Éxodo 7:4 - Dupade Uruode

⁴ Ujeta Faraón jé ca juéga doi ome uaque jne marínga, jé ca oyo uacáyugu uágome uté gãrétigaringo jne uje a uyu u jne gu jeta yicha yiyiejnáringuejnái aja puniri Egípto tudé údode jnese ome yúringai pirosobádodedaté ome cucha ponai, ga a uyu u jne rĩ jeta yiroque uágaja uacajesui uté jne. A yeranone u páyuguhebátigadatéode jne ome egíptogosode udore ore iji ore uniri tudé uje que cachi yẽrapáicho ome ore gu uje ore pésu yurasade Israel ujnacare disi ejo uacajurédatédie ga jé basa ga udore chajni ore gai iji daniri tudé údode dirome. Ujeta yejna yujuyaquérigo aja guesi jne ome egíptogosode ore ga a yojningame Israel ujnacare disi ejode uaque: "Boyo jne enga apéso uacajochatígo aja uacajesui gajneri ga boyo jnese jne enga atiróchoja uacajesúrique jne ga a yopise yurása iji uaque jne aja uacajesúrigo erámio jne."

Éxodo 7:4 Iomraidhean Croise

Éxodo 10:1

Pangarádejnai Dupade chojningame Moisés: –Bo ga abáchoi Faraón ore gajneri, ga acatecãchoi ore jne. Ga jé ca oyo uacáyugu ore úringane ducusuréchoquío jne uje uacarajáyo uje yẽrate ore úringane ducusuréo ome ore. Yigaidi jé u ome ore jeta yo yujuñame ore ga ore chimo yúringai ujopíerãque cuchape ome yátedatéode.

Éxodo 11:9

Ga Dupade chojningame Moisés: –Yiraja uje Faraón a ca tangári uacaru quitígo jne, enga adójnachopísa jne uje a jé cachodi upome yujuyaquéringome egíptogosode ore jne rĩ.–

Éxodo 12:51

Ga diri uté u nanique uje Dupade chijnime Israel ájnape disi ejode nanique iji Egípto, enga ore cãra dáguedie ome ñane aja dajei ga ore jochade chicáji ¡tiiiiii! nanique.

Éxodo 13:3

Udojo quigade ga Moisés catecã́ri darasade ore ga chojningame ore: "Diri tudé uje uacaboyo iji egíptogosode ore uniri, ga oyo uacajnusinamáni dire iji uté jne. Chamáñaje e diyajmanguipise uje uaquejnárecho egíptogosode ore josipiedie uje ore chiroque uágaja daroquéode bisideque. Mu Dupade e chingo cutejma dajopié iyiejna aja egíptogosode ore iji diri tudé ga e chijna uáguiji ore gari. Jecute jetiga ajnusináño diri udé jne ga jé ca acho arurégode iji ujeta bisidi déji.

Éxodo 13:9

A ojnichome uacabode ore jne: 'Yocujnusinamánone díño udore gajnúone u ore urusarane Dupade urúo uje jnanione uñane ore chigaru aja denochade, jeoga ore jmanecade, uje ore gaidi tu gu ujetiga Dupade uruode udore ca jnoji ore ajénique. Mu uyoque ga yipéco yocujnusinamánone díño udore enga yocáyipiedie déji Dupade uruode úringane patatacho, ga jé u uje yacaco ñane ome quigode. Chamáñaje Dupade u gu uje chijna detotiguejnai ome egíptogosode ore nanique uje chijnime yóguiji ore jmainie, ga jé tiógara ujetiga yicoi ojningane cucha jnese.

Éxodo 18:8

Ga Moisés iyoquíjnai ore chácariji uté ga jé u uje Moisés cho dojñame dayoquíjnai ga chatata Dupade átedatéode ome ore iji datã, jé aja uje ore jnoji Egípto nanique. Jé upome Faraón josipiedie ome ore uje Dupade cho dajuñame Faraón uté, urasade ore ga gose úringai ducusuréchoquí ome cucha ponai jnese. Chatatapo ore isocade to rĩ uje ore déji erãpetarei ajei enga Dupade guẽrate cuchade ome ore uje chona ore, ga jecucha chingo dáringai cuchape aja ore uje jecucha chiqueta udore iji ore jnuéngaisórone cucha jmainie.

Éxodo 3:19

Dupade chojningame Moisés: –Yiraja arĩa uje a Faraón uté chãraque doi ome uaque jne. Mu a boyo jne gu uje yucuayaque uágaja uacajesui uté jne. Uje a yejna yu aja guesi ome Faraón uté jne jeta juéga doi tome uaque.

Éxodo 3:20

Ujetiga cáma boyo ga a yingongara yúringai ujopíerãque cuchape aja egíptogosode udore ore jne. Ga a yisi ome dequejnareque cuchátigo ome ore jne jeta chequésãre ore. Ga a Faraón chimo dequejnaréngone udore jne enga jé u uje juéga doi ome uaque.

Éxodo 6:1

Mu Dupade chojningame Moisés: –A amo jne jeta yijna yujopié ome Faraón uté. Uje a yucuase Faraón uté aja ti yui jne, enga guesája dajei ome uaque jne. Que gusu udore mu a yipésu ga Faraón jé upúsu jne jeta chiroque uágaja doi.–

Éxodo 6:26

Yojningane udojo jnani bajaque jnupabejna jé ore ape disi ejode upúsu Moisés, Aarón ore uje Dupade utocaite ore nanique jeta ore chijna Israel ujnacare disi ejode iji egíptogosode ore gari. Ga Moisés, Aarón udore ore chojningame darasade ore nanique: "Jetiga yico gajneri enga uaque gosode daníngo gãrapi u yocáquirique Rubén nanique ga apéso uacajochai ga eduyo uáguiji jne. Jé basa ga gosode daníngo gãrapi u ujoi yocáqui Simeón, jeoga yocáqui uñeque uje Jacob ujnacáño ore, enga angaráñopo uacajochatique jne rĩ. Ga a yico gajneri enga yoquipopégaja yocajesúrique gajneri jeta yicoji Egípto udé ga angaráño uacajochatígo jnese aja yocajesúrique uje jé Pangarádejna Dupa Eyúgojmai urúo udojo gu ome yoque."

Éxodo 6:6

Ga Dupade chojningame Moisés: –Bo ga ajnerame yuruode ome bojode Israel ujnacare disi ejo ore jne ga ojningame ore: "Dupa Eyúgojmai a chibéro uacajnéone egíptogosode ore iroquéode udore iji uacabai jne, ga a agutíyañome uté jne jeta uacajnenie pijosipié chibéro rome uaque gu uté.– Dupade chojningame Moisés: –A yijna yujopié etotiguejnai ome egíptogosode ore dirome, ga a ore pañaji yátedatérigo ome raque jne jeta yo yujuñame ore dirome.

Éxodo 7:13

Faraón chimo udore marínga, qué cusu rome Moisés, Aarón ore ga que chajire ore yúrique enga ore jnusina uje Dupade ojninga casé jé u gu.

Éxodo 7:16

Ga ojnichome Faraón iji uté jne jeta chise uaque: 'Pangarádejna Dupa Eyúgojmai, hebréogosode yocangureni uté, utocaite yoque jeta qué yicatecãcópoi ua to rĩ iji de. Ga uruode u udojo ome uaque: Jé ca ãraque doi ome yurasade Israel ujnacare disi ejo udore ga ore catecã́ri yu iji sañeque jne iji garáijnane jne. Jecucha ore uruode udojo ome ua mu que ajuéga dórigo ome ore gatuac.

Éxodo 8:15

Uje Faraón chimo uje chiranie cho jnángome ore ga que juégapo doi tome Moisés, Aarón ore ujode Israel ujnacare disi ejo ore rĩ. U gu uje Dupade jé urúpisome Moisés ore nanique uje Dupade a guerani u pucusuréringai ome Faraón uté jne.

Éxodo 8:19

Faraón irógode udore jnani irajatácho quene ore chiraja uje Moisés que u gotique jeta pésu cuchade ome dajopiéraque, jecute ore chojningame eduguéjna cuchábi Faraón: –Quene yirajágo uje cuchade udore garani jé u Dupade ujopíerãi uje que cuchárique tṍraji yocoguedie gotique to.– Mu jé isoca uje Faraón cusu rome Moisés, enga que tangári darasade uru quigode, ga que juéga doi ome Israel ujnacare disi ejode ore. Enga jé chopise uje Pangarádejnai Dupade chingo ore ica gu.

Éxodo 9:12

Mu Dupade pésu Faraón ga cusu rome cuchade udore jnese ga que tangári Moisés ore uru quitique gotique. Ga Dupade jé uruode upúsu ica ome Moisés ore.

Provérbios 19:29

E dimane pogué paréraque ome surungúmeone. Jé chopome paójnane rĩ uje dimane ome táyipiegode guidobode jeta paquesucho ome.

Apocalípsis 15:4

Yocangarádejna, que uñeque déji ujetiga ca todo ua. Que uñeque dépoji rĩ ujetiga ca chisi babai. Gusu ua gu uje ueguipise ua ome pisijnaringuéone. Erámone jogosórone a ore chichaga dagataidie aja baquei jnese jne, enga a ore chicota ua. Uje ore chiraja gu uje jé tiógarapísa bapesudode udore jnese.

Apocalípsis 16:7

Enga yudute darai to uje tṍraji gaserani iji Dupade iguíjnai ajei uje chojninga: –Jé ũré arĩ́e, Yocangarádejná. Dupa Pujnuéngaisṍripísi tu ua, enga jé ũrepise ua ome bajiritigade ore jnese.–

Apocalípsis 19:2

Chamáñaje ũrepise Dupade ome ajiritigade gu, enga que cho paraque ome dapesutique cucha. Enga jé tiógara uje cho dajuñame chequé dibéchoquía uaté. Chamáñaje uaté bai u dapesute gajnarenguipísode uje chacate erámi unirisórone ome punganinga quedéjnane. Enga Dupade jnutaque to ome darógode udore uje uaté chujé ore nanique.

Juéces 2:15

Ga adi jé upome ore umajosórone to rĩ uje Dupade cháta raja ore umajosórone ome israélgosode uje israélgosode do jórogui pocaningane ome ore. Uje Dupade jé urúo ome israélgosode nanique gu iji taningai uje chisíome daru iyiejájnane ome ore, uje chojninga: 'A jecucha yijína uágaja uacajesúode jne jeta beyoi yuruode. Mu jeta ca angáchoi yu, ga a yujuéga jeta uacamajosórone sué uacabáyode to jne.' Mu chise diri nanique ga israélgosode que ore chirajápo dasocáringome re rĩ, uje que ore ujñapegápome cuchárique rĩ ga jé u uje ore agutedie cho jora, jorame dasododéringai.