1 Timoti 1:15 - Basef Buꞌwami Godi

¹⁵ Anif basef endilisifi atifa epes hiasi someꞌefa sogahapifif. Basef ifimba naꞌamba. Krais Jisas nisilaꞌi itap apaꞌe ma nofaꞌapa epes mandaꞌ waf awafi mokwahomapaf mutanimai mogape andeandeꞌ. Aeꞌ eaꞌ maꞌuwi aliꞌ andaꞌ waf awafi ikilaꞌ anis daiasi eaꞌ maꞌuwi aeꞌ atowe.

1 Timoti 1:15 Iomraidhean Croise

Matyu Nandaꞌafi 1:21

Eaꞌ atiasi aꞌ kola awani aman, awani inimba anen nogatopalopa amam nematawa hiasi ma nogakwaha waf awafi asasifi nofaꞌas sogotanimaii. Naꞌamba deiꞌ inaꞌ nihapomana agol ananigili Jisas. Basef kofagefa ma agol agalemba ifimba faꞌi, anen aman nogofaꞌ epes ananisii ma sogape andeandeꞌi.

Matyu Nandaꞌafi 18:10

“Ipaꞌ solawaipa! Naꞌamba piꞌi anin epen atitin saꞌwini piꞌi inimba anin falafini, owaꞌi. Deiꞌ main, amom ensel magape heveni mumafi epes isimbai saꞌwisi andeandeꞌ. Ensel amamba dondol magape felefeleꞌma ahame God nagape heveni.

Matyu Nandaꞌafi 18:11

[Aeꞌ ataga epen egefaꞌ alop epesi, aeꞌ afiꞌi ma elaoma epes higilagalasi iwambilas sokwaha waf awafi sogotanimai.]

Matyu Nandaꞌafi 20:28

Aeꞌ ataga epen egefaꞌ alop epesi, aeꞌ wapani naꞌamba atin. Ina afiꞌi ma esis sondaꞌme maola sogatopalope, owaꞌ. Aeꞌ afiꞌi endaꞌ maol egatapalopa ipaꞌ hipai ma waf awafi fagawasiꞌipai. Afiꞌi ma sehe egaꞌ etala ipaꞌ peloma epes hiasi igatagwahipama waf awafi ipeꞌifi.”

Matyu Nandaꞌafi 9:13

Anif basef fagape buk Baibeli fagaꞌi naꞌamba faꞌi, God naꞌi, ‘Ipaꞌ ina peha mafis pesoꞌ aeꞌ, owaꞌi. Apaꞌ ipaꞌ pindati anis amam nematawa uwahipis a petopalopas daoꞌ, aꞌ andeandeꞌ.’ Apaꞌ ipaꞌ ina pegawa basef ifimba kofagefa, owaꞌ. Deiꞌ pefeꞌ pitalifif pendegawef. Deiꞌ main, aeꞌ ina afiꞌi ma egefala epes sandaꞌ waf buꞌwafii, owaꞌ. Aeꞌ afiꞌi ma egefala epes isimba sandaꞌ waf awafii atis.”

Mak Nandaꞌafi 2:17

Eaꞌ Jisas nameꞌam naꞌamba naꞌipam naꞌi, “Isimba aowas akasi ina sofeꞌma dokta, owaꞌ. Esis buꞌwasi. Apaꞌ isimba aowas nandaꞌasi atis daoꞌ, safeꞌma dokta. Aeꞌ ina afiꞌi ma egefala epes isimba buꞌwasi sagape hililiꞌi, owaꞌ. Aeꞌ afiꞌi ma egefala isimba sandaꞌ waf awafii.”

Luk Nandaꞌafi 15:2

Eaꞌ anom dembami Farisi maloma amom dembami magawalipasa muꞌuli Godi mandaꞌ megahahama anen maꞌi, “Aman anamba nandaloma epes isimba sandaꞌ waf awafii nofalas alipisi nalomas nandaꞌ gwaꞌaisi.”

Luk Nandaꞌafi 19:10

Aeꞌ ataga epen egefaꞌ alop epesi, aeꞌ afiꞌi ma elaoma epes higilagalasi iwambilas sokwaha waf awafi sogotanimai.”

Luk Nandaꞌafi 5:32

Aeꞌ ina afiꞌi ma egefala epes sagape andeandeꞌi sogambema opalef, owaꞌ. Aeꞌ afiꞌi ma egefala epes sandaꞌ waf awafii atis sombema nelelemb sokwaha waf awafi sogafeꞌma God.”

Jon Nandaꞌafi 1:12

Apaꞌ esis mamahisa sogawana siꞌi ahoꞌ sogahapifanai, nosoꞌasa anin ametala sogataga awasi Godi.

Jon Nandaꞌafi 1:29

Wafilu owaꞌ, Jon nati Jisas nafiꞌmai anen naꞌipas naꞌamba naꞌi, “Ipaꞌ piti aman anamba anen siꞌi mafin sipsip noganai Godi, anamba esis sandaꞌ ofa anai. Anen siꞌi sipsip nogakwaha waf awafi esis amam nematawa hiasi sagape itapi sandaꞌafi.

Jon Nandaꞌafi 12:47

Epen ami nemeꞌ basef aeꞌafi ma owaꞌ nihapifif nilifa, aeꞌ ina anaf ewaloga anin, owaꞌ. Deiꞌ main? Aeꞌ ina afiꞌi itap apaꞌe ma egawaloga epes sagape itapi, owaꞌatin. Aeꞌ afiꞌi ma iwambilas sogotanimai.

Jon Nandaꞌafi 3:36

Epen ami nagahapifa Nogamana ananinai, epen inimba deiꞌ aꞌ nefaꞌ ambal namilima negape andeandeꞌ lifilafi dondol. Apaꞌ epen ami newaꞌ alafugama Nogamana ananinai, inimba ina atiasi nefaꞌ ambal namili, owaꞌatin. Anaf nembel wandafunai Godi aꞌ nopoman.

Aposel 11:1

Eaꞌ amom aposel maloma esis sahin owan sagahapifanai sagape anamba Judia hiagomai sameꞌ basef ifimba ma anis amam nematawa owaꞌ Judaisia wapani sofaꞌ basef Godi sagahapilif.

Aposel 11:18

Esis sameꞌ basef ifimba Pita nagaꞌipasafi eaꞌ ukup pasoꞌasa basef ifimba asasifi sasoꞌma agol Godi saꞌi, “Deiꞌ apaꞌ aꞌ mogawa God nambema nelelemb esis amam nematawa owaꞌ Judaisia ma esis wapani safeꞌma anen sogape ambal namili.”

Aposel 3:26

Eaꞌ God a nandandepa anen nandaꞌ maol ananinii, nasapana naliꞌ nafiꞌmai ipaꞌ ma nofaloꞌmepa natopalopepa nandaꞌepa pambema nelelemb atona atina pagakwaha waf aunai ipeꞌinai.”

Basef Amama Pol Nandaꞌam Mafeꞌma Esis Romi 11:14

Maol inimba aeꞌ okom maꞌian aꞌowaꞌ ma egasaꞌma esis Juda wambota aeꞌasi ma kowogalasa ipaꞌ deiꞌ pape andeandeꞌ pagaloma Godi. Ama aeꞌ egefaꞌ esis Juda duꞌwanis atis sotanima sogafeꞌma God.

Basef Amama Pol Nandaꞌam Mafeꞌma Esis Romi 5:6

Fowaꞌ apaꞌ ina banagepa ma mondaꞌ waf buꞌwafi, owaꞌ, nogota atamba God nandandepata eaꞌi, Krais nagaꞌma apaꞌ mogowaꞌ alafugaha Godi.

1 Korin 15:9

Deiꞌ main, aeꞌ ataꞌ saꞌowe ape awani falafuwai laꞌafena amom aposel. Aeꞌ ina deiꞌ boꞌwawe ma epes sofale sigaꞌi aposel, owaꞌ. Deiꞌ main, andaꞌ maol agahambombaga sios Godii.

Efesus 3:8

Endilisi atis aeꞌ ape falafuwai agagiꞌ endilisi ma amam nematawa hiasi Godi hiꞌalas. Owaꞌ anen okom maimaili natopalope dowafa andaꞌ maol awalipa esis sogololama Godi basef fasifi ma Krais. Basef ifimba faloma waf afamba boꞌwes aꞌowaꞌ sikilaꞌ gawa epes hiasi hiꞌalan, eaꞌ ina laꞌifisa sogogawa isimba kofagesa, owaꞌ.

1 Timoti 1:13

Endilisi, fowaꞌ dondol aꞌi basef andaꞌ salamala agol ananigili, apaꞌ aloma esis Kristen, andaꞌ duꞌwanigama anen. Apaꞌ aeꞌ ina egawa andeandeꞌ, owaꞌ ihapifanaia, eaꞌ deiꞌ andaꞌ waf afamba awafima anen atapiwi ape. Isimba atis deiꞌ natolowe uwahipiwi natopalope.

1 Timoti 1:19

Wandaf afamba inaꞌ banagena nigahapifa God nendaꞌ waf usiꞌifi hililiꞌ, ma malogol gagape opaf inaꞌ nomoni ina gihimbaꞌmena anef waf awafi inaꞌ nandaꞌafi, owaꞌ. Anis epes sowaꞌ alafugaha waf afambai buꞌwafi. Eaꞌ deiꞌ hapif asasini papalalan eaꞌ awasin siꞌi sip palalap pagail otamba awasip pagala naoh.

1 Timoti 3:1

Basef ifimba endilisifi. Iꞌi aman ami niꞌi nogape dembinai nugumafi esis Kristen sios Godi, anen okom mondaꞌi maol fasini aꞌowaꞌ.

1 Timoti 4:9

Basef ifiꞌi endilisifi atifa epes hiasi siꞌi awi ma semeꞌef sogahapififi, ifimba naꞌamba.

1 Timoti 6:13

God nasoꞌam ambal hiahaom hiami eaꞌ Jisas Krais nawalapa basef kofagefa andeandeꞌma nogohnaep Pontius Pailat gavman dembinai. Naep Godi naloma Jisas Krais deiꞌ aseꞌena maol inimba naꞌamba. Inaꞌ nimafi nomonas ineꞌisi andeandeꞌ nindaila basef ifimba Godi datima. Alogw owaꞌi gwilifa, eaꞌ epes ina sondaꞌ findiwa ma basef ifimba. Nimafif nendape naꞌamba atin nefeꞌ netaga afamba Dembinai apeꞌinai Jisas Krais nogataga alihina.

2 Timoti 2:11

Apaꞌ mundahapifa basef ifimba endilisifi sisihif. “Iꞌi endilisi apaꞌ aꞌ magaꞌ malomana, bola apaꞌ mosafel mope namepa molomana wapani.

Taitus 3:8

Basef ifimba endilisifi ma apaꞌ hiapai mogahapifif. Aeꞌ aꞌi newalapa basef ifimba niꞌif dindinipa epes isimba sagahapifa God eaꞌi ukup pendandaꞌma sugalutu banagesa waf fasifi. Basef ifimba ma Jisas Krais naloma God, ifimba buꞌwafi ma fegatopalopa epes.

Hibrui 7:25

Isimba atis deiꞌ anen laꞌifinai nofaꞌ esis amam nematawa sogotanimai felefeleꞌma Goda agol ananigili, ma sogape andeandeꞌ lifilafi. Deiꞌ main, anen nogape ambal lagapaona lifilafii nandabetena God nogatopalopas.

1 Jon 3:5

Ipaꞌ pegawa Krais nataga ma nogakwaha waf awafi apeꞌifi hiꞌigalaf. Anen ina nandaꞌ anef waf awafi, owaꞌatin.

1 Jon 3:8

Satan nandaꞌ waf awafi fowaꞌ dambadamba nafiꞌi nafiꞌi deiꞌ ataꞌ nape atapina. Eaꞌ iꞌi epen mamahina nendaꞌ waf awafi atapin negapomafi, anin epen Satani. Nogamana Godi nafiꞌi nataga nandawalapa main? Ma nogahambombaga maol Satani.

1 Jon 5:11

Eaꞌ basef ifimba endilisifi naꞌamba. God aꞌ nasoꞌapa ambal namili ma mogape andeandeꞌ lifilafi dondol. Ambal namili alamba anen nasoꞌapala Nogamana ananinai atona.

Revelesen 21:5

Eaꞌ aman anamba nagape sia luꞌwani kingi naꞌi, “Pemeꞌ! Deiꞌ andaꞌ hiahaom hiami mataga dambaim hiꞌalam!” Eaꞌ naꞌipi wapani naꞌi, “Inaꞌ daꞌa basef ifimba. Deiꞌ main, basef ifimba endilisifi atif aꞌowaꞌ ma sogahapilif endilisi.”

Revelesen 22:6

Eaꞌ ensel anamba naꞌipi naꞌamba naꞌi, “Basef ifimba hiafi fagape buk akwaꞌe endilisifi atif eaꞌ andeandeꞌma epes hiasi sogahapifif. Dembinai God nagasoꞌ amom profet Ambal buꞌunai ananinai nasapaꞌi ensel ananimi ma migihimbaꞌma esis sandaꞌ maola anini ma hiahawes sogataga kwafalisi.

Revelesen 5:9

Eaꞌ mandaꞌ anof awaf dambaifi naꞌamba maꞌi, “Inaꞌ buꞌwinai hililiꞌi endilisi ma nigifaꞌi buk akwamba nagahapeꞌ mandof tep amamba hiami mogowaꞌakwi. Deiꞌ main, esis asahena nagagaꞌi, esimbel ineꞌimbeli batala epes isimba wapani sotambili nasoꞌanas God. Ahoꞌ, inaꞌ natala esis amam nematawa hiꞌalasa misiꞌah ahamba epes hiasi, diga naninani hianai, alop hiapi ma misiꞌah sagape anep itap luꞌupa walemb hielimbi ma sogotanimai.