१ पाटरुस 1:4 - आठपहरिया

⁴ हिट्‌नुङ् माङ्‌हाङ्‌ङा टोनालोग्‌ङि खानि लाउङ्‌सा खोना बेला चा जाखाम् लिनिना, चोखो, हिट्‌नुङ् मेग्‌निना उताराधिकार युङ्‌सुएसुए॥

१ पाटरुस 1:4 Iomraidhean Croise

मात्‌ति 25:34

हिट्‌नुङ् हाङ्‌बाङा उछुप्‍टाङ् उमुक्‌लेङ्‌गा लोडुचिचि, ‘आबानि, आङाना माङ्‌हाङ् पाबालाम्‍मा आसिक् आटोगुम्‍गा याप्‌मिचि, नारा उटुम् नुङ् डोक् खानि लोङ्‌सा टेयार चोग्‍बालाक् मुलुक् आधिकार चोगानुम्॥

मारकुस 10:17

येसु लाम्‍बोङि खाडागेट्‌टाना बेला ठिबाङ् याप्‌मि पिन्‍सा आबाउङ् येसु ओटोकानाङि गुङ् चोगाउङ् उन् सिलाप्‍टुए, “हाउ काहिसिक्‍बा, खान् नुना याप्‌मि, आङा पाक् चोगुङ्‌ना लाट्‌निना चोला टुबुङ्‌टुङ्‌ना टे?”

मुलिचेला टोॽवा 20:32

“हाट्‌ले आङा खानि माङ्‌हाङ्‌ङाना उमुक्‌ङि पिनाँनि हिट्‌नुङ् उन्‍ङा आनि आलोडाना ओदायाङाना रिङ्‌ङाना भोरङि युङानि नुङ् लोनाँनि॥ हिट्‌डेउङ् माङ्‌हाङ्‌ङा बिस्‍वासङि खानि बोल्‍लेउ माचोगिटि हिट्‌नुङ् उन्‍ङाना ओयाप्‌मिचि आसिक्‍ङाना भागिदार चोगुचिचि॥

मुलिचेला टोॽवा 26:18

खान्‍ङा हिट्‌नागा याप्‌मिचिगा मिक् ओङ्‌सुबिडुचि, हिट्‌नुङ् हिट्‌नागा डुम्‍बारिक् डुम्‍लाम्‍मा व्‍हाङ्‌ङि हिट्‌नुङ् सैतानङाना ओसाक्‌तिलाम्‍मा माङ्‌हाङ्‌ङि ओनोक्‌याक्॥ हिट्‌नुङ् माङ्‌हाङ्‌ङा हिट्‌नागाँगा पाप टुगुबिडुचिचि, हिट्‌नुङ् हिट्‌नागाँ माङ्‌हाङ्‌ङि बिस्‍वास ओचोगुनाँ उन्‍ङा सेगुचिगा ओयाप्‌मिचिलोक् साङ्‌गाटिङि युङ्‌मा ओटोगुटु॥’

रोमि 8:17

पोङ्‌भोने आनि माङ्‌हाङ् ओछालेट्‌चि ए, हिट्‌नुङ् ओछालेट्‌चि लाउङ्‌सा उन्‍ङा पिमा युङ्‌सुना आसिक् चा आनि टोगुम्‍टुम्, हिट्‌नुङ् हिट्‌ना आसिक् खिरिस्‍टलोक् एक्‍केउ आनि चा टोगुम्‍टुम्॥ टरो खिरिस्‍टङा मान् टोगु गाड्‌डे डोक् आनि चा मान् टोगुम्‍टुम् भोने, खिरिस्‍टङा याङ्‌छामा आङ्‌डु गाड्‌डे डोक् आनि चा याङ्‌छामा आङ्‌मा कोन्‌युक्॥

१ कोरिन्‌थि 9:25

पाङ्‌ग्‍वामाङि ओखाट्‌गा सोब्‍बेङा आप्‍पेलाउङ्‌सा आड्‌डिक् टुक्‍लोक् तालिम पिमा कोन्‌युक्॥ हिट्‌नुङ् हिट्‌नागाँ जाखाम् लियुङ् खाट्‌ना पुरेस्‍कार टोक्‍माउङ्‌सा हिट्‌नाड्‌डे ओचोक्‌युक्, टरो आनिम्‌बाक् सोरोक् लियुयाक्‍ना पुरेस्‍कार टोक्‍माउङ्‌सा नाड्‌डे चोगिटि॥

गालाति 3:18

माङ्‌हाङ्‌ङा आब्‍राहाम आसिक् पिडुए, पोङ्‌भोने उन्‍ङा पिडुङ्‌टुङ् नुङ् चामारसिङा उन् चोगुएसुना डाना॥ हाट्‌ले माङ्‌हाङ्‌ङा धारमाबिधि पालान् मिचोक्‍ङे सोम्‍मा आनि आसिक् आपिनेट्‌नि भोने उन्‍ङाना चामारसिङा खेरोक् लियुक्॥

एफिसि 1:11

माङ्‌हाङ्‌ङा सोब्‍बे रिङ् लिमा उन्‍ङा निङ्‌ग्‍वा चोगु गाड्‌डे चोक्‍मा हिडुटु॥ उन्‍ङाना योजाना गाड्‌डे डोक् ओयाप्‌मिचि लिमा आनि आसेगे, पोङ्‌भोने खिरिस्‍टलोक् आनिना साम्‍बान्‍धा युङ्‌ग्‍वा॥ माङ्‌हाङ्‌ङा ना रिङ्उम्‍बाक् उन्‍ङाना योजाना डाना नुङ् पाइले डोक् उन्‍ङा निङ्‌ग्‍वा चोगुएसुना डाना॥

एफिसि 1:14

माङ्‌हाङ्‌ङा उन्‍ङाना सेङ्‌सेङ्‌ना हाङ्‌सा बैना युङ्‌बालाक् ओफाबा गाड्‌डे आनि भिट्‌रा आठेन्‍डाबिडेसे॥ हिट्‌नुङ् ना रिङ्‌ङा उन्‍ङा सेगुचिगा याप्‌मिचि छेम्‍बा डोक् हिङुचिचि नुङ् निमेट्‌माना निङ्‌ग्‍वा चोगुए॥ ना रिङ्‌ङाम्‍बाक् माङ्‌हाङ्‌ङाना उनिङ् चोम्‍माना लोक् माहिमा चोक्‍माना रिङ् टाडुटु॥

एफिसि 1:18

आनि खिरिस्‍टङि युङ्‌सुम्‍ना आसा खानिङा बुजा चोक्‍मा माङ्‌हाङ्‌ङा घुवार माफाडियाक् नुङ् आङा बिन्‌टि चोगुङ्‌टुङ्, हिट्‌नुङ्‌ना माङ्‌हाङ्‌ङा सेगुचिगा ओयाप्‌मिचि चामारसिङा चोगुना ओचेट्‌नुना रिङ्‌ङाना उटुप् खानिङा बुजा आचोगुम्‍टुम्, हिट्‌नुङ् उन्‍ङा सेगुचिगा याप्‌मिचिङा ओचोगुनाँ माङ्‌हाङ्‌ङा ठेना मान् टोगुटु॥

कालास्‌सि 1:12

माङ्‌हाङ् पाबा सोरोक् पोए-पोए ठाङ्‌सानुम्॥ उन्‍ङा व्‍हाङ्‌ङाना उमुलुक् सेङ्‌सेङ्‌गा ओयाप्‌मिचि पिमाचिलाउङ्‌सा चामारसिङा चोगुना रिङ् खानिङा चा टोक्‍मा आहिडुम्‍लोक् माचोगेसिए॥

कालास्‌सि 1:5

खानि लोङ्‌सा टोनालोग्‌ङि सुराक्‌छिट् युङ्‌बालाक् आसाङा चोगुनाँ खानिङा खिरिस्‍टङि बिस्‍वास हिट्‌नुङ् माङ्‌हाङ् ओयाप्‌मिचि माया आचोगुम्‌चिम्‍गा ए॥ ना आसाङाना बारेङि खानिङा पाइले डोक् छेम्‍बाना नुना खाबोरङि आखेम्‍सेसुम्‍मे॥

कालास्‌सि 3:24

पोङ्‌भोने खानिलोङ्‌सा टाङ्‌बाङा इनाम मापिडिटि नुङ् ठाहा युङ्‌ग्‍वा॥ ना इनामम्‍बाक् उन्‍ङा चोगुना चामारसिङाना आसिक् ए॥ हिट्‌नुङ् खानिङा सेवा आचोगुम्‍ना खिरिस्‍ट डोक् टाङ्‌बा ए॥

२ तिमोथि 4:8

हाट्‌लेउम् आङालोङ्‌सा धारमिक्‍ताङाना मुकुट् युङ्‌गुवा, हिट्‌ना मुकुट् नुलोक् न्‍याए काचोक्‍बा टाङ्‌बाङा हिट्‌ना बेला आङा याङ्‌पियुक्, हिट्‌नुङ् आङा एडोक् माखाक्, टरो उन् टाना ओलाम्‍बो उपुयुगा सोब्‍बेलोङ्‌सा पिडुचिचि॥

हिब्‍रु 10:34

छेम्‍बा डोक्, खानिङा खाम्‍बाङ्‌ङि ओठायागा याप्‌मिचि घुवार आफाडुम्‌चिम्‍मे॥ याप्‌मिचिङा खानिलोक् लिसागा माक्‍फेन्‍सुबेन् मानाप्‌टिनाँ चा खानि निङ्‌ग्‍वा टुक्‍मा ओसाट्‌टो हारका आलिसिए॥ पोङ्‌भोने याप्‌मिचिङा खानिलोक् लिसागा थोक् ओखाट्‌टु चा खानिलोक् हिट्‌ना माक्‍फेन्‍सुबेन् नुङ्‌ना चा ओचेट्‌नुना लाट्‌निना माक्‍फेन्‍सुबेन् युङ्‌ग्‍वा नुङ् खानिङा ठाहा आटोगुम्‍मे॥

हिब्‍रु 9:15

नाड्‌डेउङ् माङ्‌हाङ्‌ङा चामारसिङा चोगुना सोरोक् लियुयाक्‍ना आसिक् ओटोगुवाक् नुङ् उन्‍ङा छेम्‍डुचिगा लाउङ्‌सा खिरिस्‍टम्‍बाक् ओछोङ्‌ग्‍वाट् माङ्‌हुप् काटोङ्‌बा ए, पोङ्‌भोने पाइलेना माङ्‌हुप् आझै लिसाना बेला याप्‌मिचिङा ओचोगुना पापलाम्‍मा छुट्‌कारा पिमाउङ्‌सा उन् सिए॥

याकुब 1:11

जब टुक्‍लोक् नाम्‍छेयुक् टब फुङ् उभुङ्‌मा डोक् चोप्‌युङ् सियुक्॥ हिट्‌नुङ् ओफेट् ठायुङ् हिट्‌नाङाना ओसोभा डोक् खाट्‌युक्॥ हिट्‌नाड्‌डे डोक् वागाठागा याप्‌मि चा आप्‍पे ओटोॽवा चोगुगेट्‌टुलोक् डोक् ओचोला चा जाखाम् लियुङ् खाट्‌युक्॥

१ पाटरुस 3:9

कोइङा खानि ओचाफेम्‍मा माचोगिए भोने हिट्‌ना ओचाफेम्‍मा मेट्‌नेनुम्, हिट्‌नुङ् साराप याङुए भोने चा सारापें चोक्‍नेनुम्॥ टरो हिट्‌ना ओसाट्‌टोङि आसिक् पिडानुम्‌चिम्, पोङ्‌भोने माङ्‌हाङ्‌ङा ना लाउङ्‌सा डोक् खानि माछेम्‌डिगा॥ हिट्‌नुङ् खानिङा उन्‌लाम्‍मा आसिक् टोगानुम्॥

१ पाटरुस 5:4

जब मुलि कापुबा ठेट्‌युक्, हिट्‌ना बेला खानिङा सोरोक् ओम्‌युयाक्‍ना माहिमा लोक् मान्‌ङाना मुकुट् आटोगुम्‍टुम्॥

पारकास 21:27

टरो हिट्‌ना खालाङ्‌गाङि खोना चा आसुद्‌दो थोक्, ओचाफेन्‍ना टोॽवा काचोक्‍बाचि हिट्‌नुङ् माङ्‌जोगा रिङ् काचेक्‌चि लिग्‍मा ओटोगुन्‍गा॥ जुन् जुन्‍ङाना निङ् थुमाङाना चोला आपिना छाप्‍लाङि निङ् लियुक् हिट्‌नागा याप्‌मिचि एडोक् हिट्‌ना खालाङ्‌गाङि लिक्‍मा ओटोगुटु॥