Fıٜ̃lıٜ́pıٜ̃ lé ꞌbá 1:9 - Tã-drı̣̃ Lẽlẽ Óꞌdí Óvârí Kâ

^9-10 Má ꞌê rãtáã Ôvârí drí ãnî tãsĩ kĩ, lõvõ ãníkâ Ôvârí rî tãsĩ õjílã ãzí bê rî ũlı̣̂pı̣̃ âcálé rõô. ꞌDĩî kpạ̃rạ̃tı̣́ tã nı̣̃nı̣̃ Ôvârí rî tãsĩ rî bê, nĩ îcâ ró bê tã gólĩyî mbı̣̂mbı̣̂ rî nı̣̃lı̣́ ĩꞌdî gõꞌdá ꞌẽlé dódó. Gõꞌdá ĩtí rî, kậyı̣̂ gólâ Yésũ drí âgõzó ãngó nõ ꞌá rî, áâŋõó tã ãnî rú tã õnjí tãsĩ rî kpá kô ãlôwálâ,

Fıٜ̃lıٜ́pıٜ̃ lé ꞌbá 1:9 Iomraidhean Croise

1 Kõrínĩtõ lé ꞌbá 14:20

Ámâ ândré rî mvá yî, nĩ âyê tã ı̣̂sũ ãníkâ õzõ ꞌdĩyímvá kâtí kĩꞌá nĩ rî, tı̣̂ âtálé õjílã ãzí drí nı̣̃lı̣́ kô ꞌdĩ õrî ꞌdíyî ꞌbãlé õjílã ãmbá ró ꞌdĩ. Gõꞌdá cé âꞌdô ãníkâ rî ãâꞌdô íyíkâ õzõ ꞌdĩyímvá tã õnjí ꞌẽ ꞌbá dũû õjílã ãzâ drí kô rî yí kâtí.

2 Kõrínĩtõ lé ꞌbá 8:7

Gõꞌdá nĩ ꞌê tã Ôvârí kâ trá tãndí ró. Nĩ lẽ tã trá Yésũ Krístõ ꞌá pı̣̃pı̣̂sı̣́lı̣́ ãlô sĩ. Gõꞌdá ãnî rĩꞌá cú tã nı̣̃nı̣̃ Ôvârí ngá lésĩ rî bê, gõꞌdá nĩ pẽ tã lâ kpá trá tãndí ró õjílã ãzí drí. Gõꞌdá nĩ lẽ ãmâ trá rõô. Âꞌdô bê trá ĩtí rî, nĩ fẽ ngá gạ̃rạ̃, ãꞌdô ró bê krístõ ꞌbá gólĩyî Yũdạ́yạ̃ ꞌálâ rî ꞌbá yî pãzó.

Ẽfésõ lé ꞌbá 5:17

Nĩ âꞌdô kô tã nı̣̃ ãkó lé ꞌbá ró, gõꞌdá nĩ rî zãâ rĩꞌá tã gólĩyî Ôvârí drí lẽlé ãnî drí ꞌẽlé rî ꞌbá yî lôndãlé ĩꞌdî ꞌẽlé.

Kõlósĩ lé ꞌbá 1:9

Gõꞌdá âꞌdô bê trá ĩtí rî, mã ârî tã rî ꞌdĩ bê rî, mã îtõ trá rĩꞌá rãtáã ꞌẽlé ãnî tãsĩ. Mã rî trá rĩꞌá rãtáã ꞌẽlé Ôvârí drí, Líndrí Tãndí gólâkâ ãâꞌdâ ró, ngá gólĩyî gólâ drí lẽlé ãnî drí nı̣̃lı̣́ rî ndrĩ ãnî drí tã ányâ ãkó ꞌá lâ gõꞌdá nĩ îcâ ró kpá bê rĩlí rĩrĩ tãndí gólâ Ôvârí rî ꞌbã ꞌbá âꞌdólé ãyĩkõ ró rî sĩ. Mã rî gõꞌdá kpá rĩꞌá Ôvârí rî îjílí õfẽ ró mbârâkã ãnî drí tã tãndí ꞌẽzó õjílã drí, tã tãndí gólâ tíbê ꞌẽ ꞌbá õjílã ꞌbãlé ãnî ápí Ôvârí rî ı̣̂njı̣̃lı̣́ rî. Gõꞌdá ãmâ kpá rĩꞌá gólâ rî îjíꞌá gólâ õꞌê ró ãnî íyî nı̣̃lı̣́ gạ̃rạ̃.

1 Tẽsãlõníkã lé ꞌbá 3:12

Gõꞌdá Ôvârí ãmákâ rî õꞌê ãnî, ãnî lôvó ꞌbãlé ãnî vó ꞌásĩ lậvũlı̣́ kôrô ngbãângbânõ rî drı̣̃ı̣̂ sĩ, gõꞌdá kpá ãnî ꞌbãlé âꞌdólé õjílã ãzí lôvó bê ãkí ãkó ãnî ꞌá, kpá té õzõ ãmâ nyãányâ drí âꞌdórẽ ãnî lôvó bê rî kâtí.

1 Tẽsãlõníkã lé ꞌbá 4:1

Ãmâ drẽ rĩꞌá cé tã fínyáwá ãzâ ꞌbá yî îgĩꞌá ĩꞌdî ãnî drí. Mã âtâ úlı̣́ ãnî drí õzõ õjílã gólĩyî rĩ ꞌbá ĩyî tã âtâ-âtâ Kúmú ãmákâ Yésũ kâ zẽlé rî kâtí. Gõꞌdá nĩngá sĩ rî, mã lôgõ tã kpá ãnî drí ngbálí-ngbálí, mã kĩ nĩ rî, nĩ ꞌê ró tã tãndí bê, té õzõ ãmâ drí âtálé trá ãnî drí rî kâtí, tãlâ ũsû ró bê Ôvârí rú. Nĩ îtõ trá ĩtí rî, trá rĩꞌá tãndí ró. Ãꞌdô ĩtí rî, ꞌdõvó nĩ ꞌê tã rî ꞌdĩ ꞌbá yî lậvũlı̣́ kôrô nõô drı̣̃ı̣̂ sĩ. Nĩ ârî tã ãmâ drí âtálé trá ãnî drí sı̣́sı̣́ Yésũ kâ rî kpá trá,

2 Tẽsãlõníkã lé ꞌbá 1:3

Ãmâ ậdrúpı̣̃ yî ãmâ îzó yí bê, rĩꞌá tã mbı̣̂ ró ãmâ drí rĩzó Ôvârí rî lûyı̣́lı̣́ kárá tãlâ ãnî tãsĩ, tã lẽlẽ ãníkâ Ôvârí ꞌá rî trá rû lôpéꞌá ạ̃tı̣́ ꞌálâ. Gõꞌdá lôvó ãníkâ ãzí-ãzí drí ãkí ãkó rî kpá trá rû lôpéꞌá rõô ạ̃tı̣́ ꞌálâ.

Fĩlẽmónã 1:6

Ní îcî krístõ ꞌbá lı̣̃fı̣́ trá dũû úlı̣́ âtâ-âtâ sĩ gólĩyî drí tã lẽlẽ áníkâ Ôvârí ꞌá rî sĩ. ꞌDĩî ꞌbã mâ trá âꞌdólé ãyĩkõ ró ãmbá. Ĩtí rî, má ngô ãwó Ôvârí drí kĩ nĩ rî, õzõ ní õtírĩ tã rî ꞌdĩ ꞌẽê rî, ní nı̣̃ ró bê tã tãndí ndrĩ tíbê Yésũ Krístõ drí rĩꞌá ꞌẽlâ ãmâ drí rî yî.

Ị́bũrũ 5:14

Gõꞌdá ĩtí rî, ãꞌwá bê rĩꞌá õjílã gólĩyî mbãmbã ndẽ ꞌbá trá rî ꞌbá yî drí îcálé nyãlâ. Gólĩyî ı̣̂lı̣̂ tã trá nı̣̃lı̣́ kĩ, tã ángô rî ꞌbá yî ĩꞌdî rĩꞌá mbı̣̂ gõꞌdá ángô rî ꞌbá yî íyíkâ ĩꞌdî rĩꞌá ányâ lâ ró, tãlâ gólĩyî rî ĩyî tã gólâ Ôvârí kâ rî ꞌbá yî ꞌẽlé zãâ zãâ ró ĩꞌdî.

1 Pétẽrõ 1:22

Ĩtí rî, ãnî drí ãnî ãzí-ãzí yî lẽlé pı̣̃pı̣̂sı̣́lı̣́ ãlô sĩ õzõ ãnî ậdrúpı̣̃ yí kâtí. Nĩ âꞌdô îcáꞌá ꞌẽlâ ĩtí, tãlâ nĩ lẽ tã trá tã âtî-âtî tãndí Yésũ rî tãsĩ nô ꞌá pạ̃tı̣́ı̣̃ ró, gõꞌdá nĩ jâ rĩrĩ ãníkâ rî trá tã õnjí ꞌásĩ, gõꞌdá krístõ ꞌbá ãzí lẽlé ĩꞌdî.

2 Pétẽrõ 3:18

Ĩtí rî, gõꞌdá tã lẽlẽ ãníkâ Kúmú ãmákâ Yésũ Krístõ ꞌá rî õmbâ íyíkâ zãâ nĩꞌá ạ̃tı̣́ ꞌálâ lậvũlı̣́ gạ̃rạ̃ sı̣́sı̣́ rî drı̣̃ı̣̂ sĩ. Nĩ âdrê gạ́gạ́ tã lẽlẽ ãníkâ ꞌá õzõ rákã fê kâtí, gõꞌdá nĩ nı̣̃ dódó kĩ, Yésũ Krístõ lẽ ãnî trá rõô tãkó ĩtí. Ĩtí rî, mã ı̣̂njı̣̃ Kúmú ãmákâ Yésũ ngá ndrĩ drı̣̃lı̣́ rî ngbãângbânõ gõꞌdá zãâ gbạ́dú ạ̃dũkũ ãkó. Ãâꞌdô ĩtí.