Numeru 11:12 - Ritonõpo Omiry: A Bíblia Sagrada na língua Aparai do Brasil

¹² Mokaro onyripyra exiase, toto enurumaponeme pyra roropa exiase. Oty katoh suhsu ekaroneme jyripõko mah, syhryme mokaro arotohme poeto pisarara samo mya moro nono pona, onekarory eya xine õmihpyry ae ro itamuru tomo a?

Numeru 11:12 Iomraidhean Croise

Jenexi 13:15

Sero nono emero onenehpyry ekarõko ase oya, apakomotyamo a roropa jũme oesarykõme ehtohme.

Jenexi 24:7

Ritonõpo, Kapu Esemy a tonehse ywy papa tapyĩ tae, wekyry tõ nonory poe. Tõmiry totapose ya: sero nono ekarõko ase apakomotyamo a, tykase ynororo ya. Tynenyokyhpyry aropõko mana oesemary enepotohme oya, naeroro ekurehpyra mase, nohpo epekahnõko mase umũkuru pytyme.

Jenexi 26:3

Tehme rokẽ exiko sero nono po, amaro exikehpyra exĩko ase, kure rokẽ orĩko ase. Apakomotyamo a sero nono ekarõko ase porehme, jomihpyry ae ro omy, Aparão a.

Jenexi 50:24

Morarame ynara tykase Joze takorõ tomo a, turui tomo a roropa: — Orihsasaka ywy. Yrome Ritonõpo opynanohtorỹko mana. Aarotorỹko ropa ynororo taroino, imepỹ nonory pona, tynenepohpyry Aparão a, Izake a, Jako a, enara.

2 Tuisa 10:1

Morarame Samaria po Akape poenõ kynexine ipakõ roropa, 70mãkõ kynexine. Mame pape tymerose Jeu a pata esã neneryme, tamuximãkõ neneryme roropa, Akape ekyry tõ pyno exiketõ neneryme roropa. Ynara tykase ynororo:

2 Tuisa 10:5

Naeroro tõximõse toto; tuisa tapyĩ konõto erase te, pata tuisary maro te, tamuximãkõ maro, Akape ekyry pyno exiketõ maro. Oximaro omi taropose eya xine Jeu a ynara katohme: “Opoetoryme ynanase. Õmiry omipona se rokẽ ynanase. Yrome tuisa ekyry onymenekara ynanase tuisame tyritohme. Naeroro zae ehtoh oya tyriko,” tykase toto.

Exutu 13:11

Ritonõpo Oesẽkõ aarotorỹko mana kananeu tõ nonory pona, tõmihpyry ae ro atamuru tomo a. Morarame sero nono ekaroryhtao oya xine,

Exutu 13:5

Tõmihpyry tokarose Ritonõpo a atamuru tomo a kananeu tõ nonory ekarory poko oya xine te, heteu tõ nonory te, amoreu tõ nonory te, heweu tõ nonory te, jepuseu tõ nonory, enara. Moro nono kure mana otyro zamaro exikety. Tarose awahtao xine eya morotona otuhtoh konõto tyritoko oeahmatohkõme nuno apitorymã po, emero jeimamyry ae.

Exutu 33:1

Ynara tykase Ritonõpo Moeze a: — Ytotoko taroino, omoro, opoetory tõ maro, onenepyhpyry tõ Ejitu poe. Ytotoko ononorykõ pona. Moro nono poko jomihpyry ekarone Aparão a te, Izake a, Jako a, imũkuru tõ maro, ipakomotyã maro. “Sero nono ekarõko ase oya xine,” akene.

Exutu 6:8

Aarotorỹko ase, jomihpyry ae ro Aparão a te, Izake a te, Jako a roropa: ‘Sero nono emero ekarõko ase apakomotyamo a,’ katopõpyry ae ro. Mame moro nono ekarõko ase oya xine oesarykõme. Ywy ase Oesẽkomo.”

Izaja 40:11

Kaneru tõ pyno exikety sã, typoetory tõ pyno Kuesẽkõ mana; kaneru poenõ pisarara oximõme tyripõko mana, tonao toto arõko mana, taporykõ po tomeseke sã jẽkõ suhsu ẽnanõ arõko mana.

Izaja 49:15

Ynara ãko Ritonõpo, toto ezuhnõko: “Poeto ẽ tumũkuru poko wenikehnõko nah? Tumũkuru nymyry pyno exikehsaromepyra mana. Morarame tumũkuru poko tuenikehse nohpo ahtao ro, jũme wenikehpyra exĩko ase opoko.

Izaja 49:23

Tuisa tõ jũkõ sã opoenõkõ pyno exĩko mã toto, ipyxiãkõ opoenõ pyno ehtoh poko erohnõko mã toto. Tosekumuru po porohnõko mã toto oẽpataka tõmytykõ po nono pokoxi. Erohnõko mã toto opoetoryme. Morara ahtao zuaro exĩko matose ywy ase Ritonõpo, jenetupuhnanõ jũme emynyhmara exĩko mã toto.”

Ezekieu 34:23

Tuisa ekarõko ase jeky tomo a ypoetory Tawi panono, toto esẽme toiroro ehtohme. Toto esẽme exĩko mã ynororo, toto pyno exĩko mana.

João 10:11

— Toto esẽ ase kurano. Morara exiryke ypoetory tõ pyno ase. Kaneru esẽ ke mana toky tõ pyno. Mokyro sã ase. Jorikyry se pyra ase repe, yrome ypoetory tõ pynuke jorikyry se ase, toto pyno jexiryke, orihpyra toto ehtohme.

1 Korĩtiu 4:15

Ãmorepatõkõ ikuhpỹme tomãse ahtao ro, Kyrixtu omiry poko toiro rokẽ omykõme mana. Tamorepase ya oexirykõke Jezu Kyrixtu tonetupuhse oya xine. Morara exiryke omykõme ase, osemazuhme tamorepase ya oexirykõke.

Karaxia 4:19

Poetohti, opoko xine sam ãko ase. Enurusasaka exikety sã ase sam ãko opoko xine. Sam kakehpyra ase roropa Kyrixtu omipona ipunaka oexirykõ eraximaryke ya.

Teuteronomiu 1:31

tynyrihpyry sã roropa ona tonorẽ po. Kuenepyrykohtao xiaro ona tonorẽ po meneatose, tomeseke samo, oewomarykõme, poeto zũ tumũkuru arory samo.”