Taitus 1:9 - Basef Buꞌwami Godi

⁹ Anen nondahapila basef ifimba buꞌwafi apaꞌ magawalipasafi andeandeꞌ. Eaꞌ anen laꞌifinama nuwalipa anis epes nosaꞌma ukup asasipi nogowaꞌ banagasa basef ifimba usiꞌifi. Ea laꞌifinama nigaꞌipa isimba sogosambala basef usiꞌifii ma sogamemeꞌma basef asasifi ina endilisifi, owaꞌatin.

Taitus 1:9 Iomraidhean Croise

Aposel 18:28

Anen banagona endilisi aꞌowaꞌ ma nagagwa basef esis Judai ma nogohnaep esis amam nematawai. Anen banagona nalomas nandaꞌ hihianama natalogofas nikilaꞌas. Ama nigihimbaꞌmasa basef alihifa buk Baibela Jisas Krais God nasapaꞌana nagafiꞌii.

1 Korin 14:24

Apaꞌ iꞌi Ambal buꞌunai Godi nasaꞌma ipaꞌ hipai ma pegawalapa basef Godi siꞌi profet ama iꞌi anin epen owaꞌ nogohapifa Kraisia o owaꞌ negegawa basef Godi andeandeꞌia nifiꞌi negawis, ama basef ipaꞌ hipaii atiasi feha nembel epen inimbai eaꞌ fewaloga opaf ananifi ma waf maif awafi fagapani.

1 Tesalonaika 5:21

Pewaloga basef hiafi, ma pihapila basef fasifi atif tatalaꞌif.

2 Tesalonaika 2:15

Eaꞌ deiꞌ ipaꞌ Kristen alipipai pindalutu banagepa ma basef hiafi Godi wagaꞌipipaef malogufi o wagaseꞌepaef okwatihi, ifimba ipaꞌ dailaef.

1 Timoti 1:10

Anis sandaꞌ soꞌa wauli ma waf afamba awafii, a anis sagahambombaga anis amam nematawa siꞌi fowaꞌ Sodom sandaꞌafi. Eaꞌ anis sakwalopa anis epes sambahoꞌwas sape anis daias safiꞌi satalisa sondaꞌmas maol. Eaꞌ anis sambasoꞌami, eaꞌ anis sambasoꞌam sagaꞌi basef endilisi gani ilifi. Eaꞌ anis sandaꞌ waf afambai, faloma anef waf hiafi awafi fapaꞌ fagaloma basef endilisifii. Muꞌuli Godi nafiꞌi nagaꞌi epes isimba sandaꞌ waf awafi.

1 Timoti 1:15

Anif basef endilisifi atifa epes hiasi someꞌefa sogahapifif. Basef ifimba naꞌamba. Krais Jisas nisilaꞌi itap apaꞌe ma nofaꞌapa epes mandaꞌ waf awafi mokwahomapaf mutanimai mogape andeandeꞌ. Aeꞌ eaꞌ maꞌuwi aliꞌ andaꞌ waf awafi ikilaꞌ anis daiasi eaꞌ maꞌuwi aeꞌ atowe.

1 Timoti 1:19

Wandaf afamba inaꞌ banagena nigahapifa God nendaꞌ waf usiꞌifi hililiꞌ, ma malogol gagape opaf inaꞌ nomoni ina gihimbaꞌmena anef waf awafi inaꞌ nandaꞌafi, owaꞌ. Anis epes sowaꞌ alafugaha waf afambai buꞌwafi. Eaꞌ deiꞌ hapif asasini papalalan eaꞌ awasin siꞌi sip palalap pagail otamba awasip pagala naoh.

1 Timoti 4:9

Basef ifiꞌi endilisifi atifa epes hiasi siꞌi awi ma semeꞌef sogahapififi, ifimba naꞌamba.

1 Timoti 6:3

Basef dembinai Jisas Kraisi fawalipapa andeandeꞌma waf Godi. Iꞌi anona aman nokwaha basef ifimba ma nowalipa esisa anif basef daif owaꞌ fefeꞌ dondoꞌma basef ifimba fasisi usiꞌifi Jisasia, apaꞌ mogawa aman anamba naꞌi nondaꞌ duꞌwanigai. Anen ina nogawa kwasakwasala, owaꞌatin. Anen nomonas awasisinai. Anen okom mandaꞌi waf afamba nondopambema nogalomasafi atefa, nifitap nondalomasa basef kofagefa. Basef ifimba atif fagawalapa waf afambai. Opalef awalefa anis daindaias, sondaꞌ findiwa, ma sogape ukup aweawep pegapoma sahin owan.

2 Timoti 1:13

Basef ifimba fasifi hililiꞌi inaꞌ nagameꞌemef malogol aeꞌagili, basef ifimba siꞌi anol ametal fasini ma nigihimbaꞌmena waf fasifi negawalipa epesafi. Inaꞌ nihapifa Jisas Krais endilisi eaꞌ okom mimilana nendaꞌ waf naꞌamba nihapila basef ifimba tatalaꞌif.

2 Timoti 2:2

Basef hiafi inaꞌ nameꞌ agawalapefa nogohnaep epes hiasii, ifimba newalapefa anom amam gawaimi mogogawa basef andeandeꞌi, ma mugaꞌipa anis daias datima.

2 Timoti 2:25

Anen nuwalipas saꞌombel nisindiꞌamona nomonas nimanisa epes isimba sondaiwaꞌmanai sogosambala basef ananifii. Anen nondaꞌ maol naꞌamba notopalopas, anaf sombema nelelemba sogogawa basef endilisifi andeandeꞌ.

2 Timoti 3:14

Apaꞌ inaꞌ nihapila basef ifimba nefaꞌef nagahapilifi. Inaꞌ negawa apaꞌ amam nematawa mamahepama magawalipina basef ifimbai.

2 Timoti 4:3

Anef nemaf fegataga, atiasi asondaiwaꞌma sogofaꞌ basef usiꞌifi Godi, aꞌ owaꞌatin. Eaꞌ aꞌ sila ukup asasipi atip sofaꞌai anom tisa hiami asasimi, ma mogaꞌipasa basef ifimba esis isimba ukup paꞌi sogameꞌef aligah asasigahii.

Taitus 1:11

Esis sandandaꞌ naꞌambai, esis saꞌi sombasoꞌmas sogofaꞌasa otamba moni mais anis epesi. Eaꞌ sawalipa anisa waf afamba apaꞌ mandaiwaꞌmafi. Esis sandaꞌ waf afambai atef deiꞌ sahambombaga wambotagw epes hiasi. Eaꞌ inaꞌ nesopama malogof asasigufi isimba sandaꞌam naꞌambai.

Taitus 2:1

Apaꞌ inaꞌ nindaꞌipa esis amam nematawa ma basef fasifi ma waf asasifi findaila basef ifimba usiꞌifi. Inaꞌ nigaꞌipas naꞌamba.

Basef Ifimba Jut Nandaꞌafi 1:3

Alipipai endilisi, aeꞌ okom mandandaꞌ aꞌowaꞌ aꞌi ataꞌ endaꞌ anif basefa God nowambilai apaꞌ hiapai hiꞌalapa nofaꞌapa mutanimai magape andeandeꞌ. Apaꞌ owaꞌ, deiꞌ aꞌi ataꞌ endaꞌ anif basef daif iꞌipipago esaꞌma ukup ipeꞌipi ma pendaꞌ maol banagambel pimafiago basef endilisifi Kraisi apaꞌ magahapilafi. Ama pegahagasa boumi amamba magatalogofa basef ifimba Kraisi. Hapif inimba God aꞌ nasoꞌapan apaꞌ hiapai amam nematawa ananipai nemaf afamba atetef eaꞌ atapin nape.

Revelesen 2:25

Apaꞌ waf hiafi buꞌwafi ipaꞌ pagagiꞌmafi, afamba ipaꞌ pindahapilaf tatalaꞌif pefeꞌ ma pegataga nogota Aeꞌ igatagatai.

Revelesen 3:11

Aeꞌ ifiꞌi etagama ipaꞌ kwafalis atis. Waf buꞌwafi usiꞌifi ipaꞌ pagahapilaf eaꞌi, hapilaf tatalaꞌif atapipa. Naꞌamba anona aman nondalombepa hiahaom buꞌwami magapoma ipaꞌ ma anaf pegefaꞌami.

Revelesen 3:3

Ipaꞌ ukup pendapoma basef ifimba aeꞌafi fowaꞌ paliꞌ pameꞌef pegefaꞌef eaꞌi. Pigiꞌmif pembema nelelemb pekwaha waf awafi pifiꞌmai Aeꞌ. Iꞌi ipaꞌ owaꞌ pesafel ulal pekwaha koha, atiasi Aeꞌ ifiꞌi endambahoꞌ etagamepa siꞌi epen nandaꞌ wali nafiꞌi nagataga eaꞌ ina pegawa nogota mamahotama ifiꞌi egatagamepa, owaꞌ.