Mark 16:19 - Kice Manito Ocki Omirwatcimowin

¹⁹ Ka ickwa ni ici aimihatc otirinima Teperitciketc Cecoc, ki ocpickaw, wakwek e icatc. Ki nta witapimew Kice Manitowa. Onihiwinik ki ici apiw.

Mark 16:19 Iomraidhean Croise

Mark 16:20

Ki matcawok aniki Cecoc owitcewakana kaskina wiec e nta tipatcimotcik Mirwatcimowiniw. Ki witcihikowok Teperitcikeritci ani e ici otamirotcik. Ekota ni ka otci kiskeritcikaterik tapwe e ki pe mirikotcik okiskinohamakewiniw, e ki tca mirikotcik kaie kitci mata kackitatcik.]

Luc Omasinahikan 22:69

Anotc anahwe Ka ki pe iriniwihitisotc kata apiw onihiwinirik Kice Manitowa e mackawisiritci.”

Luc Omasinahikan 9:51

Aci kekatc ke otcitciparinik aniheriw e kicikarik ke ocpickatc wakwek, Cecoc ki oreritam otcitakotc pitama kitci icatc Jérusalem otenak.

Jean 13:1

Aci kekatc aiamihe makocaniwonikopan, Pâque ka icinikatek. Aci kiskeritamokopan Cecoc e otcitciparinik kitci nakatak askiriw, kitci ki natawapamatc Otawiwa. Mocak ki sakihepan otirinima ota askik, kaie ki wapatahew e sakihatc nac mamitcitc kicikarike.

Jean 16:28

Notawi otitawinik ni ki pe otcin, kirika ota askik ni ki pe ican. Aci ni ka nakaten ohwe aski, Notawi kitci natawapamak.”

Jean 17:13

“Aci ki ka natawapamitin. Wetci aiteian kiapatc anotc mekwata e witci tacikemakik ota askik, nimireritamowiniw kitci ki takonik otehiwak, tekaci kitci mireritakik.

Jean 20:17

Itew Cecoc: “Akawir matcikonici. Nama sa moci ni ki otci kiwan icpimik kitci natawapamak Notawi. Matca aric nta witamawik niwitcicanak aci kitci natawapamak Notawi icpimik, kaie kirawaw Kotawiwaw, Nikice Manitom kitci natawapamak, kaie kirawaw Kikice Manitomiwaw.”

Jean 21:15

Ka ickwa mitcisotcik, Cecoc itew anihi Simo Piena: “Simo, Jean okosa, kirawe ia ki sakihin patok aniki wirawaw?” “Ehe, Teperitcikein, ki kiskeriten e sakihitan,” itew Simo Pien. Itiko tca Cecoca: “Nakatawerimik nimaritcenicicimak.”

Jean 21:22

Cecoc itew: “Kecpin nin e nataweritaman kitci pimatisitc nac minawatc kitci takocinian, nama wiec iteritakon kir otci. Kir tca, nosanehici.”

Jean 6:62

Tan ki ta iteritenawaw kecpin wapamekwe anahwe Ka ki pe iriniwihitisotc ocpickate, nete e icatc ka ki ici taciketc ickotok ka ici tacikespan!

Ka ki aitotiskeritci Cecoc otarotakana 2:33

Ki ici opickowakaniwiw Kice Manitowa onihiwinik, kaie Kotawinowa ki miriko Miro Manitowa, kotc ka ki ici nespi tapweritci. Kaie kirano ki ki mirikowinano anahwe Miro Manito. Enko anihe ka ici wapatamekw kaie ka petamekw anotc.

Ka ki aitotiskeritci Cecoc otarotakana 3:21

Aric anotc, pitama ni, wakwek tacikew anaha Cecoc Krist, nac kitci otcitciparinik aniheriw e kicikarik Kice Manito kitci wecitatc kaskina kekociciriw, mia ocki kitci iteritakonik. Enkweriw meka mia aci weckatc ka ki ici witamakerispana anahweriw onikan tipatcimo irinima e kitcitwawisiritci, weckatc ka ki pe iciticohwatc kitci tipatcimoritci wir otci.

Rome iriniwok 8:34

Nama tca awik kata ki atamerimew! Cecoc Krist meka wir tipirawe ka ki nipotc, minawatc awocamec ki totam, ki apitcipaw, aci e apitc neta ka ici kicteritakonik onihiwinik Kice Manito kirika pakoserimew kirano otci.

Colosse iriniwok 3:1

Ka apitcipatc Krist, tarasak kaie kirawaw ki ki apitcipahikowinawaw. Nanto kiskeritamokw tca anihi kekocica ka ici kicteritakoki wakwek, neta e ici apitc Krist onihiwinik Kice Manitowa.

1 Timothée 3:16

Tapwe ni aci ketcinaweritakon anihe ka katcicterikipan, anotc ka wapatahiwetc Kice Manito: e apitc kicteritakok anihe ka ici tapweritamokw! Krist ki pe nokosiw, mia irinik e icinakositc. Ki ki wapatahikowinano icikowisk e iteritakositc, Miro Manitowa e ki wapatahiweritci. Aceriwa ki wapamiko. Iriniwa ota askik ki pa tipatatamiriwa otarimwewin. Ki tca tapwerimiko mitcet iriniwa ota askik, minawatc icpimik ki iciwirakaniwiw e ocpickatc oticperitakosiwinik e icatc.

Hébreux iriniwok 1:3

Cecoc wapatahiwew e apitc kicteritakosiritci Otawiwa Kice Manito. Kaskina e iteritakosiritci Otawiwa, ekoni kaie wir mia e iteritakositc. Tiperitam kaskina e ici takonik e irikokoskamikarik kaie tiperimew kaskina ka pimatisiritci, otitewin e totak e mackawisimakanik. Ka ickwa pakiteritak opimatisiwin kitci ki otci kasihikaterik kaskina iriniwa opactatowiniw, ki nta witapimew Otawiwa ka mawotci kicteritakosiritci wakwek, onihiwinik e ici apitc.

Hébreux iriniwok 12:2

Kanawapamatan mocak Cecoc. Wir meka ka ki miritokw nictam kitci asperimototawokw, kaie mocak ke witcihitokw e asperimoikw nac kitci ickwaparik kipimatisiwinino. Ki miwotaw e ki mirakaniwitc kitci nipotc tcipaiatikok. Nama ki otci waneritam aniheriw e ki otcinetc, misawatc ko e wanerimakaniwitc awik e ici nipahakaniwitc. Kiskeritamokopan meka Kice Manitowa e kanaweritamakotc nikanik kitci mireritak. Aci tca anotc apiw onihiwinik Kice Manitowa e ici apiritci okimaw tetapiwakanik.

Hébreux iriniwok 4:14

Kaketin kanaweritetan anihe kitasperimowinino ka pa tipatatamokw. Taw meka kitci makatewokorew ka mawotci kicteritakositc mocak ke witcihitokw, aci wakwek ka ki ocpickatc kitci witcewatc Kice Manitowa. Enko anahwe Cecoc, Kice Manito Okosa.

Hébreux iriniwok 6:20

Ekota neta Cecoc ka ici pitaketc kirano otci, epwamoci pitakeikw kirano. Ki mirakaniwiw kakike kitci kitci makatewokorewitc, mitowi weckatc Melkisédec ka ki kitci makatewokorewispan.

Hébreux iriniwok 7:26

Enko na Cecoc kikitci makatekoremino ka natawerimokw. Kitcitwawisiw. Tekaci nama takoniw ka maratanik otehik. Nama kaie wiskat ki otci pactatiw. Tekaci pitoc iteritakosiw kirika iriniwok mocak ka pactatitcik. Ki icperimiko Kice Manitowa, icpimik kitci witapimatc neta wakwek.

Hébreux iriniwok 8:1

Enko ohwe ka mawotci kicteritakok mekwata ka taci witamatakok: ki tarano aci kitci makatewokorew e witcihitokw, nete wakwek e taciketc, e witapimatc Kice Manitowa ka mawotci mackawisiritci, onihiwinik e ici apitc.

Hébreux iriniwok 9:24

Nama meka ki otci pitakew Cecoc rakasimonikiwamik ka ici aiamihaniwonik iriniwa ka ki ocitaritci, mia kecpin e ki keskinowapatcikaterik tapwe otitawin Kice Manito e iteritakonik. Ki pitakew tapwe wakwek. Ekote nete e ici taciketc anotc mekwata, Kice Manitowa e witci tacikematc, mocak e arimwetc kirano otci.

1 Pien 3:22

Ki ocpickaw wakwek, aci e apitc onihiwinik Kice Manitowa. Ekota neta e ici okimawitc, aceriwa e tiperimatc acitc kaskina manitowa neta ka nikaniwiritci, acitc kaskina kotakihi ka mackawisiritci.