Apocalípsis 1:9 - Dupade Uruode

⁹ Yijorane uaque á, uacojo Dupade anguresõre yu, enga yoquibaya ñane ome pijmongaquéode iji deréjnane unojo, enga Dupade urása uyoque jnese rĩ. Mu Jesucrísto átapi u yoque jnese to rĩ ujetiga yidotágo yóguiji yocanguretigai iji pequetingaquéode jmainie. Ore chisa yu diríca enga ore jno yúdi aja yote quedéjnai abué uje i tu Pátmos. Enga que ore juéga guetique ome yu. Yibai tu yatatagode Dupade urúo uje Jesucrísto chacate yógome ica.

Apocalípsis 1:9 Iomraidhean Croise

Matéo 20:23

Enga Jesús chojningame ore: –Jé ũré uje uacacásoi uacáringáringo ducañerájma to, jé aja ujetiga ójiyo yijótique cucha iringonguéjna to. Mu que yajneque go ujetiga yi yajéningo ome yirosadi charisóningo. Yai Dupade a u jne ujetiga doi dajegaitígo ome yirosadode.–

Márcos 10:39

Jecute ore chajnai Jesús ga ore chojningame: –Jé ũrepise yoque uje yicacopísi udore yui.– Jecute Jesús chojningame ore: –A jé ũrepise uágome uacacasitigade udore. Uje a jé eso to jne uacáringáringo ducañerájma uje a gajnui tu cucha otate unerótique jne ome uaque.

Juan 16:33

Yuruode u udojo ome uaque gu ujetiga eso pajesereringane ujetiga ajóyo uágaja yu. A ejnárecho cuchade jne iji erámi tudé, mu adotáyo uac. Chamáñaje yujnué cuchade gáyode iji erámi gu.–

Héchos 1:15

Enga ore pésapo dague te rĩ iji dirode udore uñeque enga Pédro chague iji dojode Jesús anguretasóño ajei ujetiga chacate ore. Enga 120 ore uje ore déji ñane gari iji jogadi uté.

Héchos 14:22

Enga ore cho Jesús anguretasórone ore quique iji ore idáyode udore jnese enga ore chojninga: –Adotáyo uáguiji uacanguretarétigai. Uje a yejnárejo yoque ome cucha dacate gajnaréngone iji de jnumi bajaque marínga, quigade ga yicagóji Dupade idai enga yocúringai purása jé u ome Dupade enga yocasuté u Dupade iji idai jne.–

Romános 8:17

Enga yocúringane Dupade abío a chiborátaja yocajnéone cucha pagutíyabácho jne. U gu uje cucha ueradode jnese uje Dupade chichagája dabode ore yui, ga a yoco yocajnéngu to jne. Enga yocajnéone cucha udore a jé chopise Dupade gueranone cucha ome Crísto uté to, uje Jesucrísto, yoquipérogai jnese jne. Enga a jé chuságaja Crísto uté úringai ingoningarãque jne, uje a yoquipérogai to jne. Mu adójnacho uje bajaque Crísto uté uje chejnáreque re uje cho daba Dupade adode nanique iji erámi tudé. E mu chise gojni diri nanique uje cuchade chinoningase re ome Jesucrísto nanique uje basapója dáringai ingoningarãque nanique rĩ. Ga a jé yoquigaidi u to iji diri tudé ujetiga yipérogoji Jesucrísto adode ome Dupade, ga yejnárejo yoque to ome cuchade bajaguíji yocúringáringo ingoningarã́cho yui.

Romános 8:25

E mu ome yoque uje cáma yimóngo yocáyipie gaidi cucha uté ome yoquedodie, mu que yiyágo yocangoroné ome yui gotique. Uje qué yugúcoji yocúringane ducañerájma jmainie iji erámi udé marínga, yirajágo uje Dupade a chimanipise dáyipie iyajmenie aja guesi jnese ome uyoque, uje chichaga cuchade udore aja gadoi nanique. Jecute yidotágo yógaja ome yocajnéone cucha dacate, ga yanguretágo Dupade ojningane cucha tocachuque yui gaté.

2 Coríntios 1:7

Yocanguretigai jiépisi ome uaque. Yirajágo gu uje jé yocajné pijosipiedie jnese ga a yocajneque Dupade osõraquédatéi jnese to jne.

Filipénses 1:7

Jé tiógara yáyipie omenie udire ome uaque jnese. Chamáñaje cho ujetiga agusopísiji yajei uje yijnorapise uaque gu. Uje yugúsiji soldádode iguíjnai uje ore suru yibai iji, jeoga yugúsiji eduguéjnane iquei uje yĩrarare yatatagode Jesús acho gai, mu cho ujetiga agúsoji yari iji te enga yajnei Dupade icaniratigué jé gajnengórone u uaque to.

Filipénses 4:14

Mu ueradipise uacasocade ome yu uje uacosṍcho yu iji yúringai pujurúgai uné.

2 Tesalonicénses 3:5

Yocajéode upo rĩ ome uaque ujetiga Yocangarádejnai chátaja uaque enga arajayopise Dupade ijnoraquei quigode. Yocajéode jé u to ujetiga adotáyo uágome cuchade, isocai tu Crísto uje chidota re ome cuchade icaite.

2 Timotéo 1:8

Enga ca agutu ua ome ujetiga atata Yocangarádejnai adode ome ore. Enga ca ajéngopome yu to rĩ uje ore suru yibai. Bamo uje yibai u Yocangarádejnai uté gu. Mu apésu bajnepítigo to ome pujnomé ueradi úringai patataque ome Jesucrísto, ujetiga uñéngo ore chise dáringáringo piquetaque to. Ujetiga ejnáreque ua jne ome batatagode udore marínga, a Dupade chisi ome picasitigai ome ua jne.

Hebréos 10:36

Ujetiga uacajéode u ujetiga apéso Dupade áyipiedie ome uaque enga cucha amiri tu ujetiga adotáyo uágome cucha dacadode jnese. Enga jé u jne ujetiga Dupade ingoméone cucha jnese chise uaque.

1 Pédro 5:1

E yuruode gajnengórone u Dupade anguresórone angaránone anciáno iji uaquedáyode. Enga a yo ore quique jne. Uje Dupade anguresórone ore angarate anciáno yu to enga yimópise Crísto to ome yedodie uje chejnáreque re nanique. Enga ujetiga Jesucrísto diapo jne rĩ ome dáringai cuchape enga a jé Dupade anguresórone angaránone uyoque yocajneque uté ingoningájnai to.

Apocalípsis 1:1

Dupade chingo cucha piqueminórone unojo aja Jesucrísto enga déji darujna aode unojo jnese. Gaidi tu gu ujetiga Jesucrísto chingo cucha dacadode unojo quigode aja danguresórone darócho ujetiga ore chidójninga to uje cuchade unojo a jĩraque tocade jne. Jecute Jesucrísto doi enga chiroque datocaidode uñai aja daroi Juan ujetiga cho quique cuchade udore gaté.

Apocalípsis 1:2

Enga Juan uyu u uje yatata gojña uréone udore jnese uje yimópiso to ome yedodie. Chamáñaje gojña uréone udore garani tupúsu Jesucrísto ome yu gu, enga gojña uréone udore garani tupúsu Dupade ome Jesucrísto to.

Apocalípsis 1:4

Juan uyu uje yurúsãre yurusarane cárta ome yujode Dupade anguresõre uaque iji uaquedai garitíode iji uacaniri Ásia. Eyúgojma Dupade. Chamáñaje Dupade jé jogate nanique iji erámi taningane, jé aja deréjnane unojo, enga a jé upo jne rĩ ujetiga diapo iji yoque rĩ iji jnumi iji dire piqueminórone. Yajéode u ujetiga uacajneque pajesereringai, pininaquei ore uje udore garani upúsu Dupade uté. Uje garani upo Dupade Ujopié Espíritu Sánto gajnu garitíode udore to ome uaque, uje ore charidi tu Yoqueduguéjna cuchábi iquei tiji gaté.

Apocalípsis 1:6

Enga pésu yoque enga eduguéjna cuchape yoque to ujetiga yicoi dai Dupade iroquéode to. Enga yocajnúone u jnani bajade angaránone sacerdote uje ore chedu Dupade iroquéode nanique iji Dupade iguíjna cuchábi. Jecute beyoi enga yisigopise Jesucrísto uté gai iji deréjnane jnese jne ome úringai ujopíerãque, ome ingoningádatéi to rĩ. Amén.

Apocalípsis 11:7

Mu ujetiga ore chimate Dupade iroquéode udore iji jnumi enga jé u uje jnani guichayárique tṍraji ejopié tuaté uje que eruénique cuse. Enga jnani guichayai uté a pésõra Dupade ipijogúsorone udore ore jne, enga a sué udore ore gai jne, enga a chujépise ore.

Apocalípsis 12:11

Enga jé cho yocujode Dupade anguresóño ore uje ore sué Satanás gai gu dáringai puruque iji Yocangarádejnai Jesucrísto iyoi uje uté gajnua u áyasa pẽrapaide chugué nanique. Adi jec upo rĩ uje ore sué Satanás gai to rĩ gu Dupade uru uréone to uje ore changureta enga que ore chagutu quitique ome darasade. Enga que ore chagutúapo dacuecaringuei rĩ ujetiga ore cho daba datatagode Dupade urúo udore.–

Apocalípsis 12:17

Jecute arócojna guichayai chugúja chequé tuaté. Enga jno enga pésu pocaningai ome uaté ape disi ejode ore. Enga ore u uje angoninguite guesaque ore ome Dupade iroquéode. Ore upo rĩ uje ore pésupúsu Jesucrísto uru uréone quigode uje chatata udore quigode ome ore nanique.

Apocalípsis 13:10

Gosode ujetiga suru uacabáyode iji soldádode iguíjnai, mu quigade enga a pujuruque udore gosode gai to jne. Adi jé u to ujetiga gosode chujé uaque ome daquesérigo, mu quigade enga a chuque udore ore to jne ome quesérigo. Jecute Dupade anguresórone uaque á, ca oyo caru ome ore jocaningane ome uaque. Mu adotáyo uágaja. Enga ca ayáyo uacanguretigai.

Apocalípsis 14:12

Enga jé jno daruode údi enga chojninga: –Jecute Dupade anguresõripísode ore gajnei tu ujetiga ore chidota rome dajnéone pequetingaquéo gatuaque á. Yojningane u ore uje ore doi Dupade ojningane cucha, enga jogadípise ore anguretigai iji Jesucrísto á.–

Apocalípsis 19:10

Enga yicha yigataidie aja jnumi iji Dupade iroi tuté iquei ujetiga yicota to. Mu chaquĩ́ra yu enga chojningame yu: –Ca achaga bagataidie aja jnumi iji yiquei. Chamáñaje Dupade iroque yu to. Enga yopise uaque, bajorane uaque uje uacabeyopísi Jesús acajnaqué uréone quigode. Uacacotaquéode gajnengóri urásu Dupade enga gusupúsu. Yocatatagode Dupade urúo que garani u atatasórone uyoque go, mu garani u Jesús acajnaqué ũrepísode.–

Apocalípsis 20:4

Quigade enga yimo piyaripi cuchábode enga Jesús anguresórone ore chácariji gáyode. Uje Jesús e ujo eduguéjna ore ujetiga ore chajire erámi jogosórone ore adode aja quigode to. Enga yimópo Dupade uruode ipesusõripísode to uje ore chatata Jesús ujnoméone nanique, enga ore cho daba datatagode unojo. Jnani guichayai guetesórone u unojo ore, jecute que ore chichaga dagataidie aja jnumi iji uté gajnui iquei. Que ore juéga to ujetiga uté i dóji ore enochade jeoga ore jmanai. Jecute jnani guichayai irógode ore chaquesu udore ore etabídode nanique. Mu yimo uje ore ecápo rĩ. Enga Crísto ujo eduguéjna ore to iji sequeredie mil udire.

Apocalípsis 3:10

Uaque u uje uacabeyopísi yuruode quigode uje yojninga: adotáyo uáguiji petingaquéode jmainie jne. Jecute a yãraque uaque jne ujetiga diga pequetingaquéode chise erámi jnese. Chamáñaje a yetingaco erámi unirisórone ore jnese jne gu iji erámi údode.

Apocalípsis 6:9

Uje Uté uje gajnua tu áyasa pẽrapaidé chijnime cucha catágode uñai uje e chejna yijmanai, enga jé u uje yimo Dupade anguresórone ore áyipiedie, uje chuque ore nanique uje ore cho daba datatagode Dupade urúo. Enga páyipiedie udire déji gaserani údi uje cuchiso pẽrapáidode gajneque ome Dupade.

Apocalípsis 7:14

Enga yichajnai jnani tuté enga yojningame: –Cachi baraja arĩ́e. Angome yu.– Enga uté chojningame yu: –Udore ore u uje ore chejna cucha dosógode aja daquigade. Enga ore churu dáyipiedie, daguidedie ore iji Yoquiquetasṍri iyoi enga e ichapise ore.