Juan 16:11 - Dupade Uruode

¹¹ Enga a ore chiraja Dupade isocade uje chajire ore adode aja quedéjnane. Chamáñaje e Dupade chajire erámi jogosórone ore eduguéjnai Satanás adode aja quigode gu enga e chimate uté qui.

Juan 16:11 Iomraidhean Croise

Génesis 3:15

A yipésu jne enga chequé, uhua uacamajo ñane. Jé cho uaté ape disi ejórique, bape disi ejórique, a ore cho damajo ome ñane to jne. A chise dínique to jne ujetiga uaté ape disi ejórique chĩro batoi ome dajadia te jne. Jé basa ga a agu uaté ape disi ejoi guídogoróraque to jne.–

Sálmos 68:18

Urénga, bacáji gaté yui ga bajna basagode bajurúgayo udore aja gaté uje bo basaguíji ore. Ga erámi unirisórone ore jnese cho doré ome ua. Jé aja udore ore uje ore tagu baruode aja, ga a ore cho doré ome ua to, uje que ore pota marínga, ujetiga o bayaridíji ore ujade, Pangarádejná, Dupade á.

Matéo 12:18

Yajegaidi u yiroi uté. Yijnorai upo rĩ enga yirasique yu ome. A yijmare Yujopié Espíritu Sánto aja uté jne. Enga chacate erámone jogosórone ore ome yadode jne.

Matéo 12:36

Jesús chojningápo rĩ iji dacajnaquéode: –Jé ũrepise yu uje yaquĩ́ra uaque, uje a chise dínique jne ujetiga pajirique uacaru noñángone aja quigode jnese jne.

Lúcas 10:18

Enga Jesús chajnai ore uruode enga chojninga: –Yiraja. Chamáñaje yimo Satanás to nanique uje basíji gatajnoquei. Gajnui u ajnorátique nanique.

Juan 12:31

Enga deréjnai e u ujetiga pajirique erámi unirisórone ore adode aja quigode jnese. Enga deréjnai jé upo rĩ ujetiga erámi unirisórone ore irósõri Satanás pijócãráque.

Juan 14:30

Mu a jé ca yiji yuruode udojo údi ome uaque. Chamáñaje erámone jogosórone ore eduguéjnai Satanás diringai e puja yui. Mu que togome uté ujetiga etotiguérique sué yibai.

Juan 16:12

Cucha amirone qué uásejna ujetiga yingome uaque, mu a ca toque iji deréjnai udé ujetiga arajáyo quigode.

Héchos 10:42

Enga chiroque yógaja erámi unirisórone iji erámi údode jnese ujetiga yacaco ore, enga yingongo ore uje Dupade ajegaidi u Jesús uté ujetiga pésu togode, uecade ore adode aja quigode jnese.

Héchos 24:25

Jecute Páblo chacate ore ome pisocade ujetiga yico yocúringárique ayoré ujñapetaque ome Dupade. Chacadápo ore rĩ ujetiga ore susípise dadode guio ome Dupade. Enga chingome ore to uje Dupade a chajire erámi unirisórone uyoque yocadode aja quigode jne. Enga Páblo acajnaquéode udore chajuque Félix aguté. Jecute chojninga: –Bo. Yangárapoi bacajnaquérigo jne rĩ ujetiga ca yisa yejórique.–

Héchos 26:18

Yiroque ua aja ore gu ujetiga acate ore ome yadode to. Chamáñaje ore gajnúone u ayoré edoparigode. Enga cho ujetiga ore déji ijnangununie ajéode. Diga ore changureta bacajnaquéode ome yu enga cho ujetiga achẽre ore edodie gáyode enga quene díreca ore ejode. Que yipota gu ujetiga Satanás jno ore údi uje sué ore gai, mu yipota ujetiga ore changureta yu enga ore doi Dupade adode to. Yipota to ujetiga yĩro ore isijnaringuéone ujetiga Dupade cháta ore aja danoningañane to jne ome dẽratígo cucha omío."

Romános 16:20

E idógosi, jõ, ujetiga pajesereringai gajnesṍri Dupade chuchiéjna Satanás uté gatoi ¡quéquese! jne iji uacajaidie údi. Yicatecãraitigade qui jé u udé ome uaque ujetiga Yocangarádejnai Jesucrísto chatapísaja uaque jnese ome dacaniratiguédatéi uté. Amén.

Romános 2:16

Iji Dupade ajegaitique dire jne enga a chuchẽri cucha dacadode jnese iji guesode. Enga Dupade angúromei tu datocaidi Jesucrı́sto jne ome udore ujetiga chajire erámi unirisórone jnese ore adode aja quigode, enga a cho ore oré jnese. Enga uté ajiritı́ga uréone udore a chuságaja páyipie pipoguiédedie jnese to jne. Jecucha yáta cuchade udojo aja yacajnaquéode ome ayoréode gatuaque, uje yacate ore ome pujnomé ueradi quigode.

1 Coríntios 4:5

Jecute ayáyobu uacajiritigade ome ñane, uje cáma deréjnai u gu. Ga yuruode qui tu jetiga arochope Yocangarádejnai Jesús diringai yui. Uje a uté u jne ujetiga chajire yoquipesudode cucha aja quigode jnese. A yipójo yocadode jeoga yocáyipiedie iji deréjnane unojo marínga, Yocangarádejnai a chijnime jne ga chicháji dírecaringuéi ayoré chojmara, chojmarane ore ipesudode dacho, jé aja ore áyipie quitígo jnese to rĩ. Enga a jé u jne ujetiga Dupade chisi ore gáyode ome date arégode. Enga ayoré chojmara, chojmarane gajnéone picotaquéo a jé chirate date arégode udore úringane pipesucho jne.

2 Coríntios 4:4

Udore ore uje que ore changureta yocacajnaquéode ga pijoque uje ore cho dadupáji Satanás iji erámone udojo. Enga Satanás uté u uje suru ore áyipiedie gai, jecute que ore chiraja yocacajnaquéode quigode ome raque. Chamáñaje Satanás ipotigádi tu ujetiga ca ore chimo dírecaringué cuchátique ome raque to. Enga ca ore chiraja yocacajnaquéode úringai ueradéjnapíso uje yacaco ore ome Crísto ingoningájnai. Chamáñaje yocojñane gajnengóri Crísto u uje dayé Dupade chopise re iji nanique ome yoque iji erámi tudé.

Efésios 2:2

¡Jé cho ujetiga uacaquecáyo jóroque jõ, chamáñaje que toc ujetiga uacáyipieraque cunguésõri Dupade atique gu! Ga uacajmapié uaté jé chopísome uacojode ayoré amirone udore jnese uje ore chedu dáringane jnutiminóño adode. ¡Irágupúsu uacajéode jnese ome pisijnaringuéone, páyipie gajnarénguenie ore iji deréjnane udore nanique! Enga gose uje pujopié noñánguenie ore asuté cuchábejna upúsu uje jecucha uacangáchoi to nanique. Ga yuruode qui tupúsu Satanás uté. Uté u uje jecucha diguiji gaté yui gatuaque, enga chijocase udore ore áyipiedie jnese uje ore tagu Dupade uruode aja ome dáringane angoninguite paricho.

Colosénses 2:15

Enga uje Crísto toji curesei gai nanique enga sué Satanás, irógode ore gáyode jnese. Uje chiese pangarádejna ore iji erámone unojo. Enga gajnui tu ujetiga Crísto isaque ore enga jno ore údi ujetiga chingo ore aja darasade. Gaidi u gu ujetiga urasade ore chimo udore ore uje pujnuéngai ore enga que qué ore bisitique pijoque ome cucha dacatique yui.

Hebréos 2:14

Adi u uje disírique a quene base enga erámi e unirísõre to. Jesús isocai jé u to nanique. Uje uté basíji chequé ayoré nanique jecute nóña ga erámi unirísõre to. Gaidi tu gu ujetiga cho daba dojode erámi unirísoño ore isijnaringuéone. Enga u to ujetiga chejnápise Satanás, uje Satanás u gu uje ujopié cuse ujetiga chisi ome pitoringai ome ore.

Hebréos 6:2

Jé upo pacajnaquéode rĩ ome yodi uje ore tṍra ore aja. Jé upo rĩ pacajnaquéode rĩ ujetiga ore catecã́ri Dupade enga ore chicha dajmanáyone aja Dupade anguresónique úringáringo piringarangápo rĩ. Jé upo pacajnaquéode ome Dupade ujuyaqué cuchábi yui rĩ.

Hebréos 9:27

Adi jé u uje yitogoi enga chojmára to. Enga quigade u uje pajirique yocadode aja quigode enga pipesute yoquiquigode rĩ.

2 Pédro 3:7

Enga Dupade e pésu dáyipiedie ome yoquiyaridi jnupe udé, jé aja yocajiri tuté gatajnoqué. Ujetiga doi daruode quigode enga pioi a tagu erámi, jé aja gatajnoquei jne. Enga a cucha dacadode udore tocade jne ujetiga e chise diri ujetiga Dupade chajire erámi unirisórone ore adode aja quigode. Enga jogadi a u uté to ujetiga pujuyápise sijnángone ore jnese jne.

1 Juan 3:8

Mu uje gosi pésu pisijnaringuéone enga uté gosi ajnai tu Satanás. Uje pisijnaringuéone ipesungore Satanás jé iji erámone taningane. Mu Dupade Abi di gu unojo ujetiga chinoningase Satanás ipesute gajnaréngone iji erámone unojo.

Apocalípsis 1:7

¡Adójnachopísa yuruode! Uje Crísto a di jne, enga gue abujáraque oidája jnumi jne. Enga a ore chimo Crísto uté jne aja jnumi, jé aja udore ore to uje ore ichajuque nanique iji curesei gai. Enga a erámi unirisórone ore jnese iji dedáyode a ore popise jnese jne ujetiga ore chimo. Jé ũrepise yu ome cuchade unojo, enga a tocade jne enga a jé upúsu yuruode unojo quigode jne. Amén.