Hibrui 4:2 - Basef Buꞌwami Godi

² Dei' main, ape' wapoti' mame' basef bu'wami Godi si'i fowa' esis Israel same'am. Ea' esis same'am etin, ina sombale'am sailam, owa'. Ea' basef amama bu'wami same'ami ina magiambamas, owa'.

Hibrui 4:2 Iomraidhean Croise

Aposel 13:46

Ea' Pol naloma Barnabas ina umbamaham, owa'. Amam la'ifim ma'ipasam alihim ma'i, “Endilisi, afa' ata' wi'ipipa basef Godi ipe' Juda pili'. Ea' ipe' pewa' alafugaha basef amama. Amama ipe' pa'iam pa'i, ‘Ape' mandaiwa'ma mofa' ambal namunai ma mope andeande' la'ela'ef.’ Ipe' pa'i na'ama dei' ipe' peme'. Afa' dei' okwaha ipe' ofe' ugi'ma epes owa' Judaisi wi'ipasa basef amama.

Aposel 3:26

Ea' God nandandepa aman anama nanda' maol ananinai, nasapa'ana nali' nafi'mai ipe' ma nonda'epa petaga la'ifipa ma pemboma opalef atona etin pekwaha waf aonai ipe' panda'anai.”

Basef Amama Pol Nandaꞌam Mafeꞌma Esis Romi 2:25

I'i ipe' Juda pembale'efa mi'uli anama God fowa' naso' Mosesanai pilana endilisi, waf anama patopa' alopanai bu'unai. Ea' i'i ipe' pimbisila' mi'uli anama, petaga si'i epes owa' Judaisi ea' petaga na'ama etin si'i ipe' owa' peatopa' alopi.

Basef Amama Pol Nandaꞌam Mafeꞌma Esis Romi 3:3

Endilisi, enis ina sombale'efa basef amama andeande'. Ea' dei' ata' si'i main? A'i waf anama aonai esis sanda'anai anona nemaf nonda' God nokwaha basef endilisimi Ananimi?

1 Korin 13:3

I'i ae' ese'asa amamaga hiami ae'ami hi'ilama esis isima kwahusima hiahaom ma enda' maol Godi i'i aho'ma enis epes sandaiwa'ma Godi si'i sehe sofe nif ega'. Ea' ae' owa' okom ninilas ese'as opaf, ea' hapaimi. Anona nemaf amamaga amama hiami ina migiambame, owa'etin.

Galesia 3:2

Ae' a'i ihali'ipa ma basef etifim. Fowa' ipe' pefa' Ambal Bu'unai Godi nape opalef ipe'imi, ipe' paila waf si'i mi'uli God naso' Mosesanai na'iam pefa'ana o pame' basef bu'wami Godi atom pembale'efam pefa'ana?

Galesia 3:8

Fowa' gani basef Baibelimi ma'iam alihima anona nogota owagama God nonda' esis owa' Judaisi sombale'efa anan, sotaga bo'wes ma naep ananimi. Fowa' basef Baibelimi ma'ipa Abrahama basef bu'wami Godi. Mihi'ambana ma'i, “Owagama God nonda' ine' ma nigiambama epes hiesi sape etapi sotaga bo'wes sope andeande'.”

Galesia 4:13

Ipe' pegawa fowa' dambadamba afe'mago ipe', alop ae'anai ina la'ifina, owa'. Ape alomepa anom nimeguf, awalapa basef bu'wami Godi a'ipipam.

1 Tesalonaika 1:5

Basef amama bu'wami Godi fowa' ofa'ami, amama ina mataga na'a ma ipe' si'i anom basef wafimi, owa'. Ambal Bu'unai Godi nanda' basef amama mataga la'ifim ma pepel Ananinai ea' wafi'i wa'ipipam. Ea' manda' ukup ipe'imi la'ifim pembale'efana. Waf fowa' wape walomepa wanda'anai, ipe' pegawana.

1 Tesalonaika 2:13

Fowa' ipe' pefa' basef Godi malogof afa'imi, pembale'efam. Basef amama ina pefa'am si'i basef epesi atom, owa'. Pefa' basef amama endilisimi Godi. Ea' basef amama magiambama opalef ipe'imi, dei' paila waf bu'unai. Ea' afa' wanifela God la'ela'efa ipe' pefa' basef Ananimi pembale'efana andeande'.

1 Timoti 4:8

Ine' negawa waf anama niwalipa alop si'ina nonda' maol alop neawi, amama la'ifim kwaikwaie' ma migiambamapa. Ea' ine' nelafa waf Godi, la'ifina endilisi ma nagiambamapa ma waf hianai bu'unai. I'i ine' nelafa waf Godi, anama la'ifina nagiambama ape' epes hiapai ma dei' mape etap nogota anae', ea' nigiambamapa owagama ilif heven wapoti'.

Hibrui 11:6

Epes owa' sembale'efa God, esis ina nambimb sila okom Ananinai, owa'. Dei' main, emi egafis si'i sefe' felefele'ma God, esis sombale'efana sogawa endilisi Anan nape namunai la'ela'ef. Ea' sembale'efana ma God nose'as amamaga bu'wami epes isima sagolopana endilisi.

Hibrui 3:12

Alupipei Ae'ipei, ipe' pindumafuma andeande'. Na'ama enin sahin owan ipe'isi okom ninila waf aonai nekwaha bale'ef ananinai newa' alafugama God nape la'ela'efi.

Hibrui 4:6

Esis amam nematawa isima fowa' same' basef bu'wami ina safe' sawis, owa'. Dei' main, esis ina sembale'efana endilisi, owa'. Sosombala basef Ananimi. Ea' basef amama ata' mape la'ela'ef ma'i endilisi enis epes anona nemaf sefe' suwis sopoma noma'w soloma God.

Jems 1:21

Amama atom dei' ipe' kwahago waf aonai neloma waf aonai hianai hi'ilana. Waf anama aonai epes hiesi sanda'ana la'ela'ef. Ea' pinindifa ipe' pepe owina Goda pefa' basef amama ananimi mope opalef ipe'imi. Basef amama la'ifimi ma mofa'ai ipe' pitanima pifi'mai God.

1 Pita 1:12

Ea' God nihi'ambamam ea' amam ina manda' maol magiambama amam atoma basef amama, owa'. Manda' maol magiambama ipe', ma'i basef amama ma amamaga bu'wami anona nemaf meatagai. Ea' dei' amam mawalipipa basef bu'wami Godi ma'ipipa amamaga amama atom. Ma'ipipa ma pepel Ambal Bu'unai Ananinai nisila'i otaga ilif. Amam profet amama, ina amam atom ukup ma'i basef amama mogawam, owa'. Amam ensel wapoti' ma'i mogawam.