Xiakre 4:3 - Tĩrtũm kapẽr ã kagà nyw

³ Rỳ ka mẽ tõhã mẽmoj tã awỳ nhũm kot mẽ amar tã mẽ amã õr kêt nẽ. Kot mẽ amã õr nhũm mẽ ate ho anhõxỳ ho apa pymaj na hte tõhã mẽ amã mẽ ate hã axàhwỳr xwỳnhta nhõr kêt nẽ.

Xiakre 4:3 Iomraidhean Croise

Matêwre 20:22

Hãmri nhũm kuma nẽ Xiakre mẽ Juãw wa omu nẽ wa kãm: —Nà na war akatorxàja htỳx ã war ato ixwỳr anẽ. Koja mẽ tokyx ixpĩ kot paj amnhĩ xà htỳx kãm ijamak kãm ty. Tã xà koja mẽ ixpyrà nẽ ã war anhĩpêx anẽ ka wa ixpyrà nẽ amnhĩ xà htỳx kamã ajamak rax kãm ty nà? Anẽ. Hãmri nhũm wa kãm: —Tỳ. Nà kot pa wa ijaxwỳja anẽ nẽ apyrà nẽ amnhĩ xà htỳx kãm ijamak kãm ty. Anẽ.

Makre 10:38

Hãmri nhũm wa kãm: —Nà na ka wa ãm atỳx ri ã amnhĩ to ixwỳr anẽ. Koja mẽ tokyx ixpĩ pa amnhĩ xà htỳx kamã ijamak rax nẽ ty. Tã xà koja mẽ ixpyrà nẽ ã war anhĩpêx anẽ ka wa ixpyrà nẽ amnhĩ xà htỳx kamã ajamak rax kãm ty nà? Anẽ.

Rukre 15:13

Hãmri nhũm kot haputa ãm ri hipêêxà hkôt pa hkrãnre hãmri nẽ kot kãm hikukrêx nhõr jamỳnh pa nẽ ma nhỹhỹm o mõ nẽ ho wẽnê hpa. Hãmri nẽ hpãnhã kàxpore jamỳ nẽ ma nhỹhỹm mõ. Nhỹhỹm awry hã pika hõ hwỳr ma mõ. Mõõ hãmri nẽ krĩ hõ kamã htỳx ri tanhmã amnhĩ tomnuj to ho ri pa. Hãmri nẽ gaa nẽ ra mẽ hkuprỳjê hã kàxpore ho hapêx pa. Nẽ kagôxỳhti hã ho hapêx pa. Nẽ gaa hãmri nẽ hikàxpore hkêt nẽ ri pa.

Rukre 15:30

Tã nhũm akra kot haputa apê akukrêx kwỳ jamỳnh pa nẽ ma o mõ nẽ axtem nẽ mẽ hkuprỳjê mã õr par tã akupỹn mõ nẽ pôj. Ka omu nẽ akĩnh nẽ hã môx kra twỳmta pĩ. Nà kot paj mẽ awỳr ixàr kêt nẽ.” Anẽ. —Hãmri nẽ gryk tỳx nẽ xa.

Xiakre 4:1

Nẽ kwa mon ka hte mẽ akwỳjaja axpẽn mã akapẽr mã agêt o axpẽn kãm agryk pix o apa? Na ka htem ã amnhĩ nhĩpêx anhỹr o amnhĩ pix kukamã ajamaxpẽr. Nẽ mẽ amã amnhĩ jamaxpẽr kôt pix mã ri amnhĩ nhĩpêx prãm. No Tĩrtũm kãm hprãm xà hkôt amnhĩ nhĩpêx prãm kêt nẽ.

Wam Juãw 3:22

Kot puj mẽ hkôt amnhĩ nhĩpêx o papa rãhã nẽ mẽmoj tã kuwỳ. Nẽ kãm hprãm xà hkôt amnhĩ nhĩpêx o papa hã amnhĩ pumunh kôt mẽmoj tã kuwỳ. Hãmri nhũm mẽ pama nẽ tanhmã mẽ pamã mẽmoj to rỳ mẽ pamã mẽmoj gõ.

Wam Juãw 5:14

Nẽ mẽ pahpê Tĩrtũm krajaja na pu htem paxàmnhĩx pajamakêtkati nẽ mẽmoj tã tanhmã hwỳr to ho papa. Kot puj mẽ kãm hprãm xà hkôt mẽmoj tã kuwỳ nhũm mẽ pama.