Impapitow 19:10 - Manobo Ata

¹⁰ Pogkaponga, nigluhud a to tangkaan din oyow ogsimboon ku poron sikandin, di kagi rin kanak to, “Doka, su songo suguanon a rod to Magboboot no ogkounawa a rod koykow woy to mgo duma nu no ogpamalogot to in-anad ni Hisu Kristu. Ian nud ogsimboon ka Magboboot.” No ka igmalogot ki Hisu Kristu, sikan dod ka ingkanangon dongan to mgo talagnangon to kagi to Magboboot.

Impapitow 19:10 Iomraidhean Croise

Matiu 4:10

Nigtabak si Hisus ki Satanas no nigsugu to, “Satanas, awo ka kai to koddi. Duon inkasulat no kagi to Magboboot dongan to, ‘Kaniu, ian now ro simbaa ka Magboboot now woy kandin do ogpaag-agaran now.’ ”

Markos 5:22

No nokouma ka songo igbuyag to anaranan to mgo og-ampu no si Hairu ka ngaran din. Pogkita rin ki Hisus, nigluhud dio to tangkaan din.

Markos 7:25

Pogdinog to sagboka no boi no duon anak din no boi no nigbusawan to duon on si Hisus nig-agpas nighondio kandin no nigluhud dio to tangkaan din.

Lukas 1:19

No kagi to diwata no nigtabak ki Sakarias to, “Koddi si Gabriel no ogsasindog a dio to tangkaan to Magboboot. Kandin ka nigsugu koddi kai to koykow oyow ognangonan ku sikoykow to soini no maroyow no nangnangonon.

Lukas 24:44

Pogkaponga, kagi ni Hisus kandan, “To kai a pad to kaniu, impanoy ku man inangon kaniu to awos to ogkatuman ka tibo no ingkasulat to Balaod ni Moisis dongan bahin koddi lagkos to ingkasulat dongan to duma no mgo talagnangon to kagi to Magboboot, lagkos to tibo no ingkasulat ni Dabid dio to sinulat no Mga Salmo.”

Huan 5:39

Nig-anad kow to inkasulat dio to Tahan no Kasulatan su nahan now ko ogtinawo kow, ian ka ligkatan to kouyagan now no waro katamanan. Di duon to sikan no Nasulatan ka innangon bahin koddi.

Hinimuan 10:43

Agad ka mgo talagnangon to kagi to Magboboot, songo ogpakamalogot to soini su impanoy ran ingkanangon tongod ki Hisus ka nigkagi ran to, ‘Agad hontow no ogtuu kandin, ogkaawo on ka salo dan su nigtuu on to ngaran din,’ ” kagi ni Pedro.

Hinimuan 13:27

Di ka mgo taga Hirusalim woy ka mgo igbuyag dan, agad to tibo no Allow to Oghimoloy, ogdinogon dan man do ka ingkasulat dongan to mgo talagnangon to kagi to Magboboot, di waro dan tokora to si Hisus ka lagboy no ingkatuon no Igbuyag dan. Woy songo waro dan masabuti ka ingkasulat dongan to mgo talagnangon to kagi to Magboboot. Di ko pigbobootan dan to ogpohimatayan si Hisus, natuman dan on ka sikan no dongan no ingkasulat.

2 Kurintu 8:7

Nò mgo sulod, dakol lagboy ka pogtuu now ki Hisus woy ka pog-uwang now to katagaanan now no nigligkat to Magboboot. Woy moingos kow to ogbulig to mgo duma now, woy indakoli koy nikaniu to goinawa. Sikan ian to ogkoiniatan noy no songo ogdakolon now ka igbogoy now no igkohoy-u now to sikan no mgo nigtuu no dio to Hudia.

Episu 5:15

Sikan ian, mgo sulod, og-ayad-ayad ki to mgo batasan ta oyow ogkounawa ki to mgo otow no duon katagaanan. No kono kid ogkoiling to mgo otow no waro katagaanan to sikan no tu-tuu ian no nangnangonon tongod ki Hisus.

Episu 5:33

Di duon dod igpasabut kaniu no mgo patalaalunggun. Ian su og-awoson to tag sagboka no lukos, igdakoli rin to goinawa ka asawa rin no og-unawoon ka igdakoli rin to kandin no unoy no lawa. No ka mgo boi no duon on asawa, og-awoson din to ogtahuron din ka asawa rin.

Pilipus 3:3

Dokad di, sikanta atag ka noindanan no tu-tuu ian no anak to Magboboot su ligkat to pogbulig to Gimukud din, ogsayoon ta sikandin woy nasagboka kinow on ki Hisu Kristu no kono ta ogsaligan ko nokoy ka igpohimu ta poron to lawa ta.

1 Tisalunika 5:15

Ko duon ogbogoy kanta to maroot, og-awoson to waro agad sagboka kanta no ogsuli to songo maroot. Di og-awoson to ungod kinow ogsumansuman ko ogmonuon ta to oyow oghimuon ta ka tibo no otow to maroyow, ko duma ta woy ko kono no duma ta.

Hibriu 1:14

Nokoy naan ka mgo diwata no suguanon din? Ka lawa ran, ogkoiling to mgo gimukud no kono ogkakitaan. Di talagbulig sikandan to Magboboot no ogsuguon din dio to sikan no mgo otow no ogtuu on kandin to oyow ogkapangabangan on to mgo salo dan.

Hibriu 12:25

Sikan ian, og-awoson to og-ayad-ayad ki ro to ogpamminog to sikan no ogkagi no ian ka Magboboot su ka mgo otow dongan no waro nigpamminog to kagi rin no impanangon din ki Moisis, niglogparan sikandan. No sikanta kuntoon, dakoldakol pad man ka iglogpad kanta ko og-iniug ki to Magboboot no ogbohog kanta no ogligkat dio to langit.

1 Huan 5:10

Ka otow no ogtuu to Anak to Magboboot, duon on dio to goinawa rin ka igmalogot to sikan no nigtuuan din. Di ka otow no kono ogtuu to innangon to Magboboot, ogkounawa to oghimuon din ka Magboboot no ubaton su kono din ogtuuan ka immalogot din tongod to Anak din.

1 Huan 5:21

Mgo anak, tantanuri now ka goinawa now oyow kono kow oghilabot to mgo og-ampuan to mgo otow no kono ian no tu-tuu ian no Magboboot.

Impapitow 1:1

Ka soini no igsulat ku, insalig to Magboboot ki Hisu Kristu no igpohitaga rin dio to mgo suguanon din oyow ogkatagaan dan ka ogkoumaan no konad on ogkalugoy. No nigsugu din ka diwata no suguanon din, no ian impohitaga kanak no si Huan.

Impapitow 1:9

Sikanak no si Huan, sulod now to pogtuu ki Hisus. No nohimu a no duma now to pog-aguanta ta to igkabaybayari no ogligkat to nalagkos kinow to pog-alap din to pandatuan din. Impougpo a to songo pulu to dagat no oghingaranan to Patmus su ligkat to nignangonnangon a to kinagian to Magboboot woy su ligkat to immalogot ku ka in-anad ni Hisus kanak.

Impapitow 12:11

No ian to naroog dan si Satanas su ogligkat to nalipuwasan sikandan to langosa ni Hisus no oghingaranan to Nati to Karniru woy su ogligkat to kagi ran no igmalogot to pogtuu ran. Ian su agad ko oghimatayan sikandan, waro dan man ongkori ka pogtuu ran.

Impapitow 12:17

Nò, nabolu lagboy ka ulod to sikan no boi. Sikan ian to ogsulungon din ka duma no mgo anak to boi no ian ka ogpaagad-agad to mgo sugu to Magboboot woy ka ogpamalogot to sikan no impan-anad ni Hisu Kristu.

Impapitow 14:7

Nigpaagbotan din to nigkagi to, “Tahura now woy sayaa now ka Magboboot su nigdatong on ka allow to ogbobootan din ka mgo koot-otawan. Simboon now sikandin su ian ka nighimu to langit woy ka kalibutan woy ka dagat woy ka ogligkatan to mgo woig.”

Impapitow 15:4

Lagboy no Igbuyag noy, ogkatahud ka woy ogkasayo ka to tibo no mgo otow su sikoykow ro ian ka waro solug no maroot dio to goinawa nu. Tibo no mgo koot-otawan no ogligkat to tibo no mgo ugpaan, ogpakatangko koykow woy ogpakasimba koykow. Ian su tibo kandan, ogpakakita to matuwarong ka mgo hinimuan nu.” Sikan ka in-opad dan.

Impapitow 19:9

No nignangonan a to diwata to Magboboot to kagi rin to, “Isulat nu ka soini to: Ogkarago ka mgo otow no nig-akat to pogtambung to pagkoonan to pogpangasawa to sikan no ogkohingaranan to Nati no Karniru.” No kagi rin kanak to, “Malogot to nigligkat to Magboboot ka sikan no kagi.”

Impapitow 4:10

Ko og-oopad ka sikan no hop-at, ka kawaan woy hop-at no mgo pogbuyagon, ogluhud to tangkaan to Lagboy no Igbuyag no ogpinpinnuu to sikan no pinnuuan din to pogboboot. Ogsimboon dan sikandin no ian ka kono ogkamatoy taman to waro katamanan. Woy og-awoon dan to ulu ran ka bulawan no mgo tangkulu ran no igpanabuk dan dio to tangkaan to Lagboy no Igbuyag no kagi ran to,