Tite 3:3 - Kice Manito Ocki Omirwatcimowin

³ Kaie kirano meka weckatc nama ki ki otci waskamateritenano, nama ki ki otci natotenano, kirika ki ki paskewirikonano arotc kekocica. Ki ki pasoweritenano tepirak kitci matci totamokw kaie kitci mireritamihitisoikw. Tarasak ki ki tiperitakosinano matci pimatisiwinik. Ki ki matcitwanano kirika ki ki moctenamowanowok e ici tatakik iriniwok. Ki ki cikerimanowok iriniwok, kaie wirawaw ki ki cikerimikonowok.

Tite 3:3 Iomraidhean Croise

Matio 21:29

‘Nama,’ ki itiko anihi okosa. Aric nanake, aci pitoc ki iteritam anahwe ockinikiw. Ki icaw neta kitikan askik.

Luc Omasinahikan 21:8

Itew Cecoc: “Aiekwamisikw aka kitci paskewirikoiekw. Mitcet meka iriniwok kata takociniwok niticinikasowiniw kitci apatcitatcik, kitci tca itetcik: ‘Nin ni anihi ka ki itespan Kice Manito kitci pe iciticohwatc ota askik kitci akwacimiweritci!’ Kotakihik kata itewok: ‘Aci kata pe iciwepan!’ Akawir aric tapwetowakw.

Jean 8:34

Cecoc itew: “Ohwe ka witamatakok, tapwe ni icinakon: tato iriniw ka pactatitc, tiperimiko pactatowiniw.

Rome iriniwok 11:30

Weckatc kirawaw aka ka cota iriniwiekw nama ki ki otci natotawawaw Kice Manito. Aric anotc ki ki pe otitikonawaw Kice Manito okitimakeritcikewin, osam aka e ki otci natotakik cota iriniwok.

Rome iriniwok 6:12

Aka pakitinamokw pactatowin kitci tiperimikoekw, kaskina tca e aitotamekw, aka kitci totamekw ka ici nataweritamekw kiwiawiwak e nipomakak.

Rome iriniwok 6:17

Mirwatcimatan Kice Manito ohweriw otci, aci tekaci e irikokoteheiekw e natotamekw anihe kiskinohamakewin ka ki pe otitikoiekw, misawatc weckatc e ki tiperitakosiekw pactatowinik.

Rome iriniwok 6:22

Aric ki ki wikotcihikowinawaw pactatowinik e tiperitakosiekopanen kirika Kice Manito kit atoskectawaw, wir e tiperimitakw. Mictahi ki witcihikowaw kitci ici pimatisiekw kotc e ici nataweritak. Nikotin e kicikak ki ka mirikowinawaw kakike pimatisiwin.

Rome iriniwok 6:6

Ki kiskeritenano ohwe: epwamoci kiskerimokw Cecoc, pactati iriniwok kit iteritakositano. Aric tarasak e itatisiikopanen ki tcictaskowateriw tcipaiatikok kirika wir Cecoc ka tcictaskowatakaniwitc, kitci ki tca nipatakaniwok anihe matci itatisiwin notc ka nosanetakaniwok, aka tca kaie awocamec pactatowin kitci tiperimikoikw.

2 Corinthe iriniwok 12:20

Ni sekisin, minawatc takociniane neta ka ici tacikeiekw, aka kitci mirowinaman tan e itatisiekw, peikon kaie kirawaw aka kitci mirowinamekw wapamiekw kaie nin tan e itatisian. Ni kocten kitci kikatoekw, kitci otcinawekerimekw kiwitc iriniwaw, kitci kiciwasiekw, kitci papikanitoekw, kitci marerimitoekw, kitci pokonimitoekw, kitci sasekaiekw, acitc kitci arimihitoekw.

Galatie iriniwok 6:3

Kecpin awik e iteritak “ni micta kicteritakosin,” aka aric tapwe e iteritakositc, wir tipirawe wecimitiso.

Colosse iriniwok 1:21

Kaie kirawaw weckatc ki rawonatawaw Kice Manito. Tarasak ki cikerimatawaw, osam e maratakipan kaskina e ici mamitoneritamekopanen kirika e totamekopanen.

Colosse iriniwok 3:7

Ekoni e itatisiekopanen weckatc mekwata ka pe pactatiekw kipimatisiwiniwak ka pe tiperimikoekopanen anihi pactatowina, epwamoci kiskerimekw Krist.

2 Timothée 3:13

Aric iriniwok ka matci iriniwitcik kaie aniki ka wecimiwetcik eckam kirawe warawik kata icawok e matci totakik. Kata wecimewok owitc iriniwawa, kirika kaie wirawaw kata wecimakaniwiwok.

2 Timothée 3:6

Atita neta e tacitcik natawapamewok iskwewa omikiwamirik e cikimatcik kitci nosanehikotcik. Aniki iskwewok nama mackawisiwok otasperimowiniwak, kiapatc mitcet pactatowiniw e takopitikotcik, e paskewirikotcik kaskina e ici matci nataweritakik.

Tite 1:16

Itewok e kiskerimatcik Kice Manitowa, aric e matci totakik, wapatahiwewok aka e kiskerimatcik. Cikeritakosiwok, nama wi natotamok, kaie tekaci nama kackitawok kitci itotisketcik kekociciriw e ici mirwacinik.

Tite 2:12

Ki kiskinohamakono omirotehewin kitci atimikapowictamokw matci itatisiwin, kaie aka aci kitci nataweritamokw kitci matci totamokw, notc ko e ici pimatisinaniwok ota askik. Kirawe tca icikowisk kitci iteritamokw mekwata anotc e pimatisiikw ota askik, icikowisk kaie kitci itatisiikw, kirika mocak kitci miro nosanehwokw Kice Manito.

Cak ka ki pe ici masinahiketc 1:26

Kecpin awik e iteritak: “nit aiamihawatisin,” aka aric e kackitatc kitci nanakatcihitisotc aka arotc kitci ici arimwetc, wiecimitiso. Nama wiec irapataniw otaiamihewin.

1 Pien 1:14

Mocak ki ka sapitowawaw Kice Manito kirika nama ki ka wi makockatcitanawaw kekwan ka maratak ka ki ici nataweritamekopan weckatc epwamoci kiskerimekw.

Ka ki ici wapatahakaniwitc Jean 12:9

Ki orowepinakaniwiw anahwe micta atikocimakan. Enko na weckatc micta kinepikw ka icinikatakaniwitc Matci Manito, kekotc ma Satan, ka wecimatc kaskina iriniwa ota askik. Ki iciwepinakaniwiw neta askik, kirika otacerima kaie wirawaw e ki iti acotci wepinakaniwitcik.

Ka ki ici wapatahakaniwitc Jean 13:14

Tekaci onicimepan iriniwa ota askik, e wapatahaspan e ici mata kackitatc, e ki mirakaniwitc ani kitci ici kackitatc, mekwata e tacikerispana neta nictam matci awesisa. Ki wikosimew ota ka tacikeritci askik kitci ociharitci manitokana tepirak kitci kicterimakaniwiritci nictam anihi matci awesisa ka ki apinehwakaniwiritci, micta mokomaniw e ki totcikaterik, minawatc kiapatc e pimatisiritci.

Ka ki ici wapatahakaniwitc Jean 18:2

Ki tepwew e micta kiciwetc: “Ki pakitin! Micta otenaw Babylone ki pakitin! Aci anotc matci manitowok tacikewok neta otenak, kotc e aicinakositcik. Kaskina pirecicak, kaie awesisak aka e mirwinakositcik, iriniwok aka ka sakihatcik e wapamatcik, ekota neta kaie wirawaw e ici pimatisitcik.