Dhekaraya 1:17 - Wëël Jwøk

¹⁷ Ni cäŋ köö jïra, ni «Cäŋ luubö man gøø piny na ennø nø: Ni man beeye luumma caan Wuuö Jwøki, eni na wïth jammi bëët, ena köö, ni ‹Päänye 'moa, yïthge cäŋa päŋŋö ki jap kwär, ni cäŋa cwïny Dhayan cømmø, ni cäŋa Jerucalem jierrø.› »

Dhekaraya 1:17 Iomraidhean Croise

2 Luup Nyeye 6:6

'Ba Jerucalem yaa nø jier nee nyeŋŋa bëëde yie, ni jiera Deebit nee bëëde na wïth jiya ma jø Icriel.›

Neemiya 11:20

'Ba jø Icriel møga, ki jø tuuŋ dïlämme møga, ki jø tuuŋ Libay møga, ge bëëdö yïth mïëri mo Juuda møga bëët, ni ŋati man nø bëëdö yïth ŋøøpe.

Neemiya 11:3

'Ba da dïbwöthe mo paac mo bëëdö Jerucalem. 'Ba jø Icriel møøk, ki dïlämme, ki jø tuuŋ Libay, ki jø wø tïïö yi Øt Jwøk, ki nyïïkwaac laak Cølöman, moa bëëdö yïth päänye mo Juuda, ge bëëdö ni ŋati man nø bëëdö yïth ŋøøpe, yi pääny mare mana bëëde yie.

Aydheea 14:1

'Ba Wuuö Jwøk cwïnye pädhö ki gïr dhi øt Jeekap, ni cäŋ jø Icriel jierrø, ni tïïc ge nee pïge piny yi ŋöömö marge, ni ö jøøa pathi ni dwätge ki geni ni kuurge dëëtge dhi øt Jeekap.

Aydheea 44:26

Luum dhaanhnha wëëga thur kare, ni ö luup jiy mo wø jääŋŋa ni tïmge na adïëri. Bee aani na caan luum Jerucalem, ni kööa, ni ‹Paanøgø jiy obëëdö yie!› Ni caana luum päänye mo Juuda, ni kööa, ni ‹Päänye moøgø di geerø!› Ni tïŋa ge maal ki yi ränynyö marge.

Aydheea 49:13

Wui, maalø, kwöŋŋï ki met ec! Wui, ï na piny, yiï mïnne! Wui, u na kïte, jøllu kwöŋŋö mar met ec manøgø! Kiper Wuuö Jwøk cwïny jiye ocøme, ni päth cwïnye ki gïr jiye moa no ocaarø.

Aydheea 51:12

Wuuö Jwøk aköö, ni «Bee aani ki dëëra ni wø cøm cwïnynyu. ?Aŋø, uuna jøøe, u ni lwäär ki dhaanhø man ni wø thøw jaak en, ni bee dhaanhø man no ocwääö kaamar luum jaak en?

Aydheea 51:3

Ka adïëri møn, Wuuö Jwøk cwïny jø Dhayan di cømø; eni ränynyö mar Dhayan di neenø ni cøm cwïny jiy moa en yie. Eni kwöra näk otal di tïïö ni caala ajïniina mar Ëden, ni tïïc kwöra näk dïtëën ni caala ajïniina mar Wuuö Jwøk, ni ö Dhayan ni jït yie ki met ec ki kanynyø, ki dwøk pwøc ki wär dudi.

Aydheea 52:9

Pänynyu maal, ni kwöŋŋu ki met ec, u bëët, u na en kwöra no oränynyö yi Jerucalem, kiper Wuuö Jwøk cwïny jiye acøme, ni wïïl jø Jerucalem wøk.

Aydheea 54:8

Aana gootø ki gootø mo dwøŋ, ni kana täärnyïma ki ïïni ki kany mo thiinh. 'Ba ki køør mëër mara ni wø ba jøøl na bäre bäre, cwïnya cäŋa ka bääthö ki ïïni. Manøgø caana a, a na Wuuö Jwøk na wïïl ïïni wøk.

Aydheea 66:13

Kaawat man wø ö mïïö wø cøm cwïny nyaare, uuni thuwø cwïnynyu cøma cømø; ni putu bëëtö ni cwïnynyu ocømø yi Jerucalem.»

Jeremaya 31:13

Kar kaace, nyïïakuue yïthge omïnni ni mielge, ni mïn yïth wøpe ki jø døøŋŋø bëët, kiper kïmmö marge odøøya met ec, ni cøma cwïnyge, ni wëëga yïthge mïnnö na kar pänh cwïny.

Jeremaya 33:13

ni beege yïth mïëri moa en bäät thuuri, ki yïth mïëri moa en yi ŋöömma näk ree ee päärö, ki yïth mïëri mo Nëgëp, ki yi ŋööm Benjamen, ki yïth mïëri moa en deŋ Jerucalem, ki yïth mïëri mo Juuda, noo cäŋ tïmö ni da pïïth dïëk mo kwaan dïkwääye kwaanø.› Luummögø caana Wuuö Jwøki.

Jeremaya 33:9

Køøre nyeŋŋa tïmö ni wïnyö, ni jïta ki met ec ki pwøc, ka ajiem ki køør pääny man nyïm wïth juurre bëët mo bäät piny, moo wïny gïïa beyø bëët moo tïïa kiper jø pääny man, ni thäŋ yïthge ni rïïŋ dëëtge kiper bëët bëënynyö ki bëët mëër mano tïïa kiper pääny man.

Edhikiel 36:33

«'Ba man beeye luumma cäŋ Kwäärö Wuuö Jwøki caannø, ena köö, ni ‹Dïcäŋo penya uuni yïth raay mou bëët, u cäŋa ka wëëk bëëtö yïth päänye mou, ni ö kwöra no oränynyö ni cäŋi geerrø.

Amøc 9:14

Jiya ma jø Icriel moa näk omaa ri leny oduua poge, ni cäŋge wïth mïëri moa no oränynyö geerrø, ni bëëtge yïthge; ni piithge jer omøki, ni maathge kwøk gø; ni tïïge ka ajïniine ni camge nyïïjer gø.

Obadiya 1:20

'Ba jø Icriel moa no omaaø ki tøŋ geno duui, ni lwørge ŋøøpa en Keenan këël Dherepeth; ni ö moa no omaaø ki tøŋ yi Jerucalem na kïth Ceparat ni lwørge päänye moa en dïtëën mana en jï løø tier-piny manøgø.

Dhekaraya 1:14

Køøre nyïïatwiel maal mana cäänö ki aani aköö jïra, ni «Gøø luubö man piny na ennø nø: Ni man beeye luumma caan Wuuö Jwøki, eni na wïth jammi bëët, ena köö, ni ‹Aani, aana këëyö døc kiper Jerucalem ki Dhayan.

Dhekaraya 1:18

Køøre aana lwïthö; 'ba ka adïëri møn tuŋi aŋween mo lääy aputa joot.

Dhekaraya 2:12

'Ba Wuuö Jwøk ŋööm Juuda otïmö na kure yi ŋöömma en kur keere, ni cäŋ Jerucalem jierrø na pääny mare.

Dhekaraya 2:4

ni kööe jï gø, ni «Reŋ baŋ nyenece ni cere da thøør røm ice, ni caanï gø jïre, ni ‹Jerucalem otïmö na pääny mo bäŋ kiir deŋŋe kiper mano tïm jiyi ki lääc paac ni thööth yie døc.

Dhekaraya 3:2

Kanyøgø Wuuö Jwøk aköö jï Ceethan, ni «Nyie Ceethan, ïïno jook Wuuö Jwøki! Wuuö Jwøk na jier Jerucalem ïïno jooe! ?Aŋø, ŋati ni kïthï bääte ki luup mo reyø en paa ŋata caal jaath mo liel mo käl wøk ka yi maac?»

Epeca 1:4

kaawat mana ö eni ni jier øøni ni kïth øøni dëër Krictø kanya poot pinynyi ni kär cwääö, kiper nøø tïmø ni ø ena kur keerø na mo Jwøk ni bäŋ ajäla dëëtø nyïme.