Aposel 9:31 - Basef Buꞌwami Godi

³¹ Deiꞌ esis amam nematawa Kristen sagape anamba itap apamba luꞌupa hiagoma Judiai Galili a Samaria sape opalef awanelef sape andeandeꞌ wandaf mais aꞌ owaꞌatin eaꞌ esis Kristen sape banages. Esis sape lafela Dembinai eaꞌ Ambal buꞌunai Godi nowaꞌ banaga opalef asasilifi. Eaꞌ esis miniꞌap Kristen apataga loup.

Aposel 9:31 Iomraidhean Croise

Aposel 12:24

Eaꞌ basef Dembinaii fataga banagef fafeꞌ walemb hielimbi ma epes hiasi sogahapifana.

Aposel 16:5

Eaꞌ deiꞌ esis Kristen sahapifa Jisas banages aꞌowaꞌ eaꞌ wambota esis Kristeni sataga sandanda nimaguf hiafi ahias aꞌowaꞌ.

Aposel 2:47

Lifilafi esis sasaꞌma agol Godi luꞌwagol, eaꞌ opalef esis amam nematawa hiasii sagape andoꞌi boꞌwalefa esis Kristen ama nimaguf hiafi. Eaꞌ Dembinai nandaꞌ maol nimaguf danda ma nogofaꞌ anis amam nematawa sakwaha waf awafi ma sagafiꞌmai anen, nowatani miniꞌap isimba sagahapifanai.

Aposel 20:32

“Deiꞌ andaꞌepa pepe banagami ma lagol Dembinaii, God okom maimailipa ma natopalopepa dowaf nofaꞌepa pigatanimai. Amamba laꞌifima mogowaꞌ banagaipa mogaseꞌepa hiahaom fasimi atom God nagasoꞌasam amam nematawa anen nandaꞌas boꞌwes hililiꞌ eaꞌ ananisi atiasi.

Aposel 5:11

Eaꞌ esis Kristen hiasi saloma esis amam nematawa sagameꞌ basefa hiahaom amambai, aꞌ ombel mahas kwapeteꞌ!

Aposel 6:7

Eaꞌ basef Godi fandasauliꞌ fafeꞌ. Amam nematawa hiasi sagape Jerusalami aꞌ sataga alipisi sahapifa Jisas. Owaꞌ pris amamba hiami wapani mahapifa Jisas mailana.

Aposel 8:1

Eaꞌ Sol nomonas atifis naloma amom magaha Stiven nagagaꞌi. Nogota atamba esis amam nematawa sandaiwaꞌma esis Kristen sagape Jerusalami, sahas sasoꞌas akafimi nimanimi luꞌwami. Eaꞌ isimba atis deiꞌ esis sagahapifanai asafaꞌ safeꞌagon hiꞌalagon atona biana ma anamba itap luꞌupa Judiai Samaria. Apaꞌ amom aposel atom ataꞌ mapani atapim Jerusalem.

Basef Amama Pol Nandaꞌam Mafeꞌma Esis Romi 14:17

Waf afamba sagaꞌ gwaꞌaisi embelafi, afambai ina kofagefa ma anamba God nagalaꞌambemagoma, owaꞌatin. Anamba waf usiꞌifi hililiꞌi a opalef awanilifi faloma waf sonagahasafi atef fagapoma. Ambal buꞌunai Godi nasoꞌapai waf afambai.

Basef Amama Pol Nandaꞌam Mafeꞌma Esis Romi 14:19

Deiꞌ apaꞌ mundaila waf hiafi fendaꞌ apaꞌ mogape opalef atelifi, a waf usiꞌifi hiafi fegewaꞌ banaga hapif esis sahin owani.

Basef Amama Pol Nandaꞌam Mafeꞌma Esis Romi 15:13

Apaꞌ mogawa endilisi notopalopapa ma mogape andeandeꞌ. God anen kofagonama amamba. Deiꞌ aeꞌ aꞌi ipaꞌ pihapifana nondaꞌ dagala luꞌwani neloma opalef awanilifi sogataga siꞌisa ipaꞌ. Eaꞌ aꞌi banagami Ambal buꞌunai ananinai nondaꞌepa pegawa endilisi atis anaf piti banagami mogogalaꞌi ananimi.

Basef Amama Pol Nandaꞌam Mafeꞌma Esis Romi 5:5

Iꞌi apaꞌ mogawa endilisi naꞌamba, gawa apeꞌini ina atiasi nenalo, owaꞌ. Deiꞌ main, God nasoꞌapa Ambal buꞌunai Ananinai eaꞌ waf okom magamagailapafi fape luꞌufa opalef apeꞌilifi.

1 Korin 14:12

Ipaꞌ wapani naꞌamba atin. Ipaꞌ ukup paꞌi aꞌowaꞌ ma pegefaꞌ presen hiahaom fasimi Ambal Godi nagaseꞌepami. Eaꞌ ipaꞌ daoꞌ pendandaꞌ maol banagambel endilisi ma pegefaꞌ presen inimbai negewaꞌ banaga hapifa siosi.

1 Korin 14:26

Ipaꞌ alipipai, deiꞌ basef ifimba akutaifi aeꞌafi fagape naꞌamba. Nemaf afamba pendakolas, presen inimba hiani Ambal Godi nagasoꞌapani napoma ipaꞌ hipai naꞌamba. Anin epen nendaꞌ anaf awaf, anin daian niꞌi anif basef Godi niwalipipa, a anin God nasoꞌana anif basefa negawalapef, eaꞌ anin daian negawa ma nigaꞌi anoga diga daiaga, a anin daian negawa ma negambema basef ifimba. Ipaꞌ pendandaꞌ hiahaom amamba hiami ma pegewaꞌ banaga hapif esis amam nematawa sios.

2 Korin 10:8

Dembinai nasoꞌafa agof luꞌwagufi afaꞌ ma ondaꞌ maol inimba ananini, amamba mogowaꞌ banaga hapif ipeꞌinii. Amamba ina mohambombagepa, owaꞌatin. Ama aeꞌ iꞌi egasaꞌma agof afaꞌigufi atogofa maol inimba Dembinaii, atiasi aeꞌ ina aꞌ ambal aola isimba, owaꞌ.

2 Korin 12:19

Ipaꞌ ina piꞌi afaꞌ wandaꞌ basef ifimba hiafi waliꞌ wagaꞌiefi onandona waf afaꞌifi ma naep ipeꞌipi, owaꞌ. Afaꞌ wape epes Kraisi wandaꞌ basef ifimba ma naep Godi. Alipipai endilisi aeꞌipai, afaꞌ wandaꞌ basef ifimba hiꞌalefa fegewaꞌ banaga hapif ipeꞌini.

2 Korin 13:10

Deiꞌ ape laogon andaꞌago basef ifimba fafeꞌmepago ma main? Aeꞌ andaꞌas naꞌamba ma atiasi efoꞌo epe egalomepa aeꞌ ina iꞌipipa banagambel aꞌowaꞌ ma banagami Dembinai nagaseꞌeami, owaꞌ. Banagami amamba anen ina naseꞌeam ma mogahambombaga ipaꞌ, owaꞌatin. Amamba mogowaꞌ banaga hapif ipeꞌini.

2 Korin 7:1

Ipaꞌ alipipai afaꞌipai endilisi, apaꞌ eaꞌ mofaꞌ basef ifimba Godi endilisifi banagafi. Eaꞌ mondelefata hiahaom amamba awami magape nomona alopi ambagof apeꞌisi eaꞌ mondape beꞌepa ombel mondahapama God mila waf endilisifi hililiꞌ aꞌowaꞌi.

Efesus 4:12

Krais nasoꞌapa hiahaom amamba fasimi ma mondaꞌ apaꞌ amam nematawa Godi mondandombola mogape laꞌifipama mondaꞌ maol buꞌwani ananini. Apaꞌ amam nematawa Godi siꞌi alop Kraisi, ma mondowaꞌ banagama atin mogape.

Efesus 4:16

Anen atona dembinai ma apaꞌ Kristen hiapai. Eaꞌ apaꞌ Kristen hiapai siꞌi alop waꞌawaꞌap pagape atifip sisihipa pondatopalopa atin siꞌi gigisilimb begewaꞌ banaga soꞌmatagw hiagwi luꞌugw saꞌogw hiꞌagalagw. Iꞌi alop waꞌawaꞌap hiapi hiꞌilap pondaꞌ maol pondahama ikwaf anen nagaꞌiefi, alop apamba siꞌip pandatopalopa atin pape banagep pikilaꞌ fowaꞌ pagape. Alop apamba pataga banagep atina ukup pandaima atin.

Efesus 4:29

Basef awafi ina fetaga malogof ipeꞌigufi, owaꞌi. Basef buꞌwafi atif fendataga ma fegewaꞌ banaga epes isimba owaꞌ banagesia, dindiꞌi dondoꞌma waf maif buꞌwafi esis owaꞌ banagesa sogailafia. Pendaꞌas naꞌamba ma pegatopalopa epes isimba sogameꞌ basef ipeꞌifii.

Efesus 5:21

Ipaꞌ pindaila okom Kraisi eaꞌ pendafeꞌ lafela esis alipisi ipeꞌisi atapipa.

Filipai 2:1

Ipaꞌ pefaꞌ banagami Kraisi aꞌa owaꞌ? Eaꞌ pegawa Krais okom maimailipa nandaꞌ opalef ipeꞌilifi fape awanelef aꞌa owaꞌ? Ipaꞌ pape ukup atifip paloma Ambal buꞌunai Godi aꞌa owaꞌ? Eaꞌ ukup pandaima pandatopalopa atin aꞌa owaꞌ? Endilisi, waf afambai fapomepa naꞌamba.

Kolosi 1:10

Wandaꞌas naꞌamba ma atiasi ipaꞌ laꞌifipama feꞌ poe ipeꞌini negataga boꞌwen endilisi dondoꞌma waf Dembinaii. Wandaꞌmepa betena Anen negati waf ipeꞌifi fendaꞌ okom ananimi boꞌoma ipaꞌ nondagalaepa. Ama pendaꞌ maol naninani hiani buꞌwani hiꞌigalana pegegawana andeandeꞌ pigikilaꞌ fowaꞌ paliꞌ pegegawana.

1 Tesalonaika 5:11

Deiꞌ ipaꞌ hipai pewaꞌ banaga nelelemb ipeꞌilimbi pendatopalopa atin siꞌi deiꞌ pape pandaꞌas.

1 Timoti 1:4

Amom mokwaha basef ambas amamba talimi dowadowafa basef mamimami hiami sagaꞌi agof isimba bafaꞌw ifaꞌw asasisi. Basef amamba magalalamona nomonas asasimi, magafela ukup asasimi saꞌi basef sandahihianamaefami, amamba ina mogowaꞌ banaga maol Godi, owaꞌ. Maol inimba natagama mogahapifa God atona.

Hibrui 4:9

Isimba atis deiꞌ mogawa waf afamba mogapoma nomaꞌwafi ataꞌ fape atapifa apaꞌ epes amam nematawa Godi. Waf afamba siꞌi God nagapoma nomaꞌw nemaf afamba fagafeꞌma 7i.

Basef Ifimba Jut Nandaꞌafi 1:20

Apaꞌ ipaꞌ alipipai endilisi, lifilafi ipaꞌ pewaꞌ banaga nelelemb ipeꞌilimbi pendahapifa God, anen kofagonama hapif ipeꞌinii. Eaꞌ dondol ipaꞌ pihaliꞌ Ambal buꞌunai Godi ma nowaꞌ banagaepa nugumafipa ma beten ipeꞌini.