1 Juan 3:5 - Dupade Uruode

⁵ E uacarajáyo uje Jesucrísto chise erámone nanique gu ujetiga chĩro yoquisijnaringuéone. Uje que pisijnaringuei unátaque déji uté.

1 Juan 3:5 Iomraidhean Croise

Matéo 1:21

Enga a uaté abi base jne enga ẽ́care Jesús aja jne. Uté a chiqueta darasade ore jne gu iji ore isijnaringuéone.– (Jesús i qui tu piquetangore ome israélgosode ore uruode.)

Lúcas 23:41

Yirajágo uje que ore chujé yoque bisideque go. Mu ore chiraja yoquibade cucha. Jecute yocajnenguíraso ore ujuyaquéode udore. Mu jé basa ga jnani tuté iji yocujai, que bárique cusipise mu jé ore chujé bisideque to.–

Lúcas 23:47

Uje soldádode ore eduguéjnai rómagotique pañaji Jesús adode udojo ga jec u uje tija Dupade ga chósi tome: –¡A jé ũrepise uje jnani ujñapetaque uté jõ!–

Juan 1:29

Jecute dire uñai enga Juan chimo Jesús uje chose ore yui enga chojningame daríjogosórone: –Cajicho to jnacari uté. Uté u jne ujetiga toi ome erámone jogosórone yoquisijnaringuéone. Enga gajnua u áyasa perané ome Dupade. Enga Dupade jé guerani u ome yoque.–

Juan 1:31

Que yiraja Dupade utocaidi uté gosi iji taningai mu yĩri gu ujetiga yaca yurasade Israel gose ore edodie iji yodi ujetiga dimane ore ome uté diringai yui. Yigaidi u gu ujetiga di enga jĩraque ore chiraja.–

Juan 14:30

Mu a jé ca yiji yuruode udojo údi ome uaque. Chamáñaje erámone jogosórone ore eduguéjnai Satanás diringai e puja yui. Mu que togome uté ujetiga etotiguérique sué yibai.

Juan 8:46

¿Jé gosi te iji uaque ujetiga chingome yoque ujetiga pisijnaringuérique déji yu? Ujetiga ca déji yu enga obiréjna yuruode uje ũrepíso. ¿Jé ome gotique gu a uje que anguretáyo yu?

2 Coríntios 5:21

Yirajágo uje Crísto que pésu cucha gajnarétique nanique. Mu Dupade cho ayoré sijnánguiji uté nanique. Gaidi u gu ujetiga cho daba yoquisijnaringuéone. Jecute uje yanguretágo Crísto ga yocúringáringo omío a u jne iji quigade. Chamáñaje Dupade potapísa yocúringáringo omipíso ome re gu.

1 Timotéo 1:15

Jé ũrepíso yuruode unojo enga jé tiógarapísa jeta yanguretágo enga yimeseco jnese: uje Jesucrísto chise jnumi nanique ujetiga chiqueta sijnángone ore ome ore ate gajnaréngone. Enga pisijnaringuéone ipesungore obiréjnai tu yu ome ore jnese nanique.

1 Timotéo 3:16

Jé ũrepise yu uje cuchadatei u Dupade adode ome erámi unirisórone uyoque uje yanguretágo. Mu que pirajaque udore quigode ome ore jnese go. Mu quiguipísi tu unojo: Dupade pésu re enga ayoré to nanique enga chingo raja erámi unirisórone. Ujopié Espíritu Sánto chajo raja uje ũrepise uté. Dupade irógode gaté unirísoño ore chimópise adode to nanique. Ujnomei chubu erámi enga erámi unirisórone iji erámi údode ore changureta. Mu diga poite uté aja gatajnoquei enga e pijógapo cutejmai ingoningájna rĩ.

Títo 2:14

Baraja gu uje Jesucrísto uté u uje tẽra re ome yoque. Gaidi u gu ujetiga chiqueta uyóguiji yoquisijnaringuéone jnese ome dáringai chuque. Enga churupise yoque ujetiga chinoningase yoque uje pota yógome re gu. Enga pota to ujetiga yójigoji gatéode ome yoquipesutígo cucha omío gatuaque.

Hebréos 1:3

Enga Dupade idírecaringuéi pijógapo rĩ iji Ujnacari uté. Chamáñaje Dupade adípisode jé dépisiji Ujnacari enga chojmarápise ore iji jnumi. Enga Dupade Ujnacari u uje chijocase cuchade jnese iji erámone, gaté ore ome darúdatéode. Uté jé upo rĩ uje chise erámone icaite ujetiga churu yoquisijnaringuéone iji jnumi. Quigade enga jnopome gaté rĩ. Enga chácariji dai Dupade ãrachua ome dáringai cuchape.

Hebréos 4:15

Enga Yocangarádejnai uté que dojnóngaja yoque uje que urénga yoquetotiguérique cuse iji yocujuredie jmainie. Chamáñaje ayoré uté to nanique gu uje déji erámone unojo nanique. Enga chiraja cuchade jnese uje chetingare ayoréode uyoque, mu que pésu pisijnaringuérique to go nanique.

Hebréos 7:26

Jecute Jesús jé upúsu yocucuei pangarate cuchape ujetiga catecã́ri Dupade ome yoque. Uje ueque gu ome cucha gajnaréngone, pisijnaringuéone ore jnese. Enga Dupade e cãra jogadi ome pisijnaringuéone ipesusórone ore jnese. Enga uté jogadi jé upúsu Dupade gari iji guéode uéchai.

Hebréos 9:26

Ujetiga Crísto gajnei urásu ujetiga tẽra re gatuaque jé iji taningane uje Dupade pésu erámi, jé aja deréjnane unojo, enga a e uásejnapisirase. Mu que quigode u udore go. Mu Crísto quene chingo raja erámi iji erámi tuné eruei yúode. Enga jé u uje tẽra re ome yoque ujetiga cho yoquisijnaringuéone oré. Enga chojmára uje tẽra re nanique, enga e gusu.

Hebréos 9:28

Isocai jé u Crísto. Uje toi enga chojmára enga chisi ome re ujetiga pĩroque yoquisijnaringuéone. Quigade enga a diapo jne rĩ. Enga diringane gare uje chise erámi. Bajai u nanique ujetiga chĩro pisijnaringuéone. Mu diringai ejoi u ujetiga chiqueta uyoque jnese jne uje yiroco yui.

1 Pédro 1:18

Uacarajáyo uje que cuchárique tṍraji uacayode jnani bajácho ore adode nanique. Enga jé uacadode u ore adode to nanique. Mu Dupade ijnimique uáguiji uacasoca bisidégode udore enga chiqueta uaque. Enga uacarajáyopise to uje que pigaidé yocúringane piquetaque ome pláta, óro ore uje cuchade udore jĩraque íjnoque.

1 Pédro 1:20

Dupade áyipiedie jé jogate nanique ome Jesucrísto ujetiga toi ome yoque uje cáma pipesute erámi. Mu quene Dupade áyipiedie udire tocade iji deréjnane udojo ome Jesucrísto. Enga e yocagutíyamáni u.

1 Pédro 2:22

Crísto que pésu pisijnaringuérique nanique go. Enga que paringaquérique dépoji ome uñeque rĩ.

1 Pédro 2:24

Uacarajáyo uje Crísto oite yoquisijnaringuéone iji dabai ayoré nanique aja curesei enga toi ome yoque. Enga uje yanguretágo Crísto gajnui tu ujetiga e yitogoi to, enga yijíñongome yocate bajade, yoquisijnaringuéone ore. Enga yiquecágopo rĩ ga e yicoi yocucuecaringué ichai isoca ujñapetade. Ore chichagu Crísto nanique enga jé u uje uaqueso uacáringane ayoré ijóño iji quigade.

1 Pédro 3:18

Uacamóño uje Crísto toi ome yoquisijnaringuéone ga chojmarápise enga e gusu. Mu que tiógara dáringai pujuya nanique uje ate areque gu, mu cho daba sijnángone uyoque enga toi ome yoquisijnaringuéone. Gaidi tu gu ujetiga chinoningase yoque enga chijna yógaja Dupade jogadi. Yirajágo to uje Jesús aoi u uje toi nanique, mu Ujopié u uje chiringare aja gaté.

1 Juan 1:2

Uje pucuecaringuei guẽrasṍri Jesucrísto chingo raja yoque nanique, enga jé u uje yatatago adode ome uaque. Enga yocatatagode júdi u pucuecaringué eyúgojmai quigode, uje pucuecaringuei tuté guẽrasṍri déji dai Dupade gari iji taningai, mu quigade enga chingo raja yoque to.

1 Juan 1:7

Mu ujetiga yicoi Dupade adode enga gajnui u ujetiga yugúcoji Dupade gari iji dírecaringuéi. Enga jogadi u uté uje yocujode Dupade anguresóño uyoque yoquirasique ñane. Enga jogadi u to uje Dupade ujnacari Jesucrísto iyoi churu yoque iji yoquisijnaringuéone jnese.

1 Juan 2:1

Yababode uaque á, yurúsãre unojo ome uaque gu ujetiga ca apéso pisijnaringuéringo. Mu ujetiga uñeque pésu pisijnaringuérique, yocangaráni cuse ome unojo ujetiga catecã́ri Yocai Dupade ome yoque. Enga yocangaráni uté u Jesucrísto. Enga uté áyipiedie que gajnareque quitique go.

1 Juan 2:2

Enga Dupade angúromei u Jesucrísto uté adode ujetiga chĩro yoquisijnaringuéone. Mu que gusu yoquisijnaringuéone uje chĩro, mu jé u erámi unirisórone ore isijnaringuéone jnese to rĩ.

1 Juan 2:29

Uacarajáyo Jesucrísto úringai areque. Jecute uacarajayópo Dupade atígo ore to rĩ ome ore úringáringo cucha arégode ipesungóño.

1 Juan 3:8

Mu uje gosi pésu pisijnaringuéone enga uté gosi ajnai tu Satanás. Uje pisijnaringuéone ipesungore Satanás jé iji erámone taningane. Mu Dupade Abi di gu unojo ujetiga chinoningase Satanás ipesute gajnaréngone iji erámone unojo.

Apocalípsis 1:5

Enga pajesereringai, pininaquei ore garani upo Jesucrísto to rĩ ome uaque, uje ũrepise uté ome dojñane iji Dupade adode. Enga uté u bajai nanique uje ecápo rĩ iji datoringai. Jecute uté u uje etotiguei suépise eduguéjna jnutiminórone etotiguéode gáyode jnese iji erámi tuné. Mu Crísto uté jé u to uje chijnorapise yoque enga chinoningasipise yoquisijnaringuéone ome dayoi.