Juan 1:51 - Dupade Uruode

⁵¹ Jesús qué jno daruode údi enga chojninga: –Jé ũrepise yu ome yuruode udojo: a amóño gatajnoquei jne uje chuchẽre dabai. A amóñopo Dupade iroque gateminórone ujetiga ore chicáji jnumi aja Dupade utocaidi uyu. Enga a amóñopo jne rĩ ujetiga ore chicapóji gaté rĩ.–

Juan 1:51 Iomraidhean Croise

Génesis 28:12

Mu urigode cuse uje mo. Ga chĩ́cara uje ore uchiejnane déji uje tṍraji jnumi enga chicáji gatajnoquei. Enga chimo uje Dupade irógode gaté unirísoño ore chuchiéjna aja jnumi yui, enga ore chuchiéjnapo aja gaté rĩ.

Matéo 25:31

Ujetiga Dupade utocaidi uyu yĩriápo rĩ enga a eduguéjna cuchape yu jne. Enga a yirógode gaté unirísoño ore chicha yu aja dajei te jne. A yiyápoji yiyaripi jne rĩ ome yúringai pojnánguejna.

Matéo 26:24

Dupade utocaidi uyu a yitoi jne uje Dupade uruode jé quicho gu. Mu iyieja Dupade ujuyaquei yui ome uté uje a tẽra yu ome yumajosórone jne. Uje a ca Dupade chajire dajuyaquérigo ome jne. Arei urásu ome nanique ujetiga ca basíji erámone unojo to.–

Matéo 3:16

Uje Jesús doi guesi tiji tié, enga gaté chuchẽre dabai. Enga uté chimo Dupade Ujopié Espíritu Sánto uje doi jnumi. Enga cho cucujnadatéode aja jnumi. Enga basája Jesús gai.

Matéo 4:11

Enga Satanás noñome Jesús iji te jmete. Enga gaté unirisórone uñane ore chise Jesús ujetiga ore chátaja.

Matéo 8:20

Jesús e chajnai uté uruode enga chojninga: –¿Ja jé ũré ua ya? Uje arapujnánguenie chiraja daguíjnane jogadode. Enga chungúperenie iguíjnane, úbiredie cusapo rĩ iji erámi. Jé basa Dupade utocaidi uyu que yiguíjnarique cusipise to go.–

Matéo 9:6

Jesús jnopo darai údi rĩ enga chojningame ore: –A qué yetingarape yu jne ome uaque, ujetiga arajáyo to uje Dupade utocaidi uyu yajnei tu ujetiga yĩro pisijnaringuéone iji erámi uné.– Jesús chejna daruode udore guesi enga jé u uje chojningame jnani noñai: –Ãriji, asa bamochápi enga bo údi aja baguíjnai.–

Márcos 1:10

Uje Jesús doi guesi iji yodi mu jĩraque chimo guéode uje ore chungare re. Ga chimo Dupade Ujopié Espíritu Sánto uje gajnui tu cucujnadatérique enga basája gai.

Márcos 14:62

Mu jé jogadi u uje Jesús chajnai uté uruode enga chojninga: –Ejẽ́, bojningai uté jé uyu. Enga diga a amóño Dupade utocaidi uyu jne ujetiga yiyáji Dupade pujnuéngaisṍri uté ãrachua. Mu a apáñañopóji yu jne rĩ ujetiga yṍraji gaté rĩ enga yijína gue abujárigui aja jnumi.–

Lúcas 2:13

Uje chejna daruode udojo guesi enga jorane Dupade iroque gateminóño ore diapóji to rĩ enga jiépisi ore. Ga ore nínapúsu raque enga ore chicota Dupade.

Lúcas 2:9

Ga ore chuniname eti Dupade utocaidode gateminore uñai chiqueta raja ore enga chijninguese ore gai. Chamáñaje Dupade ijningueñai nóna iroi aja ore gu. Enga chajuque áyasadie irodisórone agutedie enga ore todópisa.

Lúcas 22:43

Enga jé u uje jĩrique Dupade iroguipítique chiqueta raja Jesús uje garani tu gaté ujetiga tẽráma petotiguei tome.

Lúcas 22:69

Idógosi ujetiga Dupade utocaidi uyu yácariji Dupa pujnuéngaisṍri ãrachua enga a jé yijogadi u.–

Lúcas 24:4

Enga jé u uje chajuque ore agutedie. Uje que ore chimo uté atíguiji go, ga a ca ore chiraja dasocáringome raque. Mu diga ore chajire dejoi mu ore chimo jnacare gáreode iji uje ore iguidedie chijninguese te.

Lúcas 3:21

Mu iji taningai uje Juan qué déji gai uje tṍra ayorébuode aja yodi enga Jesús tibágui to ujetiga Juan tṍra aja yodi. Enga uje Jesús qué catecã́ri Dupade enga jĩrique gaté chuchẽre dabai.

Juan 1:50

Jesús chojningame uté: –Bangureta yu uje yingome ua uje yimo ua iji te iji poria uaté údi uje i tu higuéra. Mu a amópo yipesútedatérigo uñéngo jne rĩ uje sué udore gai.–

Juan 10:1

Jesús chacãra dacajnaquéode aja áyasadie pié enga chojninga: –Jé ũrepise yu uje oriechoquíode ore pijoque gu uje que ore chacája piagópisi iji áyasadie pié. Mu ore pógu re enga ore chacája uécha uñai uje íjnoque piagode iji.

Juan 10:7

Jé u uje Jesús chingome ore gaté. Enga chojninga: –Jé ũrepise yu ome udojo uje yojninga: yajnui u áyasadie pié piagoi ujetiga áyasadie chacája dabié.

Juan 13:16

Jé ũrepise yu ome yuruode uje que togome pirótique ujetiga sué darósonique gai. Enga que togápo rĩ ome putocaitique rĩ ujetiga sué datocaisṍri gai.

Juan 13:38

Jesús chajnai uruode enga chojninga: –¿Jé ũrepise ua ya ome baruode udore ujetiga ẽra ua ome yu a? Jé ũrepise yu ome yuruode udojo: ujetiga cáma adute cochagájnai agoyedie dirome, mu a otigase yu jne enga ga gadioque.–

Juan 14:12

Jé ũrepise yu ome yuruode udojo: ujetiga gosi changureta yu ga a pésu dapesudode udore cucha to ujetiga chopise yipesudode quigode. Mu a uté ipesutígo uñéngo sué yipesute bajade gáyode. Chamáñaje a yicáji Yai jogadi jne.

Juan 16:20

Jé ũrepise yu ome yuruode uje a jnusiétaque uaque enga a abóyopo yiquigade rĩ. Jé basa ga erámone jogosórone ore a ore irasique re jne. A jnusiétaque uaque múñi, uacajnusiétigade a chécãre re jne enga pininaquei a irágu uacajéode.

Juan 16:23

A ca acatecãchoi yu ome cuchade iji dirode udore mu a acatecãchoi Yai ome cuchade jne. Enga jé ũrepise yu uje Yai a chisi ome uacataidode cucha jnese ome uaque jne ujetiga ẽ́cacho uacanguretigai iji yu.

Juan 21:18

Enga Jesús jno daruode údi enga chojningame Pédro: –Jé ũré yu uje jnacare ua nanique enga bagui bajegaidedie iji baguidedie. Enga bacapóji bajegaitígo bajesúrigo erãpe rĩ. Mu ujetiga ese báringai choquíjna enga a ãrai bajmanecade iji gatéode ujetiga bamajosórone ore chimate dasocade ome ua. Enga a ore jno bádi aja dajegaitique erãpe uje que bajegaite mu.–

Juan 3:3

Jesús chajnai Nicodémo enga chojninga: –Jé ũrepise yu ome yuruode udore: ujetiga Dupade ca chinoningase gosi enga a ca togome gosi ujetiga chimo dáringárique Dupade urása. Enga gosi chise dáringárique Dupade urása enga gajnui u ujetiga quene basosi.–

Juan 3:5

Jesús chajnai Nicodémo ga chojninga: –Jé ũrepise yu ome yuruode udojo: ujetiga gosi chedu dabatiga ayorei a ca uté gosi chimo dáringárique Dupade urása jne. Mu ujetiga Dupade Ujopié chinoningase gosi enga úringai Dupade urása jogadi u.

Juan 5:19

Enga Jesús chojningame ore: –Jé ũré yu uje yojninga: que togome Dupade Ujnacari uyu ujetiga yiji yajénique quitique. Mu yedu Yai ajéode. Enga cuchade jnese uje Yapade pésu, adi jé upo ome Ujnacari uyu rĩ ujetiga yipésu cuchade to.

Juan 5:27

Dupade utocaite yu jecute yajnei tu ujetiga yajire erámi unirisórone ore adode aja quigode ujetiga yipésu ore quitígo.

Juan 6:26

Mu Jesús chajnai ore uruode enga chojninga: –Jé ũrepise yu ome yuruode: uacacueyoi yu gu ome yipesútedaté casé uje uacacho yeranone arurécho diríca enga uacãretáyo uacacadie iji diríca. Mu que arajáyo quigode gotique yipesútedatéode ome uaque.

Juan 6:32

Jesús chajnai ore uruode enga chojninga: –Jé ũrepise yu uje que Moisés u go ujetiga guẽrate arurégode udore uje tṍraji gaté ome ore nanique. Mu yai Dupade guẽracho ome ore nanique. Enga Yai e ajéode u ujetiga chisi ome arureque uñai ome uaque uje tṍraji gaté to, mu suépise arureque maná gáyode.

Juan 6:47

Jé ũrepise yu ujetiga gosi changureta yu enga pucuecaringué eyúgojmai gajnesõre gosi.

Juan 6:53

Uje Jesús chajnai ore uruode enga chojninga: –Jé ũrepise yu ome yuruode: ujetiga ca acho Dupade utocaidi uyu yibai, enga ójiyopo yiyoi rĩ enga a ca aquecáyo iji deréjnane jnese.

Juan 8:34

Jesús cho quique daruode enga chojninga: –Jé ũré yu ome yuruode. Ujetiga gosi pésu pisijnaringuéone enga pisijnaringuéone isaque gosi.

Juan 8:51

Jesús jno daruode údi enga chojninga: –Gosi ujetiga doi yacajnaquéode quigode enga a ca gosi chimo pitoringai ome re iji deréjnane jnese.–

Juan 8:58

Jesús chajnai ore uruode enga chojninga: –Jé ũrepise yu erĩ́e. Uje Abraham cáma base nanique mu jé yijogate aro nanique. Enga jé yijogate.–

Héchos 10:11

Enga Pédro chimo gaté uje chuchẽre dabai enga chimo pepeque gajnu cuchábi uje tṍraji gaté uje pigaricho erué gagájnione. Enga pepeque gajnu cuchábi uté basája iquei.

Héchos 7:56

Enga Estéban chojninga: –Cajicho to uje yimo gaté uje chuchẽre dabai. Yimópo Dupade utocaidi Jesús rĩ, enga déji Dupade ejoi tiji ãrachua.–

2 Tesalonicénses 1:7

Mu jé tiógarapísa to ujetiga Dupade chijnime uáguiji cucha gajnaréngone udore ajei uje uaquejnárechopíse uágome, enga tijode cho jnaque rĩ ome uaque. Que gusu uaque mu uyoque u to. Mu cuchade udore jogadi u jne ujetiga Yocangarádejnai tṍraji gaté ome yoque. Chamáñaje a uté jõrai u pioque ocarádejnanie aja jnumi te rĩ. Enga iroque ujopíerane a nóna to aja jnumi te jne.

2 Tesalonicénses 1:9

Unojo a ore gajnei pujuyaqué ca eruénique cusapo jne rĩ iji deréjnane jnese. Enga Dupade a tṍra udore ore jne enga a ca chimópo ore jne rĩ ome denomitique. Enga a ca ore chimo Yocangarádejnai úringárique cuchadaté, ingoningájnai ore ome raque to jne.

1 Timotéo 3:16

Jé ũrepise yu uje cuchadatei u Dupade adode ome erámi unirisórone uyoque uje yanguretágo. Mu que pirajaque udore quigode ome ore jnese go. Mu quiguipísi tu unojo: Dupade pésu re enga ayoré to nanique enga chingo raja erámi unirisórone. Ujopié Espíritu Sánto chajo raja uje ũrepise uté. Dupade irógode gaté unirísoño ore chimópise adode to nanique. Ujnomei chubu erámi enga erámi unirisórone iji erámi údode ore changureta. Mu diga poite uté aja gatajnoquei enga e pijógapo cutejmai ingoningájna rĩ.

Hebréos 1:14

Pimojma Dupade irógode gaté unirísoño jnese, enga que ayoré ore gotique. Mu Dupade utocaidode u ore ujetiga ore chátaja iquetade ayoréo. Yojningane u udore ore jnese uje ore gajmaque panguretigai ome Jesucrísto to.

Júdas 1:14

Jnani bajai Adán ujnacare bajade ore quigaminore gatéode 6 iji Adán, Enoc ore ujade nanique. Enga Enoc uté chatata Dupade uruode quigode ome ore nanique ga uruode ojningane u jnani urupatáquechoquíode udore ore jnese. Enga Enoc chimo denominone to nanique ga chatata quigode enga chojninga: "Yimo Yocangarádejnai enga tṍraji guéode, enga nóna darása gateminórone ore enga uásejnapise ore.

Apocalípsis 19:11

Cucha dacadode unojo quigade enga yimo guéode uje chuchẽre dabai. Enga burica póroroi tṍraji. Enga charipísõri i u Uru Ũrei, uje eduguéjna uté. Enga chirodipise darasade. Enga que pésu pocaningárique bisideque rĩ.

Apocalípsis 4:1

Iji unojo quigade enga yajire gaté. Enga yimo piago uñai uje guesája iji gaté. Enga dara bajade catecãrápoi yu rĩ uje cho pubuchugode jocarane. Enga chojningame yu: –Boji ti á, enga oru yu. Enga a yingo cucha piqueminórone ome ua jne uje udore a tocade jne iji cucha bajade udore quigade.–