١ بُطْرُس 3:21 - كِتاب العَهد الجَّديد مِن الكِتاب المُقَدَّس

²¹ و المويَه دي تَشَبِّه المَعموديَّه، مُش غَسيل الوَساخَه مِن الجِّسِم، لَكِن طَلَب ضَمير طَيب لِلَّه. و دي تَخَلِّصكُم هَسَّع بِقيامَة يَسُوع المَسيح.

١ بُطْرُس 3:21 Iomraidhean Croise

مَتَّى 28:19

عَشان كِدا، أمشو و أعمِلو تَلاميذ مِن كُلّو ناس الدُّنيا. و عَمِّدوهُم بِإسم الأبو، و الإبن، و الرّوح القُدُس.

مَرْقُس 16:16

هو اليَصَدِّق و يِتعَمَّد بِخلَص، و الما يَصَدِّق بِحكُمو عَليهو.

يُوحَنَّا 13:9

سِمْعَان بُطْرُس قال ليهو: ”يا سَيِّد، مُش رِجليني بَس، لَكِن إيديني و رَاسي كَمان.“

أعمال الرُّسُل 16:33

و أخَدُم في السّاعَه ديك مِن اللّيل، و غَسَّل جُروحُم. و إتعَمَّد طَوّالي، هو و كُلّو أهل بيتو.

أعمال الرُّسُل 2:38

و بُطْرُس قال ليهُم: ”توبو و إتعَمَّدو كُلّو واحِد مِنَّكُم بِإسم يَسُوع المَسيح لِغُفران خَطاياكُم، و بِتاخُدو هَديَّة الرّوح القُدُس.

أعمال الرُّسُل 22:16

و هَسَّع لِشِنو تِستَنّى؟ قوم و إتعَمَّد، و أغسِل خَطاياك، و نادي بِإسم الرَّب.‘

أعمال الرُّسُل 8:36

و وَكِت ما هُم ماشين في السِّكَّه، جو لِمَحَل فيهو مويَه. و الخِصي قال: ”شوف! في مويَه! ما مُمكِن أتعَمَّد؟“

أعمال الرُّسُل 8:37

و فِيلُبُّس قال: ”كان بِتآمِن بِكُلّو قَلبَك، مُمكِن ليك.“ و الخِصي رَدَّ و قال ليهو: ”أنا بآمِن أن يَسُوع المَسيح هو إبن الله.“

رُومِيَه 5:14

و لَكِن الموت حَكَم مِن آدَم لِمُوسَى و داك عَلى ديل الما عَمَلو خَطيَّه زي ما آدَم عَمَل خَطيَّه، لَمّا كَسَّر أمر الله. آدَم كان عَلامَه ليهو الماشي يَجي.

١ كُورِنْثُوس 12:13

عَشان كُلُّنا بِروح واحِد إتعَمَّدنا لِجِسِم واحِد، إذا كُنّا يَهود ولّا ناس إغريقيين، خَدّامين ولّا العِندَهُم حُرّيَّه. و هو أدّانا كُلُّنا روح واحِد عَشان نَشرِبو.

١ كُورِنْثُوس 4:6

عَشان خاطِركُم يا أخوان، خَتّيت دا كُلّو عَلى نَفسي و عَلى أَبُلُّوس، زي مَثَل عَشان تِتعَلَّمو مِنَّنا أن ما تَفَكِّرو في النّاس فوق ما الكِتاب يَقول. و كِدا إنتو ما بِتكونو مِتكَبِّرين الواحِد فوق التّاني.

٢ كُورِنْثُوس 1:12

عَشان دا فَخرَنا: ضَميرنا يَشهَد لينا، نِحنا مَشينا في الدُّنيا في القَداسَه و الإخلاص المِن الله و خُصوصاً مِن جِهَتكُم. و ما عَمَلنا كِدا بِحِكمَة الإنسان، لَكِن بِنِعمَة الله.

٢ كُورِنْثُوس 7:1

و عَشان عِندَنا الوُعود ديل، يا مَحبوبين، خَلّونا نَنَضِّف نُفوسنا مِن كُلّو نَجاسَة الجِّسم و الرّوح، و نَكَمِّل القَداسَه في خوف الله.

غَلَاطِيَّه 3:27

عَشان كُلُّكُم الإتعَمَّدتو لِلمَسيح، لِبِستو المَسيح.

أفَسُس 5:26

عَشان يَقَدِّسا و يَنَضِّفا بِغَسيل المويَه بِالكِلمَه.

كُولُوسِّي 2:12

دَفَنوكُم مَعاهو في المَعموديَّه، و قَوَّموكُم مَعاهو كَمان بِالإيمان بِعَمَل الله القَوَّمو مِن بين المَيِّتين.

١ تِيمُوثَاوُس 1:5

و نِهايَة الأمر مَحَبَّه مِن قَلِب نَضيف و ضَمير كوَيس و إيمان مُخلِص.

١ تِيمُوثَاوُس 6:12

حارِب حَرب الإيمان الكَويس. و أمسِك بِالحَياة الأبَديَّه. عَشان الله ناداك لِدا، و إنتَ شِهِدتَ الشَّهادَه الكوَيسَه قِدّام شاهِدين كُتار.

عِبرانيين 10:22

عَلَشان كِدا، خَلّونا نَقَرِّب بِقَلِب أمين و في كُلّو تأكيد الإيمان، و قُلوبنا مَرشوشَه عَشان يَنَضِّفنا مِن ضَمير بَطّال و أجسامنا مَغسولين بِمويَه نَضيفَه.

عِبرانيين 11:19

إِبْرَاهِيم حَسَب أن الله عِندو قُدرَه يَقَوِّمو مِن بين المَيِّتين. و بِالحَق، هو في صورَه قِبِل إِسْحَاق مِن بين المَيِّتين.

عِبرانيين 13:18

صَلّو فِشانّا. بِنَعرِف بِالحَق نِحنا عِندَنا ضَمير طَيب، و نِحنا عاوِزين نَعيش حَياة أمينَه في كُلّو حاجَه.

عِبرانيين 9:14

و عَلَشان دا الحَق، كَم بِالأكتَر دَم المَسيح عَمَل لينا! هو قَدَّم نَفسو لِلَّه بِالرّوح الأبَدي بِدون عيب. و دَمّو بِنَضِّف ضَمايرنا مِن الأعمال المَيِّتَه عَشان نَخدِم الله الحَي.

عِبرانيين 9:24

عَشان المَسيح ما دَخَل لِقُدُس الأقداس المَعمول بِالنّاس، و دا صورَة الحاجات الحَقيقيَه. لَكِن هو دَخَل لِلسَّما عَشان يَظهَر قِدّام وَش الله فِشانّا.

١ بُطْرُس 1:3

مُبارَك الله أبو رَبَّنا يَسُوع المَسيح! حَسَب رَحمَتو الكَتيرَه هو أدّانا وِلادَه تانيَه لِرَجاء حَي بِقيامَة يَسُوع المَسيح مِن بين المَيِّتين.

١ بُطْرُس 3:16

خَلّي ضَميركُم يَكون طَيب، عَشان البِشتِمو مَشيكُم الطَّيب في المَسيح يَخجَلو مِن شَتايِمُم.