Mia puo mecü mu puo melie; kemezhiekecümia puo chü mu kelhokemezie si; mu mia puo ngu ro u zie kevietayakecü puo tuoi mia puo pie kethese, siro we zorei puo le ketherhu mo.
uko mezhie pete nunu. Dieliemia morei teigeidieliemia puorei mo derei puo thuo uko ze sei tuo di uko kelalie; puo kekhrie mu puo nouzhie nu puoe uko rhalie, puo thiedzü nu uko piesieshü mu uko pfüüpie vor.
Derei nie rünyülie moliro, nie kemiakokecü la a ruopfüe pekhre di kra batatuo; a mhi-e kra phituo sidi mhidzü pekrütuo, Jihova kuoko teze kedie chü voketa la.
No die hau pie uko ki putuo: A mhinie bu teizeiteiso mhidzü pekrucie, mu unie bu rülei hiecie, kekreilamonyü rüü phousepfü a themiako kevü sei pie vü pesuo sewate, rüza zadi pfüliete.
Mha hako la a kra; a mhi nu mhidzü krütsur; kekreilamonyü thukepeluou a ki nu peciete, a kekuo chü perheishükezhau rei; a nuonuoko u dzükezei chü bate, ngumvümia kuolietakecü la.
Siro uko die süko rünyü tuo mu puoe dievi puo pu sashü, kekreilamonyü puoe Jerusalem penuo votazhü, tsiu ukoe Ukepenuopfü kedi mhai zo vorta thenyüsie di le tuocü la.
Kekreilamonyü we u kethachüko silie kelho zievokezhatho-u puo monyü puo zorei u kemhie di dophi kehoupuorei dzükelie puo bate, puo zowe kephouma puorei jü.
