1 Timoti 3:3 - Tataroha Diana

³ Iinonine ke suꞌuri inu-inu wei ni pweunge oto hiitoꞌo hunie ke mahiri. Na mwane ngeena ke suꞌuri neꞌi iinoni hai-heiseuni, taꞌe ke maneko, na ke saetoꞌo aana hanuelamanga i matolana mwala, na ke suꞌuri sae-saehanalie toꞌoha.

1 Timoti 3:3 Iomraidhean Croise

Matiu 21:13

Na ko ere aada uuri, “A God e unue aana mo Uusu-uusu Maaꞌi uuri, Nume ineu oto nume ni aarengaꞌinge. Aesaea 56:7 Taꞌe omu ko si da mola ko neꞌi hahale kira horopeli kire sai mumuni i laona.” Jeremaea 7:11

Palonga 20:33

“Omu saie oto uri nou kaꞌa saehanalie ike nga mei toꞌoha wa nga kele mei ola aana toꞌolana nga iini aana taꞌena nga maholo.

Uusu-uusu A Pol Hurula'aa Hunie Mo Rom 16:18

Mwala urine, kire kaꞌa asu ike nana a Kraes Aalaha ikie, taꞌe kire ko lae mola i sulie mo heri-huninge aaela aana sape. Kire ko eero aani lahenga huni haꞌa-olaa mola saena mwala nge kire kaꞌa lio saie ike mo neꞌisaenga aaela ikire.

Epesas 5:18

Mwaanie omu haꞌapweuꞌomu aana wai ni pweunge, ola e sai waeliꞌomu, taꞌe omu ke honu mola aana Liꞌoa Maaꞌi.

1 Tesalonaeka 5:14

Na melu ko eitanaiꞌomu, maeni eesiku, uri omu ke ere aana mo iini ko lalawasie asunge. Omu ke peꞌie mo iini nge kire sai meꞌu hunie saeda ke susu. Omu ke peꞌie mo iini nge loꞌongaꞌinge ikire e mamaelaꞌa, na omu ke haro kele ere hunie ahutana mwala. Na mwaanie saewasunge iꞌomu e lau-leu hunie taꞌena nga iini.

1 Timoti 3:8

Oto e urine loꞌu aana mo iini ko hei raretaꞌi i laona soihaadaꞌinge, aana kire ke holaꞌi neꞌi iinoni diana e malisine mwala ke haꞌamaꞌu aada. Kire ke suꞌuri neꞌi iinoni eero-eero. Kire ke suꞌuri inu-inu wei ni pweunge oto hiitoꞌo hunie ke mahiri, na kire ke suꞌuri sae-saehanalie toꞌoha.

2 Timoti 3:2

Mwala kei loꞌo-loꞌongaꞌinire oto mola maraada. Kire kei neꞌi-neꞌisae paine oto hiitoꞌo aana toꞌoha, na kire kei lae-lahera maraada, na kire kei too-toohaꞌinire oto hiitoꞌo. Kire kei talei ere-ere aaela mola, na kire saꞌa totola i sulie ike mo nikada na mo aamada. Kire saꞌa paa-paalahea ike nga iini haahie nga mei ola nge niilana e lae oto hunie, na kire saꞌa loꞌo-loꞌongaꞌinie ike loꞌu a God.

Taetas 1:11

Oto o ke uure honosie mo haꞌa-uusuli eero-eero urine mwaanie kire waelie hiiwalaimolinge ngaeta mo iini na mo uluhe ni iinoni ikire. Kire ko lae peꞌi haꞌa-uusulie mwala mola aana mo haꞌa-uusulinge tataꞌala ikire mola hunie kire ke toꞌo-toꞌo.

Taetas 1:7

Mo naꞌohai mwane i laona soihaadaꞌinge kire ko lio i sulie mo esunge a God, na aena urinena, nge kire ke iiꞌo oodotaꞌi tarau. Mwaanie kire loꞌo-loꞌongaꞌinire mola maraada, na mwaanie kire sae-saewasu lau-leu, na mwaanie kire inu-inu wei ni mehiri, na mwaanie kire haꞌa-haꞌa-ere, na mwaanie kire sae-sae haahie toꞌoha.

Taetas 2:3

Na o ke haꞌa-uusulie noꞌone mo huꞌe hunie kire ke lulu i sulie tolahai iinoni diana nge e malisine mo iini kire hiiwalaimoli aana a Jisas. Kire ke suꞌuri sisiho aana mwala, na kire ke suꞌuri inu-inu wei ni mehiri hiitoꞌo. Taꞌe kire ke haꞌa-uusulie mwala mola aana tolahai iinoni diana,

Taetas 3:2

Mwaanie kire ere aaelasie nga iini wa kire ke haꞌa-erea nga iini, taꞌe kire ke iiꞌo maneko na kire ke manata diana mola hunire hailiu.

Hibru 13:5

Tolahamiu ke suꞌuri iiꞌo oto mola aani saehanalilana toꞌoha, na omu ke sae-saemango mola haahie nga taa omu toꞌo aana oto. Aana a God e unue kaꞌu uri kei niie nga taa e adongamiu, aana e teꞌuri, Nou saꞌa toliꞌaasiꞌo ike aana taꞌena nga maholo, na nou saꞌa roroꞌa pulongosiꞌo ike. Diutronomi 31:6

Jemes 4:1

?Ohe omu saie taane nga taa nge ko da omu ko sare haꞌa-ere na haiseuni tarau? Walu ola ngeena kire uure mai mwaanie mo neꞌisaenga ni saehanalinge nge ko esuie oohotaa i laona manatamiu.

1 Pita 5:2

Oto no ko sare haꞌananauꞌomu uri omu ke lio i suli diana aana mo iinoni nge a God e neꞌire i laona nimemiu huni lio i suli diana aada mala kakali sipu ko lio i sulie amaa ni sipu ingeie. Oto omu ke lio i suli diana aana soihaadaꞌinge a God oto aani mwaꞌe-mwaꞌenga mala e saetoꞌo aana omu ke asuie. E kaꞌa diana ike uri omu ke asu mola mala omu ko esu uei waaite. !Haꞌike! Omu ke asu oto aena aana omu tohungei mwaꞌe-mwaꞌe toꞌohuu huni peꞌire.

2 Pita 2:3

Na aena aana mo haꞌa-uusuli eero-eero ngeena kire ko heri hunie mone mola toꞌoha, oto kire kei da taꞌena nga haꞌa-uusulinge eero-eero mola huni weꞌinie mola mo toꞌoha iꞌomu. Taꞌe a God e kaꞌa sai maꞌahu ike, oto e leesie mola mo tolahai ola aaela ikire, na kei haro haꞌaloire taane. E pwani leie oto mo tolahai ola urine, na leilada e iiꞌo aakau oto loosire uure mai waite.

Jiud 1:11

!Aama-aamasilana mwala ngeena! Kei tohungei aaela oto hiitoꞌo hunire, aana kire ko lae i sulie tolahana a Kein iini nge e horoꞌie aasine. Na i tehulaꞌana mola toꞌoha, kire ko toliꞌaasire huni esuie walu ola e kaꞌa diana, mala a Belam e asuiꞌi keꞌu. Kire haukama honosie a God mala a Kora e asuie kaꞌu waite honosie a Mosis. Oto dau tekelaꞌinilada kei lae oto mala ingeie.

Haataꞌinge 1:9

Ineu a Jon, aasimiu kolu meni hiiwalaimoli aana a Jisas. Ikolu, kolu ko meni lae peꞌi uure maꞌutaꞌa, maꞌalana mwala ko teungeꞌinikolu haahie uri ikolu oto i laona Aalahanga a God. Kire neꞌieu wau i laona mala-malau ni hoꞌo i Patmos, aena aana no ko tarohaꞌinie walana a God na walaimolinge i sulie a Jisas.