Aposel 20:31 - Basef Buꞌwami Godi

³¹ Ipe' dei' pindumafuma andeande' la'ela'ef. Ipe' ukup mopoma amama afagof amama wanom la'ela'ef owamb alip ae' ina apoma noma'w ma awalipipa afela ukup ipe' hipei atona etin, owa'. Awalipipa aloma embif maluwi naep ae'ami.

Aposel 20:31 Iomraidhean Croise

Matyu Nandaꞌafi 13:25

Anom nimeguf mafe'ma ea', owamb esis hiesi sa'ihi, anona aman naumbihinai nafi'i nowaha otalef awami wapoti' aof anama anan do'ok nowaha olelemb bu'wami ea' nafe'.

Matyu Nandaꞌafi 3:7

Afama Jon nati anom amam dambami esis Judai Farisi maloma anom dambami Sadyusi mafi'i ma mefa' baptais, ea' na'ipam na'i, “Ipe' panda' waf aonai si'i awasi iguf awami molaipei. Emi na'ipipa ma pa'i pefa' pefe' pindihi'ama okom wandafunai Godi anona nemaf neatagamepa?

Luk Nandaꞌafi 21:36

La'ela'ef pindumafuma pepe ma ina penda' waf aonai anama, owa'. Pepe penda' beten la'ela'ef ma God nose'epa pepel pitu la'ifipama pihi'ama amamaga amama ma'i meatagamipei. Ama pitu la'ifipa ma ae' ataga epen endilisiwei isimba'epa ewalogepa.”

Aposel 19:10

Ea' nanda'am na'ama etin nape afagof biam. Esis amam nematawa hiesi sape etap hiagoma Esiai wambel hiagoma same' basef Dembinai, esis Juda saloma isima owa' Judaisi wapoti'.

Aposel 19:8

Ea' Pol nafe' nawis ipat esis Juda sa'i basef sapeinai nawalapa basef bu'wami Godi. Anan nanda'am na'ama etin nape aomb wanemb. Ina umbamahana, owa'. Anan la'ifina na'ipas. Anan naloma esis sape sa'i basef etin, na'ipasa nefela ukup asasimi ma sogawa siowis nomon wambota Godi numafias la'ela'ef.

Aposel 20:11

Ea' Pol nao'was sotanima salata ipat ilif wapoti', nawala bret sa'ana. Ea' Pol na'i basef laumi wapoti' nalomas nafe' nataga lala. Ea' Pol nakwahis nafe'.

Aposel 20:19

Ipe' pegawa nimeguf hiami la'ela'ef esis Juda sa'i basef sa'i sogolope sehe ega'. Amama atom ae' efa' nimanimi magwamba ae'. Owa'. Ae' anda' agel ae'anai nafe' owin endilisi, efa' nimanimi ea' embif maluwi naep ma anda' maol Dembinai.

Aposel 20:7

Nemaf Sarere owamb afa' wandakolas waloma esis Kristen ma' gwa'aimi atogon ea' mofa' komunion gwa'aimi Jisasi. Naman Pol na'i nefe'. Na'ama nawalipasa basef nafe' nafe' akita amanota.

Aposel 24:17

Ae' ape anom afagof anona wambel ea' etanima afi'i Jerusalem ma epes hiesi ae'asi. Ae' efa'ai moni maina igiambama isima kwahusi ea' eha anom mafis endalalima God ese'ana.

1 Korin 4:14

Ae' ina anda' basef amama ma monda'epa ambagof ipe'imi aom, owa'. Ae' okom nainailipa si'i awasi ae'ipei, a'i iwalapa nomonas ipe'imi.

Filipai 3:18

Nimeguf hiami a'ipipa basef amama ma naumbih Kraisi. Dei' na'ama etin a'ipipam wapoti' aloma embif motah naep ae'ami. Epes hiesi saila waf aonai ea' sataga naumbih ma basef bu'wami Krais naga' lawag usi'inai tu'wanainai.

Kolosi 1:28

Ea' afa' wawalapa basef Kraisi wawalipa epes hiesi ma gawa hianai naninani bu'unai. Afa' wa'i wihi'amba epes hiesi atona etin sefe'ma Kraisa sope epes Ananisi endilisi sope la'ifisa Anan.

1 Tesalonaika 5:14

Ipe' Kristen alupipei afa'ipei, afa' wa'ipipago mehip wafela ukup ipe'imi ma pigiambamago isima ala'uta nasi la'ifipa pi'ipasa sokwahago waf ala'uta nasanai. Ea' enis ambagof mondolele'asi ma owa' si'i anom basefi, ipe' penda'as sotaga la'ifis sie'i basef. Ea' penda' esis enis owa' seambale'efana la'ifisi sotaga la'ifis. Penda' waf so'umbilinai ma esis hiesi.

2 Tesalonaika 2:5

Fowa' ae' ape alomepa a'ipipa basefa amamaga amama. Ipe' ukup mase'epama a'amon?

2 Tesalonaika 3:8

Ina ofa' gwa'aimi na'a ma ipe', owa'. Watalom etin wa'am. Ea' wanda' opeh la'ifimi hiami wanda'am owamb alipa ina wapoma ipe' etipa pimafiafa, owa'

2 Timoti 4:5

Ea' ine' la'ela'ef okom nopeina andeande' nimafi alop ine'inai andeande'. Nemaf anama nimanimi motagamena nepe la'ifina nenda' maol Godi newalapa basef bu'wami ma esis amam nematawa sololama Godi. Nenda' maol anama ma nigiambamas nenda'ana endilisi nimbefana.

Hibrui 13:17

Amam agufumi ipe'imi ma'i migiambamepa ea' mumafi ipe' la'ela'ef. Ama anona nemaf amam mowalapa basefa Goda maol hianai manda'ana mumafi ipe'. Amama atom dei' ipe' pila basef amamumi ea' pepe owina amam. I'i penda'am na'ama ma amam mondanifela monda' maol anama ma ukup amamumi ina aom mupan. I'i amam monda'ana moloma ukup awami, amama nambimb ina migiambamepa, owa'.

Revelesen 16:15

“Peme'! Anona nemaf ae' etagamepa si'i sanda' wali safi'i sataga. Atagamepa anona nemaf ipe' owa' pegawa pi'i ae' iefi'ianai. I'i epes ukup matamea sope sowaho' luwaguf asasimi andeande'ma owa' so'oh, esis ina sofe' alop atona wahifina solomas siti alop asasinai ambagof aom, owa'. Isima sondanifel.”