Aydheea 30:22 - Wëël Jwøk

²² Køøre kït gïï wø lammu moa no olëënynyö ki gwel-bïrö ki moa no olëënynyö ki warkey ba wøørru këët; geni ge putu ka wetø kaamar abïï mo ree da gïn mo raac, ni kööu jïge, «Waana pää ki uuni!»

Aydheea 30:22 Iomraidhean Croise

2 Luup Nyeye 31:1

'Ba kanya thum wøør ajwöma bäre, jø Icriel bëët moa nut kaagø gena ci wøk yïth päänye mo Juuda, ni tøcge kïte moa no ocwöth piny na gïï lam, ni ŋøtge jenni piny moa no ocaa ri jwø wø cwøl na Acara, ni raanyge kwör lam moa en bäät thuuri mo wø lam juuga reyø yïthge, ki gïï wø cïp olämme moge bäätge. Gïïögø tïïcge yïth mïëc jø tuuŋ Juuda bëët ki jø tuuŋ Benjamen, ki yïth mïëc jø tuuŋ Ipariem ki jø tuuŋ Maneeca, këël mana thöörge japøgø bëët ki raanynyø. Køøre ge na jø Icriel bëët, gena duu yïth päänye moge, ni ö ŋati man nø ni døø yïth ŋøøpe.

Aydheea 27:9

Kiper manøgønø, gïnögø otïmö na jöö man wëën bääyö mar Jeekap ki gø; ni gïno duu wëën raay manøgø beeye kanyo ö eni noo raany kïte mo gïn wø cïp olämme bääte ni tïïc ge kaamar tør mar kïn booya; ni beeye kanyo ö jenni moa näk ege tieŋø na no ocaa ri jwøa cwøl na Acara, ki gïï wø waaŋ gïï wø jïcge ŋwääi ni met bäätge noo tïmge ni bäŋgø mo cuŋŋi këët.

Aydheea 31:7

Kiper noo tïme na dïcäŋeca, ŋati man nø dïïu kït gïï wø lam moe moa no otïïö ki gwel-bïrö ki warkey leeŋe piny, ni beege gïïa tïïyu ki ceŋŋu ni beege raay.

Aydheea 40:19

Kït gïn wø lam wø tïïc rëëmmö tïïö, ni ö ŋat wø lëënyö ki warkey ni lëëny dëër gø ki warkey, ni ö ŋat wø tïïö ki gwel-bïrö ni kïth dëër gø ki tiimme mo gwel-bïrö.

Aydheea 46:6

Da jiy mo warkey wø kunyge wøk ki yïth opïri moge, ni rømge gwel-bïrö bäät gïr røm, ni cwötge ki ŋat mo waŋe riek ki tïï warkey, ni ö ŋatøgø ni tïïc gø na kït gïn wø lam. Kanyøgønø, cøŋge këëlge piny nyïme ni wøørge gø.

Wëël Kïmmö 1:17

Dhayan ceŋŋe athaaŋ maal, 'ba bäŋ ŋat moo cøm cwïnye. Wuuö Jwøk dwøre acïbe kipere, eni na po Jeekap, ki man tïm jøøa en deŋŋe na nyïïmän moe. Jerucalem atïmö na pääny mo ba waany yïthakicge.

Edhikiel 14:6

«Kiper manøgønø, caanï jï jø Icriel ni man beeye luumma caan Kwäärö Wuuö Jwøki, ena köö, ni ‹Løgu cwïnynyu ni weyu kït gïï wø lammu, ni kälu wïthu wøk ki bäät gïïa näk yia raac ki ge bëët ni wø tïïyu.

Edhikiel 18:6

mo eni ba cämö ko olämme mo wø cïp jï juuga reyø yïth uut lam moa en bäät kïte, wala ki man wøør kït gïï wø lam mo jø Icriel, mo cï wati ba pääde, ni ba buti ki dhaagø mo kar pïïn piny mare opäŋ,

Edhikiel 36:31

Køøre nø, wïthu caarru caarø ki uutjïëthe mou na reyø ki tïïe mou na näk ba beyø, ni männu ki dëëtu keeru kiper raay mou ki japa näk yia raac ki ge na tïïyu.

Edhikiel 7:19

Gwet-bïrö moge oleeŋge nyeŋ jïëthe, ni ö warkie moge ni tïmge kaamar gïn mo ba waany. Gwet-bïrö moge ki warkie moge otïmö ni bäŋ køny mo tïïcge kiperge kanyo tïme na ri cäŋ wëër mar Wuuö Jwøk. Japøge ba cïpi ki jäŋ jïge wala yïthge päŋ ki ge, kiper beege japa wëëk geni päth yïth raay.

Edhikiel 7:20

Gena töödö kiper jap mïërö moge, ni dëëtge kønyge kønyø ki ge ki man tïïcge kït gïï wø lamge na näk yia raac ki ge. Kiper manøgønø, aani japøge tïïa tïïö jïge kaamar gïn mo ba waany.

Odheea 14:8

?Wui jø Ipariem, agïnaŋø mør këët nø ni poot manynyu baŋ juuga reyø? Kiper beeye aani noo løk pïëc mou, noo gwøk uuni. Aani, a caala jaath mo bëëdö ni mar mo bøøge moe ba øc piny, ni bee aani noo jïtu ree ki nyïëdi.»

Ciik Kiper Dïlämme 13:52

Dïlämi abïï dëël manøgø wala gïna näk ocwääö, mo tïïc ka waare mo cuup wala waare mo lïïna, wala teeŋ gïrpiny jaak mo tïïc ka pïën moa dëëtge puunnö, wär waaŋ. Kiper beeye puunnö mo raac. Gïna ci dëër gø wär put waaŋ ki maac.

Dhekaraya 13:2

Wuuö Jwøk, eni na wïth jammi bëët, aköö, ni «Dïcäŋöca, juu moa näk patha adïëri raanynya raanynyø yi ŋöömö ni tïme ni wïc ba par ki nyeŋge këët. Ge raanynya raanynyø ge bëët ki nyïïkuk Jwøk moa näk patha adïëri ki jwïëc juuga reyø na näk ba waany.

Mathiew 4:10

'Ba Jecu aköö jïre, ni «Daak riï, Ceethan, kiper ogöörö, «ni ‹Ï doo wøøra Wuuö Jwøk na näk Jwøï, ni beeye eni keere na diï tïnynyö.› »

Tiet Ciik 7:25

'Ba gïïa tieŋge na juu moge dou waaŋø ki maac. 'Ba kär dee gïn manynyu ri warkey wala gwel-bïrö mana näk oleeny dëëtge, ni ba kädu rege kiper dëëtu, nee ba tïmge ni caala abïëp kiperu, kiper gïïögø beege gïï mo Wuuö Jwøk na näk Jwøu yie raac ki ge døc.

Mana Nyooth 19:20

Ni ö Lääyi ni maai, ge ki nyikuŋ jwøk mana näk patha adïëri, ŋata tïïö nyïme ki ŋïïce moa cøøk jøøa dëëtge jïtö ki ŋïï mar Läänögø, ki jøøa wøør gïna näk ocwääö na caal kïte. Gïïögø karge riet gena leeŋ yi naama liel ki maac mo jïye keec ni lïëth døc ni ge poot kwøw.