Ester 8:1 - Dupade Uruode

¹ Iji diri uté uje ore chujé Amán iji nanique ga jé u uje ore eduguéjnai Asuéro chisi ome judíode guetésõri Amán uté iguíjnai ome eduguejẽ́ cuchabé Ester ujetiga cho daguíjnai iji to. Ga jé u uje jĩraque ore eduguéjna cuchábi tibidi Mardoquéo to. Ester quene chingome deduguéjnai uje iguiosipise Mardoquéo uté gu.

Ester 8:1 Iomraidhean Croise

Ester 1:14

Ga eduguéjna cuchábi iróquegatéode udore gare ore iji yijmanai uñai ga ore íode u udojo: Carséna u uñai, jé basa ga Setar u uñai, jé basa ga Admáta u uñai, jé basa ga Társis u uñai to rĩ, jé basa ga Méres u uñai to rĩ, jé basa ga Marséna u uñai to rĩ, jé basa ga jõrai tupo Memucán to rĩ. Enga ore déji eduguéjna cuchábi iguíjna cuchábi gatuaque to nanique ujetiga ore cháta cuchárigo aja deduguéjnai Asuéro, enga eduguéjnapise ore to ga ore urasade média-pérsiagoso ore tangaripísi ore uruode quigode to.

Ester 2:15

Mu chise diri nanique uje Mardoquéo ipesudé gapu uje i tu Ester ga gajnei dire u nanique ome eduguéjnai jeta doi iquei to gajiné. Ga Ester uaté daipísi i tu Abihail nanique, mu uje toi ga ujnacare uñai pésu abia uaté to aja gaté nanique. Ga jé u nanique uje Ester catecã́ri darodisṍri Hegai ga chojninga: "Ango bajegaidéraque ome yu iji ore iguidé ueradéjnanie enga a yigui jne ome eduguéjnai yui." Ga jé u nanique uje Hegai, iróguedie ore pésupúsu Ester ome ore eduguéjnai yui. Uje ijõrepise Ester uaté nanique, ga chaguesipise, ga Hegai iróguedie uje ore chariguéta Ester iji dirode jnese, udire ore irasépise uje ate omépise Ester gu iji ore ujade. Ga jé chopome Hegai uje irasépise adode to.

Ester 2:7

Ga Mardoquéo daquerámi ababía cusosi nanique, mu quigade ga daquerámi toi ga acoté topoi rĩ, ga ore toi jnese. Ga jé u nanique uje Mardoquéo cho dabi iji daquerámi abia iji dayé, daté ore quigade enga chimánaja gaté nanique. Ga uaté i tu Ester, jé basa ga i uñai tupo Hadása rĩ. Enga penocha goningane chejna raja nanique ga omépise. Enga que gusu enochai mu adode ueradípiso rĩ ga chaguesipise rĩ.

Ester 7:6

Enga jé u uje Ester chajire Amán enga chusẽre ga chojninga: –¡Yoquetésõri u jnani sijnai uté iji yoquejoi uté uje i tu Amán!– Ga jé u uje Amán chudute eduguejẽ́ cuchabé Ester uruode ga edodie tocade, ga chajuguipise aguté ome uruode udojo. Enga todópisa eduguéjna cuchábi Asuéro, acoté Ester ore yui.

Ester 8:7

Ga jé u uje ore eduguéjna cuchábi Asuéro cháta judío uje i tu Mardoquéo, eduguejẽ́ Ester ore aja ñane uje catecã́ri ore ga chojningame ore: –Bamo uje jé ũrepise ua uje yetaguipise Amán casé áyipiedie quigode diríca uje jmongarája judíode uaque. Ga ore chujé uté iji ipesudi ore uchiejna ójo diríca. Ga yijna ugúcha dipeséode, iguíjna cuchábi ore iji acoté gari to ga yisi ome Ester to ga cho dajnéngu jnese.

Sálmos 39:6

¡Jé ũrepise uje jnanione ore chaca ñane ome dáringane disorãque, ga ore gajnui tu purúdi uje jĩraque íjnoque! Uje gosi quejnapísi jórogome dagúcha orerãque dipeséode úringáringo chucho aja ñane gáyode, mu a uté toi to jne ga que pirajaque gosi jeta cho dajnecho iji uté imatade cucha uásejna udore iji uté gosi quigade.

Provérbios 13:22

Mu ujetiga paraque gosi ga que chuseque dabode, dájnamone ore ga jecucha chañuru ore gajnéone cucha guio ome ore jetiga ore cho dajnenguíji cuchade udore iji quigáningo ujetiga ga toi. Ujetiga ayoré ugúcharã́tique Dupade guetésonique chojningárasa: "Jé yajnei yiplátadie udire jnese," mu a torási paque ga que cho gojni dajnéngu damáta casé diríca daplátai, uje Dupade chisi ome ayoré ate arégode ore iji, iji quigade.

Provérbios 28:8

Jnani iplátarã́tique jeta ujórigo ayoré ore chutai iplátarigui jeta qué ore chijnama, mu a uté chisírasome ore mu chojninga: "Ajnáño mu a atire yibai mu a ajnungu quise jne." Uté ipesudedie dapláta unucodé dipesei, mu a Dupade chijna iji uté gari jne, enga chisi ome ayoré paraque osõratai uje chosõre ayoré jmatágode.

Lúcas 12:20

Mu a Dupade catecãrirási uté gosi ga chojningárasa: "A ca araja cuchárique jõ. A jé atoi iji de dejai ga bañera casodé bagúcha ¿jé gosi gajnenguíraso udore a?"–