Lukas 4:41 - Manobo Ata

⁴¹ Woy puun to mohon-ing no mgo otow, nanlibuwas on ka mgo busow, no ogbabansagon ka mgo busow to, “Sikoykow naan ian ka Anak to Magboboot.” Di nigsaparan ni Hisus ka mgo busow no kono din ogpakagion su nataga ka mgo busow to si Hisus, ian ka Kristu no Im-imanan to mgo Koot-otawan.

Lukas 4:41 Iomraidhean Croise

Matiu 26:63

Di waro nigkagi si Hisus; waro tabak din. Nighutuk nig-inso ka Labow to mgo Talagpanubad, to, “Ogkoiniat a no kai ki to tangkaan to Magboboot, nangoni koy ko sikoykow ka Im-imanan to mgo Koot-otawan no ian ka anak to Magboboot.”

Matiu 4:3

Nigdani si Satanas ki Hisus oyow ol-ologan din sikandin. Kagi ni Satanas ki Hisus to, “Ko koykow ka Anak to Magboboot, sugua nu soini no mgo batu su oyow ogbaluy no paan no koonon nu.”

Matiu 8:16

Ko magaan on ogmarusilom, mohon-ing ka mgo otow no nanhondio ki Hisus. Nanduma ran ka mohon-ing no mgo otow no pigbusawan no pigdogil ni Hisus ka mgo busow pinabayo to kagi rin do. Songo pigbawian din ka mgo otow no nandaralu.

Matiu 8:29

Nigbabansagon sikandan no nig-inso sikandan ki Hisus to, “Koykow no Anak to Magboboot, nokoy ka tuud nu kanami? Oglogparan koy nikoykow agad ko waro pad nokouma ka allow no iglogpad?”

Matiu 8:4

Nò, kagi ni Hisus kandin, “Pamminog ka Usi, kono nu nangoni ka agad hontow to soini no nighimu ku koykow. Di hondio ka to talagpanubad dio to Dakol no Ampuanan oyow ipapitow nu kandan to noulian kad on to sikan no kogang nu. Nò, bogoy ka to Magboboot to insugu ni Moisis dongan no igtubad. Tumana nu soini su ian ka igpoitaga to tibo no mgo otow to noulian kad on to kogang nu.”

Markos 1:25

Di nigsaparan ni Hisus ka busow no kagi rin, “Hagtong kad no ogkagi; libuwas kad kai to diralom to soin no lukos.”

Markos 1:32

Ko mahapun on no magaan on ogkatangkob on, nanduma to mgo otow ka tibo no duma ran no nandaralu woy ka pigbusawan.

Markos 1:34

Nò, nabawian ni Hisus ka mohon-ing no mgo otow no duon loinloin no oggoramon dan woy nandogil din ka mgo busow no nigsolod to diralom to duma no mgo otow. Wa din pakagia ka mgo busow su nigtokod dan to sikandin ka Anak to Magboboot.

Markos 3:11

Woy ka mgo otow no nasoloran to busow, ko nigkita ran si Hisus, nigluhud duon to tangkaan din no nigbabansagon to, “Sikoykow ka Anak to Magboboot.”

Lukas 4:39

Nigdani si Hisus no nigsasindog dio to longod to anugang ni Simon no pigdogil on ni Hisus ka moinit dut lawa rin woy piglibuanan on do no nabolow on ka lawa rin no nig-onow nigparagas nigsasindog on ka boi no sikandin ka nighon-at to koonon woy ki Hisus.

Huan 20:31

Di insulat kud soini, oyow ogpakatuu kow to si Hisus ka Anak to Magboboot woy sikandin ka Im-imanan to mgo Koot-otawan. Agad inkasulat oyow ogkootawan kow no waro katamanan ko ogtuu kow on kandin.

Santiago 2:19

Ogtuu ka to duon sagboka ro no Magboboot. Maroyow, di kono pad no litos no pogtuu ka sikan su songo ogtuu ka mgo busow to duon sagboka ro no Magboboot no ogkolkolon to igkahallok dan to sikan no iglogpad din kandan uromo.