Lukas 9:26 - Manobo Ata

²⁶ Kagi ni Hisus, “Ko ogkasipod ka songo otow to ognangon to koddi ka igbuyag din woy ko ogkasipod to ig-anad ku kuntoon, sikandin ka igkasipod to Kakoy to Koot-otawan to poglibong din kai to tano lagkos to kandin no kalayagi woy ka kalayagi to Amoy rin mgo diwata no suguonon to Magboboot.

Lukas 9:26 Iomraidhean Croise

Matiu 16:27

Nò, koddi no Kakoy to Koot-otawan kai to tano, magaan a oglibong kai to tano no dakol ka kabogbogan ku ligkat to kabogbogan to Amoy ku no Magboboot woy ogdumaan a to mgo diwata no suguanon din. Nò, duon igbogoy ku to tibo no mgo otow, tagsagboka, no litos to nighimu ran kai to kalibutan.

Matiu 25:31

Sikoddi no Kakoy to Tibon Koot-otawan, ko oglibong a oyow koddi on ka Labow no Igbuyag kai to tano, ogdumaan a to mgo diwata no suguanon to Magboboot. Ogpinnuu a to pinnuuanan to labow no Igbuyag no dakol ka kabogbogan ku woy ogkitoon ka karoyawi ku.

Matiu 26:64

Woy nigtabak si Hisus to, “Sikan on ian ka innangon nu, woy ognangonan ku sikaniu no koddi no Kakoy to Tibon Koot-otawan, ogkitoon a now uromo no ogpinpinnuu dio to kawanan to Magboboot. Songo ogkitoon a now no ogpokountud to gapun no oglibong a dini to soin no kalibutan.”

Markos 8:38

Nigparagas nigkagi si Hisus to, “Ka mgo otow kai to soin no kalibutan kuntoon, maroot lagboy ka oghimuon dan woy nig-ongkoran dan ka Magboboot. Nò, ka sika mgo otow, agad hontow sikandan, ko igkasipod dan to ognangon to koddi ka Igbuyag dan, woy ko igkasipod dan to ig-anad ku, sikoddi no Kakoy to Tibon Koot-otawan, songo igkasipod ku sikandan to poglibong ku kai to tano. No, to sika poglibong ku, duon kai to koddi ka kabogbogan to Amoy ku no Magboboot. Lagkos, ogduma koddi ka mgo diwata no suguanon din.”

Huan 12:43

Madmarayow kandan ka pogsayo to duma ran to sika pogsayo to Magboboot kandan.

Huan 5:44

Ogmonuon now to ogtuu koddi su ogmol-olinoy kow ro ogmasaysayooy di waro kow nigpoomot to ogkasayo kow to bugtung no Magboboot.”

Hinimuan 10:22

Kagi ran ki Pedro to, “Dio koy nigligkat ki Kapitan Kornilio. Maroyow no otow sikandin woy ogsimboon din ka Magboboot. Ogtahuron sikandin to tibo no mgo Hudiu. No ian noy inghongkai su duon diwata to Magboboot no nigsugu ki Kornilio to oyow ogpohongkai koy on no ogpaangoy koykow. Igparuma ka dio to baloy rin oyow ogpakapamminog koy ko nokoy ka ignangonnangon nu kanami.”

Ruma 1:16

Ian su kono a ogkasipod no ognangonnangon to soini no Maroyow no Nangnangonon tongod ki Hisu Kristu, su agad hontow no ogtuu, ko Hudiu woy ka kono no Hudiu, ogkapangabangan sikandan oyow ogkaawo on ka iglogpad poron to salo dan. No ka sikan no pogpangabang, ogligkat to dakol no kabogbogan to Magboboot.

2 Kurintu 12:10

Ogkarago a ro ko duon mgo igmalotoy to lawa ku, woy ko duon ogsumsumpalit kanak, woy ko duon igkohirapi ku woy ko duon igkabaybayari ku woy ko duon duma no mgo kohirapi ku su ligkat to pogtuu ku ki Hisu Kristu. No ian su, ko malotoy a ogkabogayan a to kabogbogan ni Hisus.

Galasia 6:14

Di sikanak atag, sagboka ro ka ogsayoon ku no ian ka kamatayon to Lagboy no Igbuyag ta no si Hisu Kristu no dio to krus no inliwan kanta. No ligkat to sikan ka koiniatan to mgo otow no waro nigtuu kai to kalibutan, waro pulus ku, no to doromdom dan, songo waro pulus dan kanak.

1 Timoteo 5:21

Ka Magboboot, woy si Hisu Kristu, woy ka mgo diwata to Magboboot no pig-alam din, ian ku ogparinogon to soini no igsugu ku koykow, Timoteo su og-awoson no ogpaagad-agaran nu ka soini no mgo insugu ku. Ko ogpakaboboot ka, kono nu ogpangabangan ka agad hontow no makasasalo.

2 Timoteo 1:12

Sikan ian to ogkabaybayaran a kuntoon. Di agad naan, waro a masipod to soini su natagaan kud on ian ka ogkasaligan ku, woy waro igduwaruwa ku to ogtantanuran din ka sikan no talabau no impatalipun din kanak taman to sikan no allow no oglibong si Hisus kai to soini no tano.

2 Timoteo 2:12

Ko og-aguantoon ta ka igkabaybayari ta kuntoon uromo ogbogayan ki to katondanan to ogbulig kandin to pog-alap to katondanan din to pandatuan. Di ko ogligalon ta sikandin, songo ogligalon ki nikandin.

Hibriu 11:26

Goinawa rin ian to og-aguantoon din ka igmasakit to goinawa rin su ka pog-iman-iman din to sikan no Im-imanan to mgo Koot-otawan no si Kristu. Hondoi ka dakoldakol no pulus ni Moisis ko kono no ka sikan no pog-aguanta din? Kono no ian din pad pulus ka dakol no igkaratui dio to Ehipto su nigdoromdom din ka sikan no igkasayo kandin uromo.

Hibriu 13:13

Sikan ian mgo sulod, og-awoson to songo oglibuwas ki to lunsud no oghondio ki kandin oyow ogpakalagkos ki to kasiporan din.

Hudas 1:14

Si Inuk no ian igkahon-om no pinanganak ligkat ki Adan, impanoy rin innangon tongod to sikan no mgo otow to kagi rin to, “Ogdatong on ka Lagboy no Igbuyag ta no ogdumoon din ka mohon-ing no malan no mgo diwata no suguanon din

Impapitow 1:7

Nò, panagana kow. Oglibong si Hisu Kristu kai to tano no ogpakaruma to mgo gapun. Tibo no mgo otow, agad ka niglansang kandin dio to krus, ogpakakita kandin. No ka tibo no mgo koot-otawan kai to tano, ogpakapandawot to igkalango tongod kandin. Malogot ian.

Impapitow 20:11

Nò, pogpitow ku no duon dakol woy maputi no pinnuuanan to pandatuan, woy duon on ogpinpinnuu to sikan. Nanaawo ka tano woy ka langit dio to tangkaan din, no konad on ogkitoon.

Impapitow 21:8

Di ka otow no ogkahallok no og-unug kanak, woy ka kono ogkasaligan, woy ka oghimu to mgo maroot, woy ka ogpamunu, woy ka oghimu to maroot to kono no asawa ran, woy ka oghimu to mgo pamulinganon, woy ka ogsimba to mgo inotow-otow, woy ka og-uubat, igdogpak sikandan tibo dio to ogliabliab no hapuy to asupri. No ian ka igkararuwa no kamatayon.”

Impapitow 3:5

Ka otow no kono ogparoog ki Satanas, ogpakinaboon ku uromo to maputi. Woy kono ku og-awoon ka mgo ngaran dan dio to sulatanan to mgo ngaran to mgo otow no ogbogayan to kouyagan no waro katamanan. No ko dio ad on to tangkaan to Amoy ku no Magboboot woy to tangkaan to mgo suguanon din no mgo diwata, ogtokoron ku to sakup ku sikandan.