Impapitow 7:2 - Manobo Ata

² Sikandan ka nabogayan to katondanan to ogdaat to kalibutan woy ka dagat. No duon nigkita ku no dangob no diwata to Magboboot no nigligkat dio to silaan. Nig-alap sikandin to igpangotob no nigligkat to Magboboot no kono ogkamatoy taman to waro katamanan. No ka sikan no diwata to Magboboot no nigligkat to silaan, nigpaagbotan to nigkagi dio to sikan no hop-at no mgo diwata to Magboboot.

Impapitow 7:2 Iomraidhean Croise

Matiu 16:16

Nigtabak si Simon Pedro no kagi rin to, “Sikoykow ian ka Kristu no Im-imanan to mgo Koot-otawan to Igbuyag noy uromo. Sikoykow ka anak to Magboboot no kono ogkamatoy.”

Matiu 26:63

Di waro nigkagi si Hisus; waro tabak din. Nighutuk nig-inso ka Labow to mgo Talagpanubad, to, “Ogkoiniat a no kai ki to tangkaan to Magboboot, nangoni koy ko sikoykow ka Im-imanan to mgo Koot-otawan no ian ka anak to Magboboot.”

Huan 6:27

Nig-udlingan pad ni Hisus sikandan no kagi rin, “Kono no ian now ogpoomotan ka koonon no ogkamolu do su ian now porom ogpoomotan ka sikan no koonon no kono ogkamolu no ogpuunan to kouyagan now no waro katamanan. Sikoddi, no Kakoy to mgo Koot-otawan,” kagi ni Hisus, “ogbogoy a kaniu to soini no koonon su pigbogayan ad to Amoy ku no Magboboot ka katondanan.”

2 Kurintu 1:22

woy imbogoy rin kanta ka Gimukud din no igmaganangon to ogtumanon din ka tibo no innangon din kanta.

Episu 1:13

No sikaniu no mgo taga Ipisu no nigtuu on ki Hisus, songo nounawa kow rod kanami no nigdinog kow to soini no tu-tuu ian no kinagian to Magboboot, no ian ka Maroyow no Nangnangonon tongod to ogkapangabangan kinow on to mgo salo ta. Nigtuu kow on ki Hisu Kristu no nigbogayan kow on to Gimukud to Magboboot no ian og-indan to nohimu kow on ian no mgo sakup din. Sikan ka impanoy rin innangon no igbogoy rin kanta.

Episu 4:30

Ian su og-awoson to kono tad oghimuon ka agad nokoy no ogpakabogoy to igmasakit to goinawa to Gimukud to Magboboot. Ian su sikandin ka igmalogot to nohimu kid on no sakup to Magboboot woy to duon dod allow no ogkapongaan on to Magboboot ka pogpangabang din kanta to mgo salo ta.

1 Tisalunika 1:9

su tahan do no nandinog on sikandan tongod to pogtuu now. No ko ogpanumbaloy koy kandan, sikandan ka oghun-a ognangonnangon kanami tongod to pogpamminog now kanami. Woy ignangon dan to kono kow on og-ampu to mgo nig-ampuan now nokani no kono no magboboot, no ian su oyow ogpaagad-agaran now kun on ka tu-tuu ian no Magboboot no waro kamatayon din.

2 Timoteo 2:19

Di ka tu-tuu ian no tinuuan ta no imbogoy to Magboboot, ian ogkounawaan ka kono ogkawoil no ogpounturan to baloy. No duon impasulat to kagi to Magboboot to, “Nataga ka Lagboy no Igbuyag ta ko hontow ka tu-tuu no sakup din.” No ka dangob no impasulat din kagi, “Ka sikan no otow no og-abin to nigpasakup to Lagboy no Igbuyag ta, og-awoson to og-ongkoran din on ka tibo no maroot no batasan.”

Hibriu 12:22

Di sikantanow kuntoon atag, inat to nigparani kid on to bubungan no oghingaranan to Sion, woy to sikan no lunsud to Hirusalim no dio to langit no ian ugpaan to Magboboot no kono ogkamatoy. Woy songo nakarani kid on to pila buwa no malan no mgo diwata to Magboboot ka oglimudlimud no ogsayo kandin.

Impapitow 1:3

Ogkapulusan ka agad hontow no ogbasa, woy ka ogpamminog woy ogtuman to soini no impanoy innangonnangon to kinagian to Magboboot su magaan on ogkatuman ka soini tibo.

Impapitow 10:1

Pogpitow ku no duon dangob man do no mabogbog no diwata to Magboboot no ogligkat to langit. Nabukusan ka lawa rin to salagapun woy duon balangow no nakalingut to ulu rin. Ka langlanguwan din, nigpangini-kinì no ogkoiling to kalayag to allow. No ka mgo lison din, ogkounawa to suloy no ogkalogdog.

Impapitow 10:4

Nò, to pogtabak to mgo lugung, ogsulat a poron to nigdinog ku. Di duon kagi no nigdinog ku ligkat to langit no nignangon to, “Iholos nud to koykow ro no goinawa ka innangon to mgo lugung. Kono nud isulat.”

Impapitow 16:12

No ka igkohon-om no diwata to Magboboot, imbus-ug ka tagu to boung din dio to woig no ogkohingaranan to Eupratis. Pogkaponga, ogkootian on. Ian su oyow ogkabayaan on to mgo igbuyag no ogligkat to silaan.

Impapitow 5:2

Woy duon nigkita ku no sagboka no mabogbog no diwata to Magboboot. Nigmaagbot ka kagi rin no nig-inso to, “Hontow ka litos no ogloko to mgo imparokot woy to ogbolat to soini no ogbasoon?”

Impapitow 8:3

Pogkaponga, duon dangob no diwata to Magboboot no nigdatong. Nig-alap sikandin to bulawan no taguanan to igtotomog no moomut no nigsasindog on dio to tangkaan to tubaranan no naakoban to bulawan no ogsabukan to sikan no igbogoy. Woy nigbogayan sikandin to dakol no igtotomog no moomot. Ian su oyow ogtutungon din on dio to sikan no tubaranan no naakoban to bulawan no duon to tangkaan to sikan no pinnuuanan to Lagboy no Igbuyag to pogboboot din. No ka obol to sikan no moomut, iglagkos din on to mgo pog-ampu to mgo sakup to Magboboot. No ka tibo, igbogoy din on to Magboboot.

Impapitow 9:14

No nigkagian din ka sikan no igkohon-om no diwata no duon bungag to, “Hokari nu ka imbanggut to sikan no hop-at no mgo diwata ni Satanas no nigbanggutan dio to dakol no woig no ogkohingaranan to Eupratis.”

Impapitow 9:4

Nigsaparan ka mgo talangas to oyow kono dan ogdaaton ka mgo pangamuton, woy ka mgo kayu, woy ka agad nokoy no mgo pinamula. Di ian dan do oghisakitan ka mgo otow no waro pangotob dio to bukod dan no igpatokod to sakup sikandan to Magboboot.