Dt 20:1 - A Txꞌan Biblia Yin Kꞌanjobal 1989

¹ A yet ok ex tok e yak'len owal yetok eb ajc'ul, ok e yila' tatol xiwil bisil chej eb, c'al carruaje yet owal, yetokc'al is soldado eb, xiwilxa bisil eb e yintak, manchak ex xiw bay eb, yujtol a Jehová co Diosal, Cham max on ion eltek bay Egipto, a' ok oc e yetok.

Dt 20:1 Iomraidhean Croise

Gn 26:3

A tinani' watx' ayji bay jun conob ti', ayinc'al ec' etok cax ok wak'onc'al in watx'c'ulal ayach, yujtol a masanil jun tx'otx' ti' ok wak' ayach c'al bay masanil enatil yet chi yuncan el masanil tzet max wal bay a mam Abraham.

2 Cr 14:10

Max eltok cham rey Asa yin chalen ba yetok, axa yoc satak tu' yak'on owal bay jobeal yet Sefata, ay cawilal Maresa.

2 Cr 14:11

Yuj tu xin, max aj yaw Asa bay Jehová is Diosal, max yaloni: Mamin Jehová, ach ti' lajanc'al chi yun a colwaj bay mac tec'an, c'al bay mac c'am wal is tec'anil. Yuj wal tu xin Mamin, colwajan jetok. Ilab tol asannej ach ayach oc yipok co c'ul, xan a wal yin a bi chon jayoc satak jun miman bulan ejército ti'. Ach ti', co Diosal ach, manchak a cha' tec'ban ba eb anima ti' a satak, ẍi cham rey Asa.

2 Cr 20:12

Yuj tu xin, ach co Diosal, elok wal yin a c'ul chaoc yailal yiban eb xin, yujtol ayon ti', caw wal c'am jip chi jabej, yet chi je' co tec'ban co ba on satak jun miman bulan soldado tu', yet chi jak' owal yetok. Caw wal man jojtakok tzet wal chi jun on; yuj tu' xan a wal en ay oc co nabal, ẍi cham rey bay Jehová.

2 Cr 20:15

Max yalon cham Jahaziel tu' axca ti': Abek wal xin, ex cajyom ex bay Judá, c'al bay Jerusalén, yetok c'apax ach rey Josafat. Ẍi wal Jehová axca ti': C'am chex xiwi, tamwal cabax aj e c'ul yuj jun miman bulan soldado tu', yujtol a jun owal tu', man e yetok ayex ti', palta wet.

Salmos 118:6

Ayic' Jehová wetok. C'am chin xiw yuj tzet ok in yut eb wet animail.

Salmos 20:7

A jaywan eb, a is carruajelak yet owal chi yaoc yipok c'ul, axa juntzanxa eb, a is chej eb chi yaoc yipok c'ul; axa on ayon ti', a Cham Jehová co Diosal chi jaoc yipok co c'ul.

Salmos 23:4

Caxc'al chin eq'uel bay jobelak yelxac'al k'ekk'olinak, man ok in xiw yuj junok tzet yetal ay is may, yujtol ay ach ec' wetok Mamin. Yuj a c'ax c'al a k'okoch tol locan yayji, xan c'am chin xiwi.

Salmos 46:11

¡A Jehová Cham Yajaw yin Masanil ayic' jetok! ¡A Diosal jichmam Jacob ayoc jetok, a' ayoc jenelok!

Salmos 46:7

A Jehová Cham Yajaw yin masanil ayic' jetok. A Diosal jichmam Jacob ayoc jetok, cax a' ayoc jenelok.

Salmos 46:8

Ul ilek tzet yetal c'ayubtak max yun Cham bay yiban tx'otx' tx'otx' ti'.

Ex 20:2

Ayin ton Jehová e Diosal in, tol max ex wieltek bay yul yet Egipto bay ayex oc yin mosejal.

Is 31:1

Ok'bal c'ul eb chi toj bay Egipto yin sayoj colwal. A eb soldado yet Egipto, c'al is chej, c'al is carruaje tol miman bisil, chi yaoc eb yipok is c'ul; palta c'am chi yaoc eb sat yin Jehová, Cham Diosal Israel Asanxanej Ocok, tamwal chi k'an eb colwal bay Cham.

Is 41:10

C'amc'al chex xiwi, ayin ec' e yetok. Manchak ex oc il, ayin ton e Diosal in. Ayin chi wak' e yip, ayin chex in colo'. Ayin chex wila', chex in mitx'waayok yetok wipalil chin k'anbalnej yin tojolal.

Is 43:2

Ta chex eq'uel yul a', ayin ec' e yetok bay tu'. Ta ok e k'axponej mimek aej, man ok ex jik'bok. Ta ok ex eq'uel xol k'ak'ej, man ok ex tz'atok yuj k'ak'.

Is 7:14

A wal caw cham Yajaw ok yak' junok tx'oxbanil ayex: A jun ix k'opoj ix ok oc unin yin, ok jay jun is winak unin, Emanuel*fn* ok yik yuj ix.

Jeremías 16:14

Palta ayin Jehová in chi wak' in ti': A tinani', a yet chin is locbantok eb anima, chi yal eb axca ti': Yin bi Cham Dios max ion eltek eb israel bay Egipto, ẍi eb.

Zacarías 10:5

Ok tec'ay eb is yajc'ul, axca tec'on aj eb soldado tz'otz'ew yulak calle. Ok yak'on ayc'ay eb owal, yujtol ayin oc yetok eb, ok elcan q'uixwil eb ayoc yiban chej yuj eb.

Nm 10:9

Ta ay junok ajc'ul chi jayoc ayex bay yul e tx'otx'al, cax chex eltok e yak'on owal yin, ayman chi xulay ch'en trompeta; yin coc'xac'al xol chi yun xulayi, yet watx' ok ex in natek, ayin Jehová e Diosal in ti', axa ex in colon el bay eb ajc'ul tu'.

Nm 23:21

C'am yobtakil chi yil Cham yin conob Israel. Caw wal watx' eb is yinatil Jacob tu'. A Jehová is Diosal eb ayc'al ec' yetok eb c'al a' ayoc is Reyalok eb.

Ro 8:31

Yuj juntzan chi wal ti', xan caw c'amxa tzet chi co na' tinani'. Caw wal ayoc Dios jetok. Yuj tu', ¿xin ta ay mac chi tzakay on yaoncan yalan?

Dt 1:29

Catatu' max in tak'wi: Manchak ex xiwaj yuj juntzan tu'.

Dt 2:7

A Jehová co Diosal max yak' wal watx'c'ulal jiban yin masanil tzet max junej. A yin jun 40 abil ti', ayc'al oc Cham jetok, cax chon taynenc'al bay chon ec' bay jun miman takin tx'otx' ti'. C'amc'al tzet max majax ayon yuj.

Dt 20:2

A yet chi apnixac'al yorail yoc owal tu', a cham sacerdote ok k'anjab bay eb soldado,

Dt 20:3

cax ok yalon axca ti': Abek ex wet israelal, a tinani' toxa ok ex tok yin owal yin eb ajc'ul, c'amc'al chi cabax aj e c'ul, tamwal chex xiwi. C'amc'al chex bilaj yuj xiwilal,

Dt 31:6

Tec'bajek e ba. C'am chex xiwi yet ok e chalen e ba yetok eb ajc'ul tu', yujtol a Jehová co Diosal ayoc e yetok. C'am che na' tatol ok ex beklaycan yuj Cham, tamwal ok ex yak'can Cham e tx'oklil, ẍi cham Moisés.

Dt 31:8

A Jehová babel toj a satak. Ayc'al ec' etok, c'amc'al chach beklaycan yuj, xan c'am chach xiwi, tamwal chach meltzoj entak, ẍi cham Moisés.

Dt 7:1

A yet ok ex yiontok Jehová bay sat tx'otx' bay max yak' is ti' yak'on ayex, a' ok ion el eb nacionlak e satak, a ton eb heteo, eb gergeseo, eb amorreo, eb cananeo, eb ferezeo, eb heveo c'al eb jebuseo; ukeb wal nación tol caw wal mimek e yintak.

Dt 7:18

¡Manchak ex xiw bay eb anima tu'! Naektek tzet max yut Jehová eb anima bay Egipto yetok is reyal.

Dt 7:21

Yuj wal tu xin, c'am chex xiw bay eb anima tu', yujtol a Jehová co Dios ayic' e nan e xol, caw wal tol ay is may Cham.

Dt 9:3

Ojtaknejek el tinani' xin, tol a Jehová co Diosal, a babel toj e satak axca k'ak'ej c'aywajwom. Ok c'aylayel eb c'al yilay el eb e satak. Ayex ti' ok e yiel eb e satak, cax ok e c'ayon c'al el eb yin aymanil axca wal yalon Jehová.

Josué 1:5

A jantak tiempoal ayach ec' bay yulyibank'inal ti', c'amc'al mac ok tec'baj ba a satak. Ayinc'al oc etok, axca max yun wocc'al yetok Moisés. C'amc'al bak'in ok ach in bekcanok.

Josué 1:9

Ayin Jehová in chi wal ayach, tol tx'ijan chot a ba, tec'anc'al chot a ba, c'amc'al jabok chach paxtok entak, tamwal chi xiwaj a c'ul, yujtol ayin Jehová a Diosal in chi wal ayach, tol ayinc'al ec' etok, tzanc'al bay chach eq'ui, ẍi Jehová bay.

Josué 11:9

Max yikej cham Josué yunen masanil tzet max yal Jehová, max mak' k'aj cham yakan is chej eb ajc'ul tu', max yak'on tz'a masanil is carruaje eb yet owal.

Eb Juez 6:12

A tu' max tx'ox ba Cham yángel Jehová bay Gedeón, cax max yaloni: —Manchak ach xiwi, ach soldado watx', tol tec'an a waayi. A Jehová ayoc etok, ẍi bay.

Eb Juez 6:16

Max yalon pax Jehová: —Ayin oc etok, xan ok je' oj. Ok ayc'ay eb madianita oj, axcac'al chi yun yayc'ay junok winak tx'oklil.

Babel Libroal Cham Samuel 17:32

Max yalon David bay Saúl: —Manchak ex xiw bay jun filisteo tu'. Ok in tok ayin a chekbej in ti', ok wak' owal yetok, ẍi David.