Éxodo 20:2 - Dupade Uruode

² "Bangureni Dupa Eyúgojma u yu uje yijnime ua iji Egípto nanique uje ore cho daróguiji ua nanique mu que ore chimate ua ome basagode ore iroquéo nanique.

Éxodo 20:2 Iomraidhean Croise

1 Reyes 18:39

Ga ayorébui ore chichaga dacurutedie aja jnumone jnese uje ore pañaji cucha dacadode udore enga ore pijnacaraichi iji ejode. Ga ore chojninga: –¡Pangarádejnai jé u Dupapı́si uté! ¡Pangarádejnai jé u Dupapı́si uté!–

2 Reyes 17:12

A jé ca agúpurai israélgosode ore ome cuchade udojo jetiga jé ca ore pésu. Uje Pangarádejnai e chingo ore bajaque jeta jé ca ore chisi dupa quedéjnane gáyode, mu jé ore gaite dajéode ome raque nanique.

2 Reyes 17:7

Cucha dacate gajnarénguipı́sode udore tocade nanique gu uje israélgosode ore pésupúsu pisijnaringuéone ome dangureni Dupapı́si nanique. Uje Pangarádejnai jé upúsu uje ijnimique israélgosode ore iji Egı́pto uté, jé aja egı́ptogosode ore eduguéjnai Faraón josipiedie jmainie nanique. Mu israélgosode ore cho dedobóya dangureni Dupade uté, ga ore chisi dupa quedéjnane gáyode.

Sálmos 50:7

Dupade chojninga: –Yurasade uaque á, angáchoi ga a yĩrarare jne. Urénga, israélgosode uaque á, a yatata uacaba gajnéone cucha jne. Dupade u uyu, Uacadupa.

Sálmos 81:10

Pangarádejnai u uyu, Badupade uté, ga uyu u uje yijnimique uáguiji puniri Egípto uté nanique. Angare babijnani gai jeta guesápisaja, ga yĩreta ome bameserane cucha udore jne.

Sálmos 81:11

Mu yurasade que ore pota tangári yúringai dara. Enga israélgosode que ore doi yuruode gotique.

Sálmos 81:7

Babidi yu ome báyuguhebátigade ga yiqueta ua ome udore. Yichajnai ua iji yibié uaté gue abuja uje guéode uruode cho dapoguiépidi iji uaté. Ga yetingare banguretigai iji gajño uaté uje i tu Meríba.

Éxodo 13:14

Ga a chise dínique jne jeta uacabode chojningame uaque: '¿Jé gotique uje uacapéso udojo quitique e?' Ga a ojnichome ore jne: 'Uje yugúcoji Egípto nanique ga yejnárejo egíptogosode ore josipiedie nanique uje yicoi ore iroquéode bisideque nanique. Mu chise diri nanique uje Pangarádejnai Dupade chijna cutejma dajopiéjna ome ore nanique ga chijnime yóguiji ore jmainie.

Éxodo 13:3

Udojo quigade ga Moisés catecã́ri darasade ore ga chojningame ore: "Diri tudé uje uacaboyo iji egíptogosode ore uniri, ga oyo uacajnusinamáni dire iji uté jne. Chamáñaje e diyajmanguipise uje uaquejnárecho egíptogosode ore josipiedie uje ore chiroque uágaja daroquéode bisideque. Mu Dupade e chingo cutejma dajopié iyiejna aja egíptogosode ore iji diri tudé ga e chijna uáguiji ore gari. Jecute jetiga ajnusináño diri udé jne ga jé ca acho arurégode iji ujeta bisidi déji.

Éxodo 15:13

Mu bẽra bajnoraquei ome barasade uyoque diríca ga yapíco gu ua diríca. Ga cutejmai betotigué u diríca to uje borei barasade uyóguiji baguíjna pirosobádi yui iji bojningai tuté punire uerate.

Éxodo 15:16

Urénga, Pangarádejná, jé be ga apésu udore ore ga ore dosóñime yoque dirome, ga jé dóji ga ore cho ta-ta-ta ome darosobádode udore pujnoméo yúode. Ujeta ajé bajmainie aja cananéogosode ore gai dirome, ga cho cucha iménurique iji udore ore gai dirome, ga que uñeque chicai ti, enga a barasade uyoque yaroco yógaja udore ore idai dirome, mu jeta jé ca ore chunina yógaja déchai. Ga uyoque u gu uje bapesute yocúringane ayoré jeta o bajnéngu yoque aja yocajesúrigo erámio.

Éxodo 15:26

Enga chetingarape ore iji uté nanique jeta ore tangári, jeoga ca ore tangári. Enga catecã́ri ore iji uté ga chojningame ore: "Ujeta angachopísi yu jne enga beyopísi yuru quigode jnese jne ome cuchade, ga a jé ca amóño yujuyaquéringome uaque jne. Uacarajáyo egíptogosode uje pejóporinguéi ipesungóño ore ica, ga ore gajnéone u yujuyaquéode ica. Mu uaque, ga a ca amóño yujuyaqué casodica gajnúrique to jne ome uaque jeta beyoi yáyipiedie quigode jnese iji uacajesúrigo. Jé uyu u yu gu, jecute que yujuéga uágome dequejnarétique ga ijõre uaque gu uyu."

Éxodo 20:1

Udojo quigade ga Dupade chatata daruode udore jnese aja Moisés ga chósi tome dajúdode darúo:

Éxodo 6:6

Ga Dupade chojningame Moisés: –Bo ga ajnerame yuruode ome bojode Israel ujnacare disi ejo ore jne ga ojningame ore: "Dupa Eyúgojmai a chibéro uacajnéone egíptogosode ore iroquéode udore iji uacabai jne, ga a agutíyañome uté jne jeta uacajnenie pijosipié chibéro rome uaque gu uté.– Dupade chojningame Moisés: –A yijna yujopié etotiguejnai ome egíptogosode ore dirome, ga a ore pañaji yátedatérigo ome raque jne jeta yo yujuñame ore dirome.

Romános 10:12

Ome uruode udore uje chojninga "gosode jnese uje ore chicha danguretigai aja uté," enga e pijoque uje Dupade isocai jé chojmára ome judíode, purása quedéjnane ore jnese, ga que qué ore cãrápo rome ñane rĩ. Uje Dupa Dugai uté u Pangarádejnai ome ore jnese, enga chisíome cutejmai dacaniratigué gajnéone cucha ome ore jnese uje ore tibidi uté jeta ore chijócha uté ajei údi ome re.

Romános 3:29

Ja seca judı́ode uacuñéngo jos eti uacangaráño Dupade uté ome purása quedéjnane. Mu ¿jé ũré enga Dupade chedu judı́ode uágome dáringai Uacadupa ya? ¡Úngare! Obiréjna uje Dupapı́si u purása quedéjnane ore Udupade to.

Juéces 2:1

Enga Pangarádejnai Dupade utocaidi gaté unirísõre chise israélgosode apáringaméi Gilgal nanique ga jnoji uté ga chicáji ore idai uje i tu Boquim jetiga catecã́ri ore iji uté. Ga chósi te ome ore: "Uyu u uje yijnimique uáguiji Egípto ica ga yoite uágaja puniri tudé ica uje yingome uacai casodica ore ica uje cáma ore gajneque jnumi udé ica. Uje yingo puniri tudé aja uacayode ore ica ga yojningame ore: 'Uacajneque yuru iyiejájnane ome uaque ga que toc jetiga yuruode toja gotique.

Juéces 6:10

Ga yojningame uaque nanique: Pangarádejnai uyu, Uacangarádejnai Dupápise. E uacoyo uacaniri iji amorréogosode ore uniri, mu jé ca atodóyo ore angurenone dupa quedéjna iji ore uniri tudé.' Mu israélgosode uaque ga uacachayo yu aja ti yui ga uacoyo dupáji amorréogosode angurenone dupa quedéjna to ga uacabeyoi ore adode to.'" Dupade uruode atatasõre proféta uruode u udojo ome ore nanique.