Juan 1:1 - Dupade Uruode

¹ Uje cáma pipesute erámi iji taningai mu Dupade áyipiedie pijogúsõri jé jogate. Enga uté déji Dupade gari nanique enga Dupade jé u uté to.

Juan 1:1 Iomraidhean Croise

Génesis 1:1

Iji taningai uje Dupade pésu cuchade iji taningai enga pésu jnumi, gaté ore jnese.

Sálmos 45:6

Urénga, Dupade á, báringai eduguéjna iji bayaripi cuchábi uté a jé ca piyaque eruénique jne iji deréjna pitade gatuaque. Docogué ũrepise tu bogué nanganatáguejna uaté, uje bapésupúsu cucha uréone quigode ome uaté.

Isaías 7:14

Ga Pangarádejnai Dupade upúsu jne ujetiga chetingare re ome uaque ga a apáñañoji uté ome úringai ũré jne: "Uje a gapu paréraque icáraque déji ajei bisideque jne. Enga a ica base jne enga diyoqui jne abi. A ore chĩ́care Emanuel aja uté jne. Enga i qui tu uje Dupade déji erámi unirisórone ore ujade to ome dáringai ayorépise."

Isaías 9:6

¡Israélgosode á, pininaquei jogadi tu ome yoque uje quene disatique basosi que iji diri tudé á! Ga Dupade guẽrate disabi suté ome yoque. Ga a uté u jne ujeta yoco yoqueduguéjna cuchábi iji uté to. Enga a ore pésu uté i ueradéjnaringo jne ga íode u udojo jne: Cucha Pitijabátedatépisi u íode uñai. Ga íode uñai tu Payuquetotigué Omone Gajnengóri. Ga íode uñai tupo Yocai Togójmai to rĩ. Ga íode uñai u Peduguéjna Cuchape uje Pajesereringai Osṍri tu uté.

Matéo 1:23

A gapu paréraque icáraque déji ajénique bisideque jne. Enga a atique cuse jne. Enga a ore chĩ́care Emanuel aja jne. Uje Emanuel uruode qui tu: Dupade déji yocari.

Lúcas 24:53

Enga jecucha ore ijója Dupade iguíjna cuchábi ujetiga ore jno daninaquei uté údi ome Dupade uje ore chicota. Amén. Qui jé upúsu.

Juan 1:14

Enga Dupade áyipiedie pijogúsõri pésu re enga cho erámi unirísõri iji re to nanique. Enga déji yocujade nanique iji erámi udé. Enga chijnorapise yoque. Enga ũrepísei arecujaidie. Yimóngo ingoningájnai. Enga cuchadaté ingoningájnai uje Dupade ape ugurui u uté gu.

Juan 1:18

Que uñeque chimo Dupade gotique. Gusu Dupade ape ugurui u uje chingo dayé aja yoque. Chamáñaje Jesús, dayé Dupade ore cháta raja ñane ome dáyipiedie gu enga que ore chiramurase ñane iji dajéode go.

Juan 1:2

Dupade garíjogosṍri uté jé jogate Dupade gari iji taningápisi.

Juan 16:28

Uacamóño uje yṍraji Yai gari nanique iji gaté ujetiga yicai erámi udé. Jecute e yiji ome erámi tudé ujetiga yicapóji Yai jogadi iji gaté rĩ.–

Juan 17:5

Jecute, Yapá, yajéode u ujetiga yugúsapóji bari enga ujetiga atire yúringai cuchape yibai. Yigaidi tu gu ujetiga yocópo ñane rĩ ome yocúringane cuchape. Ujetiga yocópise uje cáma erã́tique cuse nanique iji taningane.

Juan 20:28

Jé u uje Tomás chojningame Jesús: ¡Yangaráni tu ua, enga yidupade upo ua rĩ!

Juan 8:58

Jesús chajnai ore uruode enga chojninga: –Jé ũrepise yu erĩ́e. Uje Abraham cáma base nanique mu jé yijogate aro nanique. Enga jé yijogate.–

Romános 9:5

Israélgosode ore jé upúsu uje ore dáqui ujnomerane u Abraham, Isaac, Jacob ore, uje Dupade ajegaite ore enga cho darása iji ore. Jé ũré uje israélgosode udore cho dãrapíode iji Abraham, Isaac, Jacob cásodicáite udore ore. Mu cuchadatei tu uje israélgosode ore ijnati Crísto, Dupade Júdebei Piquetangore uté, cho dãrapíode iji israélgosode ore nanique to iji ore quicujaidie, uje chinoningase re nanique ga base ome dáringai ayoré. Ga Crísto uté jé upúsu uje úringai Dupa sué cuchade jnese gáyode, ¡enga uté gajnéone picotaquéo que eruénique cusipise iji deréjnane jnese! Amén.

Efésios 3:9

Yajnepídi jé jno dádi to ujetiga yichapísa Dupade uté áyipie pipoguiede cásidicáite aja guesáringai enga choquípisiji guesi tome ayoré ponáyone jnese, ujetiga ore chirajapise udire quigode to. Cucha pitijabade diyajmé Dupade ipoguiédedie dáyipiei udire ome yoque arĩa. Uje jé jogate aro Cuchade Jnese Ipesusṍri Dupade uté áyipie iji erámone taningárique iquénique nanique.

Filipénses 2:6

Crísto, Dupade ore adode jé upúsu ñane nanique. Mu Crísto áyipieraque que déji gotique ujetiga chopise dai Dupade ome gajnéone cucha.

Colosénses 1:15

Pibojma Dupade, mu quene pimo uje Ujnacari di iji jnumi. Uje uté jé chopise dayé Dupade ome cuchade jnese. Enga bajaguipise Ujnacari tuté ome cuchade jnese, enga u uje gajneque cuchade jnese.

Colosénses 1:17

Crísto jé jogate nanique uje cuchade qué íjnoque. Enga uté e u uje suse dapesudode cucha udore quigode guio iji deréjnane.

1 Timotéo 3:16

Jé ũrepise yu uje cuchadatei u Dupade adode ome erámi unirisórone uyoque uje yanguretágo. Mu que pirajaque udore quigode ome ore jnese go. Mu quiguipísi tu unojo: Dupade pésu re enga ayoré to nanique enga chingo raja erámi unirisórone. Ujopié Espíritu Sánto chajo raja uje ũrepise uté. Dupade irógode gaté unirísoño ore chimópise adode to nanique. Ujnomei chubu erámi enga erámi unirisórone iji erámi údode ore changureta. Mu diga poite uté aja gatajnoquei enga e pijógapo cutejmai ingoningájna rĩ.

Títo 2:13

Enga Dupade pota to ujetiga yanguretágopise ojningane cucha yúode. Cuchiyi tupúsu Dupápisi Piquetangóri Jesucrísto diringai ujetiga ca yiyágo yocangoroné ome yui. Chamáñaje di gojni jne enga pininaqué diringai tuté ome yoque.

Hebréos 13:8

Jesucrísto que chécãre datique gotique iji deréjnane enga isoca bajade jé cho isoca ejode iji deréjnane unojo, enga a jé chopo dirome to rĩ.

Hebréos 7:3

Mu que pijoque Melquisedec datéraque, danique, dáquirigo ore nanique. Que pirajagápo batigárique dire nanique rĩ. Que pirajagápo isocárique rĩ ujetiga toi. Jecute Jesús, Dupade Abi, gajnui u Melquisedec enga úringai pangarate jé jogate iji deréjnane ujetiga catecã́ri Dupade ome ore.

2 Pédro 1:1

Simón Pédro uyu uje yiji Jesucrísto iroquéode. Enga Jesucrísto iroguipísode apóstol uñai u yu to uje chiroque yu aja erámi to. Yurusarane gajnengórone u uaque uje uacoyo yoque, enga e uaqueso uacanguretíga orerãi ome Dupade to. Chamáñaje Dupa áyipieranguipísi u Yoquiquetasṍri Jesucrísto uje guẽrate yocanguretigai ome yoque.

1 Juan 5:20

Yirajagópo rĩ uje Dupade Abi e di nanique ujetiga chuchẽre yocáyipiedie edodie gáyode ujetiga yirajágo Dupápisi to. Jecute e yátago yógaja Dupápisi Abi uje i tu Jesucrísto enga yicoi uté adode. Uje Dupa ũrepísi tu uté. Enga uté guerani u pucuecaringuei ome yoque ujetiga yiquecágoji deréjnane jnese.

1 Juan 5:7

Unojo pijogúsorone cucha gadioque iji gatajnoquei to. Yocai Dupade jé u uñai. Jé Dupade Uruode u uñane. Ujopié Espíritu Sánto upo to rĩ. Enga unojo ore uruode jé chojmára.

Apocalípsis 1:11

Enga yicatecãraisṍri chojningame yu: –Yajnua tu purusãra bajé uje i u A. Enga yajnua jé upo purusãra eruemito rĩ uje i tu Z. Chamáñaje bajaque yu gu iji erámi taningane nanique. Enga a erámone íjnongapo jne rĩ, mu jé yijogate jne. Jecute arúsãre bamone cucha enga aroque barusarane aja puáguedie udire uje Dupade cho da-iglésia iji ore, iji ore idai garitíode uje déji puniri Ásia uté. Guidáidatéode udore ore íode u: Éfeso, Esmírna, Pérgamo, Tiatíra, Sárdis, Filadélfia, Laodicéa ore.–

Apocalípsis 1:17

Mu uje yimo uté enga jĩraque yicṍraja jnumi iji iquei. Enga yo togode iji jnumi. Mu uté doi yu, enga chicha dajmanai ãrachua aja yibai. Enga catecã́ri yu enga chojningame yu: –Jé ca atodo yu go. Bamo uje bajaque yu iji taningane nanique uje cuchade qué íjnoque. E mu a erámone íjnongapo jne rĩ, mu a jé yijogate jne.

Apocalípsis 1:2

Enga Juan uyu u uje yatata gojña uréone udore jnese uje yimópiso to ome yedodie. Chamáñaje gojña uréone udore garani tupúsu Jesucrísto ome yu gu, enga gojña uréone udore garani tupúsu Dupade ome Jesucrísto to.

Apocalípsis 1:8

Pujnuéngaisṍri u Yocangarádejnai ome cuchade jnese. Jé jogate gu nanique iji erámi taningane, jé aja deréjnane unojo, enga a jé upo jne rĩ ujetiga diapo iji yoque rĩ iji jnumi iji dire piqueminórone. Enga uté chingo dadode ome yoque enga chojninga: "Yajnua tu purusãra bajé uje i tu A. Enga yajnua tupo rĩ purusãra eruemito uje i tu Z. Uje bajaque yu ome cuchade jnese gu. Enga a jé yijogadápo jne rĩ iji erámi eruei iquéode."

Apocalípsis 19:13

Enga diquiyojna cho cheme aja uté iguidé gáyode. Enga uté ípisi tu Dupade Uruode.

Apocalípsis 2:8

Enga Jesús chojningápome yu rĩ: –Arúsãrape yuruode ome Dupade anguresórone angaráni to uje déji ore idai Esmírna enga ósi te: "Uacacatecãraisṍri tupúsu uyu uje bajaque yu ome cuchade jnese, enga ejo yu rĩ ome cuchade jnese. Uje yitoi nanique, mu yiquecápo rĩ.

Apocalípsis 21:6

Unojo quigade enga chojningame yu: –E yimate cuchade jnese. Yajnua tu purusãra bajé uje i tu A, jé basa yajnua tupo purusãra ejópise uje i tu Z. Chamáñaje bajaque yu ome cuchade jnese, mu uje cuchade udore chise deruéode mu jé yijogate. Jecute uté gosi uje cajnóriji, enga a yisi ome yote uecai tome uté jne uje tṍraji sibíjnai iji gaté enga bisideque yerani yote tome uté gosi.

Apocalípsis 22:13

Bajaque yu ome erámi nanique. Enga a erámi íjnongapo jne rĩ mu a jé yijogate jne. Enga yajnua tu purusãra bajé uje i tu A. Enga yajnua tupo purusãra eruemito te rĩ uje i tu Z.–

Apocalípsis 3:14

Enga Jesús chojningápome yu rĩ: –Arúsãrape yuruode ome Dupade anguresórone ore angaráni uje déji Laodicéa enga ósi te: "Ũrepise uacacatecãraisṍri uyu. Enga uyu u uje yatatapísa Dupade uru uréone nanique ome ore. Enga Dupade angúromei upo yu rĩ nanique ome dapesudode cucha jnese iji erámi taningane.