Jeremaya 14:14 - Wëël Jwøk

¹⁴ Ni kö Wuuö Jwøki jïra, ni «Nyïïkuk Jwøk moøgø, luup mo wø køpge ki nyeŋŋa, køpge ka wïthge, ni beege luup tööt. Geni, ge ba jääŋŋa aani, ni ge ba köömma aani, naa kär cäänö ki geni. 'Ba ge køpa luup tööt ki køør lääk moge, ki luup adïëda mo bäŋ gïn kønyge, ki cwøk mo käla wïthge keerge.

Jeremaya 14:14 Iomraidhean Croise

Aydheea 56:10

Jø koor mo Icriel gena cööye; bäŋ gïn mo ŋäcge ge bëët. Ge bëët, ge caala guu mo dhøkge orïpö, mo ba løny ki man gucge, ge bëëdö ni geno butö jaak ni marge lääk, ni gena jiy mo yïthge met ka niine,

Aydheea 9:15

'Ba wïc beege jø døøŋŋø ki jøøa no owøørø, ni jïp beege nyïïkuk Jwøk mo wø cäänö ki luup tööt.

Jeremaya 20:6

'Ba ï na Pacuur en, ïïni ki jø wø bëëdö paarï bëët, u di maa ki tøŋ ni kïth uuni Babiløn. Køøre ï thøøa kaace, ni koony ï yie, ni beeye ïïni ki nyïïawäätï bëët moa køpï luum tööt jïge ki nyeŋ Wuuö Jwøk.› »

Jeremaya 28:11

Ni ö Ananiya ni cääne ni jiy bëët nutö, ni kööe, ni «Luumma caan Wuuö Jwøki beeye en, ena köö, ni ‹Kaawat mana räny jaath puurri manøgø, aani, teek mar Nabukedenecör nyeny Babiløn na en bäät wïth juurre bëët ni caal jaath puur man wø twöö ŋut rwaath raanynya raanynyø ki yïth cwiiri ariiø.› » Køøre nyikuŋ Jwøk ma Jeremaya aput aay jaak ki jööre.

Jeremaya 28:13

ni «Ciï ni caanï gø jï Ananiya, ni ‹Luumma caan Wuuö Jwøki beeye en: Ïïni jaath puur man wø twöö ŋut mana raanynyï enø beeye jaath jaak, 'ba mano läw kar manøgø beeye gïr puur ma nywïënyö.

Jeremaya 28:15

Kanyøgø nyikuŋ Jwøk ma Jeremaya aköö jï nyikuŋ Jwøk ma Ananiya, ni «Ï na Ananiya en, wïny gïn! Wuuö Jwøk ï käre jääŋŋö, 'ba jiy moi atïïyï nee jïëcge ki luum tööt.

Jeremaya 29:21

Luumma caan Wuuö Jwøki, Jwø Icriel, eni na wïth jammi bëët, kiper Akap o Kölaya ki Cëdëkiya o Maycëya, jøøa køp luup tööt jïïu ki nyeŋŋa, beeye en: Ka adïëri møn, aani, ge 'cïba cer Nabukedenecör nyeny Babiløn, ni ö eni ni 'näk geni ni nëënö jïïu ki nyeŋŋu.

Jeremaya 29:31

ni «Jääk Babiløn baŋ jøøa näk omaaø ki tøŋ bëët, ni kööï, ni ‹Luumma caan Wuuö Jwøki kiper Cemaya nyï Nëyëlam beeye en: Cemaya luup akøbe jïïu këël na bëëde ni eni kära jääŋŋö, ni tïïc uuni nou ŋäätha luup tööt.

Jeremaya 37:19

?Aŋø, nyïïkuk Jwøk mou moa cäänö ki uuni na köö, ni ‹Nyeny Babiløn ba ö baŋu baŋ leny, ni ba ö baŋ leny paani,› geni, ge enge kaa ennø?

Jeremaya 5:31

Nyïïkuk Jwøk atïmö ni køpa luup ki wïthge, ni beege luup tööt, ni ö dïlämme ni bwøthge jiy ki wïthge keerge; ni tïm yïth jiya ni met ka teeŋ gïï mo caala moøgø. ?'Ba u na jiya, agïnaŋø noo tägi dëëtu kanyo tïme na aŋuun japøgø?

Jeremaya 8:10

Kiper manøgønø, määrge omëëga jø møøk, ni cïba pwöth moge jï jøw oööi noo mac paac. Kiper ki mana täge ki jiy moa kwörge bäŋgø, këël mana pïïe ri jøøa kwörge døøŋŋø, ŋati man nø cwïnye atïmö ni päl ki jammi mo wø joot ki jïëth atade. Këël nyïïkuk Jwøk ki dïlämme bëët, ŋati man nø atïmö ni tïïya tïï cwøk.

Jeremaya 8:11

Gïï wø raany paac ataakge na gïn mo jööt jaak, kaawat man wø taak ŋwellø dëër dhaanhø, ni ge wø köö, ni «Paac beer jaak,» këël na bëëde ni bëët paac raac.

Wëël Kïmmö 2:14

Nyïïkuk Jwøk mou, gïï wø nyooth ki yi wïc ni wø køpge jïïu beeye tööt ki cwøk. Geni raay mou kärge thaaŋø jïïu, ki man dwøk bëëtö maru kare dhi cer bëët laŋ. 'Ba marge atïmö ni ge bwødha u wøk ki luup tööt ni ge köö ni caana Jwøki.

Wëël Kïmmö 2:9

Dhøk kiir apäänhnhö piny ni buŋi ya ŋøømmi, ni ö dïdëëdi moe ni tøc ge ni raany ge. Nyeya mare ki kwääri moe ge bëëdö dï wïth juurre ni ge mak ka tøŋ. Ciik atïmö ni bäŋgø këët, ni ö nyïïkuk Jwøki ni tïme ni bäŋ gïï wø nyooth ki yi wïc mo jootge baŋ Wuuö Jwøk.

Edhikiel 12:24

Kiper otïmö ni bäŋ luup tööt këët mo di nyoodhø wala luup adïëda mo tïïca ec ni met ki ge mo di nyoodhø dï jø Icriel.

Edhikiel 13:2

ni «Wär dhaanhø, kööm jø Icriel moa tïïc rege na nyïïkuk Jwøk ni wø køp luup moge keerge. Caanï jïge, ni ‹Cegu ïthu ki dwør Wuuö Jwøk!

Edhikiel 13:23

Kiper manøgønø, jap tööt mou mo wø caru no onyoodhø jïïu, ba jootu këët, ni bäŋ jap adïëde mo tïïyu këët. 'Ba aani jiya piema piemø ceŋŋu, ni putu gø ŋäc ni bee aani na Wuuö Jwøk.»

Edhikiel 21:29

Kiper gïï wø kööu no onyoodhø jïïu, ki gïï wø caru beege luup tööt; 'ba opëëllö ocïp ŋut jø raay ni 'näk geni. Cäŋ maneca apïï; caa mar ajäla mana näk aŋuudi aöö.

Mikiya 3:11

U na dïbwöthe mo päänyögø, luup wø ŋøllu ka køør gïï wø cïp jïïu ki piny, ni ö dïlämme moe ni pwönyge jiy ki ciik ni ge di cunnö ki jammi, ni ö nyïïkuk Jwøki moe ni køpge luup adïëda kany wø mooc geni ki gwel. 'Ba ge wø poot köö ni dëëtge ege jääŋö dëër Wuuö Jwøk, ni ge köö, na «?Aŋø, Wuuö Jwøk ba bëëdö ni nut yïthakicwa? Bäŋ gïn mo leth mo ö bäätwa.»

Dhekaraya 10:2

Juu moa näk patha adïëri ge cara tööt, ni jø adïëda jammi mo wø carge no onyoodhø jïge beege mo cwøk; geni, ge cara lääk mo patha adïëri, ni ge cøømma cwïny jiy ki gïï mo bäŋ tietge. Kiper manøgønø, jiy geno thääyi kaamar dïëk mo bäŋ dïkwääy jïge, ni caar geni kiper na bäŋe ŋat bwøth geni.

Dhekaraya 13:3

'Ba noo dee dhaanhø mo poot cäänö ki luup mo patha adïëri kiper yi nyïm, wänni ki menni na nywøl gø kiree geno köö jïgø, ni ‹Ï thøw! kiper ïïna cäänö ki luup tööt ki nyeŋ Wuuö Jwøk.› 'Ba kanyo caan luummögø kiree, eni put wänni ki menni na nywøl gø cwøp ki tøŋ.

Tiet Ciik 18:20

'Ba nyikuŋ Jwøk mo caana luup ki nyeŋŋa jaak ki wïïe keere, ni eni kära köömmö ki man caan ge, wala mo cäänö ki nyeŋ juu møøk, nyikuŋ Jwøk manøca doo nääö.›

1 Timöthi 4:2

kanyo ö tööte moa bäŋ cwïnyge noo cøøkge geni ki tööt marge,

1 Jøøn 4:1

Omëëya, kär jwïëy jïëyu bëët. 'Ba päänynyu jwïëy nee neennu nee gena mo Jwøk. Kiper nyïïkuk Jwøk mo thööth mo patha adïëri okeethø dï piny.