Episu 2:2 - Manobo Ata

² Ka sikan, nig-unug kow pad to mgo maroot no batasan to mgo otow to soini no kalibutan. Woy nakapaagad-agad kow pad ki Satanas no ian igbuyag to mgo busow no ogman-ugpo dio to aw-awangan. Sikandin dod ka ogboboot to mgo otow no kono ogpaagad-agad to Magboboot.

Episu 2:2 Iomraidhean Croise

Matiu 11:19

Koddi no Kakoy to Koot-otawan kai to tano, nigkoon ad dio to mgo pagkoonan now woy nig-inum ad. Di kagi to tibo no mgo otow to, ‘Pitawa now to soin no lukos, tungulon sikandin woy palainum sikandin. Woy amigu sikandin to mgo talagkubla to buhis woy dangob no makasasalo.’ Di ka natagaan to Magboboot, nakitaan to malogot naan ka mgo hinimuan din.”

Matiu 13:22

Ka sikan mgo boni no nakasawod dut dugion no hilamunon, ogkounawa to mgo otow no ogpamminog to nangnangonon bahin to kinagian to Magboboot. Di magaan dan do ogkalingawi ka nigdinog dan su mohon-ing ka igkasasow ran kai to kalibutan woy ogkoiniat sikandan to salapi woy waro pulus kandan ka kinagian to Magboboot.

Matiu 13:38

Ka kamot ian ka kalibutan. Ka maroyow no boni ian ka mgo otow no sakup to Pogsugu to Magboboot. Ka hilamunon ian ka mgo otow no sakup ni Satanas no igbuyag to mgo busow.

Markos 4:19

di magaan ogkaatangi to mgo igkasasow ran, mgo igkarago dan to salapi woy ka igkoiniatan dan to duma no kalaglagan dan no sikan ian ka ogpokoumos on to nangnangonon to Magboboot no kono dan oghalinon ka batasan dan oyow madmaroyow.

Lukas 16:8

“No, ka sikan no igbuyag to sikan no sinaligan, agad maroot ka batasan to sikan no sinaligan din, nakasayo ka igbuyag din kandin su ogkatou ka sinaligan din to oghimu to pogpanagana to pog-ugpo din.” Kagi ni Hisus, “Ka mgo otow no waro pogtahud dan to Magboboot, sikan ka moiria no ogkatou to oghimu to panagana to pog-ugpo dan, di ka mgo otow no ogtahud to Magboboot, kono amana no moiria ko tongod to igpanagana ran litos to kandan no pog-ugpo uromo no dio to Langit.”

Lukas 22:31

Kagi ni Hisus ki Simon Pedro to, “Simon, pamminog ka. Si Satanas, noiniatan kow nikandin su og-ol-ologan kow oyow ogkitoon din ko maagkap do ka pogtuu now no ogkounawa ro to otapon to homoy no ogkaalap to kalamag.

Huan 12:31

Kuntoon ka allow to ogbobootan ka tibo no mgo koot-otawan kai to soin no kalibutan. Kuntoon, ogkaroog ka igbuyag to soin no kalibutan no si Satanas.

Huan 13:2

Nò, ogkokoon si Hisus woy ka mgo hibatoon din to sikan no poglabung dan. Nò, nakasolod on si Satanas to goinawa ni Hudas no anak ni Simon Iskarioti to ogpanabod din si Hisus.

Huan 13:27

To nigpurut ni Hudas ka paan no inhalit to sabow, nigsolod si Satanas no igbuyag to mgo busow kandin. Kagi ni Hisus kuwo ki Hudas, “Agpasa nud ka oghimuon nu.”

Huan 14:30

Kono kud on ogmalayaton ku ka kagi ku kaniu kuntoon su marani on ka sikan no talagboot to soin no kalibutan no si Satanas ian. Di kono ogpakaroog koddi.

Huan 15:19

Ko waro kow pad nigtuu, dakol dod so goinawa ran kaniu to songo wa kow nigtuu su unawa kow kandan. Di nig-alam kud on sikaniu no kono kow on no unawa kandan su nigtuu kow on man. Sikan ian no nasundug kow to mgo waro nigtuu.

Huan 16:11

Ogpatokoron din to ogbobootan to Magboboot ka tibo no makasasalo su unawa ki Satanas no nigbobootan on to Magboboot to kandin no igkalogpad.”

Huan 7:7

Sikaniu, kono no usig now ka mgo otow kai to kalibutan. Di sikoddi atag, pig-usig a to mgo otow su ungod ku ognangoni sikandan to maroot ka oghimuon dan.”

Huan 8:23

Nigtabak si Hisus to sikan no mgo otow. Kagi rin, “Sikaniu, dii kow ro to tano ogligkat di sikoddi, nigligkat a dio to langit. Sikaniu taga dii kow to kalibutan di sikoddi, kona a no taga dii to kalibutan.”

Huan 8:44

Sikaniu, amoy now si Satanas woy ka goinawa now ian to oghimu to agad nokoy no igkoiniat din. Sikandin, tahan no talagbunu no nigbunsud ko iam pad mohimu ka kalibutan. Waro nigpaginlabot to kamalogotan su waro man dio to kandin ka malogot no kinagian. Ko og-uubat sikandin batasan din ian to ubaton woy sikandin ka ogligkatan to tibo no mgo ubat.

Hinimuan 19:35

Woy on nighagtong ka mgo otow no nigsaparan on to kunsial. Kagi rin kandan to, “Mgo sulod no taga Episu, tibo kinow man nataga to sikanta no taga Episu ka ogpokouyamu to soini no dakol no baloy no ampuanan ta ki Diana no mabogbog no magboboot ta. Woy sikanta rod ka ogpokouyamu to sikan no ogtahuron ta no batu no noulug no nigligkat to langit.

Hinimuan 5:3

Di kagi ni Pedro kandin to, “Manio Ananias, to nigpaboot ka ki Satanas no nig–ubatan nu ka Gimukud to Magboboot to niggalat nu man ka baad to salapi no imbayad to tano nu?

Ruma 12:2

Kono kow og-unug to mgo batasan to mgo otow no kono ogtuu no kai to kalibutan. Di atag, bogayi now ka Magboboot to oyow ogkahalin on ka goinawa now ligkat to ungod ogkoiam on ka mgo doromdom now. No ian su oyow ogpakasabut kow on ko nokoy ka ogkoiniatan to Magboboot, no ian ka maroyow no batasan no ogkoiniatan din no kono ogkaalang-alang.

1 Kurintu 5:10

Di ka innangon ku, kono no ka mgo otow no maroot so batasan dan no waro nigtuu no kai to soini no kalibutan, no oggogolgol to kalaglagan, woy ko ogpanakow, woy ko og-ampu to mgo inotow-otow. Ian su, ko sikan pa ka ignangon ku, ogpakaawo kinow ro duon to soini no tano.

1 Kurintu 6:11

Duon dio to kaniu nokani ka nighimu pad to sikan no maroot no batasan. Di, nig-awo on ni Hisus ka mgo salo now no nigbogayan kow on to Magboboot. Woy nohimu kow on no maroyow dio to tangkaan din su ligkat to ngaran ni Hisu Kristu no ian Lagboy no Igbuyag ta woy ligkat dod to Gimukud to Magboboot no ian Magboboot tanow.

2 Kurintu 4:4

Ian su kono ogtuu sikandan su si Satanas no ian ogboboot to mgo otow no waro nigtuu kai to soini no kalibutan, nig-akoban din ka goinawa ran oyow kono ogkabat-awan sikandan to sikan no Maroyow no Nangnangonon tongod to karoyawon ni Hisu Kristu. No sikandin, ian ogpokog-unawa lagboy to Magboboot.

Galasia 1:4

Nigpakimatoy si Hisus kanta no mgo makasasalo, oyow ogkaawo on ka maroot no nakabanggut to goinawa ta no nigligkat to mgo maroot no ogpakaayat kanta to pog-ugpo ta kuntoon kai to soini no kalibutan. Ian su sikan ka imboot to Magboboot no ian Amoy ta.

Episu 1:21

No dio ian si Hisu Kristu ka ogsugu. No ka katondanan din, ogpakalabow to katondanan to agad hondoi no igbuyag woy to agad hontow no mabogbog woy agad hontow no og-alap to mabogbog no katondanan. Nabogayan si Kristu to dakol no ngaran no oglabow to tibo no ngaran kai to kalibutan kuntoon woy ka dio to langit taman to waro katamanan.

Episu 2:11

Nò, sikaniu no kono no Hudiu no ogtuu on ki Hisus, doromdoma now ka dalan now nokani no waro kow pad nigtuu kandin. No ka mgo Hudiu no ogpatuli, nighingaranan dan sikaniu to mgo otow no kono no tinuli.

Episu 2:13

Nokani, sikaniu, namariu kow pad to Magboboot. Di kuntoon, su nasagboka kow on ki Hisu Kristu, nakamarani kow on kandin su ligkat to langosa ni Kristu no nigpakimatoy kanta.

Episu 2:3

Woy tibo kinow nig-un-unawa no nighimu to agad nokoy no maroot no ogkoibogan to lawa ta woy ka maroot no koiniatan to goinawa ta. No su sikan ian ka tahan no batasan ta, ogkoumaan kinow rod porom to logpad to Magboboot no ogkounawa to tibo no mgo otow no songo kono ogpaagad-agad kandin.

Episu 4:17

Sikan ian mgo sulod, su nohimu a no suguanon to Lagboy no Igbuyag ta no si Hisus, ogbohog a kaniu to oyow kono kow on oghimu to mgo maroot no oghimuon to mgo otow no waro nigtuu to Magboboot no malasi ogdoromdom to waro pulus.

Episu 4:22

Sikan ian, ongkoran tad on ka mgo doromdom ta no ogligkat to tahan no pogkootow ta su sikan ka ligkatan to ogtumanon ta ka mgo tahan no batasan ta no maroot. Ian su sikan ka ogpakagawoy woy ogpakaraat lagboy kanta.

Episu 5:6

Omunaan oglogparan to Magboboot ka mgo otow no kono ogpaagad-agad kandin su sikan ian ka mgo batasan dan. Sikan ian to kono kid ogpaagad-agad to agad hontow no og-imuimu poron kanta to mgo kagi no kono no tu-tuu. Ian su oyow kono kid ogkoubatan.

Episu 5:8

Ian su nokani, nig-ugpo ki pad to kausiloman. Di kuntoon, duon kid on to kaawangan su nohimu kid on no mgo sakup to Lagboy no Igbuyag ta no si Hisus. Sikan ian to og-awoson to ogmaroyawon ta mgo batasan ta oyow oglitos ka poghipanow ta dio to dalan to Magboboot no maawang.

Episu 6:12

Ian su kono no mgo otow no ogkounawa kanta ka og-atuan tanow. Di ian tanow og-atuan ka agad nokoy no lunsura no maroot no og-alap-alap to kabogbogan unawa ki Satanas, woy ka mgo sakup din no mgo diwata, mgo bantoy, lagkos to kohon-ingan no mgo busow no ogman-ugpo dio to aw-awangan.

Kulusas 1:21

Sikaniu nokani, nigmaroot kow dio to tangkaan to Magboboot. No nohimu kow no usig din su ligkat to mgo maroot no doromdom now woy maroot no mgo hinimuan now.

2 Timoteo 4:10

su si Dimas, nig-ongkoran a rin su dakol ka goinawa rin to pog-ugpo din kai to soini no kalibutan, no nighipanow on sikandin no nighondio to lunsud to Tisalunika. Si Krisinti, nighondio to ugpaan to Galasia, no si Titu, nighondio to Dalmasia.

Santiago 1:27

Ian ian su dio to tangkaan to Magboboot no Amoy ta, ka tu-tuu ian no pog-unug ta to goinawa rin no waro maroot no igkaamut, ko ogtantanuran ta ka goinawa ta to oyow kono ki ogkaayat to mgo maroot no batasan to mgo waro nigtuu no kai to soini no kalibutan su oyow kono ki ogkabuingan ka pogkootow ta. Woy og-awoson ta to ogsagmanon ta ka mgo noilu woy ka nabalu no mgo boi to mgo igkohirapi ran.

Santiago 1:7

No ka otow no ogkoiling to sikan no oglimanglimang so goinawa rin, songo kono ogkasaligan no og-awoson to songo kono og-iman-iman sikandin to ogkabogayan to agad nokoy no ogligkat to Lagboy no Igbuyag ta.

Santiago 4:4

Amana sikaniu no kono ogkasaligan. Nataga kow poron ko og-unug ki to batasan to mgo otow no waro nigtuu, ogkabalabagan ta ka goinawa to Magboboot. Sikan ian, agad hontow no ogkoiniatan to og-unug to batasan to mgo waro nigtuu, ogkousigan dan ka Magboboot.

1 Pedro 1:14

Nò, su nohimu kinow on no mgo anak to Magboboot, og-awoson to ogpaagad-agad kinow to innangon din. No kono kid on ogtuman to mgo maroot no koiniatan ta no nigpaagad-agaran ta nokani to waro ki pad mataga to tu-tuu ian no nangnangonon tongod ki Hisu Kristu.

1 Pedro 4:3

Ian su litos on ka nohimu now nokani no waro kow pad nigtuu no nig-unug now pad ka mgo batasan to mgo otow no waro mogtokod to Magboboot. Ka sikan, maroot pad ka mgo batasan now woy nigpabulung kow to mgo koibogan to lawa now. Maroot ka koibogan to lawa now. Nigpalasinglasing kow. Woy niglimudlimud kow oyow og-inum kow. Woy nighimu kow to dakol no mgo karagaan now no nigsayo now ka mgo maroot no hinimuon now no makasisipod. Woy niglop-ang now ka Balaod to Magboboot ko nigsimba now ka mgo inotow-otow.

2 Pedro 2:14

Agad hondoi no boi no ogkitoon dan, duon ogkoiniatan dan to ogpambaloybaloy. No kono ogkabulung ka pogkoibog dan to mgo maroot. No ian dan og-ayaton ka mgo otow no doisok pad ka pogsabut dan ko nokoy ka litos no oghimuon dan. Hanhanon sikandan to kono no litos. Di ogkoumaan sikandan to logpad no ogligkat to Magboboot.

1 Huan 3:10

Sikan ian ka ogtokoron ta ko hontow ka mgo anak to Magboboot woy ko hontow ka abin ni Satanas, su ka otow no kono oghimu to maroyow woy ka otow no waro goinawa rin to duma rin, kono no anak to Magboboot.

1 Huan 3:8

Di ka otow no ogparagason ka poghimu rin to mgo salo, sakup dod ni Satanas su ligkat to an-anayan, batasan ni Satanas to oghimu to salo. Di ian inghondini ni Hisus to soini no kalibutan su oyow oggulakon din ka mgo hinimuan ni Satanas.

1 Huan 4:4

Mgo anak, nigpasakup kow atag to Magboboot, no waro kow maalap to sikan no mgo talag-anad to ubat no mgo nangnangonon su ka Gimukud to Magboboot no ogdumaruma kaniu, mamabogbog ki Satanas no ogbogoy to doromdom dio to sikan no mgo otow no kono ogtuu ki Hisus no kai to soini no kalibutan.

1 Huan 5:19

Songo nataga ki to nohimu kid on no mgo anak to Magboboot. Di ka tibo no mgo otow kai to soini no kalibutan no waro nigtuu kandin, duon pad to katondanan ni Satanas.

1 Huan 5:4

Ian su ka mgo otow no nohimu on no anak din, ogmanokal on su ligkat to pogsalig dan ki Hisus. No kono dan ogkatuman ka mgo maroot no batasan to soini no kalibutan.

Impapitow 12:9

Ka sikan no dakol no ulod woy ka mgo diwata rin, indogpak kai to tano. No ka sikan no ulod, duon dongan no ian ka igbuyag to mgo busow no oghingaranan ki Satanas woy si Talagbayung. No sikandin ka niggawoy to tibo no mgo koot-otawan kai to soini no kalibutan.

Impapitow 13:14

Nò, sikan ian to ogkagawayan on ka tibo no mgo koot-otawan to soini no kalibutan su ogbogayan sikandin to ogmanhimu to sikan no mgo kabolbolonganan duon to tangkaan to sikan no nokohun-a no magintalunan. Pogkaponga, ka igkaruwa no magintalunan, ogsugu to mgo otow to oyow oghimu to inotow-otow no ogkoiling to sikan no nokohun-a no magintalunan no duon dakol no pali no ogpakimatoy poron di nouyag do.

Impapitow 13:8

No ogsimboon sikandin to tibo no mgo otow to soini no kalibutan no waro ikasulat ka ngaran dan dio to sulatanan to ngaran to mgo otow no ogbogayan to kouyagan no waro katamanan. Ligkat to waro pad nohimu ka soini no kalibutan, tahan on no ingkasulat ka ngaran dan to sikan no sulatanan to Nati to Karniru no nighimatayan nokani.

Impapitow 16:17

Nò, ka igkapapitu no diwata to Magboboot, songo imbus-ug din ka tagu to kandin no boung dio to aw-awangan. No duon maagbot no lagong no nigligkat to pinpinuuanan to pogboboot to Lagboy no Igbuyag no duon to Dakol no Ampuanan. Kagi rin to, “Napongaan on.”

Impapitow 20:2

No nigdakop din on ka dakol no ulod no ogkohingaranan to daragun. Sikandin si Satanas no ian igbuyag to mgo busow. No nigbanggutan to diwata ka sikan no ulod woy indogpak din dio to bitu no kono ogkatogkad ka karalomi rin. No niglokoban din woy nigsusian woy duon indanan to bo-bo to sikan no bitu oyow kono ogpakalibuwas woy kono ogkoubatan to ulod ka mgo otow taman to ogkapongaan on ka songo malan no tuid. Di pogkaponga to sikan, ogpalibuwason pad sikandin to magaan do.