Impapitow 3:5 - Manobo Ata

⁵ Ka otow no kono ogparoog ki Satanas, ogpakinaboon ku uromo to maputi. Woy kono ku og-awoon ka mgo ngaran dan dio to sulatanan to mgo ngaran to mgo otow no ogbogayan to kouyagan no waro katamanan. No ko dio ad on to tangkaan to Amoy ku no Magboboot woy to tangkaan to mgo suguanon din no mgo diwata, ogtokoron ku to sakup ku sikandan.

Impapitow 3:5 Iomraidhean Croise

Matiu 10:32

Ka otow no og-abinon to sikoddi ka igbuyag din dio to tangkaan to mgo otow, songo og-abinon ku sikandin dio to tangkaan to Amoy ku no dio to langit,” kagi ni Hisus.

Lukas 10:20

Nigparagas si Hisus to kagi rin to, “Kono kow ogkarago to ogpakarogil kow on to busow woy ogpaagad-agad on kaniu ka mgo busow ko ogdogilon now, kono now ogkaragoi to sikan. Ian now nasi karagoi ka ngaran now no nakasulat on dio to Langit.”

Lukas 12:8

“Duon dod ignangon ku kaniu,” kagi ni Hisus. “Agad hontow no otow no og-abinon din to koddi ka Igbuyag din dio to tangkaan to mgo otow, koddi, no Kakoy to Koot-otawan kai to kalibutan, songo og-abinon ku sikandin dio to tangkaan to mgo diwata no suguanon to Magboboot.

Pilipus 4:3

No sikoykow no duma ku to pognangonnangon to kinagian to Magboboot no duon to lunsud to Pilipus, songo ogbuyu a koykow to oyow ogbuligan nu ka soini no daruwa no mgo boi oyow ogsagbokoon dan do ka goinawa ran su sikandan, nigbulig kanak to ognangonnangon to Maroyow no Nangnangonon tongod ki Hisu Kristu. Agad si Kiliminti woy ka mgo duma ku, duma ran dod to pogbulig dan kanak to pog-anad ku to kinagian to Magboboot. No ingkasulat on tibo ka mgo ngaran dan dio to sulatanan to Magboboot to mgo ngaran to mgo otow no ogbogayan on to kouyagan no waro katamanan.

Hudas 1:24

Ogsayoon ta ka Magboboot no ian doka tu-tuu ian no Magboboot woy ka Talagpangabang kanta su ligkat to nighimu ni Hisu Kristu no ian Lagboy no Igbuyag ta. Sikandin dod ka ogkatou no ogbulig kanta oyow kono ki ogkaayat to ogpakasalo. No uromo, sikandin dod ka ogpasasindog kanta dio to tangkaan din to waro igkoogot din kanta. No sikan ian to dakol ka igkarago ta. Nò, ligkat to waro pad nohimu ka soini no kalibutan, woy kuntoon taman to waro katamanan, ka Magboboot ka litos no ogkasayo to tibo su waro ogpakasokod kandin, woy sikandin ka lagboy no mabogbog no ogpakaampow to tibo, woy sikandin dod ka igbuyag to tibo. Hoo ian.

Impapitow 13:8

No ogsimboon sikandin to tibo no mgo otow to soini no kalibutan no waro ikasulat ka ngaran dan dio to sulatanan to ngaran to mgo otow no ogbogayan to kouyagan no waro katamanan. Ligkat to waro pad nohimu ka soini no kalibutan, tahan on no ingkasulat ka ngaran dan to sikan no sulatanan to Nati to Karniru no nighimatayan nokani.

Impapitow 17:8

Ka sikan no magintalunan no nigkita nu, duon pogkootow rin dongan, di warad on kuntoon. Di konad no malugoy no ogpakalibuwas sikandin ligkat to sikan no bitu no kono ogkatogkad ka karalomi rin. Pogkaponga, ogkaalap sikandin dio to ugpaan no ogpakalogpad kandin to waro katamanan. Ka tibo no mgo otow no waro ikasulat ka ngaran dan dio to sikan no sulatanan to mgo ngaran to mgo otow no ogbogayan to kouyagan no waro katamanan ligkat to poghimu to kalibutan, ogkabolongbolong sikandan ko ogkita to sikan no magintalunan su duon dongan, naawo on di mangkuwan duon on man do.”

Impapitow 19:8

no nigbogayan on to kinabo no igsaluub din no malinis woy malayag.” No ka lituk to sikan no maroyow no manggad, ian ka maroyow no mgo hinimuan to mgo sakup to Magboboot.

Impapitow 2:11

Tag sagboka kaniu, ko duon talinga now, og-awoson now to ogpamminog kow to soini no ignangon to Gimukud to Magboboot dio to mgo nigtuu. Kagi rin to, ‘Ka otow no kono ogparoog ki Satanas, kono ogkalogparan to oghingaranan to igkaruwa no kamatayon.’ ”

Impapitow 2:7

Tag sagboka kaniu, ko duon talinga now, og-awoson to ogpamminog kow to soini no ignangon to Gimukud to Magboboot dio to mgo nigtuu. Kagi rin to, ‘Ka otow no kono ogparoog ki Satanas, ogbogayan ku to katondanan din oyow ogpakakoon sikandin to bogas to sikan no kayu no ogpakabogoy to kouyagan no waro katamanan no ogtulin dio to sikan no ugpaan to Magboboot.’ ”

Impapitow 20:12

Woy nigkita kud ka mgo nammatoy; ka mabantug woy ka kono no mabantug, ka nigligkat to dagat woy ka nigligkat to tano woy ka tibo no mgo gimukud to mgo nammatoy no nokougpo to sikan no ugpaan to mgo nammatoy. No namansasindog sikandan tibo dio to tangkaan to sikan no pinnuuanan to pandatuan. Duon tahan no mgo nasulatan no pigbokad on. Woy duon ingkasulat ka tibo no mgo hinimuan to mgo otow no wa pad nammatoy. Woy duon dangob no pigbokad on. No ian ka nasulatan to mgo ngaran to sikan no ogkabogayan to kouyagan no waro katamanan. No ogkabobootan on sikandan tibo ko nokoy ka ingkasulat no mgo hinimuan dan.

Impapitow 20:15

Sikan ian, agad hontow no waro ikasulat ka mgo ngaran dan dio to sikan no sulatanan to ngaran to mgo otow no ogbogayan to kouyagan to waro katamanan, igdogpak on dio to sikan no ogliabliab no hapuy.

Impapitow 21:27

Di waro ogpakasolod to sikan no lunsud ka agad nokoy no ogpakaligsom. Waro agad hontow no oghimu to igkasipod ta woy ko og-uubat su ian do ogpakasolod ka mgo otow no ingkasulat ka ngaran dan dio to sikan no sulatanan to Nati no Karniru to ngaran to mgo otow no ogbogayan to kouyagan no waro katamanan.

Impapitow 22:19

Woy agad hontow no ogsalin to ignangonnangon to soini no nasulatan, songo konad on ogbogayan to Magboboot sikandin to ogkoon to bogas to kayu no ogpakabogoy to sikan no kouyagan no waro katamanan. Woy songo og-awoon to Magboboot ka katondanan din to og-ugpo dio to sikan no dakol no lunsud to Magboboot no ingkanangon to soini no nasulatan.

Impapitow 3:12

Ka otow no kono ogparoog ki Satanas, ogbogayan ku to oyow ogpokougpo sikandan dio to ugpaan ku dio to langit to waro katamanan. No ian dan ogkounawaan ka mgo suloy to sikan no Baloy no Ampuanan to Magboboot. Kono og-awo sikandan to sikan no baloy. No igsulat ku dio to kandan ka ngaran to Magboboot no ian Igbuyag ku, woy iglagkos ku to igsulat ka ngaran to sikan no dakol no lunsud to Magboboot ku. Sikan ka iam no Hirusalim no ogligkat dio to langit no oglogsad kai to tano. Woy songo iglagkos ku to igsulat kandan ka iam no ngaran ku.

Impapitow 3:4

Dokad di, duon dod pila buwa kaniu dio to Sardis no waro now maligsomi ka pog-ugpo now su waro kow atag nanhimu to agad nokoy no maroot. Sikaniu ka ogpakaruma kanak uromo no ogpakakikinabo kow to maputi su litos ku ka mgo hinimuan now.

Impapitow 6:11

Nò, tag sagboka kandan, nigbogayan to maputi no manggad no igpakinabo din. Woy nignangonan sikandan to oyow oghimoloy pad to malopot naan do no mgo allow. Ian su ogpatagaron sikandan ko songo monu pad no mgo duma ran no ogtuu to Magboboot ka songo ogkounawa kandan no ogkohimatayan.