Éxodo 13:5 - Dupade Uruode

⁵ Ujeta Dupade e chorei uáguiji derani punire jne enga ajnusináño uacacoringai iji Egípto iji uacacoringui udé guedosi Abib udé jne. Yojningai tudé punire ome uaque, uerate erámone iji. Ga cutepéode jiei iji, ga jnacarai ueradápo iji to rĩ jeta aquirájnanie tagu ga irisode jiei iji. Mu puniri tuté ga jé uacojode ayoré ore jogate uje ore íode u cananéogosode, jé aja hitítagosode, jé aja amorréogosode, jé aja hevéogosode, jé aja jebuséogosode ore to. Uje Dupade jé ichagája uaquéode nanique uje chingo uacáquiode icaite mu a quene uruode tocade ome disi ejode uaque jne.

Éxodo 13:5 Iomraidhean Croise

Génesis 26:3

Mu jé ácariji de jne ore uniri udé. Enga a jecucha yijína ua jne aja bajesúode erámio enga a yáta cuchade aja ua jne gatuaque. Bamo uje e yingo yuruode aja bai nanique, enga jé yuruode u to ome ua jeta bajnecho punirone udojo jnese iji Canaán údode jnese. A jé cho bape disi ejórigo, a ore gajnengápo to jne rĩ. Bai Abraham gajneque yuru iyiejájnane nanique enga que toc jeta ca tocade jne.

Génesis 50:24

Uje cáma José toi, mu e chapu re nanique enga jé u uje tibidi dayade ore ujetiga catecã́ri ore. Enga ore tibágui desai pijnane, enga jé u uje José catecã́ri ore enga chojningame ore: "E garósi jeta yitoi mu, a Dupade chátaja uaque jne iji yiquigáningo. A chise diri jne ujetiga Dupade chijnimápo uáguiji puniri Egípto udé to rĩ enga chichapo uágaja yocayode jnani bajácho ore gajnei casicaite jnupe rĩ uje Dupade chichagája ore yui nanique jeta ore gajneque nanique. Yojningane jnani bajácho udore u Abraham, Isaac, jé aja yocai casica Jacob ore jnese."

Éxodo 12:24

Que Dupade potapísa jeta átedatéode udore jnoji israélgosode uacáyipiedie, ga uru iyiejnane quicho udojo ome uaque jeta ajnusináño Áyasa Iyo Pãrésõri iji siqueredie jnese, ga oyo uacape ejórigo ore quigome adode udojo ome uaque jne jeta ore chidójnanga to, jé aja erámi eruénique.

Éxodo 13:10

Jecute jé ca amócho siqueréraque jne jeta chise guedosi Abib enga ajnusináño Dupade átedatéode udore gatuaque uje chijnime uáguiji egíptogosode ore gari nanique.'

Éxodo 13:11

A Dupade chicha uágaja puniri Canaán uté to jne uje chichaga aja uacáquiode ore nanique enga a quene ore ájnape disi ejode agúsoji puniri tuté jne. Mu jeta e agúsoji ga asíñome uacape urejane ome Dupade jne iji te, jé aja uacachidode cuchiso ore ape bajade to rĩ jeta Dupade gajneque ore.

Éxodo 3:17

Angopome ore rĩ uje a uyu u jne jeta yoite ore iji ore gajnenie egíptogosode josipié jmainie iji te ga jogadi u ujeta tijode chopo jnángome ore jne rĩ. Angome ore uje a yorei ore iji purása quedéjnane ore unirone to jne uje ore íode u cananéogosode, hitítagosode, amorréogosode, ferezéogosode, hevéogosode, jé aja jebuséogosode ore to. Puniri tuté u uje cutepéode piéjna ga dotíja jnumone ga cho yote bayade aja dajesúode. Ga jnacarai ueradipise to iji uté jeta gosi gachidéraque aquirájna tagu ga irisode jiépisi ga tamutája guesode ga irisode chopísome yote bayade.–

Éxodo 3:8

Jecute yi jnumi ga yajna ua aja jnumi tiji de gu jeta ajna ore iji egíptogosode jmainie jne. A yangúromei tu ua jne mu a uyu upúsu jne jeta yoite ore iji egíptogosode jmainie, ga yorei ore iji punínique jne uje uerate jnumone iji, ga cutepéode déji uté to ga gosi chuchẽre gai ga udore chayója jnumone ga chopise yote bayade aja jnumone. Ga jnacarai ueradipise iji uté to jeta gosi gachidedie tagu ga irisode chayója jnumone ga jé chopise yote bayade aja daquigode to. Mu puniri tuté unirisórone uñane jé jogate puniri tuté uje ore íode u cananéogosode nanique, jé aja hitítagosode ore to nanique, jé aja amorréogosode ore to nanique rĩ, jé aja ferezéogosode ore to nanique rĩ, jé aja hevéogosode ore to nanique rĩ, jé aja jebuséogosode ore to nanique rĩ.

Éxodo 32:13

Moisés chojningápome Dupade rĩ: –Yocangarádejná Dupade á, ajnusina baru cásodicáite ome israélgosode yocáqui cásodicáite ore to uje jecucha bango cuchade aja ore nanique: yojningane u yocáqui bajai Abraham, jé aja Isaac, jé aja Israel ore. Uje ua upúsu darai nanique uje bacatecã́ri ore nanique ome baru iyiejnane ga bojningame ore nanique: 'Jé yarecujaidie u yingoméone ome uaque uje a yipésu uacape disi ejórigo ore ga a ore gajnunie u guédodie jne ome dáringanie dipesei.' Enga bojningápome ore nanique rĩ: 'Puniri uté uje yingome uaque ica a yẽrate yojningai uté ome uacape disi ejórigo ore jne jeta ore cho daniri iji uté gatuaque iji deréjna pitade. Ga yajnui a u jnanírique jne uje chichaga dagúchade aja dajnacare urẽjai, ga que qué porichópo iji ujnacari uté gari to rĩ.'–

Éxodo 33:1

Dupade chojningame Moisés: –Boji udé ga ajína udore ore aja bajesui uje boite ore iji Egípto ica. Enga acayóji jnumi casica uje yingo uacáquiode Abraham, Isaac, Jacob ore nanique uje yojningame ore nanique: 'A uacatígo gajneque jnumi udé jne jeta ore cho daniri iji jne.'

Éxodo 34:11

Ujeta yocáyipie quitique chojmára iji jnumi jnese ome yuru iyiejájnane jne, ga a ejnáño udore guesi jne enga jogadi u jne jeta yijína uágaja yojningai tuté punire yui ga yijócãre unirisórone ore jne iji yoquiquei uje ore íode u: amorréogosode, cananéogosode, hitítagosode, ferezéogosode, hevéogosode, jebuséogosode ore.

Éxodo 6:4

Ga Dupade chojningame Moisés: –Uacáqui cásodicáite Abraham, Isaac, Jacob ore gajneque yuru quigode udojo nanique uje yojningame ore nanique: 'A yẽrapaite uacapusiétique punire ome uaque jne uje puniri tuté i tu Canaán.' Yojningai uté u uje Abraham purása quedéjna ore iji nanique mu ore cho dedáji erámi tuté nanique iji puniri uté urasade ore ujade nanique.

Éxodo 6:8

A yorei uáguiji punire ueradi jne. Ga a oyo uacaniri iji jnumi tuté enga a uacajnenguipise jne. Yojningai tuté erãpe omitíga u uje yingome uacáqui jnupabejnáringui ore nanique, Abraham, Isaac, Jacob ore nanique uje qué ore chapite to nanique. Ga ore gajnecho yuru iyiejnane udojo to nanique. Dupa Eyúgojmai tu yu uje yicatecã́ri ua iji de.–

Números 11:12

¿Ama ore dai u uyu ome bajéode to a? ¿Jeoga ore daté u uyu ga yumuña ore to ga ore chucu yijnanie to a? Enga a ca togome yu to jne ujetiga yimate ore aja punire ueradéjnai uje bangome yocayode ore to nanique.

Números 13:27

Ga ore catecã́ri Moisés ore ga ore chojninga: –Yico diríca ga yicagóji ore uniri uté to uje baroque yógaja to diríca. Jé ũrepise Dupade uruode uje yico ore uniri uté to ga garáijna ujade to enga jnacarai umarejna iji ga ijoréjnapise to. Enga ore gachidedie aquirájnai ijnanie guejnapise ome irisode to. Enga yico cutérone to ga dotigade tṍraji edodie to. Uje uacachietáyoji yocujnungone ore acacho ade to, mu jé cho ñane iji ore uniri údode jnese.

Números 14:30

Ga gusu Caleb, Josué ore to jne jeta ore chise yojningai quigode punire ueradéjna to. Ore u gu uje ore changureta yuruode. Mu uaque ga yingo punire ueradéjnai taja uaque to, mu uacáyipiedie chicai quedéjnai ome yuruode quigode to enga a ca eso yojningai punire uté to jne. Uacajneque yuru iyiejájnane to nanique mu que eso yuruode unétique ga uacadojnóchopo aja to rĩ, jecute a ca eso yojningai punire ueradéjna to.

Josué 24:11

Mu chise diri nanique uje uacaquesúyo yote quedéjnai Jordán nanique. Ga uacaquítequigája ore idai nanique uje i tu Jericó ujetiga ejnáño ore to iji uté to nanique. Ore pota charángui jóroque dedai ome uaque to nanique, mu que togome ore nanique uje Uacangarádejnai uyu yisi ome uacáringane dequejnangóño ome uaque to nanique gu. Ga purása quedéjnane uñane ore besíji ore uniri Canaán uté to nanique uje ore dopoi pocaningai ome uaque to nanique rĩ, mu jé ate nanique uje serẽrája ore iji uacajmainie ga ajnuéño ore gáyode to nanique. Yojningane u amorréogosode ore, jé aja ferezéogosode ore to rĩ, jé aja cananéogosode, jé aja hitítagosode, jé aja gergeséogosode, jé aja hevéogosode, jebuséogosode ore to. Amorréogosode ore eduguéjna cuchábode gare ore nanique, mu jé ajnuéño ore gáyode to nanique. Mu que uacuñeque chichagu uñeque ome dasṍreraque to nanique, enga que uacuñeque chichopo uñeque ome dojórigui to nanique rĩ, mu e ore chayóji uacaquei bisideque nanique. Chamáñaje yisi ome pisadodéringai ome ore urasade nanique gu, ga ore chayome uaque jnese ome cutejmai dasadodéringadaté uté to nanique.