Apokarip 2:13 - Tĩrtũm kapẽr ã kagà nyw

¹³ Na pa hte mẽ anhõ krĩ nhõ xwỳnhjaja kot tanhmã amnhĩ tomnuj to ho pa hã mẽ omunh mex nẽ. Mẽ kot Satanasti kôt pix mã ri amnhĩ nhĩpêx o pa jakamã mẽ anhõ krĩ te kêp Satanasti nhõ krĩ pyràk. Ãxipas kot mẽ hkôt mẽ kãm ixkapẽr o mẽ ahkre ho pa nẽ aa hkaga hkêt tã nhũm prem axtem nẽ ixtã kupĩ. Ka mẽ ja hã mẽ omunh tã mẽ umaj ixkaga hkêt nẽ arĩ ixkôt amnhĩ nhĩpêx rãhã ho ri apa. Ãm hãmri na ka htem ã amnhĩ nhĩpêx anẽ.

Apokarip 2:13 Iomraidhean Croise

Matêwre 10:23

—Nẽ koja mẽ nhỹri krĩ hkwỳ kamã ixtã tanhmã mẽ anhĩpêx hto ka mẽ mãmrĩ mẽ kurũm ajapôj nẽ ma nhỹhỹm krĩ hõ hwỳr apa. Nẽ hpãnhã kamã mẽ kãm ri ijarẽnh o mẽ hkôt apa. Kot kaj mẽ kormã Ijaewjê nhõ krĩ piitã hwỳr apa hkêt ri pa akupỹn mẽ awỳr wrỳ. Kwa kêr ka mẽ ixkapẽr mã ajamaxpẽr tỳx rãhã ri apa.

Matêwre 24:9

—Nẽ koja mẽ piitã ixkôt mẽ akamã gryk nẽ kãm mẽ akurê htỳx o pa. Nẽ mẽ awỳr mra nẽ ixtã mẽ apynê nẽ mẽ atomnuj tỳx nẽ mẽ apa.

Matêwre 4:10

Hãmri nhũm kuma nẽ axte kãm kapẽr nẽ kãm: —Tk kwa ma nhỹhỹm tẽ Satanasti. Kot paj ri amã amex o amex ã ajarẽnh kêt kumrẽx. Tĩrtũm kapẽr ã kagà htũm kot ja nê kapẽr kãm hihtỳx kênã. Kapẽr kot: Kêr ka mẽ ixkapẽr pix ma nẽ ixkutã pix mã akõnkrã ho akrĩ nẽ inhmã inhmex o inhmex ã ijarẽ. Kêr ka mẽ ã amnhĩ nhĩpêx anhỹr o ri apa. —Anhỹr o kot hã karõ jakamã kot paj amã amex o amex ã ajarẽnh kêt kumrẽx. Anẽ.

Rukre 21:17

Koja mẽ piitã ixtã mẽ akamã gryk nẽ kãm mẽ akurê nẽ.

Atre 22:20

Nhũm mẽ kot akapẽr jarẽnh o pa xwỳnh Estewãw pĩrta pa pre hã mẽ omu nhũm ja inhmã mex pa mẽ kãm mẽ hinôkà jamỳnh o hã mẽ omunh o xa. Na pa pre ã amnhĩ nhĩpêx anhỹr o ri ixpa. Tã hpãnhã akôt amnhĩ xãm hãmri nẽ akôt amnhĩ nhĩpêx o ri ixpa. Jakamã koja mẽ ixte amnhĩ nhĩpêx nyw ã ijarẽnh ma nẽ kãm ixkapẽr mar prãm nẽ.” Anẽ.

Atre 9:14

Tã na xep ra jar Tamas wỳr pôj. Patre krãhtũm kapẽr nhỹ hã kot mẽ ixpê akôt amnhĩ xunhwỳr xwỳnhjê pynênh nẽ ma akupỹm hwỳr mẽ ixto mõr kaxyw. Tãn ka ri hwỳr ijano. Kwa nà ri ixto anhỹr kêt nẽ Pahihti. Anẽ.

Wam Tesarõn 5:21

Koja Tĩrtũm kapẽr kôt tanhmã mẽ amã mẽmoj jarẽnh to nẽ ãm hãmri Tĩrtũm Karõ nhỹ hã harẽnh ã amnhĩ jarẽ. Ka mẽ ama nẽ hkôt amnhĩ nhĩpêx.

Wam Ximotre 5:8

Nom koja mẽhõ amnhĩ kwỳjê ho mex kêt japêr. Nẽ õrkwỹ kamã hprõ nẽ hkrajaja nẽ hipêêxà nẽ katorxà nhũm mẽ kãm mẽ apkur xà nhõr kêt japêr. Koja mẽ ã amnhĩ nhĩpêx anhỹr jao Jejus kaga nẽ te mẽ kot hkôt amnhĩ xunhwỳr kêt xwỳnhjaja kot amnhĩ nhĩpêx pyràk o amnhĩ nhĩpêx nom amnhĩ tomnuj tỳx o mẽ hakre.

Sikũn Ximotre 1:13

Kwa Ximotre. Ra ixte amã mẽmoj tã karõ rax jakamã kêr ka mar tỳx nẽ hkôt amnhĩ nhĩpêx rãhã o ri apa. Jao Jejus Kris nhỹ hã mẽ piitã mẽ noo mã amnhĩ kaxyw kãm ajamaxpẽr tỳx rãhã nẽ. Nẽ mẽ piitã mẽ ho mex o ri apa.

Sikũn Ximotre 2:12

Mẽ kot tanhmã Kris ã mẽ pahtomnuj to htã kot puj mẽ arĩ hkôt amnhĩ nhĩpêx o papa rãhã ty nẽ nhỹrmã ĩhkô hã mẽ ho amnhĩptàr o papa. Nom kot puj mẽ amnhĩ kamã pakahak pê mẽ pahpê Jejus kwỳ hkêt ã amnhĩ jarẽ hã koja Jejus amnhĩ xwar mẽ pahpê hkwỳ hkêt ã mẽ pajarẽ.

Eprêw 10:23

Nẽ mẽ kot Kris ã tanhmã mẽ pahto htã kwa kêr pu mẽ tee ri amnhĩ kukamã pajamaxpẽr kêt nẽ. Rỳ pajamaxpẽr o: —Konẽn. Koja mẽ tanhmã hamaxpẽr to nẽ Kris ã ixpĩ rỳ ko. Pa apu mẽ kot ixpĩr pymaj akupỹm ixte amnhĩ nhĩpêx tũm o awjanã nẽ akupỹm hkôt amnhĩ nhĩpêx japêr rỳ ko. Anẽ. Kwa pu mẽ tee ri ã pajamaxpẽr anhỹr hkêt nẽ. Pu kêt mẽ pajamaxpẽr o: —Nà mẽ kot Kris ã tanhmã ixto htã kot paj aa hkaga hkêt nẽ. Mẽ kot hã ixpĩr mã tã kot paj hkaga hkêt kumrẽx. Anhỹr ã amnhĩ jarẽ.

Eprêw 3:6

Nẽ Kris haxwỳja na pre hte Tĩrtũm kãm hprãm xà hkôt tanhmã amnhĩ nhĩpêx to ho pa. Nom Mojes rom kêp Tĩrtũm Kra kumrẽx jakamã kurom kêp mẽ panhõ Pahihti kumrẽx. Tã kwa kêr pu mẽ kãm hprãm xà hkôt pix mã tanhmã kãm amnhĩ nhĩpêx to ho ri papa. Mẽ kot hã tanhmã mẽ panhĩpêx to htã pu mẽ ỹ hã mẽ kutã amnhĩ to htỳx nẽ papa nẽ pajamaxpẽr o: —Nà ixpunuj nẽ ixpa htã kot paj ixpunuj rãhã ixpa ho ixpa hkêt nẽ. Koja nhỹrmã Tĩrtũm ixto mex kumrẽx pa axte tanhmã ixpunuj to nẽ ixpa hkêt nẽ. Hêxta waa nẽ. Nà ja inhmã hprãm tỳx kumrẽx. Anhỹr o amnhĩ kukamã pajamaxpẽr o papa.

Xiakre 2:7

Nẽ ra mẽ ate hkôt amnhĩ xunhwỳr xwỳnhja nhũm mẽ axtem nẽ tanhmã mẽ apê ho kapẽr to ho pa. Tã ka htem mẽ kêp amrakati xwỳnhjê rom mẽ kãm akapẽr mex nẽ mẽ kãm kadêre mex gõ nhũm mẽ hã hkrĩ.

Apokarip 1:5

Nẽ Jejusja na pre hte Tĩrtũm kapẽr o mẽ ahkre mex o pa nẽ aa hkaga hkêt nẽ. Tã nhũm prem axtem nẽ kupĩ. Hãmri nhũm Tĩrtũm akupỹm ho htĩr. Jejus kumrẽx ho htĩr nhũm htĩr o htĩr. Nẽ kêp pika piitã hkôt pahi piitã nhõ Pahihti. Kãm mẽ pajapê htỳx jakamã na pre mẽ panê ty nẽ hkamrôja te mẽ panê hpikapĩr pyràk o amnhĩ nhĩpêx. Nẽ htyk o mẽ pahte amnhĩ tomnuj pãnhã amnhĩre. Jao te mẽ pahte amnhĩ tomnuj pê mẽ papytàr par pyràk o mẽ panhĩpêx.

Apokarip 11:3

—Koja Tĩrtũm ma ỹ hã kapẽr xwỳnh ho hamẽxkrut nẽ mẽ hwỳr wa kumẽ nhũm wa ma mẽ hwỳr wrỳ nẽ mẽ kãm Tĩrtũm kapẽr jarẽnh o ri mẽ hkôt pa. Hãmri nẽ tee ri mẽ kot tanhmã amnhĩ tomnuj to hã mẽ omu nẽ hkaprĩ nẽ. Hãmri nẽ wa hkaprĩ xàj xak punure kaxô nẽ haxà nẽ mẽ kãm Tĩrtũm kapẽr jarẽnh o ri wa pa hã amgrà axkrunẽpxi nẽ hkôt mytwrỳ kêp 6. Jakamã e. Pĩja py nẽ ma mẽ hwỳr wrỳ nẽ ixkreta o mĩdi. Anẽ.

Apokarip 12:11

Na pre Jejus kôt mẽ pahtõ nẽ mẽ pahtõxjaja mẽkarõmnuti kutã amnhĩ to htỳx nẽ pa. No ãm amnhĩ nhỹ hã ã kutã amnhĩ nhĩpêx anhỹr kêt. Mẽ pahte amnhĩ tomnuj pãnhã amnhĩrer xwỳnhta na pre ty nẽ hkamrô ho mẽ kuhõ nẽ mẽ nê mẽ kot amnhĩ tomnuj o hapêx. Jakamã nhũm prem kukwak ri Satanasti kutã amnhĩ to htỳx rãhã pa. Nhũm mẽ kot Jejus ã mẽ himex par kaxyw tã nhũm mẽ kãm htyk pyma hkêt nẽ. Ãm Jejus kôt arĩ amnhĩ to htỳx nẽ mẽ hkôt pa rãhã nẽ. Jao arĩ mẽ kãm Jejus kot mẽ panê tanhmã amnhĩ nhĩpêx to hã harẽnh o ri mẽ hkôt pa.

Apokarip 13:2

Nẽ hkà te kêp ropkrorti kà pyràk. Nẽ hakwa te kot rêãwti jakwa pyràk. Nẽ ĩhkra te kot pààti nhĩhkra pyràk. Jakamã na pre kagãmnuti nhỹ hã hihtỳx o kêp pahi hã pika nhõ xwỳnhjê ho amnhĩptàr o pa.

Apokarip 14:12

Anhỹr o mẽ kãm kapẽr jakamã kwa kêr pu mẽ pahte Tĩrtũm kôt amnhĩ xunhwỳr xwỳnhjaja mẽ hkukamã mẽ harẽnhja ma nẽ Tĩrtũm kapẽr kôt pix mã amnhĩ nhĩpêx rãhã ho ri papa. Mẽ kot tanhmã hã mẽ pahto htã pu mẽ hkaga hkêt nẽ amnhĩ kaxyw Jejus kôt pajamaxpẽr tỳx rãhã nẽ. Hãmri nẽ nhỹrmã mẽ kurom ma õ krĩ hwỳr api nẽ kamã pamex kumrẽx nẽ papa ho papa.

Apokarip 17:14

—Nẽ mẽ ho amnhĩptàr xwỳnh pê 10jaja koja mẽ pahte amnhĩ tomnuj pãnhã amnhĩrer xwỳnh kurê kaxàr kaxyw hwỳr mra nẽ kutã pijapu ho kuhê. No ãm tee ri kãm tanhmã ho hprãm hkaprỳ nhũm mẽ ho axtem nẽ amnhĩ tã mẽ himex pa. Hihtỳx o hihtỳx o kot mẽ ho hpimrààtã mẽ hakrenh par. Nẽ kêp pika piitã hkôt mẽ ho amnhĩptàr xwỳnhjê nhõ Pahihti. Tãm na pre amnhĩ wỳr mẽ kot hkôt amnhĩ nhĩpêx o mẽ pa xwỳnhjê wỳ nhũm htem amnhĩ kaxyw hkôt hamaxpẽr mex rãhã ho pa.

Apokarip 17:6

Nhũm axpã nẽ nhỹ pa omu. No ãm kagôxỳhti ho hpipãnh kêt. Mẽ kot Jejus kôt amnhĩ xunhwỳr nẽ ri mẽ kãm Jejus kêp mẽ õ pahihti hã harẽnh xwỳnhjê kamnhwỳr o mẽ hpar nhũm mẽ hkamrô pikapĩr xwỳnhjê kamrô ho na pre axpã nẽ nhỹ. Pa ã kot amnhĩ nhĩpêx anhỹr ã omu nẽ tee ri ijamaxpẽr.

Apokarip 2:2

Na pa hte tanhmã mẽ ate amnhĩ nhĩpêx to ho apa hã mẽ apumunh mex o ixpa. Na ka htem inhmã amnhĩ nhĩpêx mex nẽ pa ja hã mẽ apumu. Mẽ kot ixtã mẽ anhĩpêx kati htã ka mẽ kutã amnhĩ to htỳx nẽ ixkaga hkêt nẽ. Nẽ mẽ kot amnhĩ tomnuj xwỳnhjê hkôt amnhĩ nhĩpêx o ri apa hkêt nẽ. Nhũm ixte mẽ awỳr mẽ rẽnh ã amnhĩ to hêx xwỳnhjaja mẽ awỳr pan pôj ka mẽ aprĩ hã mẽ kot amnhĩ to hêx ã mẽ omu. Hãmri nẽ tee ri mẽ kot amnhĩ nhĩpêx ã mẽ omu nẽ amnhĩ nê mẽ hanor kurê kumrẽx. Ãm hãmri na ka htem ã mẽ hipêx anẽ.

Apokarip 3:11

E kot paj tokyx akupỹn mẽ awỳr wrỳ nẽ mẽ ate ixkôt pix mã amnhĩ nhĩpêx ã mẽ ato mex rax kumrẽx. Jakamã kwa mẽ mãmrĩ ã amnhĩ nhĩpêx anhỹr o inhmã hprãm xà hkôt pix mã amnhĩ nhĩpêx rãhã ty. Kot ka mẽ anhỹr kêt kot pa mẽ amã mẽmoj mex nhõr kêt nẽ.

Apokarip 3:3

Kêr ka mẽ amnepê mã kormã mẽ ate ixkôt amnhĩ nhĩpêx nyw ri mẽ kot ixkapẽr o tanhmã mẽ ajahkre htoja mã ajamaxpẽr nẽ amnhĩ tomnuj mã anhũre. Nẽ ixkapẽr kôt pix mã mãn amnhĩ nhĩpêx o ri apa. Kot kaj mẽ anhỹr kêt kot paj nhỹrmã mẽ ajaêr pê akupỹn mẽ awỳr wrỳ nẽ ja hã tanhmã mẽ ato.