Juan 15:5 - Dupade Uruode

⁵ Uacarajáyo uje yajnua tu ore acai ero. Jé basa uacajnúone u jmanecade. Ujetiga jé yoquijogate yóguiji ñane enga jogadi u ujetiga uacárigui uásejnai. Uacarajáyo gu uje que cuchárique togome uaque ujetiga ca átayo uágaja yu.

Juan 15:5 Iomraidhean Croise

Provérbios 11:30

Uje ayoré ate arégode ore chacate dojode ayoréo enga cho ujetiga ore chṹra cucha a taja dojode ayoré ga ore tagu ga cho jetiga ore poté tuaté imanique ore aja pucuecaringuei. Enga uté gosi ujetiga pésu Dupade uruode unéningai ome dojode ayoréo enga áyipierãi tu uté gosi.

Matéo 13:21

Mu ore cho cucha pacadie uje garósi erode. Jecute uje pequetingaquéode chise ore jeoga ore cho daba danguretigai iji Dupade uruode enga jogadi u uje jĩraque ore anguretigai chicai jnumi yui ome Dupade. Enga que ore jno dáringai Dupade anguresõre údi gotique.

Juan 12:24

Mu jé ũré yu uje a yitoi bajaque. Enga yajnua a u arroz quedéjnai ajñua. Uacamóño ujetiga ca pijóchõre cucha ajñua enga aode basíji gai enga a ca sué jne. Mu cucha ajñua chojmara iji deréjnane. Jé basa ga ujetiga pijóchõro cucha ajñunie enga jogadi u uje ore aode tarata jnumone, mu jogadi upo rĩ uje ajñugaté iji ajei sué. Quérã enga jiei adie.

Juan 15:16

Que uacajegaite yu nanique mu uyu u uje yajegaite uaque. Enga yiroque uágaja erámi ujetiga amácho ayoré uásejnane aja yu. Enga uacamaningone udore a jogate jne iji deréjnane jnese. Enga uacadie u uacamaningone udore cucha. Enga Yai a chisi ome uacataidode cucha jnese ome uaque gu uacanguretigai iji yu.

Juan 5:19

Enga Jesús chojningame ore: –Jé ũré yu uje yojninga: que togome Dupade Ujnacari uyu ujetiga yiji yajénique quitique. Mu yedu Yai ajéode. Enga cuchade jnese uje Yapade pésu, adi jé upo ome Ujnacari uyu rĩ ujetiga yipésu cuchade to.

Juan 9:33

Ujetiga jnani uté ca garani u Dupade enga a ca pesurásu cucha pitijabátique.–

Héchos 4:12

Enga que piquetangore uñeque cuse. Gusu uté. Uje Dupade ojningai chojmára iji erámi unirisórone jnese ujetiga chiqueta ore. Enga Jesús uté u.–

Romános 12:5

Ga adi jé u uté to ome Jesucrísto anguresórone uyoque. Uje jiei yoque marínga, yocaoi chojmarápisiji jnumi gu uje Dupade cháta yógaja Crísto jnese. Enga jé u to uje Jesús anguresõre chojmara, chojmarane ore jnese jé gajnengápo dojode Jesús anguresõre chojmara, chojmarane ore jnese rĩ, ujetiga yagutíyangome ñane.

Romános 6:22

¡Mu e cuchade chécãre re ome uaque! E uacagúsoji uacáringane piraméo ome pisijnaringuéone isagode, enga uacarósõri tupúsu Dupade iji de. Enga e pijoque uje uacagutíñañome uacáringane Dupade isacho uté. Chamáñaje uacáringane Dupade gajneque uté iborátajai tu pate arégode ujetiga ajneráño údi gatuaque iji uacacuecaringuei udé, uje uaqueduyo Dupade gu. Enga que gusu uté, mu uacaquique obiréjnai tupo pucuecaringué eyúgojmai rĩ iji Dupade gari jne.

Romános 7:4

Enga uacadi uté jé cunguésõri casamiénto isocai uté to, yujode Jesús anguresóño uaque á. Uje uacajóyo uágaja Moisés urusarane cucha puyácho quigode nanique, mu e pejñuque Moisés urusarane isapídode iji uaque, jecute que amechópo uáguiji udore rĩ. Chamáñaje uacajnúone u ayoré togode ome Moisés urusarane udore, uje uacapatíoraño Crísto uje pajópi uté aja curesei gai nanique. Enga pijoque uje e que Moisés urusarane udore etotiguei cusapome ayoré togode rĩ, jecute e que etotiguei cusapome uaque rĩ. Jé qui tupúsu uje Dupade chejñu Moisés urusarane isapídode iji uaque ujetiga átayo uágaja uñeque ome uté úringai uacajnesõre. Enga yojningai uacajnesõre uté u Crísto, uje uté e piringarangápo iji dáringai toque quigade rĩ. Gaidi tu gu ujetiga yocadie cuse enga cucha arégode tṍraji yoque ome Dupade.

1 Coríntios 10:16

Uje yójigo Jesús iyoi gajnui cucha otate enga yacãco Dupade gai ome Jesús átegoningáne ome yoque. Enga Dupade anguresórone uyoque yocáyipiedie chojmára iji jnumi jnese uje yujnusinángo Jesucrísto itoringai uje uté chojne ome dayoi ome yoque nanique. Jé basa uje yajujo arurei enga yajo, enga yocáyipiedie déji Jesucrísto aoi to jnese uje chejnáreque re ome yoque to nanique.

1 Coríntios 12:12

Crísto chacãra danguresórone uyoque aja dabai. Yirajágo uje ayorérique chojmára marínga, uté adode uásejna. Jé cho Crísto anguresórone uyoque. Uásejna yoque mu jé yitojmárango iji yocanguretigai ome Crísto, enga yocajnui u ayoré chojmarai iji jnumi.

1 Coríntios 12:27

Jecute Jesucrísto anguresórone uyoque yitojmárango to. Enga yoco pibai adode uje uásejna marínga, ore cháta rágaja ñane iji pibai chojmarai.

2 Coríntios 13:8

Ujetiga ũré cuchárique enga que toc ujetiga pumuchayaque. Jé basa enga pocojña omone gãrapié u cucha ũré tuté ujetiga pangurete ome uñane to.

2 Coríntios 9:10

Yirajágo uje Dupade gueranei cucha ajñunie ujetiga pacai, enga gueranápo cucha pibosode rĩ. Enga a uté u jne ujetiga chisi ome cuchade udore ome uaque gatuaque. Gaidi u gu ujetiga ajnerañome uacojode ayoréo gatuaque to. Enga quigade ga uacátegoningáne jiépisi iji erámi.

Gálatas 5:22

Mu uje Dupade Ujopié Espíritu Sánto chinoningase gosi ga e pijnoraquei déji, pirasitigai dépoji rĩ, pajesereringai déji, ga chidota re ome cuchade, irasique dojode ayoréo, osõrataque rĩ. Que potigayaquérique déji urúrique rĩ.

Efésios 5:9

(Adójnachopísa ujetiga ayoréode ore déji dírecaringuéi ajei, enga chiborátarásaja ujetiga cucha ueradode, cucha uréone, cucha ujñapetade udore jnese choqui guesi iji ore adode gatuaque.)

Filipénses 1:11

Yigaidi tupo rĩ ujetiga uacajnua tu poria uje adie jiépisi. Yojninganie ai u uacátegoningáne uje udore garani u uacaríjogosṍri Jesucrísto. Chamáñaje yocátegoningáne u uje pésu ga Dupade ingoningájnai pijógome erámi enga diga picotaque Dupade gu ome udore.

Filipénses 4:13

Enga que cuchárique piragome yu, uje Jesucrísto jecucha chisi ome petotiguei ome yu gu ome yajnéone cucha dacacho jnese.

Filipénses 4:17

Que yáyipie déji gotique ujetiga pisi yu iji, mu yáyipie déji uaque ujetiga ejnáño uágaja uacacaniratiguéode. Yiraja uje Dupade a cho uacoré jne ome uaqueranone udore gu.

Colosénses 1:10

Ujetiga cuchade udore chise uaque enga a u jne ujetiga ajuso uaqueo enga a apijócho jne ome uacáringane Yocangarádejnai anguresõre. Enga a apéso ajegaidode cucha gatuaque jne. Enga a uacajnimique cucha omone jnese jne aja guesi ome uacadode udore. Enga arajayopise Dupade adode gaté to jne rĩ.

Colosénses 1:6

Uje uacadúcho pacaditigade nanique ome Dupade ijnoraquei ome uaque, enga jĩraque uacanguretáyo. Uje uacarajáyo gu uje jé ũrepise pacaditigade udore. Enga uacadudigode Dupade urúo udore e chubu erámone jnese, enga e uásejnapise erámi jogosórone ore uje ore changureta Dupade uruode unojo to.

Santiágo 1:17

Chamáñaje cucha arégode, cucha ujñapetade ore jnese ore garani u gaté ome yoque. Enga cuchade udore jnese guẽrasṍri u Dupade uje ipesute dírecaringuéone jnese iji gaté yui. Enga Dupade idírecaringuéi jogate ome yoque. Uje que checãripise dasocárique iji deréjnane jnese ome yoque. Upo rĩ uje que juégapo ijnangununie ome yoque to rĩ.

1 Pédro 2:4

Átayo uágaja Yocangarádejnai Jesucrísto. Uje Yocangarádejnai gajnua tu cucarané uje ueca. Mu jnanione ore chetaque enga ore tṍra. Jé basa Dupade chisa dajegaidé cucarané uaté. Chiraja gu úringa orerẽ́.

2 Pédro 3:18

Yajéode u ome uaque ujetiga arajáyo gaté Yocangarádejnai, Yoquiquetangóri Jesucrísto ijnoraquédatéi ome uaque, enga aquéraño iji uté adode. ­¡Beyoi enga yicotágo Yocangarádejnai jé iji diri tudé, jé iji deréjnane jnese to! Amén.