Kulusas 1:23 - Manobo Ata

²³ Di og-awoson now to oghogoton now on ian ka pogtuu now to tu-tuu ian no nangnangonon, no ogsagbokoon now ro ka goinawa now dio ki Hisus. Ian su oyow kono ogkawoil ka pog-iman-iman now to tibo no nokani no ingkanangon kaniu no nigdinog now ka soini no Maroyow no Nangnangonon tongod ki Hisu Kristu. Sikan ian no nangnangonon ka naalap-alap on woy nanangnangonan on dio to agad hondoi no otawa kai to ampow to soini no kalibutan. No sikanak no si Pablo, nigsugu a to oyow ognangonnangon a to soini no Maroyow no Nangnangonon.

Kulusas 1:23 Iomraidhean Croise

Markos 16:15

Duon dod insugu ni Hisus kandan. Kagi rin, “Ogmanhipanow kow dio to tibo no mgo ugpaanan kai to soin no kalibutan woy pannangoni now ka tibo no mgo koot-otawan to Maroyow no Nangnangonon.

Lukas 22:32

Di nig-ampuan ku sikoykow, Pedro, oyow kono ogkaroog ka pogtuu nu koddi,” kagi ni Hisus, “woy ko ogpokolibong kad dini to koddi to malogot no dalan, hogota nu ka pogtuu to mgo duma nu.”

Huan 15:6

Sikan no otow no kono ogpalinggalat dii to koddi, ogkounawa sikandin to sugpang no ogtamporon dio to lawa rin no ogkagangow on. Oglimuron ka mgo nagangu no sugpang woy ogsilaban on soini.

Hinimuan 1:17

Di duma ta rod nokani si Hudas no songo nig–amut to katondanan ta no mgo suguanon ni Hisus. Ian su agad nokoy no imbogoy ni Hisus kanta no mgo hinimuan, songo ingkasalig din dod ki Hudas,” kagi ni Pedro.

Hinimuan 1:25

no igliwan to katondanan woy mgo hinimuan ni Hudas. Ian su suguanon din dod porom ni Hisu Kristu sikandin di pig–ongkoran din ka katondanan din no nakaparagas no oghondio to ugpaan no ogpakalogpad kandin.”

Hinimuan 1:8

Dokad di ko ogdatongan kow on to Gimukud to Magboboot, ogbogayan kow on to kabogbogan, no oghimuon kow on no mgo talagmalogot to igpaanad ku kai to soini no lunsud to Hirusalim, woy dio to tibo to sikan no probinsia to Hudia woy dio to Samaria, woy dio to katamanan to soini kalibutan.”

Hinimuan 11:23

No to pogkouma rin dio to Antiokia, lagboy no narago su pigkita rin on to nohoy–uan to Magboboot sikandan. No nig–os–osonan din sikandan to oyow ogkohogot dan ka pogtuu ran to Lagboy no Igbuyag ta no si Hisus oyow agad ogkoomonu, ogmasalig ka pogtuu ran.

Hinimuan 14:22

No nig–os–osonan dan ka goinawa to mgo otow no nigtuu ki Hisus woy nigtalosonan dan sikandan to, “Kono now lokoi ka pogtuu now ki Hisus.” Woy nignangonnangon kandan to, “Woy kid ogpakasolod to pandatuan to Magboboot ko og–aguantoon ta pad ka mohon–ing no igkabaybayari ta.

Hinimuan 2:5

No ka sikan, duon mgo Hudiu no ogtahud to Magboboot no nan–ugpo dio to Hirusalim. Sikandan, nigligkat to agad hondoi no mgo ugpaan.

Hinimuan 20:24

Di,” kagi ni Pablo, “kono ku ogkannugunan ka lawa ku. Balagad ko ogkamatoy ad oyow ogkapongaan kud on ka katondanan ku woy to sikan no igpohimu to Lagboy no Igbuyag ta no si Hisus. No ian to oyow ignangonnangon kud on ka Maroyow no Nangnangonon to sikan no igkohoy–u to Magboboot to mgo otow.

Hinimuan 26:16

Di kuntoon, sasindog kad on, su ian tuud ku to nigpakita a koykow kuntoon su nig–alam ku sikoykow to suguanon ku. No ian su oyow igpamalogot nu ka sikan no nigkita nu no nighimu ku, woy to sikan no igpapitow ku koykow uromo.

Ruma 10:18

Di tongod to mgo Hudiu, og-inso a ko waro dan pad makarinog tongod to Im-imanan dan poron no Igbuyag? Nalugoy ro man nakarinog sikandan su duon ingkasulat dongan to talagnangon to kagi to Magboboot, no kagi rin to: “Ka soini no nangnangonon, naalap-alap on dio to agad hondoi no otow kai to tano woy nigtangkap on dio to mgo katamanan to soini no kalibutan.”

Ruma 15:16

to nohimu a rin no suguanon ni Hisu Kristu oyow ogpakanangonnangon a kaniu no kono no Hudiu to Maroyow no Nangnangonon tongod kandin. Ogkounawa a to talagpanubad, no sikaniu no kono no Hudiu no nigtuu ki Hisus ka igbogoy ku dio to Magboboot. No og-awoson to ligkat to oghimuon to Gimukud to Magboboot, warad agad nokoy no maroot dio to goinawa now. Sikan ka litos to Magboboot.

Ruma 2:7

No ka kouyagan no waro katamanan, igbogoy rin dio to mgo otow no ogpoomot to oghimu to maroyow su ogkoiniat sikandan to karoyawon woy ka igsayo no igbogoy to Magboboot uromo kandan, woy ogkoiniatan dan ka kouyagan no waro katamanan no igbogoy rin kandan.

Ruma 5:5

Kono ogkohimu no kono ta ogkapurut ka sikan no og-imanon ta su ka Gimukud to Magboboot no ingkabogoy kanta, ian ka ogpohitaga kanta to dakol ka goinawa to Magboboot kanta.

1 Kurintu 15:58

Nò mgo sulod no igdakoli ku to goinawa, su duon soini no og-im-imanan ta, hogota now ka pogsalig now ki Hisus oyow kono oglimanglimang ka goinawa now to pogtuu now. Ungod now poomoti to ogtuman to igpohimu to Lagboy no Igbuyag ta kaniu su nataga kow man to, ka tibo no oghimuon ta to igsugu din, duon pulus ta.

1 Kurintu 3:5

Nokoy now si Apulus woy ko sikanak no si Pablo? Sikanami, mgo suguanon koy to Magboboot, no ligkat to pog-anad noy kaniu nigtuu kow on kandin. Di waro loin no oghimuon noy ko kono do no ka pogtuman noy to insugu din to tag sagboka kanami.

2 Kurintu 10:1

Mgo sulod, sikanak no si Pablo, duon ogbuyuon ku kaniu su ligkat to molungangon woy mohoy-uan si Hisus. Ian su duon otow no ognangon to, woy a ro kun ogmabulut ko dio a to mariu ka ogsulat, di ko duon to kaniu, konad kun no mabulut ka ogkagion ku. Sikan ian to

2 Kurintu 11:23

Nataga a to ogkoiling to ogkaangol-angol a su inat to ogpakasayo a to kanak no lawa. Di nahan dan to sikandan ka suguanon ni Hisu Kristu. Ko tu-tuu pa ka ignangon dan, kanak ka madmaroyow no suguanon din su dakoldakol man lagboy ka kanak no pogpoomot to talabau ku. Woy molmohon-ing pad ka kanak no pogkapirisu woy ka pogbaras to lawa ku. Woy mohon-ing ka ingkabayo ku no malintok naan do no ogkamatoy a.

2 Kurintu 3:6

Sikandin, ka nigbogoy kanami to katondanan oyow ogpakaanad koy kaniu to sikan no iam no dalan no insabut din kanta. Di ka sikan, kono ogligkat to Balaod no ingkasulat dongan, di ogligkat atag to Gimukud to Magboboot. Ian su ligkat to sikan no Balaod, ian ta poron ogkoumaan ka kamatayon. Di ka Gimukud din atag ka ogbogoy kanta to kouyagan no waro katamanan.

2 Kurintu 4:1

Nò, su nohoy-uan koy to Magboboot, nigbogayan koy rin to katondanan to ognangonnangon to kinagian din. Sikan ian, kono ogmalotoy ka goinawa noy to og-uwang to sikan no ignangonnangon noy.

2 Kurintu 6:1

Nò, su nohimu koy on no talagbulig to Magboboot, duon ogbuyuon noy kaniu no nabogayan on to ingkohoy-u to Magboboot. No ian noy igbuyu to oyow kono now ogdaaton ka sikan no ingkohoy-u rin kaniu.

Galasia 4:11

Sikan ian, dakol ka igkasasow ku kaniu, mgo sulod, su inat to warad pulus ka tibo no in-anad ku kaniu tongod ki Hisus.

Galasia 5:5

Di sikanami, ogsalig koy atag to Magboboot to oghimuon kinow rin no maroyow dio to tangkaan din su ligkat to kabogbogan to Gimukud din woy ligkat dod to pogtuu ta ki Hisu Kristu.

Galasia 5:7

Sikaniu, mgo sulod, maroyow man poron ka binunsuran to pog-unug now ki Hisus. No hontow man ka nigpasuwoy kaniu to nighagtong kow on to sikan no pog-unug now to tu-tuu ian no ingkaanad kaniu?

Galasia 6:9

Sikan ian, kono ki ogkapogul to oghimu to maroyow to duma ta su oyow ko ogpokouma on ka allow no nig-alam to Magboboot, ogkabogayan ki nikandin to igpapulus kanta.

Episu 1:18

Ogbuyu a kandin to oyow ogkapulasan on ka pogdoromdom now oyow ogkatagaan now on ian ka tibo no ogkoim-imanan tanow su nohimu kinow on no mgo sakup din. Woy ogbuyu a to oyow ogkatagaan now ian lagboy ka sikan no karoyawon no insabut to Magboboot no igbogoy rin uromo to mgo sakup din.

Episu 2:21

Si Hisus ka igmakogal to soini no baloy oyow kono ogkagulak. No ka sikan, ogkohimu on no baloy to Lagboy no Igbuyag ta no si Hisus no duon ta ian ogkasayo sikandin.

Episu 3:17

Woy songo og-ampu a to oyow, ligkat to nigtuu kow ki Kristu, nigpataliwaro on sikandin to goinawa now. Ian su oyow ogmanokal woy ogkatimulon ka goinawa now to mgo otow woy ka Magboboot. No ian ogkounawaan ka kayu no kono ogkawoil su og-ugsob ka dalig din dio to tano. No ogbuyu a

Episu 4:16

No sikanta no nigtuu on kandin ka ogkounawa to lawa rin. No ligkat to pogboot ni Hisus kanta, ogkasagboka kinow ro. No ian ogkounawaan ka lawa ta no duon ugat no ogpakatongos to bokog ta woy ogpakamakogal to lawa ta. No ian to oyow ogkaayun tibo ka pogsumpulsumpul to lawa ta woy to oyow ogkohimu on no sagboka ro ian no lawa. No ko litos ka pogtuman ta to katondanan no ingkabogoy to tag sagboka kanta, ogtulin ka soini no lawa ni Hisus woy ogmanokal no ogligkat to ogmarakdakoloy kinow tibo to goinawa.

Kulusas 1:25

No sikanak, nighimu a to Magboboot no suguanon din oyow ogpakabulig a to mgo otow no nigtuu ki Hisus. No ian to nig-alam a rin su oyow ogpakabulig a kaniu woy su oyow ka soini no kinagian to Magboboot, ogkaay-ayaran ku ignangonnangon dio to agad hontow otawa.

Kulusas 2:7

No og-awoson to, ka pogtuu now, ian now ogkounawaan ka dalig to kayu no nig-ugsob dio to diralom to tano. Sikan ian, unugi now ka batasan ni Hisus woy ay-ayari now tuui ka tu-tuu ian no nangnangonon unawa to sikan no ingkaanad kaniu nokani. Woy layun now pasalamati ka Magboboot.

1 Tisalunika 3:3

oyow kono ogkawoil ka pogtuu now ki Hisus agad duon dod ka soini no mgo igkabaybayari now. Nataga kow lagboy to nigboot to Magboboot to duon ogkaaguanta ta no igkabaybayari.

1 Tisalunika 3:5

Sikan ian ko waro kud on maaguanta ka igkasasow ku kaniu, pinohondio kud on si Timoteo to kaniu oyow oghitagoon a rin ko noomonu on ka pogtuu now. Ka kuwo koy ko nakatood buwa si Satanas no og-ol-olog kaniu no naraat on buwa ka talabau noy to nig-anad noy kaniu.

1 Tisalunika 5:8

Di sikanta atag, anak ki to kaawangan no og-awoson to ogkatapid ka goinawa ta. Og-awoson no ogmasalig ka pogtuu ta woy ogdakolon ta ka goinawa ta to mgo otow. No ian ogkounawaan ka kalasag no ogpakaatang to sosolobon ta. Woy og-awoson to og-iman-iman ki to pogpangabang to Magboboot kanta to logpad din no ian ta ogkounawaan ka kalu to sundalu no ig-atang ta kai to ulu ta.

2 Tisalunika 2:16

Nò, ligkat to Lagboy no Igbuyag ta no si Hisu Kristu woy ka Magboboot no ian Amoy tanow, ogbuyu koy to oyow ogpanokalnokal to goinawa now to ogtuu woy to oyow ogbuligan kow ran oyow ogmaroyow tibo ka oghimuon now woy ka ogkagion now. Dakol ka goinawa rin kanta no ligkat to pogkohoy-u rin kanta, duon on igkarago ta no waro katamanan woy duon on ka maroyow no ogkoim-imanan tanow.

1 Timoteo 1:12

Ogsayoon ku si Hisu Kristu no Lagboy no Igbuyag ta no nigbogoy kanak to dayagang to oyow ogpakatood a no oghimu to soini no insugu din. Ian su nigdoromdom sikandin to litos a rin no ogkasaligan, no sikan ian to nighimu a rin no suguanon din.

1 Timoteo 2:7

Sikan ian to naabin a to Magboboot to oyow ogkohimu a rin on no suguanon ni Hisu Kristu woy to oyow ogkohimu a rin no talag-anad to mgo otow no kono no Hudiu. Ian su oyow og-anad a kandan to tu-tuu ian no nangnangonon oyow duon pogtuu ran to tu-tuu ian no tinuuan. Tu-tuu ian ka kagi ku; kono no ubat.

1 Timoteo 3:16

su tibo kinow nataga to maroyow lagboy ka impohitaga to Magboboot kanta tongod to soini no tu-tuu ian no tinuuan ta to: Nigpokootow si Hisu Kristu no nigligkat dio to Magboboot. Woy immalogot to Gimukud to Magboboot to maroyow on ian si Hisu Kristu. Nakitaan si Hisus to mgo diwata to Magboboot. Woy innangonnangon on sikandin dio to mgo otow no kono no Hudiu. Woy duon on mgo otow no nigtuu on kandin kai to tano. Woy nigbatun on sikandin dio to langit.

Titu 3:7

su oyow ligkat to pogkohoy-u ni Hisu Kristu kanta, ogkohimu kinow on no maroyow dio to tangkaan to Magboboot, no ogkapurut ta ka kouyagan ta no waro katamanan no og-im-imanan ta no inggalat ni Hisus kanta.

Hibriu 10:38

Woy ka sakup ku no nohimu on no maroyow dio to tangkaan ku ligkat to pogtuu rin kanak, ogbogayan sikandin to kouyagan din no waro katamanan. Di ko duon otow no og-iniug kanak, kono a ogkarago kandin.”

Hibriu 3:14

Ian to og-iling ki su ko taman to ogpokouma kid on dio ki Kristu, og-ungoron ta ro oghirosoni ka sikan no an-anayan no pogsalig ta kandin, ogpakarumaruma kinow kandin.

Hibriu 3:6

Di si Kristu atag, ian ka Anak to Magboboot no ian tagtuun to baloy. No masalig si Hisus to og-alap to mgo otow no impasakup to Magboboot. No sikanta ka nohimu on no baloy rin, ko kono tad oglokaan ka pogsalig ta woy ka igkarago ta to sikan no og-im-imanan ta kandin.

Hibriu 4:14

Sikan ian to og-awoson to oghogoton ta ka pogtuu ta, no kono tad oglokaan su si Hisu Kristu ka mabogbog woy ian Labow to mgo Talagpanubad kanta dio to tangkaan to Magboboot. Sikandin dod ka Anak to Magboboot no diad og-ugpo to Langit dio to tangkaan to Amoy rin.

Hibriu 6:19

Ka sikan no im-imanan tanow to ogkatuman on ka innangon to Magboboot, ogkounawa to igpalibatu to goinawa ta oyow kono ogkalokaan ka pogsalig ta kandin. No ligkat to sikan no im-imanan ta, ogkounawa to nakasolod kinow on dio lagboy to tangkaan to Magboboot. Ka sikan, nounawa to sikan no mgo Labow to mgo Talagpanubad to mgo Hudiu dongan no nakasolod to sikan no sinabong dio to ampuanan dan no noolatan to manggad su lagboy nig-indanan to Magboboot.

1 Pedro 1:3

Ogpasalamatan ta ka Magboboot no ian Magboboot woy Amoy to Lagboy no Igbuyag tanow no si Hisu Kristu. Ian su dakol ka pogkohoy-u rin kanta. No ligkat to pog-uyag din ki Hisu Kristu, nigbogayan kinow to iam no pogkouyag ta. Sikan ian to og-iman-imanan tad on ian to ogkouyag kinow on uromo.

1 Pedro 1:5

no nohogot to pogtuu. No ian ighogot to pogtuu ta ka kabogbogan to Magboboot su ogsalig ki kandin tagood to ogpokouma on ka sikan no mohuri no allow no ogkouyag kinow on to waro katamanan.

1 Huan 2:27

Dokad di, nigboot si Hisus to oyow nigbogayan kow to Gimukud to Magboboot no sikan ian to waro now awosa no duon otow no og-anad kaniu ko hondoi ka tu-tuu ian no nangnangonon su ka Gimukud to Magboboot ka ogpohitaga kaniu to tibo ko tu-tuu woy ko kono. Ka tu-tuu ro ka ogligkat to Gimukud to Magboboot. Waro ubat no ogligkat kandin. Sikan ian, layun now gogongoni si Hisu Kristu unawa to in-anad to Gimukud to Magboboot kaniu.

Impapitow 2:10

Kono kow ogkahallok to duon igkabaybayari no magaan ogpokouma kaniu. Duon mgo duma now no igpapirisu ni Satanas oyow ogkool-ologan din ka pogtuu now kanak. No ogkabaybayaran kow to sampulu no allow. Di agad ko igkamatoy now ka igkabaybayari now, kono now lokoi ka pogtuu now kanak no ogbogayan ku sikaniu to pogkouyag now no waro katamanan no ian ka igsayo ku kaniu.