फिलिप्‌पि 1:1 - आठपहरिया

¹ ना चिट्‌ठिम्‍बाक् आच्‍याँ खिरिस्‍ट येसुङाना सेवा काचोक् पावाल लोक् तिमोथिलाम्‍मा ए॥ ना चिट्‌ठि आङा फिलिप्‌पि खालाङ्‌गाङिगा खिरिस्‍ट येसुङि उलिसागा माङ्‌हाङ्‌ङाना सोब्‍बे सेङ्‌सेङ्‌गा ओयाप्‌मिचि लाउङ्‌सा, हिट्‌नुङ् माङ्‌पाङ्‌ङिगा ओठेडोङ्‌चि हिट्‌नुङ् माङ्‌पाङ्‌ङिगा घुवार काफाबाचि लाउङ्‌सा छेप्‍टुएट्‌टुङ्॥

फिलिप्‌पि 1:1 Iomraidhean Croise

मारकुस 13:34

“ना रिङ्‌उम्‍टे चाकारचि पाङ्‌ठाङ् पुमा पिडुचिउङ् ठिबाङ् डाङ्‌बा लाप्‍माङ् वाजासि खाडाना रिङ् गाड्‌डेना डोक्॥ हिट्‌ना डाङ्‌बाङा ओचाकारचि उन्‌चि उन्‌चि टोॽवा चोक्‍मा लोङ्‌सा जिम्‍मा पिडुचिचि हिट्‌नुङ् पाङ् नुलोक् कोडु पिक्‍सा पाङ् काकोबा लोडुङ् लाप्‍माङ् खाट्‌युक्॥

युहान्‍ना 12:26

कोइङा आङाना सेवा चोगुटु भोने हिट्‌नाङा आङा डोक् याङ्उरिक्‌याक् हिट्‌नुङ् आङा खोनि खोनि लिङा आङाना सेवा काचोक्‍बा चा हिट्‌नि लियुक्॥ कोइङा आङाना सेवा चोगुटु भोने पाबाङा हिट्‌ना मान् चोगुटु॥

मुलिचेला टोॽवा 1:20

पाटरुसङा फेरि लोडुचे, “नाड्‌डेउङ् ना रिङ् छाम्‍लोमा छाप्‍लाङि नाड्‌डे छेप्‍टेसे– ‘हिट्‌ना युङ्‌ना पाङ्‌ठाङ् सुमुन्‍डेलेक् उलियाक्॥ हिट्‌नुङ् हिट्‌नि साक्‍चा उयुङ्‌नेयाक्॥’ हिट्‌नुङ् ‘उन्‍ङा चोगुना टोॽवाङाना जिम्‍मा आरुङा डोक् ओटोगुवाक्॥’

मुलिचेला टोॽवा 20:28

हाट्‌ले खानि आप्‍पेलोङ्‌सा हिट्‌नुङ् सेङ्‌सेङ्‌ना हाङ्‌साङा खानि ओठेडोङ् माचोगिउङ् खानि मुक्‌ङि मापिडिगा बिस्‍वासिचि नुलोक् पुयानुम्‌चिम्॥ हिट्‌नुङ् माङ्‌हाङ्‌ङा आप्‍पे उइछा ओहेलिक्‌ङा इनुचिगा माङ्‌पाङ्‌ङि चा खानिङा नुलोक् पुयानुम्‌चिम्॥

मुलिचेला टोॽवा 9:13

टरो हानानियाङा लोडुए, “हाउ आडाङ्‌बा, हिट्‌नाँम्‍टे यरुसलेमङिगा बिस्‍वासि याप्‌मिचि जोम् याङ्‌छामा चाट्‌टुचिगा याप्‍मा याप्‌मिचिलाम्‍मा आङा खेम्‍सुएसुङे॥

रोमि 1:1

आङा पावाल खिरिस्‍ट येसुङाना सेवाक्‌ङा ना चिट्‌ठि छेप्‍टुङ्‌गेट्‌टुङ्॥ माङ्‌हाङ्‌ङा आङा मुलिचेला लिमा याङ्‌सेगे, हिट्‌नुङ् माङ्‌हाङ्‌ङाना नुना खाबोर पारचार चोक्‍मा कोन्‍ना टोॽवाङि उन्‍ङा याङ्‌साम्‍डे॥

रोमि 1:7

हिट्‌डेउङ् खानि सोब्‍बे रोमङि आयुङिगा मायालु याप्‌मिचि खानिलाउङ्‌सा माङ्‌हाङ्‌ङा माया माचोगिटि हिट्‌नुङ् ओयाप्‌मिचि नुङ् माछेम्‌डिगा खानि लाउङ्‌सा ना चिट्‌ठि छेप्‍टुङ्‌गेट्‌टुङ्॥ हिट्‌नुङ् खानिलाउङ्‌सा माङ्‌हाङ् आनि पाबा लोक् आनि डाङ्‌बा येसु खिरिस्‍टङा मायादाया लोक् हाङ्‌हाङ् मापिड्‌याक् नुङ् आङा बिन्‌टि चोगुङ्‌टुङ्॥

१ कोरिन्‌थि 16:10

तिमोथि खानिङि आब्‍नाँ उन् ओचेट्‌नुलोक् मेट्‌टानुम्, पोङ्‌भोने उन्‍ङा चा आङा गाड्‌डे डोक् टाङ्‌बाङाना टोॽवा चोगुएट्‌टु॥

२ कोरिन्‌थि 1:1

माङ्‌हाङ् उनिङ्‌ग्‍वालाम्‍मा खिरिस्‍ट येसुङाना मुलिचेला आङा पावाल, हिट्‌नुङ् आनि झान्‍झा तिमोथिलाम्‍मा ना चिट्‌ठि ए॥ आङा ना चिट्‌ठि कोरिन्‌थि खालाङ्‌गाङि उलिसागा माङ्‌हाङ् माङ्‌पाङ्‌ङिगा याप्‌मिचि हिट्‌नुङ् आखैया छेट्‌राङि उयुङ्‌गा सोब्‍बे माङ्‌हाङ् ओयाप्‌मिचि लोङ्‌सा छेप्‍टुएट्‌टुङ्॥

गालाति 1:10

आङा खानि लोनाँनि, आङा याप्‌मिचि खुसि मेप्‍मा कोन्‌निङ्‌गेट्‌निङ्‌चिङ्‌गा, टरो माङ्‌हाङ् खुसि मेप्‍मा कोलुङ्‌टुङ्॥ आङा याप्‌मिचि खुसि मेप्‍मा कोलुङ्‌चिङ्‌गा भोनेउम्‍टे आङा खिरिस्‍टङाना सेवा काचोक् लिनेएट्‌निङ् बे॥

गालाति 3:26

हाट्‌ले खानि सोब्‍बे बिस्‍वासलाम्‍मा डोक् खिरिस्‍ट येसुङि माङ्‌हाङ्‌ङाना ओछालेट्‌चि आलिसिएसिए॥

गालाति 3:28

हाट्‌ले खिरिस्‍ट येसुङि याहुदि याप्‌मि चा माखाक्, गिरिक् चा माखाक्, कामारा चा माखाक्, छुट्‌कारा टोगुना याप्‌मि चा माखाक्, येम्‍बेछा चा माखाक्, मेन्‍झेमा चा माखाक्, पोङ्‌भोने खिरिस्‍टङि खानि सोब्‍बे ठिक् एडोक् ए॥

एफिसि 1:1

आङा पावाल माङ्‌हाङ्‌ङाना उनिङ्‌ग्‍वालाम्‍मा याङ्‌सेगाना येसु खिरिस्‍टङाना मुलिचेलालाम्‍मा, एफिसास खालाङ्‌गाङिगा खिरिस्‍ट येसुङि बिस्‍वास काचोक् माङ्‌हाङ् ओयाप्‌मिचि लाउङ्‌सा ना चिट्‌ठि छेप्‍टुङ्‌गेट्‌टुङ्॥

एफिसि 1:15

खानिङा टाङ्‌बा येसुङि आचोगुम्‍ना बिस्‍वास हिट्‌नुङ् माङ्‌हाङ् सोब्‍बे ओयाप्‌मिचि खानिङा माया आचोगुम्‌चिगा रिङ् खेम्‍सुङ्‌नाँ,

एफिसि 6:24

आनि डाङ्‌बा येसु खिरिस्‍टलोङ्‌सा माया काचोक्‌चि सोब्‍बेलोक् माङ्‌हाङ्‌ङाना मायादाया सोरोक् उलियाक्॥

फिलिप्‌पि 2:19

टाङ्‌बा येसुङा निङ्‌ग्‍वा चोगुटु भोने, तिमोथिलाउङ्‌सा खानि टुब्‌सिङा एला डोक् पाङ्‌सुङ्‌टुङ् नुङ् आसा चोगुङ्‌टुङ्॥ हिट्‌नुङ् उन्‌लाम्‍मा खानि बारेङि नुना खाबोर खेम्‍मा टोगुङ्‌नाँ आङाना चा आचाप् टायुक्॥

फिलिप्‌पि 2:5

खानि चाट्‌ला खिरिस्‍ट येसुङि लिसाना गाड्‌डेना डोक् लिमा कोन्‌युक्॥ हिट्‌नाम्‍बाक् नाड्‌डेना–

फिलिप्‌पि 3:12

आङा नागा सोब्‍बे थोक् पाइले डोक् चोक्‍मा हिडुङे आथाबा आङा सिद्‌दा लिसेसाङे नुङ् माट्‌टुङ्‌ना माखाक्॥ टरो आङा खिरिस्‍ट गाड्‌डे लिमा बोल् चोगेट्‌टुङ्, पोङ्‌भोने ना रिङ् लाउङ्‌सा डोक् खिरिस्‍ट येसुङा आङा याङ्‌सेगे॥

फिलिप्‌पि 3:3

पोङ्‌भोने छेम्‍बा डोक् माङ्‌हाङ् ओयाप्‌मिचिउम्आनि गोलो टे, आनि हाङ्‌साङा माङ्‌हाङ् माङ्‌ध्‍यान् चोगुम्‍टुम् हिट्‌नुङ् खिरिस्‍ट येसु उनिङ् चोन्‍डुम्‍टुम्॥ आनिम्‍टे याप्‌मिचिङा ओचोगुएट्‌टुना रिति थितिङि भोरोसा युङ्‌निम्‍गा॥

फिलिप्‌पि 3:8

नागा एडोक् माखाक्, खिरिस्‍ट येसु आटाङ्‌बा ए नुङ् मिसेन् निमा टोग्‍माना बाहुमुल्‍ले रिङ् ए, हिट्‌ना नुङ्‌ना आरु ख्‍वाप्‍पा थोक् बिथाँङिगा नुङ् मिट्‌टुङ्‌टुङ्॥ खिरिस्‍ट नुलोक् मिसेन् उनिसुङ् नुङ् आङा हिट्‌नागा सोब्‍बे थोक् नाडेसुङे, हिट्‌नुङ् हिट्‌नागा सोब्‍बे थोक् आङा भुसुॽवा गाड्‌डे डोक् मिट्‌टुङ्‌टुङ्॥

१ थेसालोनिकि 1:1

थेसालोनिकि माङ्‌पाङ्‌ङिगा माङ्‌हाङ् पाबा हिट्‌नुङ् टाङ्‌बा येसु खिरिस्‍टङि बिस्‍वास काचोक्‌चिलाउङ्‌सा आङा पावाल, सिलास लोक् तिमोथिलाम्‍मा ना चिट्‌ठि छेप्‍टुएट्‌टुम्‍मा॥ खानिलोङ्‌सा मायादाया लोक् हाङ्‌हाङ् उलियाक्॥

१ थेसालोनिकि 2:2

खानिङि आप्‍मा पाइले फिलिप्‌पिङि आन्‍याँ याङ्‌छामा याङ्‌ओचाट्‌टाना हिट्‌नुङ् ओचाफेन्‍लोक् याप्‌मि ओमेट्‌टाना रिङ् खानिङा ठाहा आटोगुएसुम्‍मे, टरो औधि बिरोध लिसा चा माङ्‌हाङ्‌ङाना नुना खाबोर माट्‌मा माङ्‌हाङ्‌लाम्‍मा आन्‍याँ आँट् टोगुमे॥

२ थेसालोनिकि 1:1

आन्‍याँ माङ्‌हाङ् पाबा हिट्‌नुङ् टाङ्‌बा येसु खिरिस्‍टङि बिस्‍वास काचोक् थेसालोनिकि माङ्‌पाङ्‌ङिगा लाउङ्‌सा आङा पावाल, सिलास लोक् तिमोथिलाम्‍मा ना चिट्‌ठि छेप्‍टुएट्‌टुम्‍मा॥

२ थेसालोनिकि 1:10

जब उन् उङ्‌युक्, हिट्‌ना लेम्‍बा उन्‍ङाना सेङ्‌सेङ्‌ना ओयाप्‌मिचिलाम्‍मा उन्‍ङा माहिमा टोगुटु, हिट्‌नुङ् उन्‌ङि बिस्‍वास काचोक्‌चि सोब्‍बे आड्‌डिक् डोङ् ओठोङ्‌युक्॥ हिट्‌नागालोक् खानि चा आलिसिटि, पोङ्‌भोने आन्‍याँ उन्‍ङाना बारेङि लोनानिनाँ खानिङा बिस्‍वास आचोगुम्‍मे॥

१ तिमोथि 3:8

नाड्‌डेडोक् माङ्‌पाङ्‌ङिना डिकानचि मान् चोक्‍मा उनुगा हिट्‌नुङ् इमान्‍दारि लिमा कोन्‌युक्॥ हिट्‌नागा आड्‌डिक् टेडुबा हिट्‌नुङ् ओचाफेन्‍लोक् ओफाबा कामाँ चोक्‍मा निङ्‌ग्‍वा काचोक्‍बा लिमा लिनिना॥

तितास 1:1

आङा पावाल माङ्‌हाङ्‌ङाना ओकामारा हिट्‌नुङ् येसु खिरिस्‍टङाना मुलिचेलाङा ना चिट्‌ठि खान्‌लोङ्‌सा छेप्‍टुएट्‌टुङ्॥ माङ्‌हाङ्‌ङा सेगुचिगा ओयाप्‌मिचि बिस्‍वासङि घुवार फासिङा हिट्‌नुङ् माङ्‌हाङ्‌ङा निङ्‌ग्‍वा टासुना चोला खोड्‌डे पारिक् हिङ्‌मा कोन्‌युक्‍ना हिट्‌ना छेम्‍बाना ठोना हिट्‌नागाँ ठाहा ओटोगु नुङ् माङ्‌हाङ्‌ङा आङा याङ्‌पाङ्‌साइसे॥

तितास 1:7

माङ्‌पाङ्‌ङिना ओठेडोङ् माङ्‌हाङ्‌ङाना टोॽवा नुलोक् कापुबा लिसानाँ उन् साङा चा फाट्‌टुर आलाबुन्‍गेट्‌टुन्‍ना याप्‌मि लिमा कोन्‌युक्॥ आपुङ्‌गे चोक्‍ना, उन् एला ओरेक् काट्‌ना, आड्‌डिक् टेडुना, खेमाबुङ्‌मा काचोक्‍बा हिट्‌नुङ् ओफाबाङि टोम्‍ना याप्‌मि लिमा लिनिना॥

फिलेमोन 1:1

ना चिट्‌ठिम्‍बाक् खिरिस्‍ट येसुङाना लाउङ्‌सा कैदि आङा पावाल लोक् तिमोथि झान्‍झालाम्‍मा आनिना मायालु एक्‍केउ टोॽवा काचोक् फिलेमोन,

हिब्‍रु 13:23

हिट्‌नुङ् आनि झान्‍झा तिमोथि खाम्‍बाङ्‌लाम्‍मा होम्‍माहिडे नुङ् ना खाबोर खानि लोनाँनि॥ नेहि उन् एला डोक् टाए भोने खानि सोरि उन् चा आप्‍टुङुङ् आङा आप्‍ङा॥

याकुब 1:1

माङ्‌हाङ् हिट्‌नुङ् टाङ्‌बा येसु खिरिस्‍टङाना सेवाक् आङा याकुबलाम्‍मा सोब्‍बेलेङ् चेम्‍बेलेङ् उछिन्‍डाउङ् उयुङागा माङ्‌हाङ्‌ङागा सोब्‍बे ओयाप्‌मिचि लाउङ्‌सा ना चिट्‌ठि छेप्‍टुएट्‌टुङ्॥ खानि सोब्‍बेलाउङ्‌सा आङाना बाबा ए॥

१ पाटरुस 2:25

पोङ्‌भोने खानि खेडोक् ओवायुजागा ठुँबाचि गाड्‌डे आलिसिएसिगा, टरो हाट्‌लेम्‍टे खानि कापुबा हिट्‌नुङ् खानि हाङ्‌सा सुरेक्‍छा काचोक्‍बाङि नोक्‌टि आटाइसिए॥

२ पाटरुस 1:1

येसु खिरिस्‍टङाना मुलिचेला हिट्‌नुङ् उन्‍ङाना सेवा काचोक् आङा सिमोन पाटरुसङा ना चिट्‌ठि छेप्‍टुङ्‌ना ए॥ आङा ना चिट्‌ठि आनि माङ्‌हाङ् हिट्‌नुङ् काहिङ्‌मेप्‍बा डाङ्‌बा येसु खिरिस्‍टङाना धारमिक्‍तालाम्‍मा आन्‍याँना गाड्‌डे डोक् बाहुमुल्‍ले बिस्‍वास आटोगुम्‍गा खानि ख्‍वाप्‍पालोङ्‌सा छेप्‍टुङ्‌गेट्‌टुङ्॥

याहुदा 1:1

येसु खिरिस्‍टङाना सेवाक्, हिट्‌नुङ् याकुबङा उन्‍झा, आङा याहुदालाम्‍मा माङ्‌हाङ् पाबाङा माया माचोगिउङ् माछेम्‌डिगा हिट्‌नुङ् येसु खिरिस्‍टङि सुरेक्‍छे माचोगिगा लाउङ्‌सा ना चिट्‌ठि छेप्‍टुएट्‌टुङ्॥

पारकास 1:1

ना छाप्‍लाङा येसु खिरिस्‍ट माङ्‌हाङ्‌ङा पारकाट् चोगुना खाबोर बारेङि माट्‌टुटु॥ हिट्‌नुङ् ना खाबोर हाट्‌ले एला डोक् लिसालाबाना रिङ् माङ्‌हाङ्‌ङा ओसेवाक्‌चिङा ठाहा ओटोगुवाक् नुङ् उन्‍ङा येसु खिरिस्‍ट पिडुए॥ येसु खिरिस्‍टङा नागा रिङ् लोमा ओसेवाक् युहान्‍ना सोरि उन्‍ङाना माङ्‌हाङ् रिङ् काउग्‍बा पाङ्‌सुए॥

पारकास 1:20

खान्‍ङा आछुप्‍टाङ् आमुक्‌ङि आनिसुगा सि ओटा चोक्‌चिङ्‌गेट्‌चि हिट्‌नुङ् सि ओटा साम्‍मेङ्‌ङा चोक्‍बालाक् कुपिदानिचि ठोबाना रिङ्‌ङाना उटुप्‍बाक् नाड्‌डे लियुक्, सि ओटा चोक्‌चिङ्‌गेट्उम्‍बाक् सि ओटा माङ्‌पाङ्‌ङाना माङ्‌हाङ् रिङ् काउग्‍बाचिगा बारेङि माट्‌टुटु, हिट्‌नुङ् सि ओटा साम्‍मेङ्‌ङा चोक्‍बालाक् कुपिदानिचिङाम्‍बाक् सि ओटा माङ्‌पाङ्‌ङाना बारेङि माट्‌टुटु॥”

पारकास 19:10

हिट्‌नुङ् हिट्‌ना माङ्‌हाङ् रिङ् काउग्‍बा माङ्‌ध्‍यान् चोक्‍मा लाउङ्‌सा ओटोकानाङि गुङ् चोगाङे, टरो हिट्‌नाङा आङा नाड्‌डे याङ्‌लोडे, “नाड्‌डे चोक्‍नेन्॥ आङाउम्‍टे खान् हिट्‌नुङ् बिस्‍वासि कासाइबाचि गाड्‌डे येसुङाना सेवा काचोक्‍बा एडोक् ए॥ खान्‍ङा माङ्‌हाङ् एडोक् माङ्‌ध्‍यान् चोक्‍मा कोन्‌युक्, पोङ्‌भोने छेम्‍बाना माङ्‌हाङ्‌लाम्‍माना रिङ् काचेक्‍बाङा एडोक् येसुङाना बारे आरु लोडुचिचि॥”

पारकास 2:12

“पारगामाम खालाङ्‌गाङिना माङ्‌पाङ्‌ङिना माङ्‌हाङ् रिङ् काउग्‍बा लाउङ्‌सा ना खाबोर छेप्‍टु॥ “ना खाबोरम्‍बाक् इप्‍पोक्‌लेङ् डोक् यान्‍ना ओधार लिसाना चेप्‍सा लोक्‌ङाना ए॥

पारकास 2:8

“इस्‍मुरना खालाङ्‌गाङिना माङ्‌पाङ्‌ङिना माङ्‌हाङ् रिङ् काउग्‍बा लाउङ्‌सा ना खाबोर छेप्‍टु॥ “ना खाबोरम्‍बाक् उटुम्‌ङि डोक् लिसाना हिट्‌नुङ् आखेरिङि चा लिना, हिट्‌नुङ् सियाउङ् उहिङ्‌ग्‍वाट् लिसानाङाना ए॥

पारकास 22:9

टरो हिट्‌नाङा आङा याङ्‌लोडे, “खान्‍ङा नाड्‌डे चोक्‍मा लिनिना॥ खान्‍ङा माङ्‌हाङ् एडोक् माङ्‌ध्‍यान् चोक्‍मा कोन्‌युक्, पोङ्‌भोने आङा चा खान् गाड्‌डे हिट्‌नुङ् खान्‍ङाना माङ्‌काटा काटाक्‌चि हिट्‌नुङ् ना छाप्‍लाङि छेप्‍टाना रिङ् पालान् काचोक्‌चि गाड्‌डेना माङ्‌हाङ्‌ङाना सेवा काचोक्‍बा एडोक् ए॥”