Mikeja 2:1 - Ritonõpo Omiry: A Bíblia Sagrada na língua Aparai do Brasil

¹ Popyra ehtoh oehnõko mana! Owõpyra ro tarõkõ ahtao osenetupuhnõko mã toto imehnõ rohmanohpory poko, toto ryhmary poko, enara! Mame tõmehse ahtao owõnõko mã toto, typenetatohkõ rĩko mã toto tyriry waro toexirykõke.

Mikeja 2:1 Iomraidhean Croise

Jenexi 31:29

Awãnopyry se jahtao, kuãnopyry. Yrome koko turuse ywy Ritonõpo, omy Esemy a. Ynara nase ya: “Tomeseke exiko! Apatũ onyenonohpyra exiko. Zae rokẽ exiko imaro,” nase ya.

1 Tuisa 21:7

Mame ynara tykase Jezapeu, tynio Akape a: — Izyraeu tõ esẽ kara mahno? Owõko hkoty! Tãkye exiko! Otuhko. Ywy roro Napote tupi ekarõko ase oya, Jezereu pono.

Exite 3:8

Mame toytose Hamã oturuse tuisa maro. Ynara tykase ynororo: — Sapararahme ahno ononory po nae tyorõkomo. Imepỹ omihpyry omipona mã toto. Popyrahxo mana, tuisa, onyripohpyry omipona pyra mã toto. Naeroro kurehxo exiry toto enahkapory.

Exite 5:14

Mame ynara tykase ipyty, epe tõ roropa, imaro exiketomo: — Wewe risẽ tyripoko xikihme exikety, 20 meturume exikety. Kokoro pakeimo ekaropoko tuisa a Moatekai anỹpotohme ipymyry ae tyhwyme moro wewe pokona. Moromeĩpo ytoko tãkye tuisa maro otuhtoh kurã pona. Morara kary kure nexiase Hamã a, wewe risẽ tyripose eya rahkene.

Exite 9:25

Yrome Exite toytose oturuse tuisa konõto maro, inyripohpyry tymeropose eya, juteu tõ ryhmary se Hamã ehtopõpyry iramapotohme ropa Hamã tõ ryhmatohme. Morarame Hamã tanỹse tyhwyme imũkuhpyry tõ maro wewe pokona.

Jo 15:35

Osenetupuhnõko mã toto popyra ehtoh ritohme, zae pyra ehtoh rĩko mã toto. Osenetupuhkehpyra mã toto imehnõ enekunopyry poko.”

Jo 24:14

Ahno etapane owõnõko mana tõmehse ahtao tytineruke pyra exiketõ etapatohme. Mame tykohmãse ahtao omatome exĩko mana.

Saumu 36:4

Tãtaxikase tahtao tynyhtoh po, osenetupuhnõko mana popyra ehtoh riry poko. Zae pyra ehtoh esemary ae ytoytõko mana. Popyra ehtoh poko: “Moro se pyra ase,” kapitopyra mana.

Saumu 36:5

Ritonõpo Jesemy, yna pyno oehtoh kaetoko exikety sã mana kapu pona exikety samo. Anamonohpyra oehtoh yna ewomary poko itamurume mana, akurũ pona exikety samo.

Saumu 58:3

Tonurutopõpyry poe ro popyra exiketõ zae pyra ehtoh poko mã toto; ajohpe omiãko mã toto tonurutopõpyry poe ro.

Porowepio 12:2

Ritonõpo zamaro zae ehtoh poko exiketõ mana, yrome jamaro pyra mana popyra tyriry se exiketomo.

Porowepio 14:22

Zae ehtoh poko oerokuruhtao, õmiry etary se exĩko mã toto, ime oehtoh enetupuhnõko roropa mã toto, yrome popyra ehtoh poko oerokuruhtao azahkuru mase.

Porowepio 3:27

Tymõkomokãkara etuarimaryhtao mokaro akorehmako akorehmatoh pune oya ahtao.

Porowepio 4:16

Mokaro nyhsaromepyra popyra ehtoh onyripyra tahtao xine. Tohrame toh repe, yrome nyhpyra mã toto imehnõ onyryhmara ahtao ro.

Izaja 29:20

Typoetory tõ rohmanohponanõ enahkapõko Ritonõpo mana; typoihtonanõ enahkapõko mana. Osenetupuhketõ imehnõ ryhmatoh poko tonahkasẽme exĩko mã toto.

Izaja 3:14

Typoetory tõ tuisary tõ hxirõko mana. Ynara ãko eya xine mana: “Izyraeu tõ tonahkase oya xine, ynarykahpyry uwa zoko tomo! Atapyĩkõ pehme mã kehko tymõkomokãkara kyryrỹpyry tapoise oya xine exiryke.

Izaja 32:7

Ajoajohpe exikety zae pyra ehtoh rĩko mana popyra toexiryke. Osenetupuhnõko mana tymõkomokãkara enekunohtohme ajohpe ehtoh ke, zae ehtoh anapoipyra toto ehtohme.

Izaja 5:8

Popyra ehtoh oehnõko oya xine mana, tapyi tuhke epekatyryke oya xine tupito tõ roropa oesaryme rokẽ ehtohme! Taroino okynã pyra osa pyra exĩko mana imehnõ esaryme, amarokõ rokẽ toiroro exĩko matose sero nono po!

Izaja 59:3

Popyra matose: imehnõ etapãko matose, imehnõ ryhmãko matose, ajohpe matose, popyra ehtoh poko oturukehpyra matose.

Jeremia 18:18

Mame ynara tykase ahno: — Ehmaropa Jeremia mynyhme tyripotohme! Oturuketõ nae ro, exikehpyra mã toto kuamorepatohkõme, tuaro exiketõ roropa zae ehtoh poko kuakorehmatohkõme te, urutõ kõ roropa Ritonõpo omiry ekarotohme kyya xine. Ehmaropa ihxirotohme, aomiry etakehtohme kyya xine.

Ezekieu 11:2

Mame ynara tykase Ritonõpo ya: — Ahno mũkuru, moxiã orutua kõ popyra osenetupuhnõko mã toto, popyra ehtoh ritohme, popyra imehnõ amorepãko roropa mã toto sero pata po.

Ezekieu 33:26

Atapemãkõ ke openetatohkõ rĩko matose. Zae pyra matose. Imehnõ pyxiã poko matose. Oty katohme ononoryme sero nono ekarõko matou?”

Ezekieu 38:10

Ynara ãko Ritonõpo Kuesẽkõ Koke a: — Morarame moro ẽmepyry toehse ahtao osenetupuhnõko mase popyra ehtoh ritohme oya.

Ezekieu 46:18

Mokyro tuisa imepỹ nonory onupuxihkasaromepyra mana. Nono ekarory se ynororo ahtao tumũkuru tomo a, tynonory poe rokẽ moro ekarõko mana, ypoetory tõ onyryhmara ehtohme, inonory anapoipyra aehtohme roropa.

Mikeja 6:12

Jerusarẽ po, tymõkomokamo imehnõ enekunohnõko mã toto tineru apoitohme, ajohpe roropa matose emero porehme.

Naum 1:11

Pata Niniwe poe orutua tooehse popyra ehtoh riry se exikety, etonatoh se mokyro mana Ritonõpo poremãkary poko.

Zakaria 7:10

Pytỹpo tõ onenekunohpyra ehtoko, poetõpo tõ roropa. Imehnõ nonory poe aehtyã roropa ononorykõ pona ehtohme te, tymõkomokãkara roropa. Osenetupuhpyra ehtoko imeimehnõ enekunohtoh poko.”

Maku 15:1

Morarame ẽmepyryme tõximõse toto Ritonõpo maro oturuketõ tuisary tomo te, juteu tamuru tõ maro te, Moeze omihpyry warõkõ maro, enara. Pata esã maro tõturuse toto tynyrirykõ waro toehtohkõme. Mame Jezu tymyhpose toto a, arotohme kowenu tuisary a, Pirato a.

Ruka 20:19

Morara kary etaryke tyya xine, Jezu apoiry se toehse toto, Moeze omihpyry warõkomo, Ritonõpo maro oturuketõ tuisary tõ maro. Typoko xine Jezu oturutoh waro toh kynexine. Naeroro Jezu ryhmary se toehse toto. Yrome imoihmãkõ kurũke anapoipyra tokurehse toto.

João 19:11

Ynara tykase Jezu Pirato a: — Tuisame oehtoh onekaropyra Ritonõpo ahtao, tuisame pyra mexiry. Yrome tuisame oehtoh tokarose Ritonõpo a exiryke sã rokẽ tuisame mase toehse. Mokyro rokẽ hxirõkohxo mã Ritonõpo jekarohpõ oya. Ohxiropyrahko mana, tykase Jezu eya.

Atos 23:12

Morarame yrokokoro juteu tõ oximõme toehse Pauru etapary se exiketomo. — Otuhpyra sehtone, eukuru onẽpyra roropa sehtone Pauru etapatoh ponãmero kyya xine, tykase toto.

Atos 23:15

Naeroro kokoro koroneu a Pauru enehpoko oya, õturupotohme samo. Ynanase eraximãko etapatohme, tykase toto eya xine, tytamuxirykomo a.

Romanos 1:30

Imehnõ kerekeremãko mã toto. Ritonõpo zehno mã toto. Imehnõ roropa rĩko mã toto popyra. Epyrypãko mã toto typoko xine. Orẽpyra toexirykõ poko osekãtopõko mã toto. Osenetupuhkehpyra mã toto tyyrypyrykõ poko. Tumykõ omipona pyra mã toto.

Teuteronomiu 28:32

— Onenerykõme omũkuru tõ oẽxiry tõ maro tokarosẽme exĩko imehnõ nono põkomo a toto namotome. Kokoro rokẽ mokaro oepyry ropa eraximãko matose repe omuhpe, yrome toto onenehposaromepyra ropa exĩko matose.