Hibru 3:1 - Tataroha Diana

¹ Oto maeni eesiku maaꞌi, a God e mani soikie oto i saana taꞌau i Lengi, oto omu ke lolodosae i sulie a Jisas, iini nge kie ko meni houleꞌinie uri ingeie oto naꞌohai Hurulaꞌaa nge ko tarohaꞌinie walana God hunikie, na ingeie oto Hahuꞌana Naꞌohai Pris ikie.

Hibru 3:1 Iomraidhean Croise

Tataroha Diana I Sulie A Jisas Kraes Nge A Jon E Uusue 17:3

Na loꞌongaꞌinge aana maurihe huu ngeena, uri hunie mwala ke sai diana aamu, taꞌa-taꞌa God oto toꞌohuu, na uri kire ke saieu noꞌone, a Jisas Kraes, iini o uusungeꞌinie mai.

Tataroha Diana I Sulie A Jisas Kraes Nge A Jon E Uusue 20:21

Oto a Jisas ko heꞌi teꞌuri loꞌu, “Hanuelamanga ke iiꞌo peꞌiꞌomu. No ko uusungeꞌiniꞌomu oto wau mala a Mamaꞌa e uusungeꞌinieu mei.”

Tataroha Diana I Sulie A Jisas Kraes Nge A Jon E Uusue 20:27

Na ko teꞌuri hunie a Tomas, “O ke toꞌomaaie mo kiꞌiku, na o ke neꞌie riꞌi-riꞌimu oto i laoni. Na o ke lae mai neꞌie nimemu i laona malaka i paparaꞌaku. O ke suꞌuri neꞌisae rue-ruaꞌa taꞌe o ke hiiwalaimoli mola.”

Palonga 1:15

Oto aana mo dingena, aana ngaeta maholo ola mala tangalai iinoni peꞌie nga ro aawala aana mo iini kire hiiwalaimoli kire mani loko. Oto a Pita e uure i lengi ko si teꞌuri,

Uusu-uusu A Pol Hurula'aa Hunie Mo Rom 11:17

Kira Ebraham kire urihana mo imi-imine nga tohungei ei hungu-hungu nge a God e saetoꞌo aana oto liutaa. Taꞌe maꞌalana mo Jiu kire neꞌie ai diana a God urine, a God e hali aasie oto mo sasarai ola hunge mwaanie ai ngeena, aena aana e leledie oto mo Jiu nge kire sereꞌinie a Kraes. Na iꞌomu, maꞌalana uri omu urihana mola mo sasarai ola aana ai ni meꞌesu, taꞌe a God e neꞌiꞌomu aana leu oolisie mo sasarai ola e taꞌaasiꞌi oto, na e ladoꞌomu oto aana ai diana ngeena. Oto aana maholo ienini, iꞌomu noꞌone omu sai helesie taꞌena nga ola diana ko lae-lae mai uure mwaanie mo Jiu.

Uusu-uusu A Pol Hurula'aa Hunie Mo Rom 15:27

Ikire maraada ni kire loꞌongaꞌi ni esuie leune urine, aana e urihana kire kaoni aana mo Jiu na e roroꞌaire noꞌone huni peꞌie mo meitale taꞌau i Jerusalem, aena aana mo Jiu oto ni kire holaꞌi peꞌire aana mo ola diana hunie maurihaꞌai. Oto mwala nge ikire nga mo Jiu haꞌike, e malisine mola kire ke peꞌie loꞌu mo Jiu aani niilana mo ola diana hunie mauringe mai welumalau.

Uusu-uusu A Pol Hurula'aa Hunie Mo Rom 15:8

Omu ke aamasitoꞌo aana uri a Kraes ko deu esunge oto huni peꞌie mo Jiu ni ngeena, huni haataꞌinie aada uri mo heiholotaꞌinge a God hunie mo weuwada mo ola toꞌohuu.

Uusu-uusu A Pol Hurula'aa Hunie Mo Rom 9:24

!Na ikie oto mwalana! A God e soikie mai i saana uure mwaanie taꞌena nga komu ni welumalau, na e kaꞌa ike mola mwaanie mo Jiu, taꞌe mwaanie noꞌone mwala nge ikire nga mo Jiu haꞌike.

1 Korinit 1:2

Mere ko uusu-uusu oto wau ienini huniꞌomu aana soihaadaꞌinge a God wau i Korinit. Iꞌomu oto a God e soiꞌomu uri omu ke neꞌi iinoni maaꞌi ingeie aani iiꞌo-rurunge peꞌie a Jisas Kraes, mala ahutana mo iini ko palo-paloa satana aalaha ikie aana taꞌena nga leu.

1 Korinit 10:17

Aena aana e taꞌa-taꞌa ho ngeulaa mola, nge maꞌalana kie ke hunge loꞌu uri taa, taꞌe kie neꞌie e taꞌa-taꞌa mei sape mola ni ngeena, aena aana kie ko meni ngeue mola e taꞌa-taꞌa mei ngeulaa ngeena.

1 Korinit 9:23

No ko euꞌesuie ue mo olana hunie Tataroha Diana tarohaꞌinilana ke lae taraꞌasi, na hunie ke mwadaꞌusieu hunie ne ke toolea haꞌadianaꞌanga mwaanie Tataroha Diana.

2 Korinit 1:7

Oto melu hiiwalaimoli toꞌohuu uri omu sai uure maꞌutaꞌa taane, aena aana melu saie mola uri omu ko sapesalu noꞌone mola aana taꞌa-taꞌa taungei ola nge melu ko sapesalu aana, na a God ko haꞌadodoa loꞌu saemiu noꞌone mala ko haꞌadodoa saemeelu ie.

2 Korinit 9:13

Na i tehulaꞌana mei esunge diana iꞌomu ngeena ko haataꞌinie hiiwalaimolinge iꞌomu e toꞌohuu, nge mwala oto hunge kei paalahea God. Omu hiiwalaimoli aana Tataroha Diana a Kraes na omu tola i sulie Tataroha Diana ngeena aani peꞌinge hunire na ahutana mwala loꞌu. Oto mwala hunge kei haꞌamanikuluꞌaa God haahie mwaꞌe-mwaꞌenga iꞌomu.

Epesas 3:6

Mei oalaꞌinge mumuni ngeena e unue uri iꞌomu mo Aapoloa Aaopa nge iꞌomu nga mo Jiu haꞌike, omu sai neꞌie taꞌa-taꞌa komu na e taꞌa-taꞌa mei sape peꞌiꞌemi mo Jiu, aana omu hiiwalaimoli noꞌone aana Tataroha Diana. Na urine nga taa nge a God e haiholotaꞌinie uri kei niie mai huniꞌemi i tehulaꞌana a Jisas Kraes, iꞌomu omu kei toꞌo aana noꞌone.

Epesas 4:1

Ineu mwane nge nou iiꞌo i laona nume ni hoꞌo haahie uri no ko esu nana Aalaha, no ko unue oto huniꞌomu uuri. Omu ke iiꞌo oodotaꞌi i sulie tolahai iinoni nge e malisine mo iini nge a God e soire hunie kire ke neꞌie mo iinoni ingeie.

Epesas 4:4

Ikie taꞌa-taꞌa mei sape mola, na kie mani toꞌo aana mola taꞌa-taꞌa Liꞌoa Maaꞌi i lalo aaka, na kie ko meni maaꞌoohi susutoꞌo mola hunie taꞌa-taꞌa haiholotaꞌinge, nge a God e haiholotaꞌinie hunie ahutaka maholo e soikie mai i saana.

Pilipae 3:14

Oto no ko huru aꞌailaꞌa hunie uri ne ke hele aana waaite taꞌau i Lengi, nge a God e soieu hunie ne ke hele aana i tehulaꞌana a Jisas Kraes.

Kolosi 1:12

Na maꞌalana omu ke siꞌohaꞌa loꞌu uri taa, taꞌe omu ke paa-paalahea mola a Mamaꞌa aana e da kie ke malisine nga aapa aana nga taa a God e loohaꞌinie hunie mwala ingeie taꞌau i laona Aalahanga ni Matapwanga.

Kolosi 1:22

Taꞌe a Kalena e neꞌi iinoni na e mae honotamiu, na aena urinena a God e si da hunie omu ke uure ruru oto peꞌie. A God e asuie urine hunie uri ke tooleꞌomu mei saana mala mo iinoni e maaꞌi oto, nge nga mei ola e kaꞌa aaela ike loꞌu aada, na nga mei ola hunie a God ke leire haahie haꞌike loꞌu.

Kolosi 3:12

Iꞌomu, a God e lio hilisiꞌomu hunie omu ke neꞌi iinoni maaꞌi ingeie nge e tohungei manata diana huniꞌomu. Oto aena urine, iꞌomu noꞌone omu ke haataꞌinie aamasinge hunie mo iinoni, na omu ke saemamae hunie mwala, na omu ke haꞌamwai-mweiꞌaꞌomu, na omu ke toli rako peꞌie mwala, na omu ke suꞌuri sae-saewasu oto lau-leu peꞌie mwala.

1 Tesalonaeka 2:12

Aana melu ere-ere haꞌasusuꞌomu, na melu eitanaiꞌomu huni tola i sulie a Jisas, na melu ere hatongaꞌi huniꞌomu hunie omu ke iiꞌo aani iiꞌonga diana i maana a God. Aana e haaraiꞌomu hunie omu ke neꞌi iinoni aana aalahanga ingeie na hunie omu ke iiꞌo peꞌie aana manikuluhaꞌana.

1 Tesalonaeka 5:27

No ko eitanaiꞌomu aana satana Aalaha ikie uri saailana uusu-uusu ienini ke lae oto nana ahutana mo iini kire hiiwalaimoli.

2 Tesalonaeka 1:11

Oto aena mo olana nge melu ko aare-aarengaꞌi mola talamiu tarau. Melu ko eitanaie a God ikie hunie ke da omu ke malisine mau-meuringe diana nge e soiꞌomu hunie uri omu ke iiꞌo aana. Na melu ko eitanaie a God hunie ke haꞌa-oaie mo neꞌisaenga diana iꞌomu aana nanamanga ingeie, na hunie ke peꞌiꞌomu huni haꞌamangoa mo esunge diana nge omu ko esuiꞌi i tehulaꞌana hiiwalaimolinge iꞌomu aana.

2 Tesalonaeka 2:14

Mo wala toꞌohuu nge a God e haaraiꞌomu mei eeni ngeena, nge oto Tataroha Diana nge melu lae peꞌi tarohaꞌinie huniꞌomu. Na e haaraiꞌomu urine ngeena aana e saetoꞌo aana uri omu ke toꞌo aana noꞌone manikuluhaꞌana a Jisas Kraes Aalaha ikie.

1 Timoti 6:12

Mo ola oto hunge kei uure huni ooho honosie hiiwalaimolinge iꞌoe, taꞌe o ke ooho diana mola, na o ke hele maꞌutaꞌa aana maurihe huu. A God e soiꞌo hunie maurihe maholo o unu tahangaꞌinie i naꞌona ruruhaa uri o hiiwalaimoli aana a Jisas.

1 Timoti 6:2

Na mo koni-konihe nge mo poro paine ikire mo iinoni hiiwalaimoli, kire ke haꞌamaꞌu noꞌone aana mo iinine aana ikire mo eeside i lalo aana a Kraes ni ngeena. Kire ke haꞌamaꞌu aada oto liutaa, na kire ke asu diana mola nada aena aana poro paine ikire ngeena nga iini e hiiwalaimoli mala ikire na kire manata diana hunie. Oto Timoti, o ke haꞌa-uusulie mwala aana mo ola ienini na o ke unue oto hunire uri kire ke lulu i suliꞌi.

2 Timoti 1:9

Aana a God e haꞌa-uurikie na e lio hilisikie oto hunie kie ke neꞌi iinoni maaꞌi ingeie. E kaꞌa asuie ike mola leune aena aana kie malisi wa uri kie asuie nga mei ola diana adongana. !Haꞌike! Taꞌe e oalaꞌinie urine mola aana e tohungei sare haꞌadianaꞌakie. Uure oto wau i naꞌo na haꞌaholanga haꞌike ue, a God e oalaꞌinie oto uri a Jisas Kraes kei haꞌadianaꞌakie oto urine.

2 Timoti 2:7

O ke loꞌongaꞌi diana i sulie nga taa nge no ko unue huniꞌo ienini, na a Aalaha kei peꞌiꞌo taane aani haataꞌinilana saenanaunge i sulie ahutana walu ola ngeena.

Hibru 10:19

Aena urine, maeni eesiku maaꞌi, i sulie apune a Kraes e aahe oto i tehulaꞌaka, kie toꞌo aana oto nanamanga huni lai sili i laona tohungei leu maaꞌi ngeena.

Hibru 10:21

Oto mwaanie kie maꞌu-meꞌu, taꞌe kie ke lae mai saana God peꞌie mei sae manola na aani hiiwalaimolinge toꞌohuu, na aana a Jisas oto Hahuꞌana Naꞌohai Pris ko lio i sulie uluhe aana nume a God, na kie saie oto uri apune e hoda rereꞌa oto aana manataka, mala mei wei manola e sai hoda rereꞌa aana sapeka.

Hibru 10:23

Kie ke lae peꞌi hele maꞌutaꞌa aana maaꞌoohinge susutoꞌo hunie walu ola nge kie ko unue uri a God e haiholotaꞌiniꞌi hunikie, aena aana kie sai norutoꞌo aana God, iini e haiholotaꞌinie walu olana.

Hibru 13:22

No ko eitanaiꞌomu, maeni eesiku maaꞌi, uri omu ke rongo diana aana mei wala ni haꞌasusulemiu ienini, aana nou kaꞌa uusu-uusu tewa ike.

Hibru 2:11

Ingeie oto ko da hunie mwala ke neꞌi iinoni maaꞌi, na ahutana mo iini e haꞌamaaꞌire ngeena, ikire taꞌa-taꞌa uluhe ni iinoni oto peꞌie. Oto aena urinena nge a Jisas e kaꞌa masa ike huni haaraꞌinire uri maeni eesine,

Hibru 2:17

Aena urinena, e tohungei roroꞌa hunie maraana, hunie ke sada peꞌikie mo eesine aana taꞌena nga ola, hunie uri ke hai-hei aamasi toꞌohuu hunikie maholo ko esu nana a God mala Hahuꞌana Naꞌohai Pris ikie, aana asunge ingeie oto hunie ke haꞌa-oodohie mo oorahaꞌaanga mo iinoni hunie a God ke saeꞌaasiꞌi.

Hibru 3:12

Maeni eesiku maaꞌi, omu ke mani kinetaꞌiniꞌomu mwaanie mo neꞌisaenga tataꞌala na mo neꞌisaenga rue-ruaꞌa, mwaanie nga iini eemiu e aatopuri aana a God Mau-meuriꞌe.

Hibru 3:14

Aana kie kei meni aalaha peꞌie a Kraes mala uri kie kei hele susuleꞌi mola aana hiiwalaimolinge nge kie holaꞌi hele aana lae hule i haꞌamangolana.

Hibru 6:20

Na e holaꞌi lae oto taꞌau i naꞌoka hunie uri ikie kie ke lae noꞌone taꞌau. Aana a Jisas oto Hahuꞌana Naꞌohai Pris oto mala a Melkisedek, na kei iiꞌo huu oto urine hunie ke aiꞌeitanaie a God talaka.

Hibru 7:26

Oto a Jisas ingeie oto Hahuꞌana Naꞌohai Pris e sai peꞌikie. Ingeie oto e maaꞌi, na e kaꞌa oorahaꞌaala ike, na oopalana e lae oto mwaanie mwala e oorahaꞌaa, na a God e tohungei haꞌapainaꞌaa oto liutaa aana e tahelaꞌinie oto taꞌau i Lengi.

Hibru 7:28

Mwala nge lio hilisilada e lae huni neꞌi naꞌohai pris i sulie mo Haꞌatolanga a Mosis, ikire mwala mamaelaꞌa mola. Taꞌe aana mei wala ni tohenga aana haiholotaꞌinge haalu nge e si lae mai purine mo Haꞌatolanga a Mosis ngeena, a God e lio hilisie oto Kalena hunie ke neꞌie oto Hahuꞌana Naꞌohai Pris nge ke iiꞌo huu.

Hibru 9:11

Taꞌe a Kraes e hule oto mai, na aana e neꞌie oto Hahuꞌana Naꞌohai Pris, nge e haꞌa-uuresie haiholotaꞌinge haalu nge ko haꞌadianaꞌakie oto ienini. E sili oto i laona tohungana nume maaꞌi nge e diana loꞌu liutaa aana nume maaꞌi susulu holaꞌinaꞌo ngeena, ola asuilana e kaꞌa lae ike aana ninimei iinoni na e kaꞌa ola ike aana walumalau ienini.

Hibru 9:15

A Kraes e mae honotana mo oorahaꞌaanga nge mwala e dau-deuꞌi aana maholo kire iiꞌo ue i melutana haiholotaꞌinge holaꞌinaꞌo ngeena. Na aana maenga, nge a Kraes e haꞌawalaimoliꞌaa haiholotaꞌinge haalu a God ngeena, uri hunie mwala nge a God e soire oto mai i saana, kire ke helesie nga taa e haiholotaꞌinie hunire. Na mei olana oto maurihe huu taꞌau i Lengi.

1 Pita 2:9

Taꞌe iꞌomu oto, a God e lio hilisiꞌomu nana. Iꞌomu oto mo pris a Inemauri, na iꞌomu oto mwala maaꞌi ingeie. Iꞌomu oto mo tohungei iinoni a God maraana, nge e lio hilisiꞌomu huni tarohaꞌinie tolahai esunge diana ingeie. Aana a God oto e soiꞌomu mei mwaanie rodohono na omu lai sili i laona raa-raa ingeie e manikuluꞌe.

1 Pita 3:5

Oto wau i naꞌo, mo huꞌe maaꞌi nge kire norutoꞌo aana God, kire haꞌalaunire urine aani tola i sulilana mo poro ikire. Na urine nge kire tohungei lio diana oto liutaa.

1 Pita 5:1

Oto no ko sare unue ngaeta mei wala ni haꞌananaunge huniꞌomu mo naꞌohai mwane aana soihaadaꞌinge. Ineu ngaeta naꞌohai mwane aana soihaadaꞌinge noꞌone mala iꞌomu, na hule aana nou sai ere haꞌawalaimoliꞌaa uri Tataroha Diana i sulie a Kraes e toꞌohuu aana ineu maraaku nou leesie kaꞌu sapesalunge a Kraes. Na nou saie uri ineu noꞌone ne kei toꞌo aana manikuluꞌanga a God aana maholo a Kraes kei ooli loꞌu mei.

1 Pita 5:10

Maholo ienini, omu ko sapesalu mola hunie kele maholo oꞌoruꞌe, taꞌe a God e manata diana huniꞌomu oto liutaa. Ingeie ni oto e soiꞌomu huni lado peꞌie a Kraes na huni iiꞌo peꞌie aana manikuluhaꞌana nge e saꞌa mango ike loꞌu aana taꞌena nga maholo. Oto a God maraana kei haꞌasusue taane hiiwalaimolinge iꞌomu na kei niie nanamanga huniꞌomu hunie omu ke uure maꞌutaꞌa tarau mala iini e neꞌi rato oto aana oodo-oodonga.

1 Jon 1:3

Melu ko haꞌarongoꞌomu urine aana nga taa melu leesie na melu rongoa, hunie uri iꞌomu noꞌone omu ke iiꞌo ruru peꞌiꞌemeelu aana iiꞌo-rurunge peꞌie a Mamaꞌa na a Kalena, Jisas Kraes.

Jiud 1:1

Saediananga mwaanieu a Jiud, koni-konihe a Jisas Kraes, na aasine a Jemes. No ko uusu-uusu ie huniꞌomu mo iini nge a God e soiꞌomu mei i saana. A God Mamaꞌa e tohungei manata diana huniꞌomu na omu iiꞌo oto i lalo aana hai kinetaꞌinge a Jisas Kraes.

Haataꞌinge 17:14

Na kire kei ooho honosie a Kalei Sipu ngeena. Taꞌe a Kalei Sipu ingeie oto aalaha paine haahie mo aalaha, na ingeie oto inemauri haahie mo inemauri. Oto ingeie na mo iini e lio hilisire na e soire na kire lulu i sulie taraꞌasi, kire kei aꞌailaꞌasie mola mo inemauri ngeena.”

Haataꞌinge 18:20

Oto ngaeta mei wala e teꞌuri loꞌu, “Iꞌomu mwala taꞌau i Lengi, omu ke mani ilenimwaꞌe haahie haꞌaloinge e hule oto aana hanuena. Omu ke ilenimwaꞌe, iꞌomu mwala a Kraes, na iꞌomu mo hurulaꞌaa, na iꞌomu mo propet. Aana a God ko haꞌaletehie oto a keine haahie nga taa e dau aaelasie huniꞌomu.”