Apocalípsis 20:3 - Dupade Uruode

³ Enga Dupade iroi tuté tṍra Satanás aja ejo cuchabé ajei uje que eruénique cuse. Enga surupúsu piagoi gai ome erãto ujetiga ca uté dopoi guesi te jne rĩ. Gaidi tu gu ujetiga ca uté chãrápo erámi unirisórone rĩ jé aja sequeré mil eruei. Mu quigade enga a ore chirapome jne rĩ, enga a dépoji erámi jne rĩ iji dire garósirigo.

Apocalípsis 20:3 Iomraidhean Croise

Sálmos 90:4

Chamáñaje mil años iji benominone cho dire chojmarápitique uje e diríca, jeoga cho guedé batiga garósirigo iji dejátique.

Daniel 6:17

Uje ore na Daniel aja caratedie gari iji ejopié ga ore doi cucarané ga ore suru Daniel jogapié uaté ejopié piagoi ome cucarané uaté. Ga eduguéjna cuchábi ujode eduguéjna ore chanire odobe aja Daniel pié uaté ejopié joride uje pérsiagosode, médiagosode ore uniri i déji uaté uje ore áyipiedie jé chojmára ome dáyipiedie quigode diríca gu. Ga eduguéjna cuchábi chanire dajnépise odobe aja Daniel pié uaté ejo joride te rĩ ga imoi u uje que pucherángai ejo uaté jeta jé ca pingoque eduguéjnai uté bajac.

Matéo 24:24

Uje a aringáca dírigo jiei jne uje chiese ore acajnaquéode garani tu Dupade. Enga a uñane ore cho Dupade utocaidi Crísto iji raque to jne. A ore pésu cucha pitijátigo ome daringaquéode ome uaque jne. Enga a idógosi jne ujetiga Dupade anguresõripísode ore timíningarása ore to, uje Dupade ajegaite ore múñi.

Matéo 27:66

Jé u uje judíode angaránone ore tibágui Jesús ode. Enga ore chimere ducaritíguiji Jesús ode piagoi jogoto cucarané. Enga ore idójnangamáni tu ducari iji ujetiga pijoque ujetiga uñeque chijocase enga ducari chécãre dajogatique. Enga ore noñopome ore irógode soldácho iji to rĩ ujetiga ore chirote.

Márcos 4:15

Ayoréode uñane ore gajnunie u cucha ajñunie uje basája dajei. Chamáñaje quene ore chudute Dupade uruode mu Satanás jĩrique doi ore áyipiedie ga chijna Dupade uruode iji ore gari.

Lúcas 8:31

Enga Jesús chijócãrirase Satanás utocaidode iji jnani tuté. Mu utocaidode ore chijócha ajei údi ujetiga Jesús ca chorei ore iji ejopié uje que eruénique cus.

2 Coríntios 11:3

Uacarajáyo uje Satanás chacája ugai nanique enga chãra yocaté bajé Éva nanique ome daringaquéode. Jecute yitodópisa udojo ome uaque ujetiga jnanione udore ore chãra uaque to ome dacajnaqué tátigo. Yiraja uje jé ũrepise uágome uacajnoraquei ica ome Crísto. Enga que uacáyipieraque déji cucha uñeque ica. Mu yitodópisa ujetiga e ecãcho uacáyipiedie quitígo enga angáchoi pacaditíga tágode udore, enga oyópise jmíti, jmíti ome Crísto.

2 Pédro 3:8

Yijorane uaque á, ca acadíchoi to uje Yocangarádejnai que jnátu cuchárique. Dire chojmarai gajnui u sequeredie uje mil años ome uté. Jé basa ga sequeredie ujetiga mil años, mu gajnui u dire chojmarai ome uté.

Apocalípsis 12:9

Enga arócojna guichayai tuté jiei íode. I bajai tu Ugai. I uñai tupo Dicoré te rĩ. I uñai tupo Satanás te rĩ. Enga uté u uje chãra erámone jogosórone ore jnese. Diga uté patĩ́ora darógode ore uje ore tṍra ore aja erámone.

Apocalípsis 17:2

Enga erámone jogosórone ore eduguéjnane jnese ore cháta raja chequé tuaté ome unganingane. Enga jé chopo erámone unirisórone ore rĩ. Ore chirate chequé tuaté aja isoca gajnaréngone to, enga ore gajnúone u yote pioi yugode uje que ore chiraja cuchárique eruénique ome re.–

Apocalípsis 17:8

Cuchiso guichayai tuté uje bamo iji benominone déji erámi nanique, mu qué íjnoque iji deréjnane unojo. Mu a dopoi guesi jne rĩ iji dayaridi ejo cuchabe uje que eruénique cuse. Mu quique obiréjnai u datoringai tuté jne uje e que qué nijiápo rĩ iji. Mu ujetiga erámone unirisórone ore chimo cuchiso guichayai tuté uje dépoji erámi rĩ, enga a ore tija jnese jne uje diapóji erámi rĩ. Mu itijabáisórone u udore uje que ore íode déji Dupade yugode darujna ao uje churúsãre pucuecaringuei gajnesórone ore íode iji uje cáma pipesute erã́tique nanique.–

Apocalípsis 20:1

Unojo quigade enga yimo Dupade irógode gaté jogosóño uñai, uje doi jnumi iji gaté. Enga chijna ejo cuchabé joride erã́sori enga chátaja enuei uje ojnaque cuchape.