Impapitow 14:4 - Manobo Ata

⁴ Sikandan ka waro makasalo to poghilabot to kono no asawa ran su maroyow lagboy ka mgo batasan dan. Woy sikandan dod ka og-ungod ogdumaruma to Nati no Karniru dio to agad hondoi no ogdolog sikandin. No nigbalukasan ligkat to mgo otow dio to kalibutan. No ian dan ogkounawaan ka an-anayan no ogkagaani no bogas no igbogoy dio to Magboboot woy dio to sikan no Nati to Karniru.

Impapitow 14:4 Iomraidhean Croise

Matiu 19:12

Loin ka mgo tuud to mgo lukos no kono ogpangasawa. Duon ka kono og-asawa su sikan ka inkabato dan. Duon duma no kono og-asawa su nigbakitan sikandan. Duon pad duma no mgo otow no kono og-asawa su oyow ogkatuman dan ka igpohimu kandan bahin to Pogsugu to Magboboot. Ka mgo lukos no ogpakatood to soini, ogparagas do duon sikandan.”

Matiu 25:1

Nigparagas nigkagi si Hisus. Kagi rin, “Ogkounawa soini no pananglitan ka Pogsugu to Magboboot ko oglibong ka Kakoy to mgo Koot-otawan. Duon sampulu no mgo dalaga no nig-alap dan ka mgo ilawan dan no oghondio oyow ogtagbu to songo ogpangasawa.

Matiu 8:19

Nigdani ki Hisus ka songo talag-anad to Balaod no nigkagi to, “Maistru, ogdumaruma a koykow agad ko hondoi ka ogdolog.”

Huan 10:27

Ogpamminog ka karniru ku to kagi ku. Nataga a kandan woy og-unugon a ran.

Huan 12:26

Kagi pa ni Hisus, “Ko duon otow no ogpasakup koddi, og-unug ka sikan no otow to tibo no sugu ku su oyow agad hondoi a, songo dio sikandin. Ogsayoon to Amoy ku no Magboboot ka sikan no ogbulig koddi.”

Huan 13:37

Kagi ni Pedro kuwo kandin, “Buyag, manio to kona a ogpakasundul koykow kuntoon? Nigpanagana ad to ogpakimatoy a no ogduma koykow.”

Huan 8:12

Nokoy pad, nighutuk nigkagi si Hisus to mgo otow. Kagi rin, “Koddi ka Igbat-ow to goinawa to mgo otow kai to soin no kalibutan. Sikan no otow no ogpasakup koddi, kono no dio to marusilom ka igkabuhi din. Duon kouyagan din no waro katamanan.”

Hinimuan 20:28

Nò, sikaniu no mgo pogbuyagon, tantanuri now ka pogtuu now woy ka pogtuu to mgo sakup to Magboboot, su ka Gimukud din ka nighimu kaniu no mgo talagbantoy to mgo otow no nohimu on no sakup din no ian napurut din su ligkat to langosa to Anak din lagboy no si Hisus.

1 Kurintu 16:15

Kuntoon, mgo sulod, nataga kow to si Istipanas no mal-alunggun ka an-anayan no otow dio to ugpaan to Girisia no nigtuu ki Hisus woy ungod ogbulig to mgo nigtuu.

1 Kurintu 6:20

Ian su ka kamatayon ni Hisus ian din imbalukas kanta. Sikan ian, ian ta igpohimu to lawa ta ka maroyow oyow ogkasayo sikandin.

1 Kurintu 7:28

Di ko ogpangasawa ka, kono ka ogpakasalo. Woy ko duon dalaga no ogkaasawa on songo waro salo din. Di ogkoiniatan ku to ogkaligaran kow porom to mgo igkabaybayari to mgo otow no duon on asawa.

2 Kurintu 11:2

Ogpakapanalikud a kaniu no ogpakadalong a to dakol no goinawa to Magboboot kaniu. Ian su inat to ogpakasuwoy kow on to sikan no matul-id no dalan no oghondio ki Hisus su ian now ogkounawaan ka dalaga no waro pad mabuingi no nigpanakinan kud on. No si Hisus ka ogpurut kaniu.

Episu 1:14

No ka Gimukud to Magboboot ka igmaganangon to uromo, ogkabogayan kinow to tibo no insabut din kanta taman to ogkapongaan din on ka pogpangabang din kanta. Ogsayoon tanow ka Magboboot no ian mabogbog.

Episu 5:27

No ian su og-awoson ni Hisus to malinis ka tibo ka goinawa ta to oyow ogmaroyow ro ka pogpitow rin kanta su warad on ka agad nokoy no maroot dio to goinawa ta.

1 Timoteo 4:3

Og-anad sikandan to kono no litos ko duon ogpangasawa woy nahan dan no duon ngalap no kono no litos no igpakoon kanta. Di nighimu to Magboboot ka tibo no ngalap. No sikanta no nataga to tu-tuu ian no tinuuan woy nigtuu on kandin, litos no ogkoonon ta ka sikan, no ogsayoon ta ka Magboboot no nigbogoy kanta.

Hibriu 12:23

Woy nakarani kid on to tibo no mgo otow no nigtuu on no tahan on no ingkasulat ka ngaran dan dio to langit. Woy nakarani ki rod to Magboboot no ian Talagboot to tibo no otow. Woy songo nakarani kid on to gimukud to mgo matuwarong no nammatoy no naayun on ian lagboy ka goinawa ran to Magboboot.

Santiago 1:18

Ligkat to imboot to Magboboot, nighimu kinow rin on no mgo anak din ligkat to pogtuu ta to kinagian din no tu-tuu ian. No ian su noiniatan din to oyow ogpakaampow-ampow ki to tibo no nighimu rin. No ian ogkounawaan ka an-anayan no ogkagaani ta no igpayag ta to Magboboot.

1 Pedro 2:9

Di sikanta atag, nig-abin kinow rin no mgo sakup. Woy nohimu kinow on no mgo talagpanubad to Labow no Igbuyag ta no si Kristu. Woy nig-indanan kinow to Magboboot oyow ogkounug ta lagboy ka mgo batasan din. Woy sikandin ka lagboy no tagtuun kanta. No ian su oyow ogpakanangonnangon ki to maroyow woy kabolongbolonganan no mgo hinimuan din. Nigpangabangan kinow rin to salo ta oyow ogkaawo kinow on to karusiloman woy ogkahalin kinow on dio to kandin no kaawangan no maroyow lagboy.

Impapitow 17:14

No ogsulungon dan si Hisus no ian oghingaranan to Nati no Karniru. Di sikandin, lagkos to mgo nigtuu no ian ka nig-alam din woy masalig to ogtuman to kinagian din, ogpakaroog to sikan no mgo igbuyag, su sikandin ka Igbuyag no ogpakalabow to tibo no mgo igbuyag woy sikandin ka Datu no ogpakalabow to tibo no mgo datu.

Impapitow 21:22

Waro nigkita ku no Dakol no Ampuanan dio to sikan no lunsud su ka Magboboot no ian ka Lagboy no Igbuyag woy Mamabogbog to tibo, woy ka Nati no Karniru, ian ka ampuanan dan.

Impapitow 21:23

No konad on og-awoson ka allow woy ka bulan su ka layag no ogligkat to Magboboot, ian ka ogpakabat-ow to sikan no lunsud. No ka oghingaranan no Nati no Karniru, ian on ka ogkohimu no ilawan dio.

Impapitow 3:4

Dokad di, duon dod pila buwa kaniu dio to Sardis no waro now maligsomi ka pog-ugpo now su waro kow atag nanhimu to agad nokoy no maroot. Sikaniu ka ogpakaruma kanak uromo no ogpakakikinabo kow to maputi su litos ku ka mgo hinimuan now.

Impapitow 5:9

No nig-oopad sikandan to iam no opparon no ognangon to, “Sikoykow ka litos no ogpurut to sikan no ogbasoon woy to ogloko to mgo imparokot din. Ian to sikoykow ka litos su namatoy kad on oyow ogbalukasan ka mgo otow to mgo salo dan oyow ogkasakup sikandan to Magboboot. Ka soini no mgo otow no balukasan nud, ogligkat sikandan to tibo no ogkaloinloin no mgo kapunganan woy to mgo kinagian, woy to mgo ugpaan woy dio to agad hondoi no mgo otawa.