Daniel 4:3 - Dupade Uruode

³ Uje cuchadaté uté ipesudode cucha ome yu. Uje cucha pimojma uté ipesudode cucha ome yu. Uje eduguéjna cuchape Dupa uté to, ga uté ujopié pijógome yoque, jé aja disi ejórigo, jé aja ore ujórigo disi ejogatéo. Ga Eduguéjna Cuchábi Dupa uté úringai eduguéjna cuchape a ca eruénique cusapo jne rĩ."

Daniel 4:3 Iomraidhean Croise

Sálmos 145:13

Báringai peduguéjna cuchape eteque eyui uje togójma; ga báringai pujnuéngaisṍre a jé chuságaja disi ejórigo ore ape ejórigo ore jnese jne. Pangarádejnai que chó daru quitique gai uje pésu udore quigode jnese, jé aja uje osõrataque ome damaningone cucha jnese.

Daniel 2:44

Iji peduguéjna ejode udojo úringane eduguéjna cuchape quigade ga Dupade uje déji gaté a chiroque peduguéjna cuchátique aja ore jne jeta jé ca uté chise deruénique. Enga que eduguéjna uñeque déji punínique jne jeta doi ga sué uté gai. A ca ayoré eduguéjna dépoji erã́tique jne rĩ ujeta Dupade ojningai uté peduguéjna cuchape gotique e di.

Daniel 7:14

Ga Jnani Jnupabejna Eyúgojma uté tẽra erámi jogosṍri uté ayoré úringai pujnuéngaisṍre ome uté, jeta chise dáringárique eduguéjna to iji erámi tudé. Ga chojninga: '¡Picotaque opejã ua jne! uje erámi unirisórone uje ore cãra daruode ome ñane marínga, a jé ore cho deduguéjnai iji ua jnese jne iji daníningo, enga a ore doi baroquérigo jnese jne. Ga báringai eduguéjna uté a jé ca chise deruénique jne, ga a ca uñeque chijnime ua iji báringai eduguéjna uté jne. Uje bamenuringuei a jé ca chise deruénique to jne gu.'

Apocalípsis 11:15

Enga Dupade iroque garitia e chubúchu dabuchui enga gaté unirisórone ore chudute pibijnacaraidie uje chojninga: –Deréjnai e di uje Yocangarádejnai Dupade, utocaidi Crísto ore gajneque punirone iji erámone jnese. Jecute erámone unirisórone udore ore jnese a ore cho dangarániji Dupade ore iji deréjnane jnese jne.

Hebréos 1:8

Mu Ujnacaripísi gajnéone urúo sué unojo gai uje chojninga: Dupade á, báringai eduguéjna cuchape que íjnoque to go iji deréjnane jnese. Eduguéjna cuchape ua enga que báyipieraque gajnarengue ome barasade gotique.

1 Timotéo 1:17

Jecute yajéode u ujetiga yicoi ga yicotágo Dupa ugurui iji deréjnane jnese ome úringai eduguéjna eyúgojma, ome úringai togójma, ome úringai pimojma, ome úringai áyipierã́quedaté rĩ. ¡Qui jé upúsu! ¡Amén!

Daniel 7:27

Ga a eduguéjna ponai iji erámi údode, jé aja ore etotiguéode a peranome Dupa Pujnuéngaisṍri urasapísode ore jne enga pijoque jne udore ore ingoningájnai iji erámi údode jnese. Ga eduguéjnapise ore, enga ore úringane eduguéjna jé ca eruénique erãpe cuse. Ga erámi unirisórone a ore chimesẽre ore jnese jne, enga a ca ore chetaque ore jne ome ore úringane peduguéjna, enga a ore doi ore ojningane cucha jnese jne iji dedáyode jnese iji erámi údode jnese.'

1 Pédro 4:11

Ujetiga ayorérique chacate ore enga omi tu ujetiga chedu Dupade uruode iji dajei. Jeoga chisa dasaque uñéngo ome Dupade enga chejna raja ome Dupade guerani etotigué. Acueyoi uacasocáringome uacapesudode cucha udore jnese ujetiga pijoque uacanguretigai iji Jesucrísto. Enga diga ore chacãre Dupade gai ome bapesudode udore. Yocajéode u gu ujetiga picotaque Dupade iji deréjnane jnese ome ujopiédaté. Amén.

Hebréos 2:4

Enga Dupade jé u to uje chetingare daruode úringane ũréo ome dajopié iji danguresórone. Jecute anguresórone udore ore urasade pañaji ore ate pitijabádode. Enga uásejna ore ipesútedatéode udore nanique. Enga Dupade pésu dáyipiedie ome danguresórone uyoque to enga chisi ome Dajopié Espíritu Sánto gueranone pirajatíga ome yoque jnese, uje yoquirajatigade udore cãra rome ñane.

Sálmos 105:27

Ga udore ore pésu Dupade ipesútedaté pitijabádode iji udore ore ujade. Ga Dupade uté itijabádode cucha pijoque ome ore iji ore uniri Cam uté údode.

Daniel 4:17

Dupade jé u uje chiroque datocaidode yógaja erámi jeta yatatago ujuyaquéode ome peduguéjna cuchábi uté jne. Dupade pésu gu jeta jnanione ore chiraja uje Dupa Eyúgojma uté jé doi dáyipie quitígome eduguéjnane ore iji erámi údode. Uje Dupade u uje ichajapite eduguéjnane aja ore úringai eduguéjna. Jé aja ayorérique, jeta ayoré poritaque marínga, Dupade ichajapite eduguéjnarique jogadi ga jé eduguéjna cuchape uté gosi. Uje a jé ca ibijoque uté iji daniri mu Dupade a ajéo ga jé ipesute úringai eduguéjna cuchap.'

Isaías 9:7

Ga eduguéjna cuchábi David ape disi ejoi u uté to. Mu David gajnei jnupe chojmára nanique, jé basa ga ájnape disi ejoi uté gajneque jnumi jnese. Enga jecucha pocaningane chise eduguéjna cuchábi David gajnei jnupe to nanique, jé basa ga que pisijnaringuérique chise ape disi ejoi uté gajnei jnupe to, ga pajesereringai déji iji deréjnane jnese. Ga que pumuchayaque uté iji úringai eduguéjna cuchape. Ga a chácariji dáqui David charipi iji deréjna pitade ome dáringai eduguéjna cuchape. Ga uté isocade ueradéjnapíso gatuaque ome darasade gatuaque, enga jé que cho dajuñame ayorérique bisideque jne. Enga uté a jno dáringai Eduguéjna Cuchape údi iji deréjna pitade jnese. Uje Dupa cuchábi ijnoraquédatéi jogadípise uté gu ga que toc jeta Dupa Pujnuéngaisṍri áyipieraque ca tocade.

Sálmos 104:24

Pangarádejná, ¿bamaningone cucha udore uatigájnai ĩ́rique? Bapésu cuchade udore jnese gu cutejmai báyuquetotiguejná. Bamaningone cucha udore chĩreta jnumi udé ome dáringane bamanicho.

Sálmos 92:5

¡Urénga, cuchadaté bamaningone udore cucha, Pangarádejná, ga báyipiedie idájapísiji guesi ome dáringanie cuchadaté!

Sálmos 86:10

¡Chamáñaje cuchadatei tu ua ga bapésu cucha pitijabádode! Dupa dugai tu ua ga que uñeque déji.

Sálmos 77:19

Bajesui uté chajna yote quedéjnai uéchai, ga bajnai dajeque chaquesu yote quedéjna cuchábode udore ore, mu que pijoque barodie iji baquigade gotique.

Sálmos 72:18

¡Urénga, pisígai Opejã Pangarádejnai Dupade uté, israélgosode udore ore angureni Dupa! Gusu uté uje pésu cucha pitijabátedatéode.

Sálmos 66:7

Ome uté ujopié iyiejna uaté, ga uté úringai eduguéjna cuchape que chise deruénique to iji deréjna pitade gatuaque. Uté edodie timíninga punirone udore aja quedéjnane. Jé ca ducusuréchoquíode dorási ga chosi ráguiji gaté ome uté.

Romános 11:33

¡Urénga, cucha pitijabátedaté Dupade isocade jnese, jõ! ¡Idájapísiji guesi uté gajnéone cucha oreránguejna! ¡Ga jé chopome uté úringai áyuquetotinguerã́que rĩ, uje cuchadatépise! ¡Irajatáguejna Dupade ga irajatigai que eruénique erãpe cuse gotique to! ¡A jé ca toguírase ujetiga gosi áyipieraque chimécãre Dupade uté áyipie quigode, jõ! ¡Ga jé chopome uté jmapiedie atígo ome yoque rĩ, uje yoquirajatigade chiságui uté jmapiedie udire isocade! Jé udore cho Dupade uruode, uje chojninga:

Daniel 2:2

Ga jé u uje ore eduguéjnai uté tibidi irajatade, daijnane ore iji daniri údode jeta uñeque chatata urigode imóringo cucha ome. Ga ore tṍraji dajñarenie jeta ore basája eduguéjnai uté iquei.