Apocalípsis 1:1 - Dupade Uruode

¹ Dupade chingo cucha piqueminórone unojo aja Jesucrísto enga déji darujna aode unojo jnese. Gaidi tu gu ujetiga Jesucrísto chingo cucha dacadode unojo quigode aja danguresórone darócho ujetiga ore chidójninga to uje cuchade unojo a jĩraque tocade jne. Jecute Jesucrísto doi enga chiroque datocaidode uñai aja daroi Juan ujetiga cho quique cuchade udore gaté.

Apocalípsis 1:1 Iomraidhean Croise

Sálmos 25:14

Pangarádejnai cho dajõranguipísode iji udore ore uje ore tõrorája iquei, ga chingo daru iyiejájnane aja ore.

Daniel 8:16

Ga yudute ayorérique uruode uje tṍraji tié edúdi uje tié uaté i tu Ulai. Ga ayoré darai uté chojningame daruode: '¡Gabriél! O uté imone cucha quigome.'

Daniel 9:21

Uje qué yugúsiji yicatecãraitigade gai ga Gabriel uté uje chiqueta raja yu iji yenominone unojo ica, uté chója gadoi iji yijogadi uté. Ga chirõre guedé batigai uje jecucha judíode ore yipotágome yoquẽrapáidode cuchiso ome Dupade iji gaseradéjnai gai nanique, uje Gabriel uté chise yu iji uté.

Daniel 9:23

Bacatecãraitíga bajai uté ome Dupade, ga jĩraque chudute, enga a doi baru quigode udore jne. Uje yise ua gu jetiga yatata udore quigode ome ua uje Dupade chimesẽripise ua, Daniel. Mu angaripísi quigode uje yatata quigode ome ua jne ujetiga araja udore imone cucha. Ga yósi tome ua jne:

Juan 12:49

Uje yuruode udore que garani u yu gotique mu garani u yai Dupade. Chamáñaje yuruode, yacajnaquéode ore quigode upúsu yirósõri Yai áyipiedie quigode.

Juan 15:15

A ca yĩ́carapo yirógode aja uaque jne rĩ. Chamáñaje pirógode que ore chiraja darósorone áyipiedie ome cuchade. Mu a yĩ́care yijorane aja uaque jne. Chamáñaje e yingo yajnéone Yai ojningane cucha jnese aja uaque gu.

Juan 17:8

E yacate ore ome beranone yacajnaquéo enga ore chimesẽre. Que potigayaquérique déji ore uje yarani tu ua. Enga ore changureta uje baroque yu aja jnumi nanique.

Juan 3:32

Enga uté júdode u damone cucha iji gaté. Jé aja dadudigode cucha iji gaté rĩ. Mu que uñeque changureta atatagode cucha quigode.

Juan 8:26

A yajéraso enga yajirirase uacadode aja quigode jé iji de. Enga a jiérasi yatatagode uacapesute gajnarécho. Mu yirósõri uruode ũréo jnese. Jecute a yedu udore ome yatatagode ome erámi unirisórone. Chamáñaje yudute puru uréone udore nanique iji uté pijnani.–

Romános 16:25

¡Beyoi ga yisigopise Dupade gai ome uté úringai ingoningarãque! Jé uté tiógarapísa dajnéone yoquicotaquéo udojo ome re gu. Adójnacho uje Dupade uté etotiguei cuse jeta pésu ga uajate uáguiji uacanguretigai gatuaque. Enga uacasocai uté jé chajnapise pujnomé ueradi quigode ome Crísto uje yatatame uaque. Jé Dupade áyipie iyajmenie u dáyipiedie udire ome Crísto uté, mu cho cucha pipoguiédedie, uje que chingongarája erámi míraque.

Gálatas 1:12

Enga que yujórique ayoré acadique yu ome pacajnaquéode udore to go. Mu Jesucrísto jé upúsu uje chacate yu ome cuchade udojo quigode.

Efésios 3:3

Enga yatatagode ome uaque qui jé upúsu Dupade áyipie pipoguiédedie udire uje quene yatata quique garósiode ome uaque que iji yurusãráiso ucode. Uacamóño uje que yiraja udire quigode bisideque, mu Dupade uté u uje chijnime dáyipiedie udire ome yu, jecute yiraja quigode to.

Títo 1:1

Dupade iroi u Páblo uyu uje yurúsarome ua. Enga Jesucrísto iroguipísode apóstol uñai upo yu rĩ. Enga Jesucrísto uté chiroque yu ujetiga yimate Dupade ajegaidode ayoré aja panguretigai ome Dupade jnese. Jé u to ujetiga yo ore quique ome yoquigaidode Dupade uru uréone ujetiga ore chirajapise quigode to.

Apocalípsis 1:19

Enga yipotigádi tu ujetiga arúsãre bamone cucha jnese. Arúsãrape cucha dacadode uje déji iji dirode unojo, enga arúsãrapo cucha piqueminórone quigode to jne rĩ.

Apocalípsis 1:9

Yijorane uaque á, uacojo Dupade anguresõre yu, enga yoquibaya ñane ome pijmongaquéode iji deréjnane unojo, enga Dupade urása uyoque jnese rĩ. Mu Jesucrísto átapi u yoque jnese to rĩ ujetiga yidotágo yóguiji yocanguretigai iji pequetingaquéode jmainie. Ore chisa yu diríca enga ore jno yúdi aja yote quedéjnai abué uje i tu Pátmos. Enga que ore juéga guetique ome yu. Yibai tu yatatagode Dupade urúo uje Jesucrísto chacate yógome ica.

Apocalípsis 17:1

Unojo quigade enga Dupade irógode uñai uje ore chójnesi doidábode agapiábio aja jnumi, udore uñai chise yu enga chojningame yu: –Juan, boji ti enga ajína yu á. A yingo chequé dibéchoquía tome ua jne uje ore chudute uaté ujnomei iji erámone jnese. Uje uaté charidode u yote quedéjnane. Mu a yingo uaté gajnei pujuyaquéquedaté ome ua jne.

Apocalípsis 19:10

Enga yicha yigataidie aja jnumi iji Dupade iroi tuté iquei ujetiga yicota to. Mu chaquĩ́ra yu enga chojningame yu: –Ca achaga bagataidie aja jnumi iji yiquei. Chamáñaje Dupade iroque yu to. Enga yopise uaque, bajorane uaque uje uacabeyopísi Jesús acajnaqué uréone quigode. Uacacotaquéode gajnengóri urásu Dupade enga gusupúsu. Yocatatagode Dupade urúo que garani u atatasórone uyoque go, mu garani u Jesús acajnaqué ũrepísode.–

Apocalípsis 19:9

Enga Dupade iroi chojningame yu rĩ: –Arúsãrape unojo: "Uje Dupade urúo udore enga ũrepíso uje a chamáta dajnacari Jesucrísto, anguresórone ore aja ñane jne ome dabose uneréjnane. Enga pirasitigai jogadi tu ome ore jne ujeta Dupade tibidi ore ome to."

Apocalípsis 21:2

Juan uyu u uje yipáñapísiji Dupade edójnari guidai Jerusalén icha uje doi jnumi iji gaté iji Dupade gari. Enga ueradéjnapise. Gajnua tu gapúraque ome yu uje que suseque re ome dajmasṍri yui.

Apocalípsis 21:9

Unojo quigade enga Dupade iroque garitíode uñai tibágui yu uje ore oidábode su agapiábode uje Dupade ujuyaqueque erueminóri dóji ajei. Enga uté chojningame yu: –Boji te á. A yingo Jesús uté gajmámia aja ua jne, uje Jesús uté u uje gajnua u áyasa pẽrapaide chuguéraque. Uje a acotépise uaté jne.–

Apocalípsis 22:1

Enga Dupade iroque gaté unirísõre chingome tié tome yu uje uaté que iguínique cuse. Enga tié tuaté yocárepise uje pucuecaringuei déji uaté. Enga cho ajicaranone. Enga tié tuaté tṍraji Dupade, Jesucrísto ore charipi cuchábi. Uje Jesucrísto uté gajnua tu áyasa pẽrapáideraque.

Apocalípsis 22:16

Enga yudúdapo Jesús uruode rĩ enga chojninga: –Jesús uyu enga yiroque yutocaidi gaté unirísõre aja uaque ujetiga ajnerañome uté ojningane cucha ome yanguresórone ore jnese iji dedáyode. Bajaque yu ome eduguéjna cuchábi David nanique, mu uté ape disi ejo yu to. Enga yajnua tu guédo niríngoro ome yingoningájnadatéi.–

Apocalípsis 22:6

Diga Dupade iroi chojningame yu: –Yojningane cucha ome ua ũrepíso jnese enga pangurecho. Yocangarádejnai Dupade u uje chisi ome daruode ome jnani bajade nanique ujetiga ore chatata quigode. Enga jé uté upúsu uje chiroque darógode gaté unirísõre uñai aja darógode uaque ujetiga cho quique cucha piqueminórone ome uaque uje udore jĩraque tocade jne.–

Apocalípsis 22:8

Juan u yu uje e yejna yimone, yududigode udore guesi enga yichaga yigataidie aja jnumi iji yicatecãraisṍri Dupade iroque iquei. Yigaidi tu gu ujetiga yisi gai.

Apocalípsis 22:9

Mu uté chojningame yu: –Ca achaga bagataidie aja jnumi iji yiquei. Bojo Dupade iroque yu to, enga jé yo Dupade anguresórone uaque jnese. Yojningane u ore uje ore chatata Dupade uruode ome ore, jé aja udore ore jnese uje ore dopísi pacajnaquéode quigode uje purusãracho iji darujna aode unojo. Be enga achaga bagataidie aja Dupade iquei.–

Apocalípsis 4:1

Iji unojo quigade enga yajire gaté. Enga yimo piago uñai uje guesája iji gaté. Enga dara bajade catecãrápoi yu rĩ uje cho pubuchugode jocarane. Enga chojningame yu: –Boji ti á, enga oru yu. Enga a yingo cucha piqueminórone ome ua jne uje udore a tocade jne iji cucha bajade udore quigade.–

Apocalípsis 5:7

Enga Áyasa tuaté sose charipi cuchábi charipísõri yui iji yenominone enga chisa darujna aoi tuté uje déji charipísõri jmanai ãrachua.