Éxodo 3:2 - Dupade Uruode

² Uje Moisés chise cucarani tuté nanique ga Dupade irótique gaté unirísõre tuangóa iji te ga pioque ocaraidie déji Dupade utocaidi uté dosadode iji porabia dosadábode jnese. Moisés chajire porabia suaté uje désiji pioque ocaraidie ajei mu jé adape tiji cutejmanie udire pioque ocaráchi ajei.

Éxodo 3:2 Iomraidhean Croise

Génesis 21:17

Mu que gusu uaté uje chudute dabi agoyé, mu Dupade chudute to agoyé uaté. Mu Dupade irótique tṍraji gaté enga catecã́ri Agar aja jnumi yui enga chojninga: "Agar á, ¿jé bajnusiétigai gajnetique cucha ya? Aya atodo yui jeta babi toi. Uje Dupade chudute babi agoyé to iji charidi.

Sálmos 66:12

Ga bajuéga jeta jnanione udore ore choru dorutode udore, ga ore chuchiéjna yocatoidie aja sona. Enga yibacója piogode ajéode, jé aja tiedie ajéode, mu ome ua ga bajnime uyóguiji udore jmainie, ga bacha yógaja cucha uerate dipeséode jogadi.

Éxodo 19:18

Ore chajire cucarani Sinaí uté mu nóña ga pioque úyujnai iji jnumi uje Dupade e chiqueta raja ore iji to ga Dupade pi u pioque cuchábi aja ore uje chiqueta raja ore iji cucarani uté. Uje pioi úyujnanie popío aja gaté ga cho ejo pipota úyujna aja gaté uje popío. Cucarani uté dosadode tãrara, tãrara ga cho cocho, cochóguiji jnumi.

Éxodo 23:20

Dupade qué jnopo daruode údi ga chojninga: "A yiroque yirógode gaté unirísõre uñéngaja bei jne. A uté chajire uaquéode jne enga a cho dajéode quigome ua aja baqui tuté punire yúode. Yojningai punire uté a dimane jne iji baquei uje e yipésu cuchade aja quigode ome uaque gu.

Éxodo 24:17

Ga jé u uje Moisés urasade israélgoso ore pañaji Dupade ingoningájnai, ga cho pioque ocarate gajnunie uje tṍraji cucarani ójopise ga chachẽre gatéode iji.

Éxodo 3:16

Bo jne enga acáji Egípto jne. Amáta barasade Israel ujnié disi ejode ore daníngo iji ore ujade enga acatecã́ri ore enga ojningame ore jne: 'Uacáqui cásodicáite Abraham, Isaac, Jacob ore angureni casicaite Dupa Eyúgojmai chague yibai diríca ga chingome yu uje áyipie dépisiji uáguiji egíptogosode ore ujade uje pañaji ore josipiedie ome uaque gu.'

Daniel 3:27

Ga jé u uje eduguéjnane iji ore idáidatéi údode ore tibágui jnacarode udore ore jeta ore chajire. Ga ore chojninga jnese: "¿Jé gotique uje que pioi chijocase udore ore aode gotique?" Ga ore chojare jnacarode udore ore iguidedie mu que pioi anique chusaque gotique. Jé aja uje ore chajire jnacarode udore ore gatúode mu que pioi tagu uñeque gatui eruétique gotique. Ga ore chajirápo udore ore iguidedie to rĩ mu que pioi chujé uñeque iguidéraque gotique, enga que ore iguidedie anique mita gotique.

Malaquías 3:1

Dupa Pujnuéngaisṍri chojninga: "A yiroque yiroi aja Yiquei to jne jeta chajo dajetique iji Yiquei to. Ga jé u jeta uacajnati Pangarádejnai uyu yĩri iji uaque to. Ga yĩri ga jĩraque yacája yiguíjna cuchábi iji uacajade to. Uacajnátuyo Dupade Utocaidi jeta uté di ga pésu Dupade áyipie ejodie úringáringui ujñapetei ome uaque to, ga idógosi ujetiga uté di jne ga pésu uacáringáringo ujñapetácho to ome Dupade."

Márcos 12:26

Mu qué yo uacaquique to ome togode ore úringáringo nirijío yui. Ísega e ajicho Moisés urusarane quigode to jõ. Uje chatata uje Dupade uruode tṍraji porabia ome. Uje porabia suaté pioi ocaraidie tṍraji. Ga Moisés ududigode Dupade urúo quigode u udojo: "Cachi bayode jnani bajácho Abraham, Isaac, Jacob ore idupade u uyu iji deréjnane."

Lúcas 20:37

Moisés urusarane déji to uje cho quique pĩrijíningai iji pitoringai isocade ome yoque. Moisés urusarane udore chatata uje Dupade chiqueta raja iji porabia nanique uje pioi ocaraidie tṍraji. Enga Moisés chojninga iji darusarane: "Jnani bajade Abraham, Isaac, Jacob ore idupade chiqueta raja yu."

Juan 1:14

Enga Dupade áyipiedie pijogúsõri pésu re enga cho erámi unirísõri iji re to nanique. Enga déji yocujade nanique iji erámi udé. Enga chijnorapise yoque. Enga ũrepísei arecujaidie. Yimóngo ingoningájnai. Enga cuchadaté ingoningájnai uje Dupade ape ugurui u uté gu.

Romános 8:3

Uacamóño uje Moisés urusarane cucha puyácho chiroque uyógaja daroquéode úringane pipesucho marínga, que bisitique cuse ome yoque ujetiga pésu yoque ga yibóco quigode. Chamáñaje yoquipotigué ayoréode pésu Moisés urusarane udore iserẽrachúringai gu. Mu Dupade u uje doi dasocai ome yoque ujetiga yico yocúringane ujñapetácho, uje Moisés urusarane que chibote go. Enga jé u uje Dupade chisíome Dabi ome yoque ujetiga cho ayoré iji re ga toi iji pisijnaringuéone ipesusórone uyoque jogadi ome dáringai pẽrapaite ome Dupade. Jé ũré uje Jesús aoi cho pisijnaringuéone ipesusórone yocaoi nanique uje diguina erámi, mu ueque uté ome pisijnaringuéone úringane pipesucho jnese nanique. Enga uje Jesús toi ga chijna yoquisijnaringuéone jnese aja re, ga Dupade cho dajuñame Dajnacari uté iji yoquiyaridi. Adi jé u uté uje Dupade chinoningase pisijnaringuéone etotiguei ome uyoque, jeta jé ca chijocásapo yoque rĩ.

2 Tesalonicénses 1:7

Mu jé tiógarapísa to ujetiga Dupade chijnime uáguiji cucha gajnaréngone udore ajei uje uaquejnárechopíse uágome, enga tijode cho jnaque rĩ ome uaque. Que gusu uaque mu uyoque u to. Mu cuchade udore jogadi u jne ujetiga Yocangarádejnai tṍraji gaté ome yoque. Chamáñaje a uté jõrai u pioque ocarádejnanie aja jnumi te rĩ. Enga iroque ujopíerane a nóna to aja jnumi te jne.

Juéces 13:13

Ga Dupade iroi gaté unirísõre chojningame Manóa: –Beyoi yuru qui casodé uje e yingome bacoté diríca.