Lukas 22:27 - Manobo Ata

²⁷ Pananglitan,” kagi ni Hisus, “og-inso a kaniu ko hontow ka oglabow, ka otow no ogkoon dio to lamisaan woy ko ka otow no oghonaton ka koonon? Ian oglabow ka otow no ogkohonatan to koonon, di ka koddi no batasan ko kai a to kaniu, unawa a to suguonon now.”

Lukas 22:27 Iomraidhean Croise

Matiu 20:28

Ian oyow ogkounawa kow koddi no Kakoy to koot-otawan kai to kalibutan to waro a nighondii oyow koddi ka ogpangabangan to mgo otow, di nighondii a oyow ogpakapangabang a kandan woy koddi ka ogpakapangabang to mohon-ing no mgo otow pinabayo to kamatayon ku.”

Lukas 12:37

No ogkapulusan lagboy ka sika mgo suguonon ko ogpokouma on ka kandan no igbuyag, agad liwaro to karusiloman woy ko marani ogkapawo, no ogkitoon din ka mgo suguonon din to waro ian mohirogo su nigpanagana. Ognangonan ku sikaniu,” kagi ni Hisus, “ka sikan no igbuyag dan, oghalinon din ka kinabo din no ogpapinnuuon din ka sikan no mgo suguonon din no kandin on ka ogpanhonat to koonon dan. Ogkarago ian ka sikan no mgo suguonon din no nakapanagana to igbuyag dan.”

2 Kurintu 8:9

Nataga kow, mgo sulod, to dakol ka igkohoy-u to Lagboy to Igbuyag ta no si Hisu Kristu, su agad to datu lagboy sikandin dio to Langit di ko nighondiid on to tano, nohimu on no publi. No ka tuud to sikan to oyow ligkat to kandin no ingkapubli, ogkohimu kinow on no datu to pogtuu ta.