Apocalípsis 13:1 - Dupade Uruode

¹ Yimone cucha unojo quigade enga yiyáji yote quedéjnai pijnanai iji yenominone. Enga yimo uje jnani guichayai tṍraji yote quedéjnai. Enga uté gatoidie gariti. Uedie dépoji rĩ enga chejna yijmanáyone. Uté ayode coróna déji uedie jnese. Enga purusarane déji gatoidie uje uruode gajnarécho aja Dupade.

Apocalípsis 13:1 Iomraidhean Croise

Daniel 11:36

'Eduguéjnai uté iji casaque garani yui a jé doi dáyipie quitígo ome cucha ponai jnese jne. Ga a uté jé icotaque re ome cuchade jnese jne ga a jos eti sué ore angurenone dupa gáyode jnese to. Ga a uté chietáyime Dupápisi jne ome daru noñángone jne. A uté chise darétigáriguiji ujárigo jne, mu a chise dínique jne jetiga Dupade chiroque dajuyaquei gajnetique cucha aja uté. Uje Dupade chĩ́care cuchárique, ga jé u uje tocade.

Daniel 2:41

"Barigode imoi u uje pimeraque guebei, pacataringuei iji ñane uje déji ayoré gajnui uté guídade, guídedie ore. Udore ojningai tu peduguéjnane uje ore cháta raja ñane, mu udore uñane etócho ga pirosobate ore ome erámi unirisórone. Jé basa ga serẽrája uñane.

Apocalípsis 11:7

Mu ujetiga ore chimate Dupade iroquéode udore iji jnumi enga jé u uje jnani guichayárique tṍraji ejopié tuaté uje que eruénique cuse. Enga jnani guichayai uté a pésõra Dupade ipijogúsorone udore ore jne, enga a sué udore ore gai jne, enga a chujépise ore.

Apocalípsis 12:3

Enga cucha pibojma uña tõrapóji guéode rĩ. Enga arócojna guichaya. Charumájna uté. Enga gatoidie gariti. Uté ayode coróna déji gatoidie jnese. Enga uedie chejna yijmanáyone.

Apocalípsis 13:11

Quigade enga yimo jnani guichaya uñai iji yenominone uje uté tṍraji jnumi údi. Uté uedie gare enga cho áyasadie uedie. Mu narare enga uruode cho arócojna guichayai uruode.

Apocalípsis 13:15

Enga udore ore doi enga ore pésu jnani guichaya bajai gajnui. Enga jnani guichaya ejoi pésu enga jnani guichaya bajai gajnui narare to. Enga gajnui tuté uruode chequésãre ore uje que ore chisi uté gai to go.

Apocalípsis 15:2

Enga yimo cuchárique uje gajnui u yote quedéjnarique uje pioi nóna ajicaranone iji. Enga yimo ayoréode uje ore chague iji yote quedéjnai uté pijnanai, enga ore ijocayade árpai déji ore jnese uje Dupade gueranome ore. Yojningane u udore ore uje ore sué jnani guichayai, gajnui ore gai. Chamáñaje que udore ore juéga rome jnani guichayai tuté gajnei número to gu ujetiga purusãraque ore ome.

Apocalípsis 16:13

Quigade enga yimo nicoré uje tṍraji arócojna guichayai pijnani. Enga yimópo nicorenie uñai rĩ uje tṍraji jnani guichayai pijnani to rĩ. Enga nicorenie uña tṍraji jnani guichayai iroque aringacai pijnani to rĩ. Enga pujopié gajnarénguenie u nicoré gadióguedie udire ore jnese.

Apocalípsis 17:16

Enga yicatecãraisṍri tuté Dupade iroque chojningápome yu to rĩ: –Eduguéjna erueminórone udore uje ore gajnunie u uedie uje chejna yijmanáyone a ore chetaguipise chequé dibéchoquía tuaté jne. Enga jé cho cuchiso guichayai uje a chetaguipise uaté to. Enga a ore cugujnáji uaté jne. Enga a ore chejñu uaté iguidedie jne. Enga a ore tagu uaté arágajñunie jne. Iji unojo quigade enga a ore chãrúpo detepídode gai rĩ ujetiga ca diquimópo uaté atique rĩ iji erámone.

Apocalípsis 17:3

Enga Dupade iroi jno yúdi aja erãpe eyutiguei iji yenominone uje Dupade Ujopié Espíritu Sánto chingome yu. Enga yimo chequé tuaté uje cháji cuchiso guichaya charumájnai gai. Enga purusarane déji uté gai uje uruode gajnarécho aja Dupade. Enga uté gatoidie gariti, enga uedie chejna yijmanáyone.

Apocalípsis 17:5

Enga chequé uaté purusãrai pi déji enochai uje pipoguiécho quigode enga chósi te: "Yi tu guidáidaté ujnomerãi i, uje i tu Babilónia. Enga pisoca gajnarenguipísode ipesusórone ore jnese iji erámi tuné ore iradé tu yu aja cuchade udore jnese. Jé cho dibéchoquídie jnese rĩ ore iradé tupo yu rĩ."

Apocalípsis 19:19

Iji darade unojo quigade enga yimo jnani guichaya bajai, erámone jogosórone ore eduguéjnane uje e ore chamáta dasoldádode aja ñane ujetiga ore pésu pocaningai ome buricai charipísõri, isoldádode ore to.