Ka ki ici wapatahakaniwitc Jean 8:5 - Kice Manito Ocki Omirwatcimowin

⁵ Minawatc aceriw ki otapinam aniheriw osawo coria orakaniw. Ki mockinam e actatc ickoteriw, neta e ki otinak ka ici aiamihe pakitinikaniwonik, e iciwepinak askik. Ki petakosiw onimiskiw e micta kiciwetc, e wawaskoreparik, kaie e kwekok.

Ka ki ici wapatahakaniwitc Jean 8:5 Iomraidhean Croise

Matio 24:7

Kata mamowinehitowok iriniwok ite kotc e ici aitaciketcik. Peikw okimaw kata nta natoparictawew kotakihi okimawa. Kata kokataniwon, kaie kata kwekon atita e aitaskamikak.

Luc Omasinahikan 12:49

“Ni ki pe ican ota askik ickote kitci petaian. Mictahi tca ni nataweriten aci kitci iskahikatek!

Ka ki aitotiskeritci Cecoc otarotakana 16:26

Kek keskat ki micta kowikoniw. Ki aiatcipariniw askiriw neta ka ici acterik aniheriw kipohotokiwamiriw. Tecikotc kaskina ickwatema ceparino kirika apikopariniw opiwapiskwapimiwawa kaskina aniki ka kipohwakaniwitcik.

Ka ki aitotiskeritci Cecoc otarotakana 4:31

Ka ickwa aiamihatcik, neta ka tacikewaspan ka ki ici mawotcihitowaspan ki aiatcipariniw. Kaskina e tacitcik ki mockineckakowok Miro Manitowa, kirika ki pa tipatcimowok Kice Manitowa otitewiniw e sokeritakik.

Ka ki ici wapatahakaniwitc Jean 11:13

Ani apitc mekwata ki micta kwekon. Mitatowaw e ici tipahikatek anihe micta otenaw, peikw ki korokoskomikiparin. Nicowasowaw kice mitato mitana iriniwok ki nipowok e ki kwekonik. Aniki kotakihik iriniwok ki micta sekisiwok, kaie ki micta mirwatcimewok Kice Manitowa icpimik ka tacikeritci.

Ka ki ici wapatahakaniwitc Jean 11:19

Minawatc Kice Manito okitci aiamihe mikiwam, neta wakwek ka takonik, ki pe cepariniw. Kek ki pe nokon neta pwete ka kitcitwaweritakok, neta e masinaterik Kice Manito otacotamakewin. Ki pe wawaskoreparin, kirika e ki pe koctasitakok kaie e petakositc onimiskiw. Ki kwekon kaie e ki micta sesekak.

Ka ki ici wapatahakaniwitc Jean 4:5

Ekota neta e otci orowiparikipan okimaw tetapiwakanik e micta waskoreparik. Kaie onimiskiw e petakosispan e micta kiciwetc. Nicowatcinopana wactenamakana ka kanowaskoki e ki iskahikateki, neta nikanik anihe okimaw tetapiwakanik. Anihi wactenamakana ka ki iskahikateki, tarasak enko ni aniki e nicowatcitcik manitowok ka atoskectawatcik Kice Manitowa.

Ka ki ici wapatahakaniwitc Jean 6:12

Minawatc kiapatc ni ki wapamaw Maritcenic e pikopitak kipotcickiwokisikaniw, ekoni aci nikotwaso. Kek ki micta kwekon. Pisimw tekaci iti makatewosiw, mia wikasi tekaci e makatewekik, awik e apatcitatc e cikawitc. Minawatc tipiskaw pisimw tekaci iti mikosiw, mia miko.

Ka ki ici wapatahakaniwitc Jean 8:3

Minawatc kiapatc peikw kotak aceriw ki pe nta nanipowiw neta ko ka ici aiamihe pakitinikaniwonik. Takonamopan orakaniw ka osawo coriawapiskowonik, neta ko e ici iskahikaterik sakatakaniw ka miromakonik. Nipara sakatakaniw ki mirakaniwiw kitci iskahak Kice Manitowa otci neta ka ici aiamihe pakitinikaniwonik, kitci icpipanik kaie peikon kaskina Kice Manito otirinima otaiamihewiniw. Neta ka ici aiamihe pakitinikaniwok, osawo coria ki totcikatepan e ocitakaniwok, nikanik e actekipan okimaw tetapiwakanik.