Numeru 8:7 - Ritonõpo Omiry: A Bíblia Sagrada na língua Aparai do Brasil

⁷ Toto kurãkatohme tuna pitiko emako toto pona, zũsety emero isahkako toto zoko poko te, zupõkõ ikurikapoko roropa. Moro ke tukurãkasẽme exĩko mã toto, nuriame pyra.

Numeru 8:7 Iomraidhean Croise

Jenexi 35:2

Naeroro ynara tykase Jako tytapyĩ taõkomo a, tymarõkõ maro emero: — Neponãmary ipahtoko, imeimehnõ neponãmarykõ, amaro xine ahtao. Oorypyrykõ ikorokapotoko te, epytoko te, upo amurutoko, ikurikasenano.

Saumu 51:2

Kukurikako popyra jexiryke, iirypyryme jehtoh ikurikako kure jehtohme ropa.

Saumu 51:7

Yyrypyry touko ukurohtae kure jehtohme; kukurikako upo ikurikasenã sã jehtohme, mauru karimutumã motye jehtohme.

Exutu 19:10

Ynara tykase ropa Ritonõpo: — Ytoko imoihmãkõ zuruse: Seroae nuriame ehtoh irumekatoko. Morararo kokoro oorypyrykõ irumekatoko jeahmatohme oya xine. Oupõkõ roropa ikurikatoko

Izaja 52:15

Yrome tuhkãkõ imeimehnõ nonory põkõ kurãkãko mana; mokyro eneryke tyya xine ynara ãko mã toto ipoko: ‘To, tuisamehxo mana,’ ãko. Tuisa tõ osenuruhkãko roropa mã toto. Mokyro eneryke zurupitopyra exiketõ enẽko mã toto, enetupuhnõko mã toto onetapitopyra ro aexityã ipoko.”

Jeremia 4:14

Jerusarẽ põkomo, popyra oehtohkõ ikurikatoko okurohtao xine, typynanohsẽme oehtohkõme. Okynahxo matose oorypyrykõ poko osenetupuhnõko matose. Epo hnae moro poko oehtohkomo.

Ezekieu 36:25

Konopo sã tuna kurã emãko ase opona xine okurikatohkõme oneponãmarykõ pokoino, emero nuriame oripotopõpyrykõ pokoino roropa.

Rewitiku 15:27

Mame ahno a moro nyhtoh tapose ahtao, morohne epehtoh tonõ tapose ahtao roropa eya epona typorohse nohpo munume exikety ahtao, nuriame exĩko mana, tupõ kurikãko mana, epỹko roropa mana; mame nuriame exĩko mana xixi omõtoh pona.

Rewitiku 15:6

typorohse ahtao roropa mokyro porohtopõpyry pona, tupõ kurikãko mana te, epỹko roropa mana; mame nuriame exĩko mana xixi omõtoh pona.

Rewitiku 16:28

Mame mokyro morohne zahkahpono tupõ kurikãko mana, epỹko roropa mana toehtohto ropa pata pona.

Rewitiku 8:6

Moeze a Arão tõ tonehpose tyya, mame aomi poe toekurikase toto.

Numeru 19:13

Aorihtyã ekepyry tapose ahtao ahno a, mame ekurikara mokyro ahtao nuriame exikehpyra mana, epona tuna ekurikatoh onemara exiryke. Nuriame Ritonõpo Tapyĩ Kurã rĩko mokyro mana. Mokyro anaorihmapopyra ahtao taroposẽme exĩko mana Izyraeu tõ maro pyra ehtohme.

Numeru 31:20

Oupõkõ roropa ikurikatoko, okyno pihpyry risẽ roropa te, poti hpoty risemy te, wewe risẽ roropa emero.

Numeru 8:21

Toekurãkase toh nexiase rewita tomo, tupõkõ tukurikase roropa eya xine. Mame toto tapiakase Arão a tynekaroryme kurã Ritonõpo a, okyno tõ tyahkase Arão a iirypyrykõ korokapotohme.

Epereu 9:10

Moeze omihpyry poe pakatokõ tõsẽ poko eukuru poko. Toekurikase roropa toto. Jarao rokẽ morohne poko toh kynexine. Yrome morohne poko pakatokõ tyripose Ritonõpo a axĩtao rokene, Kyrixtu oehtãne rokene, (aomiry kasenato ke, kukurãkatohkõme rahkene).

Epereu 9:13

Pui tõkehko munuru, tynekarotyã zahsẽ erunohpyry roropa ahno pona tyritohme kynexine, tyyrypyhpyke exiketõ pona, toto rypyry kurikatohme repe.

Tiaku 4:8

Ritonõpo maro se oexirykõ se awahtao xine, amaro xine se roropa ynororo mana. Iirypyrymãkomo, oorypyrykõ irumekatoko, oorypyrykõ ikorokapotoko Ritonõpo a.

1 Peturu 3:21

Moro tuna kuamorepatohkõme kynexine kuẽpurihkarykõ poko. Epypyra sytatose kuẽpurihkarykohtao. Osẽpurihkãko sytatose: “Typynanohse ywy Ritonõpo a,” katohme imehnõ netaryme emero. “Zae ase seromaroro Ritonõpo a,” ãko sytatose. “Aomipona rokẽ ase taroino,” ãko sytatose kuẽpurihkarykohtao, tõsemãse ropa Jezu Kyrixtu exiryke.

Apokaripxi 7:14

— Kũ, omorohko, zuaro mase, tykase ywy eya. Mame ynara tykase ynororo ya: — Moxiã poremãpyra exiketomo. Toanahtose toto a etuarimatoh konõto toehse ahtao. Kaneru mũkuru etapary sã toorihse Ritonõpo mũkuru. Moro enetuputyryke moxiamo a tukurikase toto Ritonõpo a upo kurikary sã kyya xine.