Ka ki ici wapatahakaniwitc Jean 11:8 - Kice Manito Ocki Omirwatcimowin

⁸ Ickwa nipahate, ekota neta ke pa miciniritci owiawiwariw meskanak micta otenak, neta ka Tiperimikotcik ka ki ici tcictaskowatakaniwiritci tcipaiatikok. Arica icinikatew anihe otenaw Sodome, matci kaie icinikatew anihe otenaw Égypte.

Ka ki ici wapatahakaniwitc Jean 11:8 Iomraidhean Croise

Matio 10:15

Tapwe ohwe ka witamatakok: takociparike anihe ke kicikak kitci tipaskonikaniwok, aniki neta otenak ka taciketcik aka ke mireritakik kitci tacikeiekw kirawe wirawaw mictahi kata anwerimakaniwiwok patok aniki weckatc ka matci iriniwiwaspan ka tacikewaspan neta otenak Sodome kirika Gomorrhe.”

Ka ki aitotiskeritci Cecoc otarotakana 9:4

Ki pakicin kaie ki petam e itakaniwitc: “Saul, Saul, kekwan wetci nekatcihiin?”

Hébreux iriniwok 13:12

Ekoni wetci kaie wir Cecoc ki nipotc orowitimik otenak, kitci kasihamawakaniwitcik iriniwok opactatowiniwaw, wir tipirawe omikw e ki macikowitakaniwonik.

Hébreux iriniwok 6:6

Peikon ki koski pakiciniwok kitci ici pimatisitcik weckatc e ici pimatisiwakopanen epwamoci kiskerimatcik Cecoca. Aniheriw e itotisketcik, tarasak mia e koski tcictaskowatatcik tcipaiatikok Kice Manito Okosa, kaie tarasak kaskina wiec e aitatcik e marerimatcik kitci wanerimakaniwiritci.

2 Pien 2:6

Minawatc Kice Manito ki anweritam aniheriw otenariw Sodome kirika Gomorrhe ka icinikaterik. Ki tcakaskisam aniheriw otenariw, ickoteriw e ki pakitinak. Ekoni ka totak kitci wapatahiwetc ke iti iciwepasiritci ka matci iriniwiritci.

Jude 1:7

Mikaweritamokw kaie anihi weckatc otenawa Sodome kirika Gomorrhe ka icinikateki, kaie anihi otenawa papecotcik ka aitakoki. Aniki iriniwok ka tacikewaspan neta otenak matci totamwakopan kaie wirawaw, mia anahweriw matci aceriwa ka ki totamirispana, pacikwatisiwinik e ki ici matcatcik, kaie kotakeriw ka micta maratanik e ki aitotakik. Aci mekwata kicakonakaniwiwok, kakike ickotek e ki arakaniwitcik. Ekoni tca ka otci kiskeritakok aka nte kitci itatisinaniwok.

Ka ki ici wapatahakaniwitc Jean 11:13

Ani apitc mekwata ki micta kwekon. Mitatowaw e ici tipahikatek anihe micta otenaw, peikw ki korokoskomikiparin. Nicowasowaw kice mitato mitana iriniwok ki nipowok e ki kwekonik. Aniki kotakihik iriniwok ki micta sekisiwok, kaie ki micta mirwatcimewok Kice Manitowa icpimik ka tacikeritci.

Ka ki ici wapatahakaniwitc Jean 11:9

Iriniwok kaskina papitoc e aicinakositcik ota askik, kaskina e tato otenwesitcik, kaskina tatowek e ici arimwetcik, kaie kaskina wiec e wetcitcik kata kanawapatamwewok owiawiwariw anihi e niciritci iriniwa nicto kickwa acitc apita irikik. Nama kata pakitinamok tecikotc kitci rikwaskatakaniwiritci.

Ka ki ici wapatahakaniwitc Jean 14:8

Minawatc kotak aceriw ki pe nosanehwew anihi nictam aceriwa, e pe itetc: “Ki pakitin! Micta otenaw Babylone ki pakitin! Iriniwok nta ka taciketcik ki micta nosanetawok pacikwatisiwiniw, kaie e ki wikosimatcik kaskina iriniwa e taciritci kotakihik askik kaie wirawaw kitci nosanetaritci. Tarasak ki minihewok ominicapomiwaw ke ki otci micta kiwockwepiritci!”

Ka ki ici wapatahakaniwitc Jean 16:19

Anihe micta otenaw Babylone tekaci ki oraparin, e nicto tetawopariki, kaie kaskina otenawa ota askik tekaci ki korokotawokiparin. Kice Manito nama ki otci onikatew neta ka tacikeritci micta otenak Babylone. Ki wapatahew e apitc kiciwahikotc, tarasak e ki miratc orakaniw kitci minikweritci ominicapom ka mackawakaminik. Anihe minicapo, enkweriw omicta okiciwasiwin Kice Manito.

Ka ki ici wapatahakaniwitc Jean 17:1

Minawatc peikw ani e nicowatcitcik aceriwok ka takonakik e nicowatcinik orakaniw ki pe icaw, e icitc: “Petcimote. Ki ka wapatahitin ke totcikatek ke ici anweritcikatek micta otenaw ka ici takok rarewak mitcet sipik. Anihe micta otenaw, mia iskwew orina ka nosanetatc matci pimatisiwiniw e iteritakok.

Ka ki ici wapatahakaniwitc Jean 17:18

“Minawatc anahwe iskwew ka ki wapamatc, enko ni micta otenaw. Okimaw ka tiperitak neta otenak, enko na ka tiperimatc kaskina kotakihi okimawa ota askik.”

Ka ki ici wapatahakaniwitc Jean 17:5

Oskitikok ki masinateriw icinikasowiniw peikw otenariw ka katcicterik wa itemakanik, e itasinaterik: “Nin micta otenaw Babylone, okawiwawa kaskina iskwewok orina ka nosanetatcik matci pimatisiwiniw kaie kaskina ka matci totakik ota askik.”

Ka ki ici wapatahakaniwitc Jean 18:10

Warawik kata nanipowiwok, ke apitc koctakik kitci ici kicakonakaniwitcik kaie wirawaw ka ki ici kackitamatisotcik. Kata itewok: “Arimiparin! Arimiparin neta Babylone otenak! Micapan anahwe otenaw, kaie micta mackawisimakanopan! Tepirak peikwo tipahikan ki taciketew kitci anweritcikatek!”

Ka ki ici wapatahakaniwitc Jean 18:18

Ki notakosiwok e wapatakik e akwapiterik aniheriw otenariw e ickwaterik, e itetcik: “Nama wiskat ki otci takon otenaw e apitc mikinakok anahwe towi!”

Ka ki ici wapatahakaniwitc Jean 18:2

Ki tepwew e micta kiciwetc: “Ki pakitin! Micta otenaw Babylone ki pakitin! Aci anotc matci manitowok tacikewok neta otenak, kotc e aicinakositcik. Kaskina pirecicak, kaie awesisak aka e mirwinakositcik, iriniwok aka ka sakihatcik e wapamatcik, ekota neta kaie wirawaw e ici pimatisitcik.

Ka ki ici wapatahakaniwitc Jean 18:21

Minawatc peikw aceriw ka micta mackawisitc ki otapinew micta asiniwa, mitowi ka apatisitc e pakickihwakaniwitc mirominockw. Ki iciwepinew kitcikamik, e itetc: “Ekoni ke apitc soki totcikatek, orapitcikateke micta otenaw Babylone. Nama kaie wiskat awocamec kata nokon.

Ka ki ici wapatahakaniwitc Jean 18:24

Ekota neta Babylone otenak ka ki ici macikowinik omikowaw iriniwok ka ki pe nikan tipatcimotcik kaie kotakihi Kice Manito otirinima, acitc kaskina ka ki nipahakaniwitcik ota askik.”