Basef Amama Pol Nandaꞌam Mafeꞌma Esis Romi 15:14 - Basef Buꞌwami Godi

¹⁴ Ipe' alupipei ae'ipei, opaf ae'anai egawa endilisi ma ipe' panda' waf bu'unai la'ela'ef ea' pegawa gawa hianai naninani. Ea' ipe' wila ma pese'asa nomonas bu'wami sahin owan.

Basef Amama Pol Nandaꞌam Mafeꞌma Esis Romi 15:14 Iomraidhean Croise

1 Korin 1:5

Ipe' pape la'ifipama Krais pape andeande' endilisi ea' pefa' basef hiami pa'iami maloma gawa hianai bu'unai naninani.

1 Korin 12:8

Epen atitin Ambal Bu'unai Godi nase'an pepela nihi'ambamasa gawa hianai bu'unai naninani ma nowalapa basefa epes hiesi. Ea' enin epen Ambal Bu'unai Godi anama atona nase'ana pepela newalapa basef ofagema waf Godi ma esis amam nematawa sogawam andeande'.

1 Korin 13:2

I'i Ambal Bu'unai Godi nose'e presen amamaga bu'wami nefele ma ewalipasa basef Godi ma egawa okom hiami Godi mape mandamabahi'i hi'ilam, ama egawa gawa hianai wapoti', ma embale'efa God la'ifiwi endilisi ma la'ifiwi ma i'ipama halafutagw mindiki'ah mefe' gani to'wan, ea' ae' owa' okom ninila esis amam nematawa endilisi, ae' falafuwei atowe.

1 Korin 8:1

Dei' ae' a'i i'i basefa mafis saham sapefelam god anama baso'omunai. Endilisi, “Ape' hiapai mogawa”, si'i ipe' pa'iam. Gawa anama atona wafinai nafelai waf safela agof asasimi atom. Ea' i'i ape' ukup mimila sahin owan, amama migiambamapa motaga Kristen la'ifipai.

1 Korin 8:10

Ine' epen negawai, i'i nefe' ipat anama sanda' lotuma god baso'omunai nepe nea' gwa'aimi, ma enin epen okom ananinai owa' la'ifinai ma bale'ef ananinai nitilina. Atuwasi nefela okom ananinai nea' gwa'aimi amama saso' godami, o owa'? Ape' ina mogawana.

1 Korin 8:7

Ea' enis epes ina sagawa amama, owa'. Epes isima fowa' saila god baso'omunai. Ea' dei' sa' mafis amama sondolali saso' god baso'omunai, ukup asasimi mapoma mafis amama sa'i, “Amama endilisimi,” ea' sa'am. Ea' basef mape opalef asasimi nomon ma'iami mihi'amba esis sanda' waf aonai ea'. Dei' main, esis ina ukup matamea andeande' sa'am, owa'.

2 Korin 8:7

Alupipei, amamaga hiami ipe' panda' waf bu'unai endilisi, pikila' enis epesa waf anama. Ipe' pembale'efa God la'ifipa. Ambal Bu'unai Godi nase'epa gawa nafelepa ma pewalapa basef bu'wami ananimi. Ipe' pahafel endilisi ma panda' maol Godi ea' ukup maimailafa wapoti'. Ipe' panda' waf anama bu'unai na'ama. Dei' afa' wa'i ipe' penda' anona waf bu'unai wapoti'. Pigiambama esis Kristen kwahusi pese'as anom amamaga na'a.

Efesus 5:9

Epes safe' alipi sawalapai waf bu'unai, endilisinai hianai.

Filipai 1:11

Ae' anda' betena waf bu'unai Jisas Krais nawalapanai nambimb nepe si'ina ma ipe', nese'ana agel lu'unai Goda epes hiesi siti pepel nafifili Ananinai.

Filipai 1:7

Ae' ahapila ipe' okom ae'anai, egawa God nigiambamepa dei' anona nemaf wapoti' na'ama etin. Amama andeande'. Dei' main, ape' manda'kolas etin manda' opeh ananimi. Nemaf anae' dei' ape kalabus o nimeguf hiami ali' awalapa basef amama bu'wami epes hiesi agiambamasa sogawa basef amama endilisimi atom, nimeguf amama hiami God nagiambamapa na'a.

Kolosi 3:16

Basef Kraisi bu'wami endilisi mope opalef ipe'imi nomon. Ipe' penda'am na'ama piwalipa esis sahin owan ipe'isi pi'ipasa gawa hianai naninani. Ipe' pinifela Goda opalef ipe'imi pelomana. Ea' penda' awalef mail Buk Sami ea' penda' awalef lotuwimi ea' penda' awalef monda' ambagof ipe'imi motaga la'ifim.

1 Tesalonaika 5:11

Dei' ipe' hipei penda opalef ipe'imi motaga la'ifima pendagigiambanama etin si'i dei' pape panda'am.

1 Tesalonaika 5:14

Ipe' Kristen alupipei afa'ipei, afa' wa'ipipago mehip wafela ukup ipe'imi ma pigiambamago isima ala'uta nasi la'ifipa pi'ipasa sokwahago waf ala'uta nasanai. Ea' enis ambagof mondolele'asi ma owa' si'i anom basefi, ipe' penda'as sotaga la'ifis sie'i basef. Ea' penda' esis enis owa' seambale'efana la'ifisi sotaga la'ifis. Penda' waf so'umbilinai ma esis hiesi.

2 Tesalonaika 1:11

Afa' ukup ma'i amama ea' la'ela'ef wanda' betena God ape'inai ma nigiambamepa. Afa' ogawa God nofalepa ea' wanda' betena anan nonda'epa petaga la'ifipa endilisi si'i anan nofalepa penda'am. Afa' wanda' betena God nonda'epa pataga la'ifipa ma penda' waf anama bu'unai hianai pa'i pienda'anai, ea' pembale'efa Krais pembefa maol ipe' panda'anai

2 Timoti 1:5

Ae' okom napoma bale'ef ine'inai, anama endilisinai, ina baso'omunai, owa'. Bale'ef anama fowa' nali' napoma iha'mena ine'ikwi Lois kwaloma mama'wena Yunis. Ea' egawa endilisi, bale'ef anama dei' napoma ine' wapoti'.

Filemon 1:21

Anda' basef amama, egawa endilisi ine' nambimb nila basef amama ae'ami. Ea' ae' dei' anda'ago basef amama ma ine'. Ae' egawa anom basef wapoti', ine' nambimb nenda' anona waf bu'unai endilisi nikila' amama dei' a'ipina pas amama a'i ine' nenda'am.

Hibrui 5:12

Dei' nogota anae' ea' ma ipe' pepe dembipei tisa piwalipa enis epes. Ea' owa'. Ipe' gawa tu'waninai atona ukup ipe'imi, ea' anona aman ata' nowalipipa wapoti' ma basef mali'i Godi. Ipe' ina la'ifipa pegawa basef lu'wami Godi si'i pagwa' gwa'aimi la'ifimi, ata' owa'. Ipe' dei' pegawa basef mali'i Godi atom si'i pagwa' nomagof atom.

Hibrui 6:9

Ipe' alupipei ae'ipei endilisi, dei' ae' a'ipipa basef amama nimanimi, ea' ae' egawa endilisi anona nemaf ipe' ina awepa higililipa na'ama, owa'. Ae' egawa anona nemaf God nefa'epa pitanimani.

2 Pita 1:12

Endilisi, ipe' pegawa amamaga amama ma basef amama mali'i pembale'efam la'ifipa ma basef amama endilisimi paitu la'ifipamam. Owa'etin, ae' a'i ata' i'ipipa efela ukup ipe'imi ma pilam andeande'.

1 Jon 2:21

Ipe' ina pelolama basef amama endilisimi ma dei' enda'mepago basef amama, owa'. Ipe' pegawam. Ea' pegawa basef baso'maimi ina mawalapa basef amama endilisimi, owa'. Amama atom dei' anda'ago basef amama ma ipe'.